Ons beskou die wêreld
In die Republiek van Georgië, in die suidooste van Europa, “het die egskeidingsyfer oor die afgelope tien jaar byna verdubbel”. Die meeste van diegene wat skei, is onder die ouderdom van 20.—FINANCIAL, GEORGIË.
In Ierland het 17 persent van kinders tussen die ouderdom van 11 en 16 “hulle volle naam oor die Internet verstrek aan iemand wat hulle nog nooit ontmoet het nie”. Tien persent het ook hulle “e-posadres, selfoonnommer of foto” aan die persoon gegee.—DIE IERSE VERENIGING VIR DIE VOORKOMING VAN KINDERMISHANDELING.
Net omtrent 4 persent van bosbrande regoor die wêreld word toegeskryf aan natuurlike oorsake. In al die ander gevalle word die brande deur mense gestig—hetsy moedswillig of weens nalatigheid.—PRESSEPORTAL, DUITSLAND.
“Byna een uit 10 Amerikaners [12 jaar of ouer] sê dat hulle gereeld dwelmmiddels gebruik, insluitende dagga, kokaïen, heroïen, hallusinogene, snuifmiddels of voorskrifmedisyne wat vir ontspanning gebruik word.”—USA TODAY, VSA.
Selfbeheersing is ’n sleutel tot stabiliteit
“Navorsing toon dat ’n gebrek aan selfbeheersing gedurende die jeug daarop kan dui dat ’n persoon teen volwassenheid gesondheidsprobleme, minder finansiële stabiliteit en ’n kriminele rekord sal hê”, sê die tydskrif Time. ’n Studie is van meer as 1 000 mense gemaak, vanaf geboorte tot op die ouderdom van 32. Die waarskynlikheid was omtrent drie keer groter dat “dié wat [as kinders] impulsiewer was en makliker gefrustreerd geraak het en vir wie dit moeiliker was om nie dadelik hulle sin te kry nie of om hulle beurt af te wag”, as volwassenes swak gesondheid sou hê, ’n lae inkomste sou verdien, enkelouers sou wees of hulle aan ’n misdaad sou skuldig maak. Maar “selfbeheersing kan aangeleer word”, sê die tydskrif, en dit voeg by: “As kinders van kleins af by die skool en in die gesin geleer word om hulleself te beheers, sal hulle moontlik gesonder en stabieler volwassenes wees.”
Slegte bestuurders word ’n les geleer
Die owerheid in Indië gebruik nuwe metodes om die ergste verkeersoortreders ’n les te leer deur hulle as verkeersbeamptes te laat werk. Die doel is om bestuurders te help besef hoe moeilik dit is om die chaos wat hulle veroorsaak, te hanteer. In plaas daarvan om bestuurders net voor te keer en te beboet, vereis die verkeerspolisie in Gurgaon, in noordwestelike Indië, nou ook dat bestuurders ’n halfuur of langer saam met die konstabels werk om die verkeer te reël. Party bestuurders erken dat die les hulle gesindheid verander het. “Ons reik elke dag duisend [boetes] uit in Gurgaon vir verkeersoortredings”, sê Bharti Arora, die plaaslike adjunkkommissaris van die polisie. “Ons kan elke dag 1 000 ekstra ‘konstabels’ hê.”