Is ’n wêreld sonder terrorisme moontlik?

“ONS moet stry . . . om harte en verstande te bereik.” Dit is die gevolgtrekking wat gemaak is ná ’n 20 jaar lange studie van die persoonlikheidsprofiele van sogenaamde terroriste.

Maar wat kan die harte en verstande verander van mense wat diep betrokke was by gewelddadige en wraaksugtige bedrywighede?

’n Boek wat die hart kan verander

Gedurende die 1990’s het Hafeni sy godsdiensoortuigings begin ondersoek en besluit om ’n Bybel te kry. Hy het gesê: “Ek het begin deur die Evangelies [die Bybelboeke Matteus, Markus, Lukas en Johannes] te ondersoek, wat die lewensverhaal van Jesus bevat. Toe ek dit gelees het, het die persoonlikheid van Jesus en die goedhartige en onpartydige manier waarop hy mense behandel het, my onmiddellik aangetrek. Dit het my hart geraak.”

Hafeni het gesê dat hy, toe hy verder gelees het, afgekom het “op ’n Bybelgedeelte wat hom werklik diep getref het—Handelinge 10:34 en 35”. Dit toon dat “God nie partydig is nie, maar in elke nasie is die mens wat hom vrees en regverdigheid beoefen, vir hom aanneemlik”.

“Ek het tot die slotsom gekom”, sê Hafeni, “dat dit mense is wat verantwoordelik is vir stamtrots, nasionalisme en rassevooroordeel. Ek het besef dat die Bybel se boodskap mense se denke kan verander en dat die belangrikste ding in die lewe is om ’n goeie naam by God te hê. Dit is belangriker as om te veg ten behoewe van mense van ’n spesifieke stam, ras of kleur.”

Joseba, wat in die vorige artikel aangehaal is, was die leier van ’n klein kommandogroep wat beplan het om ’n polisiestasie op te blaas. “Maar voordat ons ons plan kon uitvoer”, het Joseba verduidelik, “is ek in hegtenis geneem, en ek was twee jaar lank in die tronk.” Later het sy vrou, Luci, die Bybel saam met Jehovah se Getuies begin studeer. Joseba het uiteindelik by hierdie besprekings aangesluit.

“Toe ek meer van Jesus geleer het”, het Joseba vertel, “het hy my rolmodel geword. Een van die dinge wat hy gesê het en wat my werklik geraak het, was: ‘Almal wat die swaard opneem, sal deur die swaard vergaan.’ Ek het geweet dat dit die waarheid is” (Matteus 26:52). Joseba het erken: “As jy iemand doodmaak, wek dit by die gesinslede net haat en ’n begeerte om wraak te neem. Geweld bring net pyn mee, nie ’n beter wêreld nie.” Joseba het aanpassings in sy denke begin maak.

Hafeni sowel as Joseba het uit persoonlike ondervinding geleer dat Bybelleringe ’n kragtige uitwerking op ’n mens se lewe kan hê. Die Bybel sê: “Die woord van God is lewend en oefen krag uit en . . . [kan] bedoelings van die hart” onderskei (Hebreërs 4:12). Die krag van God se Woord het baie mense al gehelp om hulle denke en optrede te verander. Maar is daar bewyse dat wêreldwye eenheid bestaan onder diegene wat waarlik Bybelleringe toepas?

’n Broederskap wat op liefde gegrond is

Toe Hafeni die vergaderinge van Jehovah se Getuies begin bywoon het, het die rasse-eenheid wat hy gesien het, hom diep getref. “Om langs wit mense te sit, was vir my ’n heel nuwe ondervinding”, het hy gesê. “Ek het nooit gedink dat ek in my lewe die geleentheid sou kry om ’n wit man broer te noem nie. Dit het my die vaste oortuiging gegee dat die Getuies die ware godsdiens moet hê, want hulle het die eenheid gehad waarna ek gesmag het en het mekaar ten spyte van rasseverskille liefgehad.”

Jesus het gesê dat sy ware volgelinge geïdentifiseer sou word deur die ‘liefde wat hulle onder mekaar het’ (Johannes 13:34, 35). Hy het ook geweier om by politieke konflikte betrokke te raak en het vir sy dissipels gesê: “Julle [is] geen deel van die wêreld” nie (Johannes 6:15; 15:19; Matteus 22:15-22). Liefde en neutraliteit was destyds kenmerke van die ware Christelike godsdiens, en vandag is dit ook.

Hulle pas toe wat Jesus geleer het

Maar hoe kan liefde die verdelende invloede oorkom wat tot terrorisme aanleiding gee? Wanneer politieke geskille tot vyandigheid lei, veroorsaak lojaliteit teenoor ras, nasie of etniese groep dikwels dat konflik tussen individue—of nasies—ontstaan.

In 1914 het rassetrots die sluipmoordenaar Gavrilo Princip byvoorbeeld beweeg om aartshertog Frans Ferdinand, die Oostenryks-Hongaarse troonopvolger, te vermoor. Princip was ’n lid van ’n organisasie wat die Swart Hand genoem is en wat volgens hulle manifes “revolusie bo . . . kulturele strewes” verkies het om hulle doelwitte te probeer bereik. Die sluipmoord het aanleiding gegee tot oorlog tussen sogenaamde Christennasies, wat ontaard het in die Eerste Wêreldoorlog en die dood veroorsaak het van miljoene soldate wat beweer het dat hulle Jesus, die “Vredevors”, volg.—Jesaja 9:6.

Ná die oorlog het ’n vername geestelike, Harry Emerson Fosdick, sogenaamde Christenleiers veroordeel omdat hulle nie hulle lidmate geleer het om Jesus se voorbeeld te volg nie. “Ons het manne vir oorlog voortgebring”, het hy geskryf. “Ons het soldate ons helde gemaak en ons het selfs in ons kerke oorlogsvlae geplaas.” Fosdick het tot die slotsom gekom: “Aan die een kant het ons die Vredevors geloof en aan die ander kant het ons oorlog verheerlik.”

In teenstelling hiermee het ’n sosiologiese studie wat in 1975 gepubliseer is, gesê: “Jehovah se Getuies het hulle standpunt van niegewelddadige ‘Christelike neutraliteit’ konsekwent gehandhaaf dwarsdeur twee groot wêreldoorloë en die daaropvolgende militêre konflikte van die ‘Koue Oorlog’.” Hoewel die Getuies mishandel en in die tronk gegooi is, het hulle “nooit op gewelddadige wyse gereageer nie”. Die studie het die gevolgtrekking gemaak: “Die leringe van Jehovah se Getuies spruit voort uit hulle oortuiging dat die Bybel die geïnspireerde woord van God is.”

Die waarde daarvan om Bybelleringe toe te pas

Toe ’n voormalige eerste minister van België ’n boek oor die lewe van Jesus met die titel Die grootste mens wat nog geleef het by sy buurman gekry het, is sy hart geraak deur wat hy gelees het. Hy het vir sy buurman geskryf: “Die wêreld sou vandag beslis heeltemal anders gewees het as mense meer in die Evangelieboodskap belanggestel het en as hulle die beginsels toegepas het wat Jesus Christus geleer het.”

“Ons sou nie ’n Veiligheidsraad nodig gehad het nie”, het hy bygevoeg, “daar sou ook nie terroristeaanvalle gewees het nie [en] geweld sou verbode gewees het.” Hy het egter tot die slotsom gekom: “Dis alles wensdenkery.” Maar is dit werklik? Selfs nou, in ’n wêreld vol geweld, help die Bybel baie mense uit alle agtergronde om die gebruik van geweld te verwerp en om die bittere gegriefdheid te oorkom wat in mense opbou wanneer hulle dekades van sinlose bloedvergieting beleef.

Soos in die eerste artikel beskryf is, het Andre na aan die dood gekom toe ’n bomontploffing die lewe van ’n hele paar van sy vriende geëis het. Die bom is deur ’n militante groep geplant. Hy het besef dat hy die Bybelraad moet toepas om ‘vryelik te vergewe’ (Kolossense 3:13). Hafeni, wat jare later ’n lid van daardie selfde groep geword het, het geleer om Bybelbeginsels toe te pas en geweld te verwerp (Psalm 11:5). Nou is albei Getuies van Jehovah, en hulle werk saam by ’n vertaalkantoor van die Getuies in ’n Afrikaland.

Vertroue in ’n veilige toekoms

Miljoene mense regoor die wêreld vind dat ’n studie van die Bybel hulle vertroue in ’n veilige toekoms opbou. Eendag het Andre byvoorbeeld vir ’n buurman die Bybel se belofte van ’n regverdige nuwe wêreld gewys (Jesaja 2:4; 11:6-9; 65:17, 21-25; 2 Petrus 3:13). Skielik het soldate met outomatiese wapens die huis omsingel en Andre beveel om vir ondervraging buitentoe te kom. Nadat die soldate gehoor het dat Andre ’n Bybelonderrigter is vir wie sy buurman groot waardering het, is hulle daar weg.

Andre het oomblikke tevore vir sy buurman verduidelik dat God in menseaangeleenthede sal ingryp, soos Hy in die dae van Noag gedoen het, toe “die aarde . . . vol geweld geraak” het (Genesis 6:11). God het die wêreld van daardie tyd deur middel van ’n aardwye vloed vernietig en die vredeliewende man Noag en sy gesin behoue laat bly. “Net soos die dae van Noag was”, het Jesus gesê, “so sal die teenwoordigheid van die Seun van die mens wees.”—Matteus 24:37-39.

Jesus, “die Seun van die mens”, is die Heerser wat God gekies het om te regeer in die hemelse regering wat die Koninkryk van God genoem word. Hy sal binnekort God se hemelse magte aanvoer om geweld van die aarde te verwyder (Lukas 4:43). As hemelse Koning sal Jesus ‘almal regverdig behandel, en daar sal vrede wees’. Hy sal sy onderdane beskerm “teen ’n wrede en gewelddadige dood”.—Psalm 72:7, 14, Contemporary English Version.

Daarna sal almal wat regverdigheid liefhet en wat onderdane van hierdie hemelse Koning word, sien hoe die aarde in ’n vreedsame paradys omskep word (Lukas 23:42, 43). “Vrede en geregtigheid”, belowe die Bybel, sal “op elke berg en heuwel heers”.—Psalm 72:1-3, CEV.

Sal jy dit nie geniet om in ’n wêreld te lewe wat deur so ’n koning regeer word nie? Dit sal beslis ’n wêreld sonder enige terrorisme wees.

[Lokteks op bladsy 7]

Hafeni sowel as Joseba het uit persoonlike ondervinding geleer dat Bybelleringe ’n kragtige uitwerking op ’n mens se lewe kan hê

[Lokteks op bladsy 9]

‘Die wêreld sou vandag heeltemal anders gewees het as mense die beginsels toegepas het wat Jesus Christus geleer het. Ons sou nie ’n Veiligheidsraad nodig gehad het nie, daar sou ook nie terroristeaanvalle gewees het nie en geweld sou verbode gewees het.’—’n Voormalige eerste minister van België

[Prent op bladsy 8]

Die toepassing van Bybelbeginsels het Hafeni en Andre gehelp om mekaar opreg lief te hê