Hoe om die brosjure Goeie nuus wat van God kom! te gebruik
’n Nuwe brosjure wat saamgestel is om ons te help om herbesoeke te doen en Bybelstudies te begin
1. Watter nuwe brosjure wat by die “Bewaak jou hart!”-streekbyeenkoms vrygestel is, is saamgestel om ons te help om herbesoeke te doen en Bybelstudies te begin?
1 Hoe opgewonde was ons tog om tydens die “Bewaak jou hart!”-streekbyeenkoms ’n nuwe brosjure te ontvang wat ons kan help om herbesoeke te doen en Bybelstudies te begin! Die lesse in Goeie nuus wat van God kom! is bondig, soos dié van die Vereis-brosjure, wat deur hierdie nuwe brosjure vervang word. Dit maak hierdie brosjure besonder geskik om Bybelstudies by die deur te hou. Anders as die Vereis-brosjure wat die vereistes vir Christene bespreek, wat vir nuwe studente moeilik kan wees om te aanvaar, vestig hierdie nuwe brosjure die aandag op die goeie nuus wat in die Bybel gevind word.—Hand. 15:35.
2. Waarom is die Goeie nuus-brosjure geskryf?
2 Waarom is dit geskryf? Broers van regoor die wêreld het gevra vir iets wat maklik is om te verstaan, mense na die waarheid kan aantrek en na ’n studie kan lei in die Leer Bybel-boek, ons vernaamste hulpmiddel om Bybelstudies te hou. Mense wat deur ’n boek afgeskrik word, is dikwels gewilliger om die Bybel met behulp van ’n brosjure te studeer. ’n Brosjure kan ook makliker in ’n groot aantal tale vertaal word.
3. Hoe verskil hierdie brosjure van ander studiepublikasies?
3 Hoe dit saamgestel is: Baie van ons studiepublikasies is geskryf sodat ’n persoon dit kan lees en die waarheid kan verstaan, al help niemand hom daarmee nie. Hierdie publikasie is anders. Dit is geskryf as ’n Bybelstudiegids wat met die hulp van ’n onderrigter gebruik moet word. Wanneer jy dit vir iemand aanbied, sal dit dus goed wees om ’n paragraaf of twee te bespreek. Omdat die paragrawe kort is, kan dit selfs by die persoon se deur of by sy werksplek bespreek word. Hoewel dit goed is om les 1 eerste te doen, kan ons ’n studie feitlik enige plek in die brosjure begin.
4. Hoe help die brosjure ons om ander direk uit die Bybel te leer?
4 In baie van ons publikasies kan die antwoorde op die gedrukte vrae in die paragrawe gevind word. Maar in hierdie publikasie is die antwoorde hoofsaaklik in die Bybel. Die meeste mense wil uit die Bybel leer eerder as uit ons lektuur. Gevolglik word amper nie een van die teksverwysings aangehaal nie. Dit moet uit die Bybel self gelees word. Dit help studente om te besef dat wat hulle leer van God kom.—Jes. 54:13.
5. Waarom is dit belangrik dat die onderrigter vir elke studie goed voorberei?
5 Die brosjure verduidelik nie al die tekste nie. Waarom nie? Dit is saamgestel om die student aan te moedig om vrae te vra en vir die onderrigter die geleentheid te gee om sy onderrigvermoë te gebruik. Dit is dus belangrik om vir elke studie goed voor te berei. ’n Woordjie van waarskuwing: Moenie te veel praat nie. Ons hou daarvan om die Bybel te verduidelik. Maar ons bereik dikwels meer wanneer ons die student nooi om te verduidelik wat hy dink die teks beteken. Deur taktvol vrae te vra, kan ons hom help om self oor die betekenis van die teks te redeneer.—Hand. 17:2.
6. Hoe kan ons die brosjure gebruik: (a) wanneer mense skepties is oor God en die Bybel? (b) in die huis-tot-huis-bediening? (c) om Bybelstudies deur middel van die direkte benadering te begin? (d) wanneer ons herbesoeke doen?
6 Soos ander studiepublikasies, kan hierdie brosjure enige tyd aangebied word, ongeag wat die aanbod vir die maand is. Baie sal geniet om dit aan te bied wanneer hulle die direkte benadering gebruik om studies te begin wat by die deur gehou word. Soos by die streekbyeenkoms genoem is, kan dit ook “die herbesoekwerk regtig opwindend maak” as dit gebruik word wanneer ’n mens teruggaan na diegene wat belangstelling getoon het!—Sien die vensters op bladsye 5-7.
7. Hoe kan jy die brosjure gebruik om ’n Bybelstudie te hou?
7 Hoe om die studie te hou: Ons kan die gesprek begin deur die genommerde vraag wat in vetdruk verskyn, te bespreek. Lees daarna die paragraaf en die skuinsgedrukte teksverwysing(s). Vra taktvolle vrae om die huisbewoner te help om die tekste te verstaan. Voordat jy die volgende deel bespreek, vra die huisbewoner om die vetgedrukte vraag te beantwoord om seker te maak dat hy dit verstaan. Dit sal dalk beter wees om tydens die eerste paar besoeke net een van die vetgedrukte vrae te bespreek. Mettertyd sal ons dalk langer besprekings van ’n hele les kan hê.
8. Hoe moet ons tekste inlei, en waarom?
8 Teksverwysings wat voorafgegaan word deur die woord “lees”, gee die duidelikste antwoord op die vetgedrukte vraag. Wanneer jy ’n teks inlei, moet jy nie sê: “Die apostel Paulus het geskryf” of “Let op wat Jeremia voorspel het” nie. Die huisbewoner kan dink dat ons die woorde van blote mense lees. Dit sal beter wees om te sê: “Die Woord van God sê” of “Let op wat die Bybel voorspel het.”
9. Moet al die teksverwysings gedurende die studie gelees word?
9 Moet ons al die teksverwysings lees of slegs die tekste waarby daar “lees” staan? Dit hang van die omstandighede af. Nie een van die teksverwysings word bloot aangegee om te toon waar ’n gedagte in die Bybel gevind kan word nie. Elke teks bevat nuttige inligting. Maar in party gevalle sal dit dalk beter wees om slegs die tekste te lees waarby daar “lees” staan omdat die student nie baie tyd het, genoeg belangstel of goed kan lees nie.
10. Wanneer kan ons oorskakel na die Leer Bybel-boek?
10 Wanneer om na die Leer Bybel-boek oor te skakel: Ná verskeie besprekings en nadat ons ’n goeie roetine gevestig het, kan ons óf oorskakel na die Leer Bybel-boek óf met die Goeie nuus-brosjure voortgaan totdat ons dit voltooi het. Verkondigers moet self besluit wanneer om oor te skakel. Moet ons voor in die Leer Bybel-boek begin wanneer ons oorskakel? Nie noodwendig nie. Elkeen is anders. Die meeste studente sal egter daarby baat vind om dieselfde onderwerpe in meer besonderhede in die Leer Bybel-boek te bespreek.
11. Waarom moet ons goed gebruik maak van hierdie nuwe brosjure?
11 In ’n wêreld waar goeie nuus skaars is, het ons die groot voorreg om die heel beste nuus te verkondig—dat God se Koninkryk regeer en dat dit binnekort ’n nuwe wêreld sal inlei waarin regverdigheid sal woon! (Matt. 24:14; 2 Pet. 3:13). Ons is oortuig daarvan dat baie mense wat dié boodskap hoor, met hierdie geïnspireerde woorde sal saamstem: “Hoe lieflik op die berge is die voete van die een wat goeie nuus bring, wat vrede verkondig, wat goeie nuus van iets beters bring, wat redding verkondig, wat vir Sion sê: ‘Jou God het koning geword!’” (Jes. 52:7). Laat ons hierdie nuwe brosjure gebruik om die goeie nuus wat van God kom, te verkondig aan almal in ons gebied wat na die waarheid dors!
[Venster op bladsy 5]
Wanneer mense skepties is oor God en die Bybel:
● In party gebiede vind verkondigers dat die woorde “God” en “Bybel” gesprekdempers is. In so ’n geval sal dit dalk beter wees om tydens die eerste besoek oor onderwerpe te praat wat van plaaslike belang is, soos die behoefte aan ’n goeie regering, waar om praktiese hulp vir gesinne te vind en wat die toekoms inhou. Ons kan die Goeie nuus-brosjure begin gebruik nadat ons etlike besprekings gehad het om te toon hoe ons weet dat God bestaan en waarom die Bybel betroubaar is.
[Venster op bladsy 6]
Wanneer ons van huis tot huis gaan:
● “Ek besoek jou om vir jou te wys hoe maklik dit is om uit te vind wat God in die toekoms vir die mensdom gaan doen. Het jy al ooit gewonder of God ons van lyding sal bevry? [Wag vir ’n antwoord.] Hierdie brosjure wys waar in die Bybel jy die antwoord op hierdie vraag kan vind. [Gee vir hom ’n brosjure en lees die eerste paragraaf in les 1, asook Jeremia 29:11.] Met dit in gedagte, sou jy sê dat God wil hê dat ons ’n beter toekoms moet hê? [Wag vir ’n antwoord.] As jy wil, kan jy hierdie eksemplaar kry. Volgende keer kan ons die tweede paragraaf bespreek om die Bybel se antwoord op hierdie vraag te vind: ‘Hoe sal God die mensdom bevry van die oorsake van lyding?’” As dit lyk asof die huisbewoner tydens die eerste besoek tyd het, kan jy dalk die tweede paragraaf en die drie Bybeltekste daarin lees. Reël om terug te gaan om die tweede vraag in daardie les te bespreek.
● “Baie mense hou daarvan om te bid, veral wanneer hulle probleme ondervind. Bid jy soms? [Wag vir ’n antwoord.] Dink jy dat God na alle gebede luister, of is dit moontlik dat party gebede hom nie behaag nie? [Wag vir ’n antwoord.] Ek het ’n brosjure wat toon hoe ons die Bybel se antwoord op hierdie vrae kan vind. [Gee vir hom ’n eksemplaar en bespreek die eerste paragraaf van les 12 en die tekste waarby “lees” staan.] Is dit nie wonderlik dat God bereid is om na ons te luister nie? Maar om die grootste voordeel uit gebed te trek, moet ons God goed ken. [Blaai na les 2 en lees die opskrifte.] As jy wil, kan ek hierdie brosjure by jou laat en dan kan ons by ’n ander geleentheid die Bybel se antwoorde op hierdie fassinerende vrae lees.”
● “Ek besoek jou omdat mense besorg is oor waarop hierdie wêreld afstuur. Dink jy dat toestande ooit sal verbeter? [Wag vir ’n antwoord.] Baie mense is verbaas om uit te vind dat die Bybel goeie nuus bevat wat ons hoop kan gee. Hier is van die vrae wat die Bybel beantwoord.” Gee vir hom ’n brosjure en nooi hom om ’n vraag op die agterblad te kies waarin hy die meeste belangstel. Blaai dan na die les en demonstreer die studie. Reël om terug te gaan en die volgende vraag in daardie les te bespreek.
[Venster op bladsy 7]
Probeer die direkte benadering:
● “Ek besoek mense om hulle van ’n nuwe Bybelstudiekursus te vertel. Hierdie brosjure bevat 15 lesse wat toon waar in jou Bybel jy die antwoorde op belangrike vrae kan vind. [Wys vir hom die voor- en agterblad.] Het jy al ooit die Bybel probeer verstaan? [Wag vir ’n antwoord.] Laat ek jou wys hoe maklik die lesse is. [Bespreek die eerste paragraaf van vraag 3 in les 3 en lees Openbaring 21:4, 5. Indien dit gepas is, kan jy die volgende paragraaf en die tekste bespreek waarby “lees” staan.] As jy wil, kan ek hierdie brosjure by jou laat. Ons stel voor dat jy ten minste een keer probeer om die Bybel te bestudeer. As jy daarvan hou, kan jy daarmee voortgaan. Ons kan volgende keer die eerste les bespreek. Dit is net een bladsy lank.”
[Venster op bladsy 7]
Bied dit tydens ’n herbesoek aan:
● Wanneer ons na iemand teruggaan wat belangstelling getoon het, kan ons sê: “Ek is bly om jou weer te sien. Ek het vir jou hierdie brosjure gebring wat die Bybel se antwoord op talle interessante vrae gee. [Gee vir hom ’n brosjure en nooi hom om na die agterblad te kyk.] In watter een van hierdie onderwerpe stel jy die meeste belang? [Wag vir ’n antwoord. Blaai dan na die les wat hy gekies het.] Laat ek jou wys hoe hierdie brosjure gebruik kan word om die Bybel se antwoord te vind.” Demonstreer dan die studie deur een of twee paragrawe en die tekste te bespreek waarby “lees” staan. Jy het so pas ’n Bybelstudie begin! Laat die brosjure by die huisbewoner en reël om terug te gaan. Wanneer jy die les voltooi het, kan jy nog ’n les bespreek wat die huisbewoner gekies het of by les 1 begin.