“Die wysheid van die natuur”
DEUR ONTWAAK!-MEDEWERKER IN JAPAN
DIT was die tema van Expo 2005, wat in Aitsji, Japan, gehou is en waaraan 121 lande deelgeneem het. Besoekers is aangemoedig om by die natuur te leer en om “ernstige pogings aan te wend om maniere te vind om volhoubare groei teweeg te bring”. Op die skouterrein, wat naby Nagoja, in Sentraal-Japan, geleë is, was daar woude, damme en blomme. ’n Unieke aanloklikheid was ’n verhewe loopvlak van 2,6 kilometer wat die Global Loop genoem is. Dit was sowat 21 meter wyd, het panoramiese uitsigte gebied en het terselfdertyd die natuurskoon daaronder bewaar.
Een met die natuur
’n “Vel” van 23 000 lengtes geweefde bamboes wat soos ’n reusekokon gelyk het, het die Japannese paviljoen bedek, wat dit teen die son se hitte beskerm het. Die bamboesstamme was gemiddeld 7 meter lank, en die gebou was 19 meter hoog, 90 meter lank en 70 meter breed, wat beteken dat dit een van die grootste bamboesgeboue ter wêreld was. In die paviljoen was daar ’n sferiese videostelsel wat ’n beeld reg rondom kykers geprojekteer het. Binne die koepel, wat ’n deursnee van 12,8 meter gehad het, was besoekers heeltemal omring deur bewegende beelde, wat hulle laat voel het dat hulle as ’t ware een is met die aarde en die oorvloed van lewe daarop.
In die Maleisiese paviljoen is daardie land se reënwoude en koraalriwwe met behulp van multimedia-vertonings uitgebeeld. In die Thaise paviljoen het hartverskeurende tonele van die tsoenami van 26 Desember 2004 kykers herinner dat “die mens nie die meester van die natuur is nie”. Die Suid-Afrikaanse uitstalling het die aandag gevestig op die gevaar van uitsterwing, en ’n replika van ’n kwaggavul is ten toon gestel, ’n sebra-agtige soogdier wat op die grasvlaktes van Suider-Afrika voorgekom het totdat dit in die 19de eeu weens jagtery uitgesterf het.
In ’n verkoelde vertoonlokaal langs die Expo se hoofpaviljoen was die oorblyfsels van ’n mammoet wat in 2002 uit die ysgrond van Siberië, Rusland, uitgegrawe is. Hierdie voorbeeld van ’n uitgestorwe olifantspesie, wat die Joekagir-mammoet genoem word, na die plek waar dit ontdek is, het twee groot, geboë tande en oë wat gedeeltelik oop is. Sy kop is nog bedek met vel en klosse hare. Die mammoet, ’n verstommende eksemplaar, het as nog ’n aangrypende herinnering van uitsterwing gedien.
’n Beter toekoms?
Wat kan die mens doen omtrent dinge wat die toekoms van ons planeet bedreig, soos besoedeling en aardverwarming? ’n Yslike “groen” muur—die sogenoemde Bio-lung—wat 150 meter lank en tot 15 meter hoog was, is beskryf as “die simbool van Expo 2005”. Die muur het bestaan uit 200 000 plante van 200 spesies, insluitende blomme. Party meen dat ’n aantal van hierdie “longe”, wat elke seisoen aangepas kan word, as ’n stad se asemhalingsorgaan en lugfilter kan dien deur koolstofdioksied te absorbeer en suurstof vry te stel.
Vervoermiddels by die Expo het hibridebusse ingesluit wat met elektrisiteit aangedryf is. Terwyl hierdie voertuie mense van een plek na ’n ander geneem het, was al wat by hulle uitlaatpype uitgekom het, water. Nog iets wat tegno-entoesiaste beïndruk het, was Japan se eerste kommersiële magnetiese sweeftrein, wat Linimo genoem word. Met behulp van kragtige magnete het Linimo byna ’n sentimeter bo die spoor stil en glad gesweef. Battery-aangedrewe trems, fiets-taxi’s en busse wat met of sonder bestuurders kon ry, kon ook gesien word. Hierdie futuristiese voertuie, wat vinnig in groepe van twee of drie rondgery het, het aardgas gebruik, wat skoner is as gewone brandstowwe.
Stel jou voor dat organiese afval, soos kombuisafval, in elektrisiteit en kunsmis omskep word. ’n Kragaanleg op die terrein het ’n proses gebruik wat metaangisting genoem word, om juis dit te doen. Die aanleg het die vullis nie verbrand nie, maar het dit eerder laat gis en in metaangas verander, waaruit waterstof verkry is. Brandstofselle, wat chemiese reaksies gebruik om elektrisiteit voort te bring, het die waterstof met suurstof laat verbind om elektrisiteit op te wek. Die neweprodukte was water en kunsmis. Trouens, die aanleg het al die organiese afval van die Expo verwerk, en die elektrisiteit wat daaruit verkry is, is gebruik om aan party van die paviljoene krag te voorsien.
Heelwat navorsing word op die gebied van robotika gedoen, met die doel om ligte masjiene te vervaardig wat as persoonlike assistente vir mense kan dien. Van die vooruitgang wat in robottegnologie gemaak is, kon gesien word toe sewe robotte in een paviljoen op die verhoog gestap het en skares gelok het deur musiek te speel. Party het op blaasinstrumente gespeel met “vingers” wat behendig oor die instrument beweeg het terwyl ’n ander robot op tromme gespeel het. “Hulle bewegings was so natuurlik en grasieus dat hulle gelyk het soos mense wat vermom is”, het een waarnemer gesê.
Nog twee hipertegnologiese uitvindings was bioafbreekbare plastieke wat uit mielieblom en soortgelyke produkte gemaak is, asook nanoborrels—piepklein gasborreltjies wat minder as 200 nanometer in deursnee is. ’n Mensehaar is ongeveer 50 000 nanometer in deursnee. Sulke piepklein borreltjies is gewoonlik baie onstabiel en verdwyn vinnig. Maar navorsers in Japan het die tegnologie ontwikkel om stabiele nanoborrels van suurstof te vervaardig, wat “die vermoë van visse en skulpvisse [verbeter] om aan te pas by veranderinge in hulle omgewing”. Trouens, sekere spesies van vars- en soutwatervisse kon saam in ’n akwarium gehou word wat ’n hoë konsentrasie suurstofnanoborrels bevat het! Navorsers hoop om toepassings vir hierdie nuwe tegnologie in visboerdery, landbou en op ander gebiede te vind.
Gee die wêreld gehoor?
Hoewel die Expo beklemtoon het dat daar na “die wysheid van die natuur” geluister moet word, steur die wêreld hulle oor die algemeen nie daaraan nie. Die stemme van onkunde, gierigheid en korrupsie oorweldig die stemme wat daarteen gekant is. Gevolglik het die aarde “die Gewonde Planeet” geword, soos een uitstalling gesê het. Maar selfs dié met goeie bedoelings het nie betroubare antwoorde op die mensdom se probleme en die aarde se ekologiese rampe nie. Volgens die Bybel val hierdie antwoorde buite die bestek van mensekennis en -wysheid (Jeremia 10:23). Tog is die situasie allesbehalwe hopeloos. Hoe so?
Die Bybel sê dat die allerhoogste Bron van wysheid—ons Skepper—in die aarde se aangeleenthede sal ingryp voordat mense sy handewerk vernietig (Openbaring 4:11; 11:18). “Nog net ’n klein rukkie en die goddelose sal daar nie meer wees nie . . . Maar die sagmoediges sal die aarde besit, en hulle sal hulle inderdaad verlustig in die oorvloed van vrede”, sê Psalm 37:10, 11. Ja, dit sal verstandig van ons wees om na die natuur te luister, maar dit sal nog verstandiger wees om na die Skepper te luister deur sy Woord, die Heilige Bybel, te lees en dit toe te pas (2 Timoteus 3:16). Almal wat dit doen, sal sien hoe ons siek planeet heeltemal genees word en in ’n paradys omskep word.—Lukas 23:43.
[Prent op bladsy 24]
Uitstalling van nanoborrels
[Prent op bladsy 24]
Busse sonder bestuurders
[Prent op bladsy 24, 25]
Die sferiese videostelsel wat ’n beeld reg rondom kykers projekteer
[Prent op bladsy 25]
Die “Bio-Lung” het uit 200 000 plante van 200 spesies bestaan
[Prent op bladsy 25]
Robotte het die gehoor met musiek vermaak