Die Bybel se beskouing
Het Jesus werklik aan ’n kruis gesterf?
DIE kruis is een van die herkenbaarste godsdienssimbole wat aan die mens bekend is. Miljoene vereer dit en beskou dit as die heilige instrument waaraan Jesus om die lewe gebring is. Die Rooms-Katolieke skrywer en argeoloog Adolphe-Napoleon Didron het gesê: “Die kruis het aanbidding ontvang wat soortgelyk, of selfs gelyk, is aan dié van Christus; hierdie heilige houtvoorwerp word byna net soveel aanbid as God self.”
Party sê dat die kruis hulle nader aan God laat voel wanneer hulle bid. Ander gebruik dit as ’n gelukbringer en dink dat dit hulle teen kwaad beskerm. Maar moet Christene die kruis as ’n voorwerp van verering gebruik? Het Jesus werklik aan ’n kruis gesterf? Wat leer die Bybel oor hierdie onderwerp?
Wat word deur die kruis gesimboliseer?
Kruise is lank voor die Christelike era deur die antieke Babiloniërs as simbole gebruik in hulle aanbidding van die vrugbaarheidsgod Tammus. Die gebruik van die kruis het na Egipte, Indië, Sirië en China versprei. Eeue daarna het die Israeliete hulle aanbidding van Jehovah verontreinig deur die valse god Tammus te vereer. Die Bybel praat van hierdie vorm van aanbidding as ’n ‘verfoeilike ding’.—Esegiël 8:13, 14.
Die Evangelieverslae van Matteus, Markus, Lukas en Johannes gebruik die Griekse woord stau·rosʹ met verwysing na die teregstellingsinstrument waaraan Jesus gesterf het (Matteus 27:40; Markus 15:30; Lukas 23:26). Die woord stau·rosʹ verwys na ’n regop paal. Die boek The Non-Christian Cross, deur J. D. Parsons, verduidelik: “Daar is nie ’n enkele sin in enige van die talle geskrifte van die Nuwe Testament, wat in die oorspronklike Grieks selfs indirek bewys dat die stauros wat in Jesus se geval gebruik is, enigiets anders as ’n gewone stauros was nie; wat nog te sê dat dit nie net uit een stuk hout bestaan het nie, maar uit twee stukke wat in die vorm van ’n kruis aanmekaar vasgespyker was.”
Soos in Handelinge 5:30 opgeteken is, het die apostel Petrus die woord xuʹlon, wat “boom” beteken, as ’n sinoniem vir stau·rosʹ gebruik, wat nie dui op ’n kruis bestaande uit twee balke nie, maar op ’n gewone regop stuk hout of ’n boom. Dit was eers ongeveer 300 jaar ná Jesus se dood dat party verklaarde Christene die idee voorgestaan het dat Jesus aan ’n kruis bestaande uit twee balke om die lewe gebring is. Maar hierdie beskouing was gegrond op tradisie en ’n verkeerde gebruik van die Griekse woord stau·rosʹ. Dit is noemenswaardig dat ’n enkele houtpaal of boom gesien kan word op party tekeninge uit die ou tyd wat Romeinse teregstellings uitbeeld.
“Bewaar julle van afgode”
’n Belangriker saak vir ware Christene is om vas te stel hoe gepas dit is om die instrument te vereer wat gebruik is om Jesus dood te maak. Hetsy dit ’n enkele regop folterpaal, ’n kruis, ’n pyl, ’n lans of ’n mes was, behoort so ’n instrument in aanbidding gebruik te word?
Veronderstel dat een van jou geliefdes wreed vermoor is en dat die wapen as getuienis aan die hof voorgelê is. Sou jy probeer om die moordwapen in die hande te kry, foto’s daarvan neem en dan baie afdrukke maak om te versprei? Sou jy replikas van die wapen in verskeie groottes maak? Sou jy dan sommige daarvan in juweliersware omskep? Of sou jy hierdie replikas kommersieel laat vervaardig en aan vriende en familielede laat verkoop sodat dit vereer kan word? Jy sou die idee heel moontlik afstootlik vind! En tog is dit presies wat met die kruis gedoen is!
Boonop is die gebruik van die kruis in aanbidding dieselfde as die gebruik van beelde in aanbidding, iets wat in die Bybel veroordeel word (Eksodus 20:2-5; Deuteronomium 4:25, 26). Die apostel Johannes het die leringe van die ware Christelike godsdiens akkuraat weerspieël toe hy sy mede-Christene vermaan het met die woorde: “Bewaar julle van afgode” (1 Johannes 5:21). Hulle het dit gedoen al het dit beteken dat hulle in die Romeinse arena sou sterf.
Die eerste-eeuse Christene het egter hoë agting vir Christus se offerdood gehad. Dit is ook die geval met ware Christene van vandag. Hoewel hulle nie die instrument aanbid wat gebruik is om Jesus te folter en dood te maak nie, herdenk hulle wel Jesus se dood as die middel waardeur God redding aan onvolmaakte mense voorsien (Matteus 20:28). Hierdie voortreflikste blyk van God se liefde sal ongekende seëninge aan liefhebbers van waarheid bring, insluitende die vooruitsig op ewige lewe.—Johannes 17:3; Openbaring 21:3, 4.
[Prent op bladsy 12]
Op party tekeninge uit die ou tyd word die gebruik van ’n enkele houtpaal in Romeinse teregstellings uitgebeeld
[Erkenning]
Rare Books Division, The New York Public Library, Astor, Lenox and Tilden Foundations