Benut jou tyd goed
1 Jehovah is tydsbewus. Hy wil hê dat ons ook van tyd bewus moet wees. Hy help ons deur sy organisasie om tydsbewus te wees. Ons word aangespoor om altyd ‘volop te hê om in die werk van die Here te doen’ (1 Kor. 15:58). So kan ons meer in Jehovah se diens verrig.
2 Elkeen van ons het elke week dieselfde hoeveelheid tyd—168 uur. Hoe goed benut ons ons tyd? Toon ons dat ons werklik weet hoe laat dit uit Jehovah se standpunt is? Word ons deur onbelangrike bedrywighede afgelei?
3 Dit is belangrik dat ons goed georganiseerd moet wees. Baie probeer ’n voorranglys hou. Elke besonderheid word in volgorde van belangrikheid op die lys geplaas. Hoe kan die belangrikheid bepaal word? Die Bybel sê dat ’n mens ‘die goeie vir al sy harde werk moet sien’ (Pred. 3:13, NW). Party take lewer beter resultate as ander. Dink aan die resultate wat elkeen sal meebring. Sal dit noemenswaardige voordele inhou om die werk te voltooi? Sal jy die “goeie sien” vir jou harde werk? Indien nie, is dit moontlik nie ’n taak wat voorkeur moet geniet nie.
4 In ons bediening: Ons waardeer dit wanneer ander betyds vir velddiensvergaderinge opdaag, aandagtig na instruksies luister en onmiddellik na die gebied vertrek. Ons wil eerder met die predikingswerk besig wees as om te wag. Paulus het klaarblyklik sterk gevoel oor die belangrikheid van goeie orde toe hy geskryf het: “Laat alles welvoeglik en volgens reëling geskied.”—1 Kor. 14:40.
5 Wanneer ons velddiens doen, kan ons gedurende koffiepouses kosbare tyd verloor. Maar wanneer die weersomstandighede onguur is, sal ’n blaaskans ons verkwik en ons help om voort te gaan. Baie verkies egter om besig te bly om vir mense te getuig en nie koffiepouses saam met die broers te hê gedurende die tyd wat vir die bediening opsy gesit is nie. Balans is nodig.
6 “Selfs ’n groot sprinkaanvoël ... ken sy bepaalde tye” om te trek, en die mier “maak sy brood klaar in die somer” sodat hy vir die winter gereed kan wees, sê die Bybel (Jer. 8:7; Spr. 6:6-8). Hierin lê die geheim om ons tyd goed te benut. Ons moet ook ‘ons bepaalde tye ken’. Hoewel ons nie uiters onbuigsaam moet wees nie, moet ons tydsbewus wees. Ons moet nie net weet wát ons moet doen nie, maar ook wanneer ons dit moet doen. Ons moet die gewoonte aanleer om vooruit te dink en vir moontlike vertragings voorsiening te maak. En ons moet ook bereid wees om sekere bedrywighede kort te knip ter wille van iets belangrikers, soos voorbereiding vir ons vergaderinge, velddiens en ander teokratiese bedrywighede.
7 Ons wil soos ons hemelse Vader, Jehovah God, wees wat ons leer dat ‘alles sy bepaalde uur het’ (Pred. 3:1). As ons ons tyd goed benut, kan ons ‘ons bediening ten volle uitvoer’.—2 Tim. 4:5.