Waarom was God nog altyd so geduldig?
KYK na die mismoedige gesiggie van ’n kind wat honger ly. Kyk hoe uitgeteer is sy liggaampie en hoe opgeswel is sy magie. Dink daaraan hoe dringend hy voedsel nodig het, en kyk na die leë kommetjie in sy hand. Sy ma kyk miskien toe deur oë wat agter in haar kop sit terwyl haar strak gesig ’n prentjie van wanhoop is. Probeer dan jou droefheid onderdruk—ja, en probeer jou trane bedwing.
Hierdie toneel speel hom miljoene kere af in die 6 miljoen vierkante kilometer van die hongergeteisterde landstreek wat die Sahel genoem word. Die Sahel strek meer as 4 800 kilometer ver oor Afrika suid van die Saharawoestyn, van Senegal aan die Atlantiese kus tot by Ethiopië aan die Rooi See. Hongersnood bedreig natuurlik ook tallose mense in ander lande. Die Wêreldgesondheidsorganisasie berig dat nagenoeg 1,1 miljard mense wêreldwyd ernstig siek is of aan wanvoeding ly.
Honger is natuurlik net een aspek van menselyding. Die mens besoedel die aarde, en ons almal word daardeur geraak. Politieke stelsels keur onreg en oorlogvoering goed wat vir baie mense ellende en die dood meebring. Waarom laat God sulke dinge toe? Gee hy vir ons om?
God gee wel om!
Ons Skepper gee wel vir ons om. Daar is oorgenoeg bewys hiervan en van sy vermoë om alle dinge ten goede te laat meewerk vir ons en vir die harmonie in sy ganse skepping. Kyk byvoorbeeld na die bygaande prentjie van ’n by wat ’n bloeisel aan ’n vrugteboom besoek. Die by is afhanklik van die bloeisel vir die nektar wat hy nodig het vir voedsel. Die boom is weer afhanklik van die stuifmeel wat die by se liggaam van ’n boom van dieselfde soort af oordra. Op hierdie manier word die bloeisel bestuif sodat ’n vrug kan ontwikkel. Nie alle vrugtebome word so bestuif nie, maar God het beslis in hierdie geval ’n merkwaardige samewerking bewerkstellig. En as gevolg van sy goedhartigheid word vrugte voortgebring wat ons met genot kan eet en wat vir ons goed is.
Die by self is deel van ’n goed georganiseerde swerm van meer as 30 000 bye. Sommige bewaak die nes terwyl ander dit skoonmaak of dit ventileer. Ander vergaar weer nektar en stuifmeel, voed die larwes of gaan uit om na nuwe nektarbronne te soek. God het dinge so gereël dat ons baat vind daarby wanneer sulke vlytige bye soet en voedsame heuning maak wat so lekker smaak.
Die wonder van die samewerking tussen bye en plante en onder die insekte self is slegs een van baie bewyse dat die Skepper volkome by magte is om lewende dinge met mekaar te laat saamwerk. Trouens, “God is nie ’n God van wanorde nie, maar van vrede” (1 Korinthiërs 14:33). Waarom het hy die mens dan toegelaat om in sulke onenigheid te leef wat vir soveel mense ellende tot gevolg het? Waarom het God, as hy vir ons omgee, so lank gewag om hierdie situasie reg te stel? Trouens, waarom was God nog altyd so geduldig?
God se Woord, die Bybel, beantwoord hierdie vrae. Hierdie merkwaardige boek deel ons mee dat Jehovah God om ’n baie goeie rede nog altyd geduldig was. Wat is daardie rede? En hoe lank sal God nog geduldig wees?
[Foto-erkenning op bladsy 2]
Cover photo: Frilet/Sipa