Hoe om te onderrig wanneer mense besware opper
1 Onderrigting in die huis-tot-huisbediening bied ’n uitdaging. Mense verwag ons nie, en party probeer dus ’n bespreking vermy sodat hulle gou kan terugkeer na wat hulle besig was om te doen. Maar goed voorbereide inleidings kan belangstelling in die Koninkryksboodskap wek en selfs besware te bowe kom. Dit is ons doel om meer mense te help om die waarheid te leer, en as ons dit doen, sal ons die uitdaging aanvaar om hulle die goeie nuus te “leer”.—Matt. 28:19.
2 Het jy agtergekom dat daar in baie gebiede gewoonlik twee of drie algemene besware is wat die meeste huisbewoners opper? Ten einde bekwame onderrigters van die goeie nuus te wees, moet ons noukeurig voorberei en dit met vriendelikheid en takt te bowe kom. (Vergelyk Prediker 12:10.) Waar moontlik moet ons ’n belangrike gedagte oor die Koninkryk by mense probeer laat.
’N POSITIEWE BENADERING
3 ’n Positiewe beskouing van besware sal ons in ons onderrigting help, ’n Beswaar gee ons gewoonlik ’n mate van insig in die huisbewoner se denke. Trouens, dit kan selfs as ’n grondslag vir julle gesprek dien. Probeer ’n gedagte kry waaroor julle saamstem. Wees dan bereid om jou Skriftuurlike aanbieding dienooreenkomstig aan te pas.
4 Ter toeligting: As die persoon sê dat hy ’n Katoliek is, kan jy sê: “Dan het u ongetwyfeld al baie keer die Onse Vader gebid (Matt. 6:9-13). Ons bid ook dat God se Koninkryk moet kom en vra dat God se wil op die aarde moet geskied soos in die hemel. Het u al ooit gewonder wat God se Koninkryk is en hoe dit God se wil op die aarde teweeg sal bring?” Beantwoord dan daardie vrae nadat jy die huisbewoner kans gegee het om kommentaar te lewer. So ’n bespreking kan heel natuurlik tot ’n aanbieding van die Paradys op aarde-boek lei.
5 Hoe sal jy reageer as ’n persoon se: “Ek het my eie kerk”? Jy kan toon dat jy in hom belangstel deur vrae oor sy geloof of kerk te stel, soos: “Aan watter kerk behoort u, as ek mag vra?” Dan kan jy vra: “Waar is u kerk?” Noudat julle ’n gesprek voer en die huisbewoner sien dat jy na hom luister, kan jy se: “Ek is bly om dit te weet”, en dan jou aanbieding begin oor iets wat julle gemeen het, soos die modelgebed of wêreldtoestande. As die huisbewoner sê van watter kerk hy ’n lidmaat is,kan jy sê: “As ’n - wil u ongetwyfeld graag vrede op die aarde sien. Dink u dat daardie tyd ooit sal aanbreek? Indien wel, hoe?” Gaan dan voort met jou aanbieding van die Paradys op aarde-boek, en pas dit aan by die huisbewoner se antwoord en ons ‘Onderwerp vir gesprekke’.
6 Wanneer dit duidelik is dat die huisbewoner besig is, is dit moontlik beter om saaklik te wees en te reël om later weer te kom. Jy kan sê: “Ek waardeer dit dat u dit meld. In plaas van u tyd in beslag te neem, wil ek graag die boodskap in gedrukte vorm by u laat. Ek wou met u gesels oor [meld die titel van die tydskrif artikel]. Maar nou kan u dit lees wanneer u tyd het. Die twee tydskrifte kos slegs 50 sent.” Party verkondigers gebruik ’n soortgelyke antwoord maar doen die gewone lektuuraanbod.
VOORSIEN BESWARE
7 Soms kan besware voorsien word. Party verkondigers sê byvoorbeeld wanneer hulle sien dat ’n persoon besig is: “Ek besoek besige mense” en gaan dan met hulle gewone aanbieding voort.
8 Ten einde bekwame onderrigters in die huis-tot-huisbediening te wees, moet ons nadink oor hoe ons moontlike besware te bowe kan kom. As ons voorberei om bekwame onderrigters te wees, selfs wanneer ons besware teëkom, toon ons ons gehoorsaamheid aan Jesus se bevel en ons opregte belangstelling in die mense in ons gebied.—Eseg. 3:17-19.