Die skielike groei in tegnologie

IN Albanië is dit nie ongewoon om ’n ouer persoon op ’n donkie te sien ry terwyl hy oor ’n selfoon praat nie. In Indië sal ’n bedelaar dalk ’n paar oomblikke ophou bedel om ’n oproep oor sy selfoon te maak of te ontvang. Ja, van selfone tot rekenaars tot televisie, tegnologie het elke uithoek van die wêreld bereik en vir baie mense—hetsy ryk of arm—deel van die lewe geword.

Die verreikende invloed van tegnologie word miskien die duidelikste gesien in die groot toename in selfone, waarvan baie nie meer net telefone is nie. Gevorderde modelle stel gebruikers in staat om toegang tot die Internet te kry, e-pos en SMS’e te stuur en te ontvang, TV te kyk, na musiek te luister, foto’s te neem, hulle pad met behulp van die globale posisioneringstelsel (GPS) te vind en—o, ja—om iemand te bel!

Volgens ’n berig in die Washington Post het ’n multimedia-slimfoon “nou ’n groter verwerkingsvermoë as wat die Noord-Amerikaanse Lugverdedigingskommandement in 1965 gehad het”. Die Post sê ook: “Daar is nou een selfoon vir elke twee mense op aarde”, en in ten minste 30 lande is daar meer selfone as mense. Ja, ons sien tans “die vinnigste wêreldwye verspreiding van enige soort tegnologie in die mensegeskiedenis”, sê die koerant.

Byna 60 persent van selfoongebruikers regoor die wêreld woon in ontwikkelende lande, wat die selfoon die eerste hipertegnologiese kommunikasietoestel maak waarvan die meeste gebruikers in hierdie lande is. Afganistan het byvoorbeeld in 2008 sowat 140 000 intekenare per maand bygekry, terwyl selfoongebruik in Afrika in onlangse jare met byna 50 persent per jaar toegeneem het.

Maar die kommunikasierevolusie het ook ’n negatiewe sy. Selfone, roepradio’s en skootrekenaars maak dit moontlik om mense byna te eniger tyd en op enige plek te bereik, wat party gebruikers laat voel asof hulle in ’n elektroniese web vasgevang is. Die ander uiterste is “tegnologieverslaafdes”, wat ’n drang het om in voeling te bly, om te weet wat aangaan.

“Verslaafdheid”, afleiding, onderbreking—dit is moontlik die bekendste probleme wat met gewilde kommunikasie- en mediategnologie verbind word.a Maar dieselfde toestelle kan ook baie nuttig wees. Hoe kan jy dit dus op ’n gebalanseerde, verstandige en bedagsame wyse gebruik? Die volgende artikels bespreek hierdie vraag.

[Voetnoot]