Maak jy ten volle van Die Wagtoring en die Ontwaak! gebruik?
1 “Dit verbaas my keer op keer dat julle so ’n wye verskeidenheid uitstekende en waarlik interessante artikels—waarvan baie nie godsdienstig van aard is nie—teen so ’n lae prys aanbied. Hoewel ek min tyd vir myself het, het ek my al dikwels in die aande in my sitkamer gemaklik gemaak en julle tydskrifte by lamplig gelees. Ek wil julle weer eens hartlik bedank vir julle werk.” Hierdie betuiging van dank vir ons tydige tydskrifte is van ’n dokter in Wes-Duitsland ontvang. Ons kan ons afvra: Hoeveel waardering het ék vir Die Wagtoring- en die Ontwaak!-tydskrifte? Wat doen ek om hulle in die huise van mense in my gebied te kry?
2 Ons het onlangs die artikel “Die Wagtoring en die Ontwaak!—tydige tydskrifte van waarheid” in Die Wagtoring van 1 Januarie 1994 bestudeer. Dit is nou byna drie maande later. Het jy die uitstekende wenke wat gegee is, toegepas en daardeur jou tydskrifverspreiding verbeter? Die tak se tydskrifproduksiesyfers toon dat tydskrifverspreiding gedurende die afgelope paar jaar afgeneem het. Verkondigers versprei gemiddeld 4 tydskrifte per maand, hulppioniers 15 en gewone pioniers ongeveer 18.
3 In sommige gemeentes neem die verkondigers, waaronder talle jongmense, op ’n Woensdagaand aan die tydskrifwerk deel. In ander gebiede word baie sukses op ’n Vrydagmiddag behaal, aangesien skoolgaande verkondigers dan vry is om ook aan hierdie werk deel te neem. Aangesien baie van ons broers dit gerieflik vind om oor naweke aan die tydskrifwerk deel te neem, is gemeentes aangemoedig om spesifieke Saterdae vir hierdie doel opsy te sit. Bied die tydskrifte van huis tot huis, op straat, van winkel tot winkel en op tydskrifroetes aan. Ons wil almal aanmoedig om ’n groter aandeel daaraan te hê om ons tydskrifte van huis tot huis te versprei, aangesien dit die geleentheid vir herbesoeke en Bybelstudies skep.
4 Die ouere manne in julle gemeente sal julle van die reëlings vir tydskrifgetuieniswerk in kennis stel, as hulle dit nie alreeds gedoen het nie. Ouere manne en bedieningsknegte moet die leiding in tydskrifgetuieniswerk neem. Gaan jy hierdie reëlings ten volle ondersteun? Wat van julle jonges in die gemeente? Die tydskrifwerk was nog altyd vir ons jonger verkondigers iets spesiaals. Hoe kan ons ’n groter deelname aan tydskrifverspreiding hê?
5 Die Wagtoring het vier stappe uiteengesit. (1) Wees tydskrifbewus, (2) hou jou aanbieding eenvoudig, (3) wees aanpasbaar en (4) stel ’n persoonlike doelwit. Hou jy hierdie stappe duidelik voor oë? Het jy hulle al begin toepas en gevolglik ’n verbetering in jou tydskrifverspreiding gesien?
6 Dit is Jehovah se wil dat “alle mense gered word en tot kennis van die waarheid kom” (1 Tim. 2:4). Ons tydskrifte help mense om in hierdie sterwende stelsel van dinge ’n bevredigende lewe te lei, bied hulle ’n hoop op die toekoms en toon hoe hulle die ewige lewe kan verkry. Wat ’n voorreg het ons tog om hierdie tydskrifte van waarheid te gebruik om opregtes van hart te help sodat hulle die weg na die ewige lewe kan vind.