Onthou jy?

Het jy dit geniet om die onlangse nommers van Die Wagtoring te lees? Kyk dan of jy die volgende vrae kan beantwoord:

▫ Watter praktiese hulp kan vandag aan siekes en bejaardes in die gemeente verleen word?

In die vroeë Christengemeente is daar ’n lys gehou van weduwees wat materiële ondersteuning nodig gehad het (1 Timotheüs 5:9, 10). Ouere manne kan vandag ook ’n lys opstel van siekes en bejaardes wat spesiale aandag nodig het. Dit moet egter nie aan die ouere manne alleen oorgelaat word om die voortou hiermee te neem nie. Almal in die gemeente moet bewus wees van sulke behoeftes (1 Timotheüs 5:4-8).—8/15, bladsye 28-9.

▫ Is die Bybelverhaal van Jona wat deur ’n seedier ingesluk is vergesog?

Nee, ’n potvis, ’n groot blouhaai of ’n walvishaai kan ’n mens insluk. Daarbenewens het Jesus self bevestig dat die verslag van Jona waar is (Mattheüs 12:39, 40).—8/15, bladsy 32.

▫ Watter gevaar hou die bygelowige gebruik van amulette en gelukbringers in?

Die gebruik daarvan veroorsaak eintlik dat mense nie hulle probleme op ’n intelligente wyse aanpak nie en dit moedig hulle aan om geluk as die antwoord op alles te beskou. Dit gee die gebruiker ook ’n valse gevoel van veiligheid. Nog belangriker is die feit dat iemand wat op die mag van amulette en gelukbringers vertrou die beheer van sy lewe aan onsigbare demoniese magte kan oorgee.—9/1, bladsy 4.

▫ Wat is vier faktore wat kan help om ’n huwelik te laat hou?

Dit is die gewilligheid om te luister, die vermoë om om verskoning te vra, die vermoë om voortdurend emosionele ondersteuning te gee en die begeerte na liefdevolle aanraking (1 Korinthiërs 13:4-8; Efesiërs 5:33; Jakobus 1:19).—9/1, bladsy 20.

▫ Wat is een manier waarop Jehovah volharding verskaf aan die wat voor beproewinge te staan kom?

Jehovah doen dit deur die voorbeelde van volharding wat in sy Woord, die Bybel, opgeteken is (Romeine 15:4, NW). Wanneer ons daaroor peins, word ons aangemoedig om te volhard en ons leer ook baie oor hóé ons kan volhard.—9/15, bladsye 11-12.

▫ Wat is godvrugtige toegewydheid?

Godvrugtige toegewydheid verwys na toegewydheid aan Jehovah wat ons beweeg om te doen wat hom behaag, selfs wanneer ons voor swaar beproewinge te staan kom, omdat ons God uit die hart liefhet.—9/15, bladsy 15.

▫ Hoe moet ons God se genade beskou?

Ons moet God se groot genade nooit geringag nie. Ons moet soos Paulus wees en ons waardering toon deur teen ons eie onvolmaaktheid te stry (1 Korinthiërs 9:27). Sodoende toon ons, selfs wanneer ons voor probleme te staan kom, dat ons ’n opregte begeerte het om te doen wat reg is.—10/1, bladsy 23.

▫ Waarom is dit gepas dat Paulus lankmoedigheid as die eerste aspek van die liefde gemeld het?

Daar is al gesê dat daar geen Christenbroederskap kan wees sonder lankmoedigheid of sonder dat ons mekaar geduldig verdra nie. Dit is omdat ons almal onvolmaak is, en ons onvolmaakthede en tekortkominge is vir ander ’n beproewing. Lankmoedigheid is dus uiters belangrik as broers liefde onder mekaar wil hê.—10/15, bladsy 21.

▫ Het die vroeë Christene God se naam gebruik?

Die bewyse toon dat hulle dit wel gedoen het. Jesus het sy volgelinge geleer om tot God te bid: “Laat u Naam geheilig word” (Mattheüs 6:9). En teen die einde van sy bediening het hy gebid: “Ek het u Naam geopenbaar aan die mense wat U My uit die wêreld gegee het” (Johannes 17:6). Daarbenewens het vroeë kopieë van die Septuagint God se naam in die vorm van die Hebreeuse Tetragrammaton bevat.—11/1, bladsy 30.

▫ Watter Bybelvoorbeelde toon dat die wyse waarop ons ons foute hanteer ons lewe kan beïnvloed?

Koning Saul het raad hardkoppig weerstaan en sy foute het toegeneem, en dit het eindelik daartoe gelei dat hy in onguns by God gesterf het (1 Samuel 15:17-29). Daarenteen het koning Dawid, ondanks sy foute en sondes, op berouvolle wyse tugtiging aanvaar en getrou aan Jehovah gebly. Hierdie Bybelvoorbeelde toon dat dit ons help om ’n goeie verhouding met God te behou en dat ons gevolglik die vooruitsig het om vir ewig te lewe as ons ons foute erken (Psalm 32:1-5).—11/15, bladsye 29-30.

▫ Hoe help Jehovah sy volk wanneer hulle weens natuurrampe of ander oorsake in die nood verkeer?

Jehovah help, nie deur op wonderdadige wyse die natuurkragte skadeloos te maak of deur ’n ander bonatuurlike daad te gebruik nie, maar deur ’n ander krag wat die meeste mense nie werklik begryp nie—liefde. Ja, Jehovah het sy volk werklik lief, en hy het onder hulle ’n liefde vir mekaar teweeggebring wat so sterk is dat hy vir hulle ongelooflike dinge kan doen (1 Johannes 4:10-12, 21).—12/1, bladsy 10.