Van ons lesers

Hulp vir tieners met hulle probleme (8 April 2005) Hierdie reeks was baie insiggewend. Soms is dit nogal ’n uitdaging om ’n tiener te wees, maar bemoedigende artikels soos hierdie maak dit ’n bietjie minder stresvol. Dit is presies die soort inligting wat ons nodig het om ons aan te spoor gedurende hierdie “kritieke tye . . . wat moeilik is om deur te kom” (2 Timoteus 3:1). Die vermanings in hierdie artikels sal ons help om nie slagoffers van “die sette van die Duiwel” te word nie (Efesiërs 6:11). Dankie dat julle geestelike voedsel op die regte tyd voorsien.

K. S., Verenigde State

’n Skoon huis—Die rol wat ons almal speel (8 Junie 2005) Terwyl ek opgegroei het, het albei my ouers gewerk, en ons drie kinders het altyd in die huis gespeel. Dit was ’n groot gemors. Tot vandag toe haat ek dit om skoon te maak. Maar toe ek hierdie artikel lees, het dit vir my gevoel asof my ma my liefdevol leer hoe om skoon te maak. Ek het nou volwasse kinders, en hulle hou nie daarvan om skoon te maak nie. Daar is baie dinge wat ek hulle sal moet leer. Die artikel het my aangemoedig.

J. E., Japan

’n Hersiening vir die gesin (8 Mei 2005) Toe ek hierdie artikel gesien het, het my oë vol trane geskiet. Ek het dit vir my dogter gewys. Toe het sy vir my gesê dat sy reeds die artikel oor die beseerde swaeltjie gelees het en albei vrae in “’n Hersiening vir die gesin” beantwoord het.

L. S., Verenigde State

Biblioteke—poorte na kennis (22 Mei 2005) Mag ek julle daarop wys dat die prent op bladsy 18 verkeerdelik aangegee word as dié van koning Assurbanipal van Assirië. Die prent is in werklikheid dié van die Assiriese koning Esar-Haddon.

A. W., Duitsland

“Ontwaak!” antwoord: Dankie dat jy dit onder ons aandag gebring het. Volgens die Bybelnaslaanwerk “Insight on the Scriptures”, Deel 1, bladsy 757, was Esar-Haddon ’n jonger seun en opvolger van die Assiriese koning Sanherib.a

Die merkwaardige Maja-kalender (8 April 2005) Hierdie artikel het my laat besluit om op die Internet navorsing te gaan doen. Ek het gevind dat daar ’n noue verband tussen die Maja-kalender en astrologie was. Deur sulke artikels te publiseer, kan dit na my mening lesers se belangstelling in die astrologie en toorkunste wek.

J. K., Pole

“Ontwaak!” antwoord: Soos bladsy 4 van die “Ontwaak!” sê, lewer hierdie tydskrif “verslag oor die nuus, vertel dit van mense in baie lande, ondersoek dit godsdiens en die wetenskap”. Dit gee beslis nie te kenne dat ons alles goedkeur wat op hierdie gebiede plaasvind nie. In die kort artikel waarna jy verwys, het ons verslag gelewer oor die eertydse Majas, wie se vaardige berekening van tyd gehelp het om ’n besonder akkurate kalender saam te stel. Die feit dat hierdie kalender in waarsêery gebruik is—wat wel in die artikel genoem word—behoort geensins ons lesers aan te spoor om in ’n studie van astrologie te begin belangstel nie.

Van tyd tot tyd ontvang ons soortgelyke vrae oor kunswerk wat in ons publikasies verskyn. Die uitbeelding van afgode, godsdienssimbole of spiritistiese voorwerpe is nie bedoel om nuuskierigheid te wek nie, maar om enige geheimsinnigheid wat hiermee verband hou, uit die weg te ruim en ons lesers te waarsku om glad nie daarby betrokke te raak nie. Baie van die kommentare wat ons al ontvang het, toon dat ons artikels en kunswerk wel so ’n voordelige uitwerking het.

[Voetnoot]