Kan dit weer gebeur?

WANNEER ons terugkyk op hierdie era, dink ons dalk dat dit elegant, selfs romanties, was. In die Westerse wêreld was dit byvoorbeeld ’n tyd van perdekarre, pluiskeile en lang sleeprokke. Maar dit was ook ’n skrikwekkende tyd toe groot getalle mense regoor die wêreld gesterf het. Die oorsaak?

Dit was nie oorlog nie, al het daar destyds ’n oorlog gewoed. Nee, ons praat van iets anders, iets wat al die vernietigendste plaag in die ganse opgetekende mensegeskiedenis genoem is—die Spaanse griep van 1918-19.

Ontsaglike getalle mense het gesterf, want daar was geen doeltreffende behandeling of geneesmiddel nie. Miljoene gesonde jongmense se lewe is skielik in hulle fleur kortgeknip. Lyke het vinniger opgehoop as wat hulle begrawe kon word. In sommige plekke is hele dorpe uitgewis.

Dit alles het sowat 85 jaar gelede gebeur. Weet ons wat daardie siekte veroorsaak het? Kan so ’n ramp weer plaasvind? Indien wel, sal ons ons daarteen kan beskerm?

Hierdie onderwerp het ook ’n ander fassinerende aspek. Het jy geweet dat die Bybel lank gelede iets gesê het oor die pessiektes wat in ons tyd voorkom? (Lukas 21:11; Openbaring 6:8). Was die Spaanse griep deel van die vervulling van Bybelprofesie? Die antwoorde op hierdie en ander vrae sal in die volgende artikels bespreek word.

[Prent op bladsy 3]

Voorbereidings om slagoffers van die Spaanse griep te begrawe, Philadelphia, VSA

[Erkenning]

Library of the College of Physicians of Philadelphia