Lê goeie oordeel aan die dag wanneer jy gedurende die vakansie na belangstellendes teruggaan
1 Desember is ’n maand waartydens baie van die mense wat belangstelling in ons boodskap getoon het waarskynlik met vakansiebedrywighede besig sal wees. Wanneer ons na belangstellendes teruggaan, moet ons dus goeie oordeel aan die dag lê en dalk kort en saaklik wees, tensy die huisbewoner toon dat hy langer wil gesels.
2 Ons moet beplan wat ons gaan sê: Ons moet altyd duidelik in gedagte hê wat ons wil sê. Dit sal vereis dat ons ons aantekeninge van die vorige besoek deurgaan en ons herinner aan die gedagtes wat ons bespreek het, asook enige vrae wat ons onbeantwoord by die huisbewoner gelaat het.
3 As jy die wenk in paragraaf 3 van die artikel hierbo gebruik het, kan jy, wanneer jy teruggaan, sê:
◼ “Baie mense dink hierdie tyd van die jaar aan die geboorte van Christus. Toe ons laas gesels het, het ek belowe om jou iets interessants te vertel omtrent die stad waar Jesus gebore is. Het jy geweet dat die Bybel 700 jaar tevore voorspel het dat Jesus in Bethlehem gebore sou word?” Laat die huisbewoner antwoord. Dan kan jy, nadat jy Miga 5:1 gelees het, sê: “Dit is ’n merkwaardige profesie, nie waar nie? Dit is ’n interessante Bybelse feit, maar het jy geweet dat Bybelprofesieë ook in ons dag vervul word?” As die persoon die tyd het, kan ons die gesprek voortsit, of as hy besig is, kan ons aanbied om terug te kom en hierdie saak verder met hom bespreek.
4 As die traktaat “Die lewe in ’n vreedsame nuwe wêreld” by die huisbewoner gelaat is, kan ons die volgende sê:
◼ “Kyk wat sê dit hier op bladsy 3 onder die tussenhofie ‘Die lewe in God se nuwe wêreld’. Dit het betrekking op toestande wat onder God se Koninkryk sal heers. [Bespreek paragrawe een en twee en vestig die aandag op party van die tekste.] Sal jy onder sulke toestande wil lewe?” Sê vir die huisbewoner dat jy graag volgende week wil terugkom en nog ’n paar gedagtes in die traktaat wil bespreek. As die huisbewoner nog nie die Grootste mens-boek het nie, kan jy toon hoe hoofstuk 111 die teken wat Jesus gegee het wat die einde van die huidige goddelose stelsel van dinge sou kenmerk in meer besonderhede bespreek. Bied die boek vir hom aan.
5 Bied ’n tuisbybelstudie aan: As ons die Grootste mens-boek by die huisbewoner laat of as hy reeds ’n eksemplaar het, sal dit goed wees as ons ’n tuisbybelstudie demonstreer deur hoofstuk 111 te gebruik. Ons kan ’n soortgelyke metode gebruik as wat ons by die Gemeentelike Boekstudie gebruik. As die studie vorder, kan ons na een van die brosjures of direk na die Paradys op aarde-boek oorgaan.
6 Laat ons altyd vasbeslote wees om na alle belangstellendes terug te gaan. Ons moet goeie oordeel aan die dag lê en altyd probeer om ’n grondslag vir ’n toekomstige besoek te lê deur interessante vrae aan die einde van elke gesprek te vra. Dit sal ons help om “vir elke goeie werk volkome toegerus” te wees.—2 Tim. 3:17.