Jongmense vra

Hoekom verstaan my ouers nie?

STEL JOU HIERDIE SITUASIE VOOR.

Dit is sesuur op ’n Vrydagaand, en die 17-jarige Chris is haastig op pad na die voordeur toe. “Sien julle later!” roep hy uit in die hoop dat sy ouers nie die gevreesde vraag sal vra nie.

Hy moes van beter geweet het.

“Hoe laat sal jy terug wees, Chris?” vra sy ma.

Chris steek in sy spore vas. “Um . . . uh . . . ”, stotter hy, “julle hoef nie op te bly nie, okei?” Chris maak die deur oop en is amper by die deur uit toe sy pa uitroep: “Wag ’n bietjie, Chris!”

Chris steek weer vas, en dan hoor hy sy pa se streng stem: “Jy weet wat die reël is. Jy moet tienuur by die huis wees—niks later nie!”

“Aag, Pa”, kla Chris terwyl hy omdraai, “weet Pa hoe skaam ek voel wanneer ek vir my vriende moet sê dat ek so vroeg by die huis moet wees?”

Sy pa het geen simpatie nie. “Op die kop tienuur”, herhaal hy, “en niks later nie!”

DALK was jy al in ’n soortgelyke situasie. Hetsy dit te doen gehad het met jou inkomtyd, jou musiek, jou vriende of jou klere, jou ouers het die wet neergelê en hulle wou eenvoudig nie toegee nie. Byvoorbeeld:

“Nadat my stiefpa met my ma getrou het, het hy my verbied om na die musiek te luister waarvan ek hou. Op die ou end moes ek al my CD’s weggooi!”—Brandon.a

“My ma kritiseer my omdat ek nie vriende het nie. Maar wanneer ek vir haar vra of ek met iemand kan uithang, sê sy nee omdat sy die persoon nie ken nie. Dis so frustrerend!”—Carol.

“My pa en stiefma laat my nie toe om ’n T-hemp te dra tensy dit ’n nommer te groot is nie. En my pa sê dat my kortbroek te kort is as dit bokant my knie sit!”—Serena.

Wat kan jy doen as jy en jou ouers nie oor iets saamstem nie? Kan jy met hulle daaroor praat? “My ouers wil gewoonlik nie luister nie”, sê Joanne, 17. Amy, 15, sê: “Wanneer ek voel dat my ouers my nie verstaan nie, hou ek liewer my mond.”

Maar moenie so gou tou opgooi nie! Jou ouers is dalk meer bereid om te luister as wat jy dink.

Dink hieraan: Selfs God luister wanneer mense hulle saak aan hom stel. Jehovah het byvoorbeeld na Moses geluister toe hy ten behoewe van die opstandige Israeliete met Hom gepraat het.—Eksodus 32:7-14; Deuteronomium 9:14, 19.

Dalk voel jy dat jou ouers nie so redelik soos God is nie. En daar is wel ’n groot verskil tussen Moses se gesprek met Jehovah oor die lot van ’n hele nasie en ’n gesprek met jou pa of ma om ’n bietjie later in te kom. Maar daar is ’n beginsel wat in al twee situasies geld:

As jy ’n geldige punt het, sal mense in gesagsposisies—in hierdie geval jou ouers—moontlik bereid wees om na jou te luister.

Die sleutel tot sukses is hoe jy jou saak stel! Die volgende stappe sal jou help om dit op doeltreffender wyse te doen:

1. Identifiseer die probleem. Skryf hieronder die kwessie neer waaroor jy en jou ouers blykbaar net nie kan saamstem nie.

․․․․․

2. Identifiseer die gevoel. Skryf hieronder ’n woord neer wat beskryf hoe jou ouers se standpunt oor die saak jou laat voel—hetsy seergemaak, hartseer, verleë, dat hulle jou wantrou of iets anders. (Byvoorbeeld: In die scenario aan die begin van hierdie artikel sê Chris dat sy ouers se streng reëls oor inkomtyd hom skaam laat voel voor sy vriende.)

․․․․․

3. Dink soos ’n ouer. Stel jou voor dat jy die ouer is van ’n tiener met dieselfde probleem as wat jy in Stap 1 genoem het. Waaroor sou jy as ouer die meeste besorg wees, en waarom? (Byvoorbeeld: In die scenario aan die begin is Chris se ouers miskien besorg oor sy veiligheid.)

․․․․․

4. Kyk weer na die saak. Beantwoord die volgende vrae:

Waarom is jou ouers se beskouing moontlik geldig?

․․․․․

Wat kan jy doen sodat hulle hulle minder sal bekommer?

․․․․․

5. Bespreek die saak met jou ouers en probeer saam oplossings vind. As jy die bogenoemde stappe volg—en die wenke in die venster “Kommunikasiewenke” probeer toepas—sal jy dalk vind dat jy op ’n volwassener manier met jou ouers kan kommunikeer. Kellie geniet so ’n verhouding met haar pa en ma. “Dit help niks om te stry nie; en jy sal in elk geval verloor”, sê sy. “My geheim is om sake met my ouers uit te praat. Ons bereik byna altyd ’n ooreenkoms waarmee ons almal tevrede is.”

Nog artikels uit die reeks “Jongmense vra” kan gevind word op die webwerf www.watchtower.org/ype

[Voetnoot]

[Venster op bladsy 20]

KOMMUNIKASIEWENKE

“Om te luister, is baie doeltreffender as om te skreeu. As jy na jou ouers luister en hulle beskouing probeer verstaan, sal hulle waarskynlik dieselfde vir jou doen.”—Rianne.

Lees Filippense 2:3, 4.

“Moenie teëpraat nie! Ek het dit keer op keer gedoen totdat ek uiteindelik besef het dat ek ’n stryery (en straf) kon vermy het as ek net my tong in toom gehou het!”—Danielle.

Lees Spreuke 17:27; 21:23.

“Wag totdat daar ’n ontspanne atmosfeer is en jy weet jou ouers bereid sal wees om te luister.”—Collette.

Lees Spreuke 25:11.

“Jou ouers moet weet dat jy hulle respekteer en dat jy werklik luister na wat hulle sê. Voordat jy vir hulle sê hoe jy voel, moet jy hulle dus verseker dat jy gehoor het wat hulle gesê het en dat jy dit verstaan.”—Emily.

Lees Spreuke 23:22; Jakobus 1:19.

[Venster op bladsy 20]

LEWENS- WAARHEID

Julle hoef nie alle meningsverskille te bespreek nie. In sommige gevalle kan jy ‘sê wat jy te sê het in jou hart en stilbly’ (Psalm 4:4). ’n Jong meisie met die naam Beatrice sê: “Wanneer ek soms dink aan hoe min die probleem môre sal saak maak, lyk dit nie meer so belangrik nie. Ek kan net daarvan vergeet.”

[Venster op bladsy 21]

VRA JOU OUERS

Hoe het julle meningsverskille met julle ouers opgelos? Is daar enigiets wat julle wens julle anders gedoen het? Indien wel, wat?

[Venster/Prente op bladsy 21]

WAT JOU PORTUURS SÊ

Wyndia—Ek probeer dink voordat ek praat. Ek neem my ouers se beskouing in ag, en ek bid voordat ek iets sê. As ek weet dat wat ek wil sê, ’n stryery sal begin, bly ek stil totdat ek my kan uitdruk sonder om te stry.

Ross—Wanneer ek voel dat ek ontsteld begin raak, sê ek gewoonlik vir myself dat ek die res van my dag weens ’n onnodige stryery kan bederf. Ek vind nou dat ek nie meer so maklik kwaad raak as toe ek jonger was nie.

Ramona—Ek vind dat dit altyd goed is om na my ouers se beskouing te luister. Dalk verskil hulle beskouing nie soveel van myne nie en sal ons oor meer saamstem as wat ek gedink het.