Pasop vir loodvergiftiging!

In onlangse jare het regerings verbruikersprodukte soos speelgoed en juwele dringend teruggeroep. Waarom? Gevaarlike loodvlakke is in party van hierdie produkte gevind, en jong kinders is geneig om daaraan te suig of te kou. Loodvergiftiging kan veral vir kinders onder die ouderdom van ses jaar gevaarlik wees, aangesien hulle sentrale senuweestelsel nog ontwikkel.

VOLGENS ’n studie deur die Bloomberg-fakulteit van Openbare Gesondheid van die Johns Hopkins-universiteit, onderdruk lood ’n proteïen wat belangrik is vir breinontwikkeling en bewussyn. Studies toon dat kinders tot 50 persent van die lood absorbeer wat hulle inneem, terwyl volwassenes gewoonlik slegs 10 tot 15 persent absorbeer.

Onlangse navorsing het getoon dat selfs loodvlakke wat laer is as die giftigheidsgrens wat deur party regerings vasgestel word, skade kan veroorsaak. Volgens die Amerikaanse Nasionale Veiligheidsraad kan dit by kinders probleme soos “leergestremdheid, aandaggebreksindroom, gedragsprobleme, belemmerde groei, verswakte gehoor en nierskade” veroorsaak. Vroue wat moontlik swanger sal raak, moet bykomende voorsorg tref om blootstelling te voorkom, aangesien lood skadelik kan wees vir die fetus.a

Lood kan ook kos en drank besmet wat voorberei is in erdeware met loodglasuur, wat algemeen gebruik word in sekere dele van Asië en Latyns-Amerika. Partykeer word drinkwater in kleipotte gehou sodat dit koel kan bly, en warm drankies word in geglasuurde bekers bedien. ’n Studie van kinders onder die ouderdom van vyf jaar in Mexikostad het getoon dat byna die helfte van die kinders ouer as 18 maande ’n hoë loodvlak in hulle bloed het. Kos wat in geglasuurde erdeware voorberei is, is gemeld as die oorsaak daarvan. Lood verleen ’n gladde, glasagtige afwerking aan erdeware, maar dit kan deur voedsel geabsorbeer word, veral wanneer skottels verhit of aan sekere vrugte en groente blootgestel word.

Ander bronne van loodvergiftiging

Hoewel die meeste ontwikkelde lande in onlangse jare opgehou het om lood in hulle brandstof te gebruik, sê die Wêreldgesondheidsorganisasie (WGO) dat byna 100 lande in die wêreld nog steeds lood in brandstof gebruik. Lood breek nie af nie en kan nie verbrand word nie. Klein deeltjies uit voertuie se uitlaatgasse besoedel dus die grond langs hoofweë. Loodpoeier word dan ingeasem of in huise ingetrap.

Nog ’n vername bron van loodbesmetting is verf met ’n loodbasis wat in huise gebruik is voordat wette uitgevaardig is om dit te reguleer. In die Verenigde State alleen het ongeveer 38 miljoen huise—40 persent van alle behuising—loodverf. Verf wat afskilfer of loodpoeier as gevolg van opknappingswerk, kan ’n groot gevaar inhou.

Talle ouer stede en huise het waterpype van lood of van koper met loodsoldeersel. Die Mayo-kliniek, ’n hoogaangeskrewe mediese sentrum in die Verenigde State, beveel aan dat koue water 30 tot 60 sekondes lank uit sulke pype moet loop voordat ’n mens dit drink. Warm water uit hierdie pype moet glad nie gedrink of gebruik word om kos mee te kook nie—veral nie om melkformule vir babas voor te berei nie.

Loodvlakke in die bloed neem heelwat af wanneer die bron van blootstelling aan lood verwyder word. Mense wat bekommerd is oor lood in hulle bloed kan ’n bloedtoets laat doen. Mediese behandeling moet verkry word as skadelike vlakke gevind word.

Die belangrikheid van openbare bewustheid

As lood oor ’n tydperk in die liggaam ophoop, kan dit loodvergiftiging tot gevolg hê. Maar as genoeg lood op een slag ingeneem word, kan dit dodelik wees. Die Amerikaanse Sentrums vir Siektebeheer berig dat ’n kleuter in 2006 dood is nadat hy ’n stukkie metaaljuweliersware wat baie lood bevat het, ingesluk het.

’n Mediese ensiklopedie beklemtoon die belangrikheid van openbare bewustheid en sê dat 1 uit 20 kleuters in die Verenigde State tans ’n hoë loodvlak in sy of haar bloed het. As dit die geval is in ’n land waar die gebruik van lood beheer word, wat kan gesê word van lande waar sulke regulasies nie bestaan nie? Ja, almal moet oppas!

[Voetnoot]

[Venster/Prent op bladsy 29]

PARTY SIMPTOME VAN LOODVERGIFTIGING BY KINDERS

Aggressiwiteit, bloedarmoede, gebrek aan eetlus en energie, geïrriteerdheid, hardlywigheid, hoofpyn, konsentrasieprobleme, maagpyn, moegheid, stadige groei en verlies van ontwikkelingsvaardighede.—MEDLINE PLUS MEDICAL ENCYCLOPEDIA.