Ons beskou die wêreld
In die eerste jaar en ’n half van drastiese optrede teen mensehandel het “die Chinese polisie 10 621 vroue en 5 896 kinders bevry wat ontvoer is”. Sowat 15 673 verdagtes is aangehou.—CHINA DAILY, CHINA.
“In Kenia is meer as 1 000 onderwysers [afgedank] omdat hulle skoolmeisies gemolesteer het in die afgelope twee jaar. . . . ’n Landwye vertroulike hulplyn . . . het getoon dat die probleem algemener was as wat voorheen gedink is.”—DAILY NATION, KENIA.
’n Studie toon dat die risiko om ’n melanoom te kry, 75 persent hoër is by mense wat sonbeddens gebruik as by mense wat dit nog nooit gebruik het nie. Mense wat toestelle soos sonbeddens al meer as 50 uur lank gebruik het, se risiko om ’n melanoom te kry, is 2,5 tot 3,0 keer groter.—CANCER EPIDEMIOLOGY, BIOMARKERS & PREVENTION, VSA.
“Slegs 8% [van aanstaande bruide in Kanada] dink dat dit ’n goeie idee is om jou van seks voor die huwelik te onthou”, en “74% van paartjies wat trou, bly voor die tyd saam”.—WEDDINGBELLS, KANADA.
Die gevare van besoedelde water
’n Verslag van die Verenigde Nasies sê dat “meer mense nou weens besoedelde water sterf as weens alle vorme van geweld insluitende oorloë”. Volgens die VN word tweemiljoen ton afval—landbou- en industriële afval sowel as rioolvullis, ensovoorts—elke dag in riviere en die see gestort, wat siekte versprei en ekosisteme beskadig. Wat meer is, elke 20 sekondes sterf ’n kind onder die ouderdom van vyf weens waterverwante siektes. Achim Steiner, die uitvoerende direkteur van die VN se Omgewingsprogram, sê: “As ons wil hê dat die wêreld moet floreer, . . . moet ons ’n gesamentlike poging aanwend om ’n beter en intelligenter oplossing te vind om van afval ontslae te raak.”
Sang as spraakterapie
’n Aantal pasiënte wat hulle spraakvermoë ná ’n beroerte verloor het, is gehelp om dit terug te kry deur te sing. Neuroloë spoor beroertepasiënte aan om wat hulle wil sê, te sing, met ander woorde om hulle gedagtes volgens ’n ritme en melodie uit te spreek. Die behandeling, wat melodiese intonasieterapie genoem word, het indrukwekkende resultate gelewer. Ná 15 weke van terapie “leer pasiënte geleidelik om sang in spraak te verander”, verduidelik The Wall Street Journal.
“Skerp toename in kullery in die klaskamer”
In ’n opname waartydens onderhoude met 20- 000 Kanadese eerstejaarstudente gevoer is, het 73 persent “erken dat hulle hulle op hoërskool een of meer keer skuldig gemaak het aan ernstige akademiese bedrog op geskrewe werk”, sê die Kanadese Onderwysraad (CCL). Een universiteit het gesê dat gevalle van kullery en plagiaat tussen die jare 2003 en 2006 met 81 persent toegeneem het. “Oor die afgelope dekade”, sê dr. Paul Cappon, die president van die CCL, “het die Internet en hipertegnologiese toestelle ’n skerp toename in kullery in die klaskamer moontlik gemaak.”