Jongmense vra

Waarom hou seuns nie van my nie?

Hy weet dat ek gewild is, want ek het vir hom gesê dat ander seuns van my hou. Hy het gelag toe ek vir hom vertel hoe verspot party van my vriendinne is. En hy weet ek’s slim—ek het hom al ’n paar keer reggehelp. Ek wonder wanneer hy my gaan uitvra.

Sy’s mooi, maar dis asof sy so oppervlakkig is! Ek kry skaars ’n woord in. En wanneer ek wel iets sê, help sy my reg! Ek wonder waar die naaste uitgang is.

IS JY bang dat seuns nie tot jou aangetrokke voel nie? Baie meisies is, selfs dié wat jy dink geen probleem het nie! Neem byvoorbeeld Joanne. Sy is mooi, intelligent en kan haar goed uitdruk. Maar sy sê: “Ek dink dikwels dat seuns nie van my hou nie. ’n Paar van wie ek gehou het, het ’n rukkie in my belanggestel, maar later heeltemal opgehou om met my te praat!”

Wat vind seuns aantreklik in ’n meisie? Wat vind hulle onaantreklik? Wat kan jy doen om die aandag van ’n ordentlike jong man te trek sonder om jou te verlaag?

Wat om te doen

● Ken jou eie verstand en hart. Kort nadat jy puberteit bereik het, het jy waarskynlik meer aangetrokke tot seuns begin voel. Jy het dalk meer as een seun aantreklik gevind. Dit is normaal. Maar as jy gou was om jou hart te gee aan die eerste seun wat jou hart vinniger laat klop het, sou jy die gevaar geloop het om jou emosionele en geestelike groei te belemmer. Dit neem tyd om positiewe karaktertrekke te ontwikkel, om ‘jou verstand te hervorm’ oor belangrike dinge en om party van jou eie doelwitte te bereik.—Romeine 12:2; 1 Korintiërs 7:36; Kolossense 3:9, 10.

Baie seuns is weliswaar aangetrokke tot meisies wat nog nie sterk oortuigings gevorm het nie of wat naïef is. Maar sulke seuns stel hoofsaaklik belang in die meisie se liggaam, nie in haar as persoon nie. Die feit is dat ’n gebalanseerde jong man na ’n meisie sal soek wie se sterk punte tot ’n verhouding kan bydra.—Matteus 19:6.

Wat seuns sê: “Ek vind dit aantreklik as ’n meisie haar eie opinies kan vorm, wanneer dit lyk asof sy innerlik oortuig is dat sy ’n persoon in haar eie reg is.”—James.

“Ek sal belangstel in ’n meisie wat haar op ’n eerlike, respekvolle manier kan uitdruk en wat nie net saamstem met alles wat ek sê nie. Selfs as sy mooi is, voel ek nie op my gemak met ’n meisie wat net sê wat ek wil hoor nie. Dit maak my bang!”—Darren.

“Ek erken dat ek mooi meisies dikwels met die eerste oogopslag aantreklik vind. Maar dit kan vinnig verander as die meisie nie ’n paar definitiewe, goeie doelwitte het nie. Aan die ander kant, as sy weet wat sy met haar lewe wil doen—veral as sy al party van haar doelwitte bereik het—kan dit haar baie aantreklik maak.”—Damien.

● Kweek respek vir ander aan. Net soos jy ’n behoefte aan liefde het, het die seuns wat jy ken, ’n groot begeerte om gerespekteer te word. Dit is nie toevallig dat die Bybel vir die man sê dat hy sy vrou moet liefhê, maar dat die vrou “diep respek” vir haar man moet hê nie (Efesiërs 5:33). In lyn met hierdie insig het meer as 60 persent van honderde jong mans wat aan ’n meningspeiling deelgeneem het, gesê dat respek vir hulle belangriker is as liefde. Meer as 70 persent van die ouer mans wat ondervra is, het hierdie selfde keuse gemaak.

Respek beteken nie oorgawe nie—dat jy jou reg om ’n ander opinie te hê en dit te lug, moet prysgee nie (Genesis 21:10-12). Maar die manier waarop jy jou opinie lug, sal waarskynlik bepaal of jy ’n jong man afstoot of aantrek. As jy hom voortdurend weerspreek of reghelp, sal hy moontlik voel dat jy min respek vir hom het. As jy egter erkenning gee aan sy beskouing en sê wat jy prysenswaardig vind, sal hy waarskynlik meer geneig wees om jou opinie te aanvaar en waarde daaraan te heg. Maar ’n jong man met goeie oordeel sal natuurlik ook oplet of jy jou gesinslede en ander met respek behandel.a

Wat seuns sê: “Ouens hou daarvan om te dink dat hulle opinie vir iemand saak maak, veral vir ’n meisie van wie hulle hou.”—Anthony.

“Ek dink respek is die belangrikste ding aan die begin van ’n verhouding. Liefde sal dalk later ontwikkel.”—Adrian.

“As ’n meisie vir my respek kan toon, dink ek dat sy my beslis sal kan liefhê.”—Mark.

● Trek beskeie aan, en handhaaf goeie higiëne. Jou kleredrag en persoonsversorging is soos luidsprekers wat jou innerlike gedagtes en gesindhede uitbasuin. Lank voordat jy met ’n seun begin praat, het jou kleredrag klaar boekdele oor jou gespreek. As jou kleredrag goed versorg en beskeie is, sal dit ’n baie positiewe boodskap uitstuur (1 Timoteus 2:9). As dit uitlokkend of slordig is, sal die boodskap hard en duidelik wees—en negatief!

Wat seuns sê: “’n Meisie se standaard van kleredrag sê baie oor haar gesindheid teenoor die lewe. As sy onbeskeie of slordige klere dra, sê dit vir my dat sy desperaat is om aandag te kry.”—Adrian.

“Ek voel aangetrokke tot ’n meisie wat haar hare versorg, lekker ruik en ’n rustige stemtoon het. Eenkeer was ek aangetrokke tot ’n pragtige meisie, maar haar swak higiëne het vinnig ’n einde daaraan gemaak.”—Ryan.

“Ek hou regtig van ’n meisie wat nie voel dat sy lae en lae grimering of stywe of onbeskeie klere moet dra om aandag te kry nie.”—Ethan.

“As ’n meisie uitlokkende klere dra, sal sy beslis die seuns se aandag trek. Maar dis nie die soort meisie met wie ek ’n verhouding wil begin nie.”—Nicholas.

Wat om nie te doen nie

● Moenie flirt nie. Vroue kan ’n geweldige invloed op mans uitoefen. Hierdie vermoë om iemand aan te trek, kan ten goede en ten kwade gebruik word (Genesis 29:17, 18; Spreuke 7:6-23). As jy jou invloed toets op elke seun wat jy ontmoet, sal jy waarskynlik ’n reputasie kry as ’n flerrie.

Wat seuns sê: “Om net langs ’n mooi meisie te sit en haar skouer teen joune te voel, kan vir ’n ou opwindend wees en sy emosies wek. Daarom dink ek dat ’n meisie wat dikwels aan jou raak terwyl sy praat, met jou flirt.”—Nicholas.

“As ’n meisie heeltyd na maniere soek om te vat aan die arm van elke seun wat sy ontmoet, of as sy skamerig loer vir elke man wat verbyloop, dan dink ek dat sy ’n flerrie is, en ek vind dit onaantreklik.”—José.

“Ek sou ’n meisie as ’n flerrie beskryf as sy vat aan elke ou wat sy ontmoet, en dan haar aandag vinnig verskuif na die een wat die meeste belangstelling in haar toon.”—Ethan.

● Moenie besitlik wees nie. Wanneer ’n paartjie trou, word hulle soos die Bybel sê “een vlees” (Genesis 2:24). Op hierdie stadium van die verhouding gee die man sowel as die vrou baie vryhede prys wat hulle dalk geniet het toe hulle ongetroud was; hulle word in werklikheid toegewyd aan mekaar (1 Korintiërs 7:32-34). Maar as jy ’n jong man nog net leer ken, het jy nie die reg om hierdie mate van aanspreeklikheid van hom te verwag, of hy van jou nie. As jy oorhaastig sy onverdeelde aandag eis, kan dit julle vriendskap vernietig.b

Wat seuns sê: “Ek dink dat ’n meisie te besitlik is as sy alles moet weet wat ek doen en as dit lyk asof sy sonder my geen sosiale lewe of ander belangstellings kan hê nie.”—Darren.

“As ’n meisie wat ek onlangs ontmoet het, gedurig vir my SMS’e stuur en wil weet saam met wie ek is, veral die name van enige meisies in die groep, is dit vir my ’n waarskuwingsteken.”—Ryan.

“’n Meisie wat nie wil hê dat jy tyd saam met jou mansvriende deurbring nie en wat ontsteld raak as jy haar nie oral saamnooi nie, is onaantreklik omdat sy te afhanklik is.”—Adrian.

Wees bewus van jou waarde

Jy ken waarskynlik meisies wat enigiets sal doen net om die aandag en goedkeuring van ’n seun te kry. Ander sal dalk hulle standaarde verlaag bloot om ’n kêrel—of selfs ’n man—te kan kry. Maar die beginsel ‘jy maai wat jy saai’, is hier van toepassing (Galasiërs 6:7-9). As jy nie waarde heg aan jouself en die standaarde waarvolgens jy probeer lewe nie, sal jy waarskynlik seuns aantrek wat ook geen waarde heg aan jou of jou standaarde nie.

Die feit is dat nie alle seuns van jou sal hou nie—en dit kan ’n goeie ding wees! Maar as jy aandag gee aan jou uiterlike skoonheid sowel as jou innerlike skoonheid, sal jy “in die oë van God van groot waarde” wees—en jy sal die soort jong man aantrek wat jy verdien.—1 Petrus 3:4.

Nog artikels uit die reeks “Jongmense vra” kan gevind word op die webwerf www.watchtower.org/ype

[Voetnote]

IETS OM OOR TE DINK

● Hoe kan jy toon dat jy ’n jong man se gedagtes en gevoelens respekteer?

● Hoe kan jy toon dat jy waarde heg aan jouself?

[Prent op bladsy 27]

Liefde en respek is soos die twee wiele van ’n fiets—al twee is noodsaaklik