Waardeer Jehovah se eienskappe ten volle

1. (a) Watter eienskappe van Jehovah kan ’n Christen van naderby ondersoek? (b) Hoe sal ons by so ’n ondersoek baat vind?

WATTER eienskappe kom by jou op wanneer jy aan Jehovah se persoonlikheid dink? Baie van ons dink aan liefde, geregtigheid, wysheid en krag. Maar ons besef dat Jehovah talle ander innemende eienskappe het. Trouens, ’n lys kan gemaak word van meer as 40 van Jehovah se eienskappe, en elkeen is al in ons publikasies bespreek. Stel jou net voor wat ’n skatkis van fassinerende feite oor Jehovah se persoonlikheid ons gedurende ons persoonlike of gesinstudie kan ontdek! Hoe kan ons by so ’n studie baat vind? Dit kan ons waardering vir ons hemelse Vader vergroot. En hoe groter ons waardering vir Jehovah is, hoe sterker sal ons begeerte wees om nader aan hom te kom en hom na te volg.—Jos. 23:8; Ps. 73:28.

2. (a) Lig toe hoe ons groter waardering vir Jehovah se eienskappe kan ontwikkel. (b) Wat sal ons bespreek?

² Wat beteken dit egter om iets te “waardeer”? Dit beteken dat ’n mens besef wat die regte waarde daarvan is. Waardering kan geleidelik toeneem. Ter toeligting: Ons waardering vir ’n nuwe gereg neem toe namate ons eers die geur daarvan kry, dan aan elke happie daarvan smul en dit uiteindelik self voorberei. Net so kan ons groter waardering vir ’n eienskap van Jehovah ontwikkel deur meer daarvan te leer, daaroor na te dink en hom dan na te volg deur dit self in ons lewe te openbaar (Ef. 5:1). Die doel van hierdie artikel en die volgende twee is om ons waardering te vergroot vir dié eienskappe van God waaraan ons nie so dikwels dink as sy hoofeienskappe nie. In die geval van elke eienskap sal ons bespreek: Wat beteken dit? Hoe openbaar Jehovah dit? En hoe kan ons Jehovah navolg deur hierdie spesifieke eienskap aan die dag te lê?

JEHOVAH IS TOEGANKLIK

3, 4. (a) Hoe sal jy ’n toeganklike persoon beskryf? (b) Hoe verseker Jehovah ons dat hy toeganklik is?

³ Kom ons bespreek eers die eienskap van toeganklikheid. Hoe sal jy iemand beskryf wat toeganklik is? Jy sal dalk sê: ‘Iemand wat vriendelik is, altyd bereid is om te luister en maklik is om mee te praat.’ Jy kan dikwels sien of iemand toeganklik is of nie deur te luister na wat hy sê en deur sy lyftaal dop te hou—sy gebare, gesigsuitdrukkings en ander nieverbale tekens.

⁴ Hoe toon Jehovah dat hy toeganklik is? Al is hy die almagtige Skepper van ons uitgestrekte heelal, verseker Jehovah ons dat hy bereid en gretig is om na ons gebede te luister en dit te verhoor. (Lees Psalm 145:18; Jesaja 30:18, 19.) Ons kan te eniger tyd of op enige plek en so lank as wat ons wil, met God praat. Ons kan hom vryelik nader in die wete dat hy ons nooit daarvoor sal verwyt nie (Ps. 65:2; Jak. 1:5). God se Woord beskryf Jehovah in menslike terme om te toon dat hy wil hê dat ons hom moet nader. Die psalmis Dawid het byvoorbeeld geskryf dat “die oë van Jehovah . . . op die regverdiges [is]” en dat sy ‘regterhand ons stewig vashou’ (Ps. 34:15; 63:8). Die profeet Jesaja het Jehovah met ’n herder vergelyk en gesê: “Met sy arm sal hy die lammers bymekaarbring; en in sy boesem sal hy hulle dra” (Jes. 40:11). Stel jou net voor! Jehovah wil hê dat ons net so na aan hom moet wees soos ’n lammetjie wat snoesig in die boesem van ’n liefdevolle herder lê. Wat ’n toeganklike Vader het ons tog! Hoe kan ons Jehovah in hierdie verband navolg?

’N KOSBARE EIENSKAP

5. Waarom is dit vir ouer manne belangrik om toeganklik te wees?

⁵ Ywerige Getuies van verskillende vastelande is onlangs gevra: “Watter eienskap waardeer jy die meeste in ’n ouer man?” Die oorgrote meerderheid het geantwoord: “Toeganklikheid.” Elke Christen moet hierdie eienskap natuurlik na die beste van sy vermoë aankweek, maar dit is veral vir ouer manne belangrik om toeganklik te wees (Jes. 32:1, 2). Een suster het gesê waarom sy dink hierdie eienskap so belangrik is: “Ons kan slegs by ’n ouer man se ander goeie eienskappe baat vind as hy toeganklik is.” Kan jy sien waarom hierdie redenasie logies is? Wat maak ’n persoon egter toeganklik?

6. Wat is ’n sleutel tot toeganklikheid?

⁶ ’n Sleutel tot toeganklikheid is om ware belangstelling in ander te toon. As ’n ouer man vir ander omgee en bereid is om van homself te gee, sal sy broers en susters, insluitende jongmense, waarskynlik hierdie gesindheid aanvoel (Mark. 10:13-16). Die 12-jarige Carlos sê: “Ek sien hoe die ouer manne in die saal glimlag en liefdevol optree, en ek hou daarvan.” Dit is natuurlik nie genoeg vir ’n ouer man om te sê dat hy toeganklik is nie; hy moet hierdie eienskap openbaar (1 Joh. 3:18). Hoe kan hy dit doen?

7. Waarom gee ’n lapelkaart dikwels aanleiding tot ’n gesprek, en watter les kan ons hieruit leer?

⁷ Kyk na hierdie vergelyking. ’n Tydjie gelede het ’n broer sy byeenkomslapelkaart op die vliegtuig gedra toe hy teruggereis het van ’n byeenkoms wat hy in die buiteland bygewoon het. Toe die vlugkelner die lapelkaart met die woorde “Laat God se Koninkryk kom!” sien, het hy vir die broer gesê: “Ja, laat dit kom—ons moet verder hieroor praat.” Later het hulle toe gesels, en die vlugkelner het ons tydskrifte met graagte geneem. Baie van ons het al soortgelyke ondervindinge gehad. Waarom gee ’n lapelkaart dikwels aanleiding tot ’n gesprek? Omdat dit as ’t ware vir mense sê: “Kom praat gerus met my. Vra my waarheen ek gaan.” Die lapelkaart is ’n sigbare teken wat mense laat weet dat ons bereid is om oor ons oortuigings te praat. Net so wil Christen- ouer manne sigbare tekens uitstuur wat vir hulle medegelowiges sê: “Voel vry om my te nader.” Wat is ’n paar van hierdie tekens?

8. Hoe toon ouer manne hulle opregte belangstelling in ander, en watter uitwerking het dit op die gemeente?

⁸ Gebruike verskil moontlik van een land na die ander, maar dit is gewoonlik vir ons broers en susters ’n teken dat ons opreg in hulle belangstel as ons vriendelik glimlag, hulle hartlik die hand gee of hulle ontspanne groet. Wie moet die inisiatief hierin neem? Let op Jesus se voorbeeld. Matteus sê in sy verslag dat Jesus by ’n vergadering met sy dissipels “nader gekom [het] en met hulle gepraat” het (Matt. 28:18). Vandag moet ouer manne eweneens die inisiatief neem om medegelowiges te nader en met hulle te gesels. Watter uitwerking kan dit op die gemeente hê? ’n Pioniersuster wat 88 jaar oud is, het gesê: “Die hartlike glimlagte en aanmoedigende woorde waarmee die ouer manne my verwelkom wanneer ek by die Koninkryksaal instap, maak dat ek al hoe liewer vir hulle word.” Nog ’n getroue suster het bygevoeg: “Dit word dalk as iets kleins beskou, maar wanneer ’n ouer man my by die vergadering met ’n glimlag verwelkom, beteken dit vir my baie.”

TOEGANKLIK EN BESKIKBAAR

9, 10. (a) Watter uitstekende voorbeeld stel Jehovah? (b) Hoe kan ouer manne vir ander beskikbaar wees?

⁹ Mense kan ons natuurlik nie nader as ons nie beskikbaar is nie. Jehovah stel ’n uitstekende voorbeeld in hierdie verband. “Hy [is] nie ver van elkeen van ons af . . . nie” (Hand. 17:27). Een manier waarop ouer manne vir ander beskikbaar kan wees, is deur voor en ná Christelike vergaderinge tyd opsy te sit om met hulle broers en susters—jonk en oud—te gesels. ’n Pionierbroer het gesê: “Wanneer ’n ouer man my vra hoe dit gaan en dan na my antwoord luister, voel ek dat ek waardeer word.” ’n Suster wat Jehovah al byna 50 jaar lank dien, het gesê: “Ouer manne wat tyd neem om ná die vergadering met my te gesels, laat my voel dat hulle my waardeer.”

¹⁰ Christenherders moet weliswaar ook ander pligte nakom. Maar dit moet hulle doelwit wees om eers aan die skape aandag te skenk.

JEHOVAH IS ONPARTYDIG

11, 12. (a) Wat behels dit om onpartydig te wees? (b) Hoe stel Jehovah vir ons ’n voorbeeld in onpartydigheid?

¹¹ Onpartydigheid is nog een van Jehovah se innemende eienskappe. Wat beteken dit om onpartydig te wees? Dit behels om mense regverdig te behandel, sonder vooroordeel of partydigheid. Ware onpartydigheid het twee elemente: gesindheid en dade. Waarom is albei nodig? Want slegs as iemand onpartydig is wat sy beskouing betref, sal hy beweeg word om almal met onpartydigheid te behandel. In die Christelike Griekse Geskrifte beteken die uitdrukking “nie partydig” letterlik “nie ’n aannemer van aangesigte . . . nie”, dit wil sê, hy begunstig nie een gesig bo ’n ander nie (Hand. 10:34; Kingdom Interlinear). Iemand wat onpartydig is, konsentreer dus nie op ’n persoon se uiterlike voorkoms of omstandighede nie, maar op sy of haar karakter as ’n persoon.

¹² Jehovah stel die beste voorbeeld in onpartydigheid. Sy Woord sê dat hy “nie partydig is nie” en dat hy “niemand partydig behandel” nie. (Lees Handelinge 10:34, 35; Deuteronomium 10:17.) ’n Situasie wat in Moses se dag ontstaan het, lig hierdie feit toe.

13, 14. (a) Voor watter situasie het die vyf dogters van Selofhad te staan gekom? (b) Hoe het Jehovah onpartydigheid geopenbaar?

¹³ Net voordat die Israeliete die Beloofde Land sou ingaan, het vyf ongetroude vleeslike susters hulle in ’n dilemma bevind. Wat was dit? Hulle het geweet dat die gesin, soos ander Israelitiese gesinne, ’n stuk grond sou ontvang wat as erfdeel aan hulle vader gegee is (Num. 26:52-55). Maar hulle vader, Selofhad van die stam Manasse, het afgesterf. Volgens die gebruik moes Selofhad se seuns die grond ontvang, maar hy het net dogters gehad (Num. 26:33). Sou die gesin se grond aan familielede gegee word en die dogters sonder ’n erfdeel gelaat word, aangesien daar nie ’n seun in die gesin was om die grond te ontvang nie?

¹⁴ Die vyf susters het Moses genader en hom gevra: “Waarom sou die naam van ons vader uit sy familie weggeneem word omdat hy geen seun gehad het nie?” Hulle het gepleit: “Gee tog vir ons ’n besitting onder ons vader se broers.” Het Moses gereageer deur te sê: ‘Daar is geen uitsonderings op die reël nie’? Nee, hy het “hulle saak voor Jehovah gebring” (Num. 27:2-5). Wat was Jehovah se antwoord? Hy het vir Moses gesê: “Die dogters van Selofhad het gelyk. Jy moet hulle vir seker ’n erflike besitting onder hulle vader se broers gee, en jy moet hulle vader se erfdeel op hulle laat oorgaan.” Jehovah het selfs verder gegaan. Hy het die uitsondering in ’n reël verander en Moses beveel: “As iemand sterf sonder dat hy ’n seun het, dan moet julle sy erfdeel op sy dogter laat oorgaan” (Num. 27:6-8; Jos. 17:1-6). Van toe af sou Israelitiese vroue wat hulle in dieselfde benarde situasie bevind, beskerm word.

15. (a) Hoe behandel Jehovah sy volk, veral dié wat kwesbaar is? (b) Watter ander Bybelverslae toon dat Jehovah onpartydig is?

¹⁵ Wat ’n liefdevolle en onpartydige besluit was dit tog! Jehovah het hierdie vroue, wat in ’n kwesbare situasie was, met waardigheid behandel, net soos hy Israeliete behandel het wat gunstiger omstandighede gehad het (Ps. 68:5). Dit is net een van baie Bybelverslae wat hierdie hartverblydende feit toelig: Jehovah behandel al sy knegte met onpartydigheid.—1 Sam. 16:1-13; Hand. 10:30-35, 44-48.

ONS KAN JEHOVAH NAVOLG

16. Hoe kan ons in voller mate onpartydigheid openbaar?

¹⁶ Hoe kan ons Jehovah se onpartydigheid navolg? Onthou, onpartydigheid behels twee elemente. Slegs as ons onpartydig is, sal ons ander onpartydig behandel. Ons almal wil graag dink dat ons onbevooroordeeld en onpartydig is. Maar jy sal waarskynlik saamstem dat dit nie altyd maklik is om ons eie gevoelens objektief te beoordeel nie. Wat kan ons dan doen om uit te vind of ons bekend staan as iemand wat onbevooroordeeld is? Wel, toe Jesus wou uitvind wat mense oor hom sê, het hy sy vertroude vriende gevra: “Wie sê die mense is die Seun van die mens?” (Matt. 16:13, 14). Volg gerus sy voorbeeld na. Jy kan ’n vriend wat jy weet met jou eerlik sal wees, vra of jy as ’n onpartydige persoon beskou word. Wat moet jy doen as hy of sy sê dat jy nog steeds tekens van rasse-, sosiale of ekonomiese vooroordeel toon? Dan moet jy ernstig oor jou gevoelens tot Jehovah bid en hom smeek om jou te help om jou gesindheid te verander sodat jy sy onpartydigheid in voller mate kan weerspieël.—Matt. 7:7; Kol. 3:10, 11.

17. Op watter maniere kan ons ander onpartydig behandel?

¹⁷ In die Christengemeente toon ons ons begeerte om Jehovah se onpartydigheid na te volg deur al ons broers en susters met waardigheid en liefderyke goedhartigheid te behandel. Wanneer ons byvoorbeeld gasvryheid betoon, kan ons medegelowiges van alle agtergronde nooi, insluitende dié wie se agtergrond van ons s’n verskil asook armes, wese en weduwees. (Lees Galasiërs 2:10; Jakobus 1:27.) Wat meer is, ons toon onpartydigheid terwyl ons die Koninkrykspredikingswerk doen deur mense van alle agtergronde, insluitende dié van ander lande, van die goeie nuus te vertel. Hoe bly is ons tog dat ons Bybellektuur in sowat 600 tale het—’n tasbare bewys van onpartydigheid!

18. Hoe sal jy toon dat jy Jehovah se toeganklikheid en onpartydigheid waardeer?

¹⁸ Ja, wanneer ons die tyd uitkoop om oor Jehovah se toeganklikheid en onpartydigheid na te dink, sal ons groter waardering vir hom hê. Groter waardering moet ons dan weer beweeg om Jehovah se eienskappe ten volle na te volg en dit te openbaar in ons handelinge met ons medegelowiges en dié vir wie ons getuig.