HOE OM DIE SIKLUS VAN HAAT TE BREEK

4 | Oorkom haat met God se hulp

Wat die Bybel sê:

“Die vrug van die gees is liefde, vreugde, vrede, geduld, goedhartigheid, goedheid, geloof, sagmoedigheid, selfbeheersing.” – GALASIËRS 5:22, 23.

Wat dit beteken:

Dit is moontlik om die siklus van haat met God se hulp te breek. Sy heilige gees kan ons help om eienskappe te ontwikkel wat ons nooit uit ons eie kon hê nie. So in plaas daarvan om self te probeer om haat te oorkom, is dit beter om op God se hulp te vertrou. As ons dit doen, sal ons net soos die apostel Paulus voel, wat geskryf het: “Vir alles is ek sterk genoeg deur hom wat my krag gee” (Filippense 4:13). En ons sal ook kan sê: “My hulp kom van Jehovah.” – Psalm 121:2.

Wat jy kan doen:

“Jehovah het my van ’n gewelddadige na ’n vredeliewende mens verander.” – WALDO

Bid tot Jehovah en vra hom uit die hart vir sy heilige gees (Lukas 11:13). Vra hom om jou te help om goeie eienskappe te hê. Vind uit wat die Bybel sê oor eienskappe wat keer dat haat ontwikkel, soos liefde, vrede, geduld en selfbeheersing. Soek na maniere om hierdie eienskappe in jou eie lewe te ontwikkel. En maak vriende met mense wat ook probeer om hierdie eienskappe te ontwikkel. Sulke vriende kan jou “tot liefde en goeie werke . . . motiveer”. – Hebreërs 10:24; voetnoot.

Ondervinding – WALDO

Hy het gewelddadige haat oorkom

Waldo het ’n baie moeilike lewe gehad toe hy grootgeword het wat hom met haat gevul het. Hy vertel: “Ek was gereeld betrokke by straatgevegte met dwelmhandelaars . . . Eenkeer het ’n bende ’n berugte huurmoordenaar gevra om my dood te maak, maar ek het met net ’n steekwond daarvan afgekom.”

Waldo het nie daarvan gehou toe sy vrou die Bybel met Jehovah se Getuies begin studeer het nie. Hy sê: “Ek het die Getuies gehaat en dikwels op hulle geskreeu en hulle gevloek. Maar tot my verbasing het hulle altyd op ’n vredeliewende wyse gereageer.”

Waldo het later ook die Bybel begin studeer. Hy sê: “Dit was nogtans nie maklik om toe te pas wat ek geleer het nie. Ek was oortuig dat ek nooit my verskriklike humeur sou kon beteuel nie.” Maar iets wat hy uit die Bybel geleer het, het ’n groot verskil gemaak.

Waldo verduidelik: “Eendag het my studiehouer, Alejandro, my gevra om Galasiërs 5:22, 23 te lees. . . . Alejandro het verduidelik dat ek hierdie eienskappe nie in my eie krag kan aankweek nie, maar slegs met die hulp van God se heilige gees. Hierdie waarheid het my beskouing heeltemal verander!”

Waldo het dit reggekry om die siklus van haat te breek omdat hy op God se hulp vertrou het. Hy sê: “My familielede en voormalige vriende kan nie glo hoeveel veranderinge ek aangebring het nie.” Hy sê verder: “Jehovah het my van ’n gewelddadige na ’n vredeliewende mens verander.”