Die regulerende vermoë van hormone

Vir ons liggaam om te funksioneer, het ons bloed ’n baie spesifieke hoeveelheid elektroliete, soos kalsium, nodig. Maar die hoeveelheid elektroliete wat jy inneem, kan van dag tot dag verskil. Wat doen jou liggaam sodat dit te alle tye die regte hoeveelheid elektroliete het?

’n Gesonde menseliggaam reguleer die hoeveelheid elektroliete deur hormone te maak, te stoor en in die bloedstroom vry te stel. Hormone is chemiese stowwe wat verskillende funksies in die liggaam beheer. Selfs ’n klein hoeveelheid van ’n hormoon kan ’n groot effek op jou liggaam hê. Die Encyclopedia Britannica sê dat die vrystelling van hormone nie toevallig gebeur nie. Dit is ’n presiese en ingewikkelde proses.

Byvoorbeeld, die byskildkliere in die nek identifiseer klein veranderinge in die hoeveelheid kalsium in die bloed. Daar is gewoonlik vier van hierdie kliere, en elkeen is omtrent so groot soos ’n ryskorrel.

Wanneer hierdie kliere agterkom dat die kalsiumvlakke laer is as wat dit moet wees, stel hulle vinnig ’n hormoon vry, soms binne sekondes. Hierdie hormoon stuur ’n sein na jou bene om kalsium wat gestoor is, in die bloed vry te stel. Dit sê ook vir jou niere om op te hou om kalsium uit die bloed te filtreer en vir jou dunderm om meer kalsium uit kos te absorbeer.

Maar as daar te veel kalsium in die bloed is, stel die skildklier – ’n aparte klier – ’n ander hormoon vry. Hierdie hormoon sê vir die bene om meer kalsium te absorbeer en te stoor en vir die niere om meer kalsium as gewoonlik uit te filtreer.

Hierdie hormone is maar net twee van meer as ’n honderd hormone wat die menseliggaam gebruik om verskillende prosesse aan te pas en te reguleer.

Wat dink jy? Het die regulerende vermoë van jou hormone deur evolusie ontstaan? Of is dit ontwerp?