Hoofstuk 27

Waarom hou seuns nie van my nie?

Hy weet dat ek gewild is, want ek het vir hom gesê dat ander seuns van my hou. Hy het gelag toe ek vir hom vertel hoe verspot party van my vriendinne is. En hy weet ek’s slim—ek het hom al ’n paar keer reggehelp. Ek wonder wanneer hy my gaan vra om met hom uit te gaan.

Sy’s mooi, maar sy is so oppervlakkig! Ek kry skaars ’n woord in. En wanneer ek wel iets sê, help sy my reg! Ek moet so gou as moontlik hier wegkom.

IS JY bekommerd dat seuns nie tot jou aangetrokke voel nie? Baie meisies is, selfs dié wat jy dink geen probleem sou hê nie! Neem byvoorbeeld Joanne. Sy is mooi, intelligent en kan haar goed uitdruk. Maar sy sê: “Ek dink dikwels dat seuns nie van my hou nie. ’n Paar van wie ek gehou het, het ’n rukkie in my belanggestel, maar later heeltemal opgehou om met my te praat!”

Wat vind jong mans aantreklik in ’n meisie? Wat vind hulle onaantreklik? Wat kan jy doen om ’n ordentlike jong man se oog te vang?

Wat om te doen

● Ken jou eie verstand en hart. Kort nadat jy puberteit bereik het, het jy waarskynlik meer aangetrokke tot seuns begin voel. Jy het dalk tot meer as een seun aangetrokke gevoel. Dit is normaal. Maar as jy gou was om jou hart te gee aan die eerste ou wat jou voete onder jou uitgeslaan het, sou jy die gevaar geloop het om jou emosionele en geestelike groei te belemmer. Dit neem tyd om positiewe eienskappe te ontwikkel, om ‘jou verstand te hervorm’ oor belangrike dinge en om ’n paar van jou eie doelwitte te bereik.—Romeine 12:2; 1 Korintiërs 7:36; Kolossense 3:9, 10.

Baie seuns voel wel aangetrokke tot meisies wat nog nie sterk oortuigings gevorm het nie of wat naïef is. Maar sulke seuns stel hoofsaaklik belang in die meisie se liggaam, nie in haar as persoon nie. Die feit is dat ’n gebalanseerde jong man na ’n meisie sal soek wie se sterk punte hulle verhouding sal verryk.—Matteus 19:6.

Wat seuns sê: “Ek vind dit aantreklik as ’n meisie haar eie opinies het, wanneer dit lyk asof sy weet dat sy ’n persoon in haar eie reg is.”—James.

“Ek sal belangstel in ’n meisie wat haar op ’n eerlike, respekvolle manier kan uitdruk en wat nie net saamstem met alles wat ek sê nie. Selfs as ’n meisie mooi is, voel ek nie gemaklik as sy net sê wat ek wil hoor nie.”—Darren.

Wat dink jy van hierdie seuns se kommentare?

․․․․․

● Kweek respek vir ander aan. Net soos jy ’n behoefte aan liefde het, het die seuns wat jy ken, ’n groot begeerte om gerespekteer te word. Dit is nie toevallig dat die Bybel vir die man sê dat hy sy vrou moet liefhê, maar vir die vrou sê dat sy “diep respek” vir haar man moet hê nie (Efesiërs 5:33). In lyn met hierdie feit het meer as 60 persent van honderde jong mans wat aan ’n meningspeiling deelgeneem het, gesê dat respek vir hulle belangriker is as liefde. Meer as 70 persent van die ouer mans wat ondervra is, het hierdie selfde keuse gemaak.

Respek beteken nie dat jy jou reg moet prysgee om ’n ander opinie te hê en dit te lug nie (Genesis 21:10-12). Maar die manier waarop jy jou opinie lug, sal waarskynlik bepaal of jy ’n jong man afskrik of aantrek. As jy hom voortdurend weerspreek of reghelp, sal hy moontlik voel dat jy min respek vir hom het. As jy egter erkenning gee aan sy beskouing en sê wat jy prysenswaardig vind, sal hy waarskynlik meer geneig wees om jou opinie te aanvaar en waarde daaraan te heg. ’n Jong man met goeie oordeel sal natuurlik ook oplet of jy jou gesinslede en ander met respek behandel.

Wat seuns sê: “Ek dink dat respek aan die begin van ’n verhouding die belangrikste ding is. Liefde sal dalk later ontwikkel.”—Adrian.

“As ’n meisie vir my respek kan toon, dink ek dat sy my beslis kan liefhê.”—Mark.

Wat dink jy van hierdie seuns se kommentare?

․․․․․

● Trek beskeie aan, en handhaaf goeie higiëne. Jou kleredrag en persoonsversorging is soos luidsprekers wat jou innerlike gedagtes en gesindhede uitbasuin. Lank voordat jy met ’n seun begin praat, het jou kleredrag klaar boekdele oor jou gespreek. As jou klere goed versorg en beskeie is, sal dit ’n baie positiewe boodskap uitstuur (1 Timoteus 2:9). As dit uitlokkend of slordig is, sal die boodskap hard en duidelik—en negatief—wees!

Wat seuns sê: “’n Meisie se kleredrag sê baie oor haar gesindheid teenoor die lewe. As sy onbeskeie of slordige klere dra, sê dit vir my dat sy desperaat is om aandag te kry.” —Adrian.

“Ek voel aangetrokke tot ’n meisie wat haar hare versorg, lekker ruik en ’n rustige stemtoon het. Eenkeer was ek aangetrokke tot ’n pragtige meisie, maar haar swak higiëne het vinnig ’n einde daaraan gemaak.”—Ryan.

“As ’n meisie uitlokkende klere dra, sal sy beslis die seuns se aandag trek. Maar dis nie die soort meisie met wie ek wil uitgaan nie.”—Nicholas.

Wat dink jy van hierdie seuns se kommentare?

․․․․․

Wat om nie te doen nie

● Moenie flirt nie. Vroue kan ’n geweldige invloed op mans uitoefen. Hierdie vermoë om iemand aan te trek, kan ten goede en ten kwade gebruik word (Genesis 29:17, 18; Spreuke 7:6-23). As jy jou invloed toets op elke seun wat jy ontmoet, sal jy waarskynlik ’n reputasie kry as ’n flerrie.

Wat seuns sê: “Om net langs ’n mooi meisie te sit en haar skouer teen joune te voel, kan opwindend wees. Daarom dink ek dat ’n meisie wat dikwels aan jou raak terwyl sy praat, met jou flirt.”—Nicholas.

“As ’n meisie heeltyd na maniere soek om te vat aan die arm van elke seun wat sy ontmoet, of as sy skamerig loer vir elke man wat verbyloop, dink ek dat sy ’n flerrie is, en ek vind dit onaantreklik.”—José.

● Moenie besitlik wees nie. Wanneer ’n paartjie trou, word hulle soos die Bybel sê “een vlees” (Genesis 2:24). Op hierdie stadium van die verhouding gee die man sowel as die vrou baie vryhede prys wat hulle dalk geniet het toe hulle ongetroud was; hulle vorm ’n verbintenis (1 Korintiërs 7:32-34). Maar as jy ’n jong man nog net leer ken, het jy nie die reg om hierdie mate van aanspreeklikheid van hom te verwag, of hy van jou nie.a Trouens, as jy erken dat hy die reg het om ander vriende te hê, sal hy dalk nog meer in jou belangstel. En die manier waarop hy hierdie vryheid gebruik, sal jou baie omtrent sy karakter leer.—Spreuke 20:11.

Wat seuns sê: “Ek dink dat ’n meisie te besitlik is as sy alles moet weet wat ek doen en as dit lyk asof sy sonder my geen sosiale lewe of ander belangstellings kan hê nie.”—Darren.

“As ’n meisie wat ek onlangs ontmoet het, gedurig vir my SMS’e stuur en wil weet saam met wie ek is, veral die name van enige meisies in die groep, is dit vir my ’n waarskuwingsteken.”—Ryan.

“’n Meisie wat nie wil hê dat jy tyd saam met jou mansvriende deurbring nie en wat ontsteld raak as jy haar nie oral saamnooi nie, is onaantreklik omdat sy te afhanklik is.”—Adrian.

Wat dink jy van die seuns se kommentare onder hierdie onderhofie?

․․․․․

Selfrespek is belangrik

Jy ken waarskynlik meisies wat enigiets sal doen om die aandag en goedkeuring van ’n seun te kry. Ander sal dalk hulle standaarde verlaag bloot om ’n kêrel—of selfs ’n man—te kry. Maar die beginsel ‘jy maai wat jy saai’, is hier van toepassing (Galasiërs 6:7-9). As jy jouself en die standaarde waarvolgens jy probeer lewe, nie respekteer nie, sal jy waarskynlik seuns aantrek wat ook geen respek vir jou of jou standaarde het nie.

Die feit is dat nie alle seuns van jou sal hou nie—en dit kan ’n goeie ding wees! Maar as jy aan jou uiterlike skoonheid sowel as jou innerlike skoonheid aandag gee, sal jy “in die oë van God van groot waarde” wees—en jy sal die soort jong man aantrek wat die beste by jou pas.—1 Petrus 3:4.

[Voetnoot]

SLEUTELTEKSTE

“Bekoorlikheid kan vals wees, en skoonheid kan nietig wees; maar die vrou wat Jehovah vrees, sy verwerf lof vir haarself.”—Spreuke 31:30.

WENK

Moenie te veel grimering dra nie! Dit kan die verkeerde indruk skep—dat jy verwaand is of selfs desperaat is om aandag te kry.

HET JY GEWEET . . . ?

As jy heeltyd op ’n seun se onverdeelde aandag aandring, kan dit jou verhouding met hom vernietig.

AKSIEPLAN!

Die eienskap waaraan ek sal werk, is ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Hoe kan jy toon dat jy ’n jong man se gedagtes en gevoelens respekteer?

● Hoe kan jy toon dat jy selfrespek het?

[Lokteks op bladsy 190]

Ek moet erken dat ek in die begin aangetrokke tot ’n meisie voel omdat sy mooi is. Maar dit kan vinnig verander as die meisie nie ’n paar besliste, goeie doelwitte het nie. Aan die ander kant, as sy weet wat sy met haar lewe wil doen—veral as sy al party van haar doelwitte bereik het—kan dit haar baie aantreklik maak.’’—Damien

[Prent op bladsy 191]

Liefde en respek is soos die twee wiele van ’n fiets—al twee is noodsaaklik