Wat stel jy eerste?
1 Baie godsdiensorganisasies lê klem op liefdadigheidswerk, soos om fasiliteite vir skoolopleiding of mediese sorg te voorsien. Hoewel Jehovah se Getuies “nie vergeet om goed te doen en mededeelsaam te wees nie”, is dit vir hulle belangriker om mense geestelik te help.—Heb. 13:16.
2 Die eerste-eeuse voorbeeld: Jesus het gedurende sy aardse bediening talle goeie werke gedoen, maar sy vernaamste werk was om van die waarheid te getuig (Luk. 4:43; Joh. 18:37; Hand. 10:38). Hy het sy volgelinge beveel: “Gaan dus en maak dissipels van mense van al die nasies, . . . en leer hulle” (Matt. 28:19, 20). En hy het getoon dat diegene wat geloof in hom beoefen, die werk wat hy begin het, op ’n baie groter skaal sou doen (Joh. 14:12). Jesus het die predikingswerk eerste gestel omdat dit mense leer wat die weg tot redding is.—Joh. 17:3.
3 Die apostel Paulus het sy predikingswerk as noodsaaklik beskou, iets wat hy nie kon ignoreer nie (1 Kor. 9:16, 17). Hy was gewillig om enige opoffering te maak, enige beproewing te verduur of enige ontbering te ly sodat hy sy bediening kon uitvoer (Hand. 20:22-24). Die apostel Petrus en sy metgeselle het ’n soortgelyke gesindheid getoon. Hulle het selfs ondanks die feit dat hulle in die tronk gegooi en geslaan is, “sonder ophou voortgegaan om te leer en die goeie nuus oor die Christus, Jesus, bekend te maak”.—Hand. 5:40-42.
4 Wat van ons? Gee ons voorkeur aan die werk om die goeie nuus van die Koninkryk te verkondig en dissipels te maak? Is ons, soos Jesus, werklik besorg oor diegene wat “gestroop en rondgegooi [is] soos skape sonder ’n herder”? (Matt. 9:36). Huidige wêreldgebeure en Bybelprofesieë toon duidelik dat daar nie meer veel tyd vir hierdie goddelose stelsel oor is nie! As ons goed in gedagte hou hoe belangrik die predikingswerk is, sal dit ons beweeg om ywerig daarmee voort te gaan.
5 Kyk na jou omstandighede: Aangesien persoonlike omstandighede dikwels verander, is dit goed om van tyd tot tyd te kyk of ons aanpassings kan maak sodat ons ’n groter deelname aan die predikingswerk kan hê. ’n Suster wat gedurende die 1950’s, ’60’s en ’70’s ’n gewone pionier was, moes weens swak gesondheid ophou pionier. Mettertyd het haar gesondheid egter verbeter. Sy het onlangs weer na haar omstandighede gekyk en besef dat sy weer kan begin pionier. Hoe bly was sy tog toe sy die Pionierdiensskool op die ouderdom van 90 kon bywoon! Wat van jou? Gaan jy binnekort aftree of die skool verlaat? Sal jou veranderde omstandighede jou dalk in staat stel om te pionier?
6 Toe Jesus gesien het dat Marta “afgelei [is] deurdat sy na baie pligte omgesien het”, het hy liefdevol daarop gewys dat sy groter seëninge sou ontvang as sy dinge eenvoudig hou (Luk. 10:40-42). Kan jy jou lewenswyse vereenvoudig? Is dit werklik nodig dat albei huweliksmaats sekulêr werk? Kan die gesin op net een inkomste lewe as aanpassings gemaak word? Baie het geestelik daarby baat gevind omdat hulle aanpassings gemaak het sodat hulle ’n groter deelname aan die bediening kan hê.
7 Mag ons almal die voorbeeld volg wat Jesus en die apostels gestel het! Ons kan seker wees van Jehovah se seën op ons opregte pogings om ’n volle deelname te hê aan die lewensbelangrike werk om die goeie nuus van die Koninkryk te verkondig.—Luk. 9:57-62.