Kos uit Thailand

DEUR ONTWAAK!-MEDEWERKER IN MALEISIË

TERWYL jy in ’n besige straat in Bangkok, Thailand, afstap, word jy dalk skielik bewus van ’n onweerstaanbare geur wat van die sypaadjie na jou aangesweef kom. Daar berei sjefs in die buitelug tipiese Thaise disse voor. Nadat jy die heerlike geure geruik het en die aantreklike kleure gesien het, kan jy nie anders nie—jy móét eenvoudig van die smaaklike kos proe.

Thaise kos is so gewild omdat dit net die regte kruie, wortels, blare en sade kombineer. Dit lewer ’n kombinasie van soet, suur, sout, bitter en warm smake en geure wat dit baie moeilik maak om verby te stap sonder om ten minste te proe. Waar kom Thailand se ongewone kookkuns vandaan? Die antwoord lê in die verre verlede.

’n Internasionale mengsel van geure

Thailand lê op ’n kruispad van Asië. Eeue lank het Chinese, Laosiane, Kambodjane, Indonesiërs, Europeërs en ander deur Thailand gereis, en baie van hulle het hulle daar gevestig. Hierdie mense het kos van hulle land van herkoms saamgebring, en die smake en geure van al daardie verskillende kossoorte het byval gevind by die mense van Thailand.

Êrens in die verre verlede het Indiese reisigers die mense van Thailand gewys hoe om met kerrie te kook. In die 16de eeu het die Portugese rissies en moontlik ook tamaties na Thailand gebring. Vandag is daar ’n groot verskeidenheid Thaise kos, maar in die meeste Thaise disse sal jy geel, groen en rooi rissies, asook kerriepastas van dieselfde kleure vind. Hierdie mengsel van kerrie en rissies gee die Thaise kookkuns die ryk geure wat so kenmerkend is van Oosterse kos.

Baie disse, baie meer geure

’n Tipiese Thaise maaltyd bestaan uit verskillende disse, wat sop, slaai, ’n roerbraaigereg, kerrie en doopsouse kan insluit. Daar is altyd stomende wit rys op die tafel. Dan is daar nagereg, wat soetgoed met suiker en eier as basis kan insluit. Die vlees en melk van kokosneute is ook deel van die soet kant van Thaise kos.

’n Sleutel tot alle goeie kos is vars bestanddele, en in Thailand kan dit dikwels net om die hoek gevind word. In die stede en dorpe verkoop markte vars vrugte, groente, vis en speserye soos lemoengras, koljander, knoffel, gemmer, galanga, kardemom, tamaryn en komyn. By hierdie markte sal jy ’n oorvloed warm rissies en lemmetjies vind, wat ’n groot deel van Thaise disse uitmaak.

Of jy nou Thailand besoek of graag Thaise kookkuns tuis wil proe, probeer tom yam goong, die warm-en-suur garnaalsop, ’n spesialiteit van Thailand. Ander goeie keuses is ’n papajaslaai met speserye, glasnoedels met gebraaide hoender of eend, repies varkvleis of gemarineerde vis. Ma ho, wat “galoppende perde” beteken, is ’n mengsel van varkvleis, steurgarnale en grondboontjies, gestapel op vars pynappel en versier met rooi rissies en koljanderblare. Rond gerus jou maaltyd af met ’n nagereg wat uit klewerige rys met kokosmelk en mango’s bestaan.

Wat is die beste manier om Thaise kos te eet? In sommige dele van die land is dit die gebruik om met jou vingers te eet en die spesiaal voorbereide klewerige rys in klein balletjies te druk, wat jy dan in ’n sous doop en in jou mond sit. Wanneer jy noedelgeregte eet, verkies jy dalk om eetstokkies te gebruik. Maar as jy te onhandig met die eetstokkies is, kan jy altyd van ’n vurk en ’n lepel gebruik maak.

Is jou aptyt nou gewek vir Thaise kos? Die lekkernye van hierdie pragtige Asiatiese land ontsluit dalk ’n geheimenis wat jy nog nie ontdek het nie—naamlik die heerlike kos van die Ooste.

[Prente op bladsy 23]

1 Tom yam goong-sop

2 Glasnoedelslaai met gemaalde varkvleis en garnale

3 Papajaslaai met speserye

4 Ma ho

5 Klewerige rys met kokosmelk en mango’s