Koninkryksverkondigers berig

“Wees heilig”

GOD se raad aan Christene is om “nie jul lewe [in te rig] volgens die begeerlikhede wat tevore in julle onwetendheid bestaan het nie. Maar soos Hy wat julle geroep het, heilig is, moet julle ook in jul hele lewenswandel heilig word, omdat daar geskrywe is: Wees heilig, want Ek is heilig” (1 Petrus 1:14-16). Sulke heilige gedrag is dikwels ’n goeie getuienis vir ander (1 Petrus 2:12). Soos die volgende ondervindinge toon, bring opregte persone dwarsoor die wêreld die nodige veranderinge aan om hulle gedrag in ooreenstemming met hierdie raad te bring.

◻ In Ecuador het ’n man sy Bybelstudie stopgesit toe die Getuie wat met hom gestudeer het weens onsedelikheid uitgesit is. Sy geestelike behoefte het hom beweeg om ander godsdienste te ondersoek. Hy het die Evangeliese godsdiens aanvaar en vooruitgang gemaak totdat hy ’n pastor van sy eie kerk geword het. Sy gewete het hom egter gepla, aangesien hy nie getroud was met die vrou met wie hy saamgelewe het nie. Toe hy met pastors van ander kerke oorleg gepleeg het, het hulle hom verseker dat dit nie ’n probleem was nie. Hy het egter gevoel dat dit nie reg was nie, aangesien die Getuie wat met hom gestudeer het weens onsedelikheid uitgesit is. Hy kon nie verstaan waarom hy nie deur sy kerk tereggewys word nie. Later het die vrou met wie hy saamgelewe het met Jehovah se Getuies in aanraking gekom en saam met hulle begin studeer. Die man het saam met haar begin studeer. Albei woon nou die vergaderinge by, neem toe in kennis van Bybelbeginsels en doen stappe om te trou sodat hulle Jehovah op ’n rein en aanvaarbare wyse kan dien.

◻ ’n Getuie vertel ’n ander ondervinding in Ecuador: “In Februarie 1984 het ’n bejaarde dame ons gevra om met haar te studeer.” Wat het agter hierdie versoek gesit? Die dame se broer het een van Jehovah se Getuies geword, en sy voorbeeldige gedrag het haar diep beïndruk. Gedurende die tweede Bybelstudie het hulle die rookgewoonte bespreek, wat een van die dame se probleme was. By die volgende studie ’n week later het sy egter trots aangekondig dat sy nie een sigaret gerook het sedert sy geleer het wat die Bybel se beskouing van rook is niel Sy het nog ’n probleem gehad—haar huis was vol godsdiensbeelde. Maar nadat sy Deuteronomium 7:26 gelees het, wat lui: “En jy mag geen gruwel in jou huis inbring nie . . . Dit is onder die banvloek”, het sy dit alles verbrand.

Van toe af het sy die vergaderinge begin bywoon en het sedertdien nie een gemis nie. Kort daarna het sy haar grootste hindernis te bowe gekom—sy het ’n onsedelike verhouding met ’n getroude man verbreek. Sy kon toe vir die eerste keer in haar lewe ware geluk smaak, aangesien sy Jehovah met ’n rein gewete kan dien. Sy is in April 1985 gedoop en het op daardie tydstip vier Bybelstudies met ander gehou. Haar volgende doelwit is om ’n pionier te word, aangesien dit volgens haar die beste manier is waarop sy haar waardering vir Jehovah kan toon, wat haar van “’n tevergeefse en onsedelike lewe” bevry het.

◻ Die uitstekende resultate van godvrugtige gedrag is in ’n meisiekosskool in Kenia gesien, waar die goeie gedrag van ’n Getuie op ’n buitengewone manier opmerklik geword het. Nege onderwysers, waarvan een ’n getuie van Jehovah is, is deur die skool aangestel. Maar hulle moes een na die ander afgedank word weens geslagsonsedelikheid met die leerlinge. Na ’n ruk was net een van die nege oor—die onderwyser wat een van Jehovah se Getuies is!

Mense wat ’n onsedelike lewe gelei het, kan inderdaad verander. Wanneer ons ‘in ons hele lewenswandel heilig word’, gee ons nie net ’n goeie getuienis vir ander nie, maar maak ons ook Jehovah se hart bly. So kom ons in aanmerking vir die ewige lewe.—Spreuke 27:11.

[Venster op bladsy 21]

“Want Ek is [Jehovah] julle God; toon dan dat julle heilig is en wees heilig, want Ek is heilig.”—Levitikus 11:44.

[Lokteks op bladsy 21]

“Laat ons ons van alle besoedeling van die vlees en die gees reinig.”—2 Korinthiërs 7:1.