Gebruik die somer wyslik
1 Skoolkinders word dikwels gevra wat hulle van plan is om gedurende die somervakansie te doen, en wanneer hulle teruggaan skool toe word hulle moontlik gevra om verslag te doen van wat hulle gedoen het. Trouens, dit sal goed wees as ons almal, jonk en oud, ons afvra: ‘Wat is ons van plan om met ons somermaande te doen? Wanneer die somer verby is, sal ons verslag kan doen van ’n lonende, produktiewe somer?’—Ef. 5:15, 16.
2 Vind baat by byeenkomste: Baie sal die “Liefhebbers van Vryheid”-Streekbyeenkoms bywoon. Dit sal goed wees as ons ons aantekeninge ná die tyd kan hersien om te sien watter punte ons geleer het en in ons lewe as lowers van Jehovah kan toepas. In Efesiërs 4:25 word ons aangemoedig om ‘elkeen die waarheid te spreek met sy naaste’. Ons intiemste naaste is lede van ons eie gesin. Ons kan die wonderlike geestelike voedsel wat ons gedurende die byeenkomsprogram ontvang het met hulle of met lede van ons geestelike gesin bespreek.
3 Neem deel aan die veldbediening: Is ons van plan om hierdie somer so ’n groot aandeel as moontlik in die bediening te hê? As ons by ons eie gemeente is, sal ons waarskynlik die gewone velddiensreëlings ondersteun. Ons kan moontlik aan aandgetuieniswerk deelneem, aangesien dit langer lig bly. Baie mense is saans tuis en is gewoonlik meer ontspanne, wat dit vir ons makliker maak om met hulle oor die goeie nuus van die Koninkryk te praat.—Jes. 50:4.
4 Wanneer ons ’n reis beplan om na ’n byeenkoms of met vakansie te gaan, moet ons sorg dat ons brosjures saamneem. Wanneer daar geleenthede is om informeel te getuig, kan ons die aandag op een van die brosjures vestig. Terwyl ons weg is van die huis kan ons dalk uitvind waar die plaaslike Koninkryksaal is sodat ons die vergaderinge kan bywoon en saam met die plaaslike broers en susters kan velddiens doen. Dit sal vir ons en die broers met wie ons omgaan ’n uitstekende bron van aanmoediging wees.—Rom. 1:12.
5 Indien ons nie aan die einde van die maand by ons tuisgemeente gaan wees nie, moet ons ons velddiensrapport vroeg genoeg aan die sekretaris pos, sodat dit by die rapport ingesluit kan word wat hy op die sesde van die volgende maand instuur. Anders kan ons dit by hom laat voordat ons vertrek, en enige getuieniswerk wat ons later doen, kan by die volgende maand se rapport ingesluit word.
6 Streef daarna om studies te hou: Daar word gewoonlik minder studies gedurende die somermaande gehou omdat Bybelstudente met vakansie gaan. Die een wat die studie hou, gaan miskien ook weg, maar op ’n ander tyd. Pleks dat weke verbygaan waartydens die studie nie gehou word nie, kan ons gerus reël dat iemand in die gemeente die studie hou terwyl ons weg is. Dit is goed om die studie so gereeld moontlik te hou sodat die student kan besef hoe belangrik dit is om gereeld geestelike voedsel in te neem.
7 Ons moet almal op die somer van 1991 kan terugkyk en voel dat ons, as toegewyde knegte van Jehovah, inderdaad die tyd wyslik gebruik het deur ‘die gesonde woorde as voorbeeld te hou’ en deur ander te help om die gesonde woorde van waarheid in Jehovah se Woord te leer.—2 Tim. 1:13.