Volg Jehovah se onpartydigheid na
1 Jehovah is besorg oor mense. Op ’n onpartydige wyse neem hy enigiemand aan wat sy wil doen (Hand. 10:34, 35). Toe Jesus vir mense gepreek het, was hy net so onpartydig (Luk. 20:21). Ons moet hulle voorbeeld navolg, soos Paulus, wat geskryf het: “Oor almal is daar dieselfde Here, wat ryk is teenoor almal wat hom aanroep.”—Rom. 10:12.
2 As ons aan almal wat ons ontmoet die goeie nuus van God se Koninkryk verkondig, gee ons heerlikheid aan God. Ons moet voortgaan om aan ander, ongeag hulle ras, sosiale status, opvoeding of finansiële posisie, hierdie wonderlike boodskap te verkondig (Rom. 10:11-13). Dit beteken dat ons die goeie nuus sal verkondig aan diegene wat wil luister—mans, vroue, jongmense en bejaardes. Ons moet aan elke deur klop om aan elke huisbewoner die geleentheid te gee om die waarheid te hoor.
3 Toon belangstelling in almal: Ons doelwit is om met soveel mense as moontlik in aanraking te kom. Met dit in gedagte het sommige verkondigers met welslae vir mense getuig in spreekkamers, hospitale, verpleeginrigtings, welsynskantore en rehabilitasiesentrums. Daarbenewens het verkondigers vir begrafnisondernemers, skoolhoofde en -voorligters asook regters getuig. Wanneer ’n mens amptenare nader, is dit gepas om waardering uit te spreek vir die nuttige dienste wat hulle aan die gemeenskap lewer. Wees beleef en kies tydige artikels wat spesifiek handel oor hulle soort werk en die verwante probleme daaraan verbonde.
4 In een geval het ’n suster dit reggekry om met ’n regter in sy kantoor te praat. Ná ’n lewendige gesprek het hy gesê: “Weet jy wat ek omtrent Jehovah se Getuies waardeer? Hulle het gegronde beginsels waarvan hulle nie afwyk nie.” ’n Goeie getuienis is aan hierdie invloedryke persoon gegee.
5 Ons kan nie mense se harte lees nie. Maar as ons met almal praat wat ons ontmoet, toon ons ons geloof in God se vermoë om ons werk te rig. Dit gee mense boonop die voorreg om die boodskap van hoop te hoor en daarop te reageer (1 Tim. 2:3, 4). Kom ons gebruik ons tyd verstandig en probeer Jehovah se onpartydigheid navolg deur almal wat ons kan met die goeie nuus te bereik.—Rom. 2:11; Ef. 5:1, 2.