Die kerke bieg

“Die Pous laat die Kerk teregstaan.” “Inkwisisie en anti-Semitisme—Die Kerk berei sy mea culpa voor.”a “Mea culpa vir die Nazi-slagting.” “Metodiste vra die Indiane van die Verre Weste om verskoning.”

HET jy al sulke opskrifte gelees? Dit lyk asof kerke al hoe meer skuld erken en verskoning vra vir wat hulle deur die eeue heen gedoen het. Die media vestig gedurig die aandag op die Pous se nuwe mea culpas.

Wanneer die Pous vergifnis vra

Tussen 1980 en 1996 het Johannes-Paulus II ten minste 94 keer ‘die Kerk se geskiedkundige foute erken of vergifnis gevra’, sê die Vatikaanse kommentator Luigi Accattoli in sy boek Quando il papa chiede perdono (Wanneer die Pous vergifnis vra). Volgens Accattoli is dit “in die Katolieke Kerk net die Pous wat tereg ’n mea culpa kan doen”. En dit het hy gedoen met verwysing na die mees omstrede bladsye van die Katolieke geskiedenis—die Kruistogte, oorloë, ondersteuning van diktatorskappe, verdeeldheid in die kerke, anti-Semitisme, die Inkwisisies, die Mafia en rassisme. In ’n memorandum wat in 1994 aan die kardinale gestuur is (wat sommige as die belangrikste dokument van die pousskap beskou), het Johannes-Paulus II “’n algemene belydenis van dié millennium se sondes” voorgestel.

Etlike aartsbiskoppe het die Pous se voorbeeld gevolg. In Desember 1994 het die Italiaanse koerant Il Giornale berig: “Talle Amerikaanse biskoppe het op televisie verskyn en in die openbaar vergifnis gevra.” Waarvoor? Omdat hulle die kwessie van pedofielpriesters onderskat het, tot nadeel van talle jong slagoffers. In Januarie 1995 het die koerant La Repubblica verslag gedoen oor “’n gebaar wat ongekend in die geskiedenis van eietydse Katolisisme is”—die kwessie van pous Pius XII se stilswye met betrekking tot die Nazi-slagting is aangeroer. In Januarie 1995 het dieselfde koerant berig dat die Duitse bisdom vergifnis gevra het vir die “talle foute” van Rooms-Katolieke wat die wandade van die Nazi’s gesteun het. Verskeie Protestantse kerke het hulle ook aan selfkritiek onderwerp.

Waarom?

Die Bybel spoor ons aan om vergifnis te vra wanneer ons verkeerd gedoen het, en baie mense prys die kerke wanneer hulle hulle aan selfkritiek onderwerp (Jakobus 5:16). Maar waarom doen die kerke dit? Hoe moet dit ons beskouing van hulle raak?

[Voetnoot]