Ons beskou die wêreld
◼ Volgens een studie “is mense wat op selfone praat terwyl hulle bestuur, selfs al gebruik hulle ’n ‘handvrye’ toestel, se bestuursvermoë net so belemmer soos dié van dronk bestuurders”.—REUTERS-NUUSDIENS, VSA.
◼ Binne die eerste vyf maande van 2006 was daar 30 200 gewapende rooftogte op Guatemalastad se openbare busse. Veertien busbestuurders of hulle assistente en tien passasiers is om die lewe gebring.—PRENSA LIBRE, GUATEMALA.
◼ Uit die 124 nasies wat deelgeneem het aan ’n WGO-opname oor bloedinsamelings- en bloedtoetsingspraktyke, het 56 “nie al hulle geskenkte bloed vir MIV, hepatitis B en C en sifilis getoets nie”.—WÊRELDGESONDHEIDSORGANISASIE, SWITSERLAND.
◼ Die aantal Australiërs wat saamgelewe het voordat hulle getrou het, het van ongeveer 5 persent in die 1960’s tot net meer as 70 persent in 2003 toegeneem.—UNIVERSITEIT VAN MELBOURNE, AUSTRALIË.
Suikersiekte—’n wêreldwye epidemie
The New York Times sê dat die aantal mense wat wêreldwyd met suikersiekte gediagnoseer word, volgens data van die Internasionale Diabetesfederasie, oor die afgelope 20 jaar van 30 miljoen tot 230 miljoen gestyg het. Sewe uit die tien lande wat die hoogste aantal mense met die siekte het, is in die ontwikkelende wêreld. “Suikersiekte is een van die grootste gesondheidsrampe wat die wêreld tot nog toe gesien het”, het dr. Martin Silink, die president van die federasie, gesê. “In party van die wêreld se armste lande lei die siekte tot ’n vinnige dood”, sê die berig.
Wêreld se hoogste spoorweg
Die wêreld se hoogste spoorweg, wat in Julie 2006 geopen is, verbind Beijing met Tibet se hoofstad, Lhasa, oor ’n afstand van ongeveer 4 000 kilometer. “Die spoorweg”, sê The New York Times, “is ’n ingenieurswonder wat oor onstabiele ysgrond loop en ’n hoogte van meer as 4 800 meter bo seespieël bereik.” Een van die uitdagings wat die ingenieurs te bowe moes kom, was om die spoorbed heeljaar lank gevries te hou om onstabiliteit te verminder. Weens die hoogte moet lug in die kompartemente ingepomp word, wat ook toegerus is met suurstof vir individuele passasiers.
“Spookstudente”
Tussen 10 en 20 persent van eerstejaarstudente wat inskryf om by ’n sekere Franse universiteit in die letterkunde te studeer, “woon nooit lesings by nie”, berig die koerant Le Figaro. Party misbruik hulle studentestatus om welsynsvoordele of afslag op vlugte, hotelle, openbare vervoer en rolprente te kry. Om voordele te ontvang, skryf “spookstudente” in op kursusse wat minder gewild is, soos Belo-Russies, Fins of Swahili. Valse registrasies is algemeen omdat bywoning nie gekontroleer word nie. “Studente” skryf op die Internet in en ontvang binne ’n paar dae ’n studentekaart, verduidelik die berig.
‘Afgesny van die buitewêreld’
Israeliese wetenskaplikes glo dat hulle agt nuwe spesies ongewerwelde diere ontdek het in ’n grot wat tallose eeue lank “van die buitewêreld afgesny was”, sê The Jerusalem Post. Opgrawers wat in ’n steengroef gewerk het, het ’n klein opening gevind wat afloop na ’n grot wat altesaam twee en ’n half kilometer lank is en ’n grotsaal met ’n meer het. Die nuwe spesies, waarvan party soos skerpioene lyk, sluit twee seewater- en twee varswaterskaaldiere en vier landspesies in.