‘Verkondig die woord van God ten volle’

¹ Wanneer jy dit opreg waardeer dat jy iets goeds ontvang het, toon jy dit dan nie deur middel van jou gesindheid en jou dade nie? Natuurlik! Let op hoe die apostel Paulus gereageer het op die goedheid en liefderyke goedhartigheid wat Jehovah teenoor die mensdom betoon. Hy het uitgeroep: “Ons dank God vir sy onbeskryflike vrye gawe”! Wat sluit daardie “vrye gawe” in? Al die blyke ‘van God se allesoortreffende onverdiende goedhartigheid’ teenoor ons, waarvan die grootste die gawe van sy eie Seun as ’n losprys vir ons sondes was.—2 Kor. 9:14, 15; Joh. 3:16.

² Was Paulus se dankbetuiging net leë woorde? Geensins! Hy het sy innige waardering op baie maniere getoon. Hy was baie besorg oor die geestelike welsyn van sy mede-Christene en wou doen wat hy kon om hulle te help om ten volle by God se liefderyke goedhartigheid baat te vind. Paulus het aangaande hierdie persone gesê: “Omdat ons . . . ’n tere geneentheid vir julle het, het ons julle met graagte nie net die goeie nuus van God meegedeel nie, maar ook ons eie siele, want julle het by ons gelief geword” (1 Tess. 2:8). Paulus het nie net diegene wat reeds deel van die gemeente was, gehelp om hulle redding te verseker nie, maar het ook die goeie nuus onvermoeid verkondig en duisende kilometers ver op land en see gereis om diegene te vind “wat die regte gesindheid vir die ewige lewe gehad het” (Hand. 13:48). Paulus se innige waardering vir alles wat Jehovah vir hom gedoen het, het hom beweeg om “die woord van God ten volle te verkondig”.—Kol. 1:25.

³ Beweeg waardering vir alles wat Jehovah vir ons gedoen het, ons nie ook om geestelike hulp te verleen aan diegene in ons gemeente wat hulp nodig het nie? (Gal. 6:10). En word ons nie beweeg om soveel moontlik te doen in die verkondiging van die goeie nuus van die Koninkryk in ons hele gebied nie?—Matt. 24:14.

⁴ ’n Geleentheid om waardering te toon: Elke jaar gee die herdenking van Christus se dood ons ’n spesiale geleentheid om waardering te toon vir wat Jehovah en Jesus vir ons gedoen het. Dit is nie net nog ’n vergadering of bloot ’n herdenking van ’n gebeurtenis nie. Jesus het gesê: “Hou aan om dit tot my gedagtenis te doen” (Luk. 22:19). Die herdenking van Christus se dood is ’n geleentheid om na te dink oor die soort persoon wat Jesus is. Dit is ’n tyd om te erken dat hy vandag lewe en bedrywig is en dat heerlikheid en koningskap aan hom gegee is weens sy getroue lewensweg en offerande. Hierdie viering is ook ’n geleentheid om te toon dat ons ons aan Christus se hoofskap onderwerp terwyl hy die aangeleenthede en bedrywighede van die Christengemeente rig (Kol. 1:17-20). God se hele volk behoort uit respek teenwoordig te wees vir die herdenking van Christus se dood. Dit sal vanjaar op Donderdag, 28 Maart 2002, ná sononder gehou word.

⁵ Met al die harde werk wat verlede jaar voor die viering van die Gedenkmaal gedoen is, het ons ’n splinternuwe opkomshoogtepunt van 202 271 gehad in die lande wat onder die Suid-Afrikaanse takkantoor dien. Wat gaan die bywoningsyfer vanjaar wees? Dit gaan in groot mate afhang van ‘ons harde werk en inspanning’ om soveel moontlik te help om dit by te woon.—1 Tim. 4:10.

⁶ Buiten dat ons die Here se Aandmaal gaan bywoon, sal ons moontlik ook ons velddiensbedrywighede kan vermeerder. Tienduisende broers en susters sal ongetwyfeld gedurende een of meer maande hulppionierdiens doen. Ons het die afgelope vyf jaar elke jaar gedurende die Gedenkmaalseisoen, Maart tot Mei, gemiddeld 17 788 hulppioniers gehad. Kan jy jou sake so reël dat jy vanjaar die voorreg kan geniet om hulppionierdiens te doen? Dit sal ’n uitstekende manier wees waarop jy jou opregte waardering vir God se liefdevolle voorsiening van Christus se offerande kan toon. Jy kan verseker wees van Jehovah se seën, soos die volgende ondervindinge toon.

⁷ ’n Suster wat ’n voltydse sekulêre werk het, het oor haar ondervinding geskryf wat sy verlede Maart in die hulppionierdiens gehad het: “Ons Koninkryksbediening vir Februarie 2001 het almal wie se omstandighede hulle toegelaat het, aangespoor om gedurende die Gedenkmaalseisoen hulppionierdiens te doen. Aangesien Maart vyf Saterdae gehad het, het dit goed by my rooster ingepas. Ek het dus besluit om my aansoekvorm in te gee.” Aan die begin van die maand het sy vir haar ’n doelwit gestel om ’n tuisbybelstudie te probeer begin. Het sy dit reggekry? Ja, in haar 52ste uur van getuieniswerk daardie maand! Haar gevolgtrekking? “Ons ontvang wonderlike seëninge wanneer ons meer moeite doen.”

⁸ Watter voordele geniet ’n gesin wat saam pionier? ’n Gesin van vier wat dit verlede April gedoen het, het gevind dat dit ’n maand was wat hulle altyd sal onthou. Die ma het gesê: “Ons het elke dag ’n baie positiewe gesindheid gehad, aangesien ons verenig in die bediening was! Besprekings oor ons daaglikse velddiensbedrywighede het aandete baie aangenaam gemaak.” Die seun het gesê: “Ek het dit geniet om gedurende die week saam met my pa velddiens te doen, wanneer hy gewoonlik by die werk is.” Die pa het bygevoeg: “Die wete dat ons saam werk in die belangrikste werk van ons tyd het my as gesinshoof tevrede laat voel.” Kan julle as ’n gesin saam pionier? Waarom bespreek julle dit nie as ’n gesin en kyk of die hele gesin dalk gedurende hierdie Gedenkmaalseisoen kan pionier nie?

⁹ Kan ons Maart ons beste maand tot nog toe maak? Vroeg in 2000 het Ons Koninkryksbediening die vraag gevra: “Kan ons April 2000 ons beste maand tot nog toe maak?” Wat was die reaksie? Verskeie nuwe hoogtepunte is bereik. Suid-Afrika het in daardie een maand ’n splinternuwe hoogtepunt van 10 126 hulppioniers bereik. Daarbenewens het ons nuwe hoogtepunte in ure, tydskrifverspreiding, boekies/brosjures, herbesoeke en Bybelstudies gehad. Onthou jy die entoesiasme wat in julle gemeente aangewakker is deur al die geestelike bedrywighede gedurende daardie spesiale maand? Kan ons wat ons toe bereik het, vanjaar ewenaar of selfs oortref? As ons almal ons kragtig inspan, kan Maart 2002 “ons beste maand tot nog toe” word. Waarom Maart?

¹⁰ Daar is twee redes waarom Maart ’n spesiale maand van bedrywigheid moet wees. Eerstens, die Gedenkmaal gaan teen die einde van Maart gehou word, wat ons genoeg geleentheid vroeg in die maand gee om soveel moontlik te nooi om dit by te woon. Tweedens het Maart vanjaar vyf volle naweke, wat dit vir diegene wat sekulêr werk of skoolgaan, makliker maak om hulppionierdiens te doen. Waarom sit en beplan jy nie nou ’n praktiese rooster deur die kalender te gebruik wat in hierdie byvoegsel voorsien word nie? Hulppionierdiens is dalk makliker as wat jy gedink het. Deur byvoorbeeld 8 uur velddiens vir elk van die vyf naweke te beplan, hoef jy net nog 10 uur gedurende die res van die maand te werk om die vereiste 50 uur te bereik.

¹¹ Wat kan die ouer manne doen om almal in die gemeente te help om “die woord van God ten volle te verkondig”? Wek entoesiasme deur middel van vergaderingdele en persoonlike gesprekke. Gemeentelike Boekstudiehouers en hulle assistente kan die inisiatief neem om met elkeen in hulle groep te praat en persoonlike hulp aan te bied. ’n Paar vriendelike woorde van aanmoediging of ’n paar praktiese wenke is dalk net wat nodig is (Spr. 25:11). Baie sal sien dat hulle wel die voorreg kan geniet om as hulppioniers te dien deur hulle rooster net effens aan te pas. In etlike gemeentes stel die meeste ouer manne en bedieningsknegte en hulle vrouens, indien nie almal nie, ’n goeie voorbeeld deur gedurende die Gedenkmaalseisoen saam te pionier. Dit het talle verkondigers aangemoedig om by hulle aan te sluit. Weens fisiese beperkinge of ander omstandighede kan sommige verkondigers dalk nie pionier nie, maar hulle kan aangemoedig word om hulle waardering te toon deur saam met die res van die gemeente soveel moontlik in die bediening te doen.

¹² Sukses hang af van sorgvuldige beplanning deur die ouer manne. Vergaderinge vir velddiens moet gereël word op gerieflike tye regdeur die week. Indien moontlik sal die diensopsiener voor die tyd reël dat bekwame broers alle velddiensvergaderinge hou. Goeie voorbereiding sal nodig wees sodat hierdie vergaderinge nie langer as 10 tot 15 minute is nie, waartydens daar ook groepe gereël, gebied uitgedeel en ’n gebed gedoen moet word. (Sien die Vraebus in Ons Koninkryksbediening vir September 2001.) ’n Rooster van die bedrywighede vir die maand moet sorgvuldig aan die gemeente verduidelik word en op die kennisgewingbord gesit word.

¹³ Daar moet genoeg gebied beskikbaar wees. Die diensopsiener moet met die broer wat die gebied behartig, vergader om reëlings te tref sodat daar in gebiede gewerk word wat nie dikwels gedek word nie. Ons moet ons daarop toespits om terug te gaan na mense wat nie tuis was nie, om op straat en in sakegebied te getuig en om aandgetuieniswerk te doen. Waar gepas kan party verkondigers gehelp word om telefoongetuieniswerk te doen.

¹⁴ Help hulle om weer te dien: Is daar enigiemand in julle gemeente se gebied wat nie meer ’n bedrywige verkondiger van die goeie nuus is nie? Hulle is nog deel van die gemeente en het hulp nodig (Ps. 119:176). Aangesien die einde van hierdie ou wêreld so naby is en die nuwe wêreld voor die deur is, het ons goeie rede om ons kragtig in te span om diegene te help wat onbedrywig geraak het (Rom. 13:11, 12). Gedurende die afgelope vyf jaar het meer as 1 400 mense elke jaar op hulp gereageer en weer bedrywig geword. Wat kan ons doen om nog baie ander te help om die liefde en vertroue wat hulle aan die begin gehad het, opnuut aan te wakker?—Heb. 3:12-14.

¹⁵ Die liggaam van ouer manne moet bespreek hoe hulle diegene kan help wat gedurende die afgelope paar jaar onbedrywig geraak het (Matt. 18:12-14). Die sekretaris moet die gemeentelike verkondigerverslagkaarte nagaan en ’n aantekening maak van almal wat onbedrywig geraak het. ’n Spesiale poging moet aangewend word om deur middel van herderswerk hulp te verleen. ’n Ouer man sal dalk ’n sekere verkondiger wil besoek omdat hy daardie persoon voorheen geken en met hom geassosieer het, of ander verkondigers kan gevra word om te help. Miskien het hulle met die een gestudeer wat nou onbedrywig is en sal hulle baie graag die geleentheid wil hê om spesiale hulp te verleen noudat hy dit nodig het. Hopelik sal baie van dié wat onbedrywig geword het, beweeg word om weer die woord van God te begin verkondig. As hulle kwalifiseer, is daar geen beter tyd vir hulle om te begin as gedurende die Gedenkmaalseisoen nie!—Sien die Vraebus in Ons Koninkryksbediening vir November 2000 vir verdere besonderhede.

¹⁶ Is daar ander wat kwalifiseer om te getuig? Jehovah gaan voort om sy volk te seën deur “die begeerlike dinge van al die nasies” in te bring (Hag. 2:7). Daar is elke jaar duisende wat as ongedoopte verkondigers kwalifiseer. Wie is hulle? Kinders van Jehovah se Getuies sowel as progressiewe Bybelstudente. Hoe weet ons of hulle kwalifiseer om verkondigers van die goeie nuus te wees?

¹⁷ Kinders van Jehovah se Getuies: Baie kinders gaan al jare lank saam met hulle ouers van huis tot huis, hoewel hulle nog nie as ongedoopte verkondigers dien nie. Maart is dalk ’n goeie tyd om hulle te laat begin. Hoe weet jy of jou kind kwalifiseer? Bladsy 100 van Georganiseer om ons bediening te vervul sê dat dit die geval is “wanneer ’n voorbeeldige kind sy geloof kan betuig deur met ander oor die goeie nuus te praat en uit die hart beweeg word om dit te doen”. As jy meen dat jou kind kwalifiseer, kan jy met een van die ouer manne op die Gemeentelike Dienskomitee praat.

¹⁸ Bybelstudente wat kwalifiseer: Nadat ’n Bybelstudent kennis ingeneem het en al ’n rukkie vergaderinge bywoon, sal hy dalk ’n Koninkryksverkondiger wil word. As jy ’n studie met so ’n student hou, moet jy hierdie vrae oorweeg: Maak hy vordering in ooreenstemming met sy ouderdom en vermoë? Het hy al begin om ander informeel van sy geloof te vertel? Beklee hy hom met “die nuwe persoonlikheid”? (Kol. 3:10). Voldoen hy aan die vereistes vir ongedoopte verkondigers wat uiteengesit word op bladsye 97-9 in die Ons bediening-boek? Indien wel, moet jy die Gemeentelike Dienskomitee in kennis stel sodat reëlings getref kan word dat twee ouer manne met jou en die student vergader. As hy kwalifiseer, sal die twee ouer manne hom in kennis stel dat hy aan die openbare bediening kan begin deelneem.

¹⁹ Wat van April en Mei? Dit sal ook spesiale maande van groter bedrywigheid in die veldbediening wees. Baie wat in Maart hulppionierdiens gedoen het, sal dit dalk weer in April en/of Mei kan doen. Gedurende April en Mei sal ons veral Die Wagtoring en Ontwaak! in die bediening aanbied. Wat ’n voordelige uitwerking het die tydskrifte tog op die lewe van diegene wat dit lees! Hierdie tydskrifte het ’n groot rol gespeel in die wonderlike vermeerdering wat regoor die wêreld ondervind word. ’n Spesiale poging sal gedurende April en Mei aangewend word om die tydskrifte vir soveel mense moontlik aan te bied. Beplan nou om ’n volle deelname te hê.

²⁰ Sal jy die aantal tydskrifte moet vermeerder wat jy deur die gemeente ontvang, aangesien daar soveel meer predikingswerk beplan word? Regdeur die diensjaar bied ons elke Saterdag, wat ons Tydskrifdag is, Die Wagtoring en Ontwaak! aan. Maar aangesien baie aan die hulppionierdiens gaan deelneem en ons almal vir twee maande die tydskrifte gaan aanbied, sal dit dalk nodig wees om jou tydskrifbestelling by die gemeente te vermeerder. As dit die geval is, moet jy asseblief onmiddellik die tydskrifkneg in julle gemeente in kennis stel. Terselfdertyd moet die lektuurkneg seker maak dat daar genoeg van die traktaat Wil jy graag die Bybel beter leer ken? in voorraad is vir almal om te gebruik.

²¹ Baie het waardering uitgespreek vir die deel in Ons Koninkryksbediening met die titel “Wat ons oor die tydskrifte kan sê”. Het jy al van hierdie voorsiening gebruik gemaak deur die tydskrifaanbiedings te leer? Waarom gebruik julle nie elke week ’n deel van julle gesinsbybelstudie om hierdie aanbiedings te oefen nie?

²² Maak ten volle gebruik van hierdie Gedenkmaalseisoen: Laat ons, soos die apostel Paulus, vir Jehovah wys hoeveel ons “sy onbeskryflike vrye gawe” waardeer deur ’n volle aandeel te hê aan die geestelike bedrywighede wat vir hierdie Gedenkmaalseisoen beplan word. Dit sluit in om (1) ’n volle aandeel aan ons spesiale Tydskrifdag op 2 Maart 2002 te hê; (2) die belangrikste geleentheid van die jaar, die viering van die Here se Aandmaal op Donderdag, 28 Maart 2002, by te woon; (3) diegene wat onbedrywig geraak het, te help om “die liefde wat [hulle] eers gehad het”, opnuut aan te wakker (Op. 2:4; Rom. 12:11); (4) ons kinders en enige Bybelstudente wat kwalifiseer, te help om ongedoopte verkondigers te word en (5) sover moontlik betrokke te wees by die evangelisasiewerk en selfs in Maart en daarna hulppionierdiens te doen.—2 Tim. 4:5.

²³ Dit is ons innige bede dat ons almal hierdie Gedenkmaalseisoen ’n volle aandeel aan die verkondiging van die goeie nuus van die Koninkryk sal hê en sodoende sal toon hoe innig ons waardering is vir alles wat Jehovah vir ons gedoen het.

[Venster op bladsy 6]

Persoonlike velddiensrooster vir Maart 2002

Sondag Maandag Dinsdag Woensdag Donderdag Vrydag Saterdag

1 2

3 4 5 6 7 8 9

Tydskrifdag

10 11 12 13 14 15 16

Tydskrifdag

17 18 19 20 21 22 23

Tydskrifdag

24 25 26 27 28 29 30

GEDENKMAAL Tydskrifdag

NÁ SONONDER

31

Kan jy beplan om altesaam 50 uur te werk sodat jy in Maart hulppionierdiens kan doen?