Van ons lesers
Statistiek in verband met slawerny ’n Verklaring in die berig “Misdaad se snelgroeiendste bedryf” wat in “Ons beskou die wêreld” (22 Desember 2000) verskyn het, het my omgekrap. Die berig sê dat 11,5 miljoen slawe gedurende 400 jaar van slawerny uit Afrika uitgevoer is. Slawerny het in 1865 in die Verenigde State geëindig. Vierhonderd jaar vroeër bring ons by die jaar 1465—lank voordat die Jamestown-kolonie selfs bestaan het!
M. B., Verenigde State
Volgens die “Encyclopædia Britannica” het die uitvoer van slawe uit Afrika “reeds in die 1450’s” begin. Geskiedkundiges sê dat ontvoerde Afrikane na plantasies op eilande in die Atlantiese Oseaan geneem is lank voordat die slawehandel die Karibiese Eilande en die Verenigde State bereik het.—RED.
Identiteitsdiefstal Ek het julle artikel “Hulle kan jou identiteit steel!” (22 Maart 2001) met persoonlike belangstelling gelees. Iemand het my tjekrekeningnommer gesteel, vervalste tjeks uitgeskryf en amper R7 000 bestee! Dit het baie tyd geneem om die situasie reg te stel—om die rekening te sluit, ’n nuwe een te open en ’n klag by die polisie in te dien. Ek het geleer om nie sommer persoonlike inligting aan mense te gee nie.
D. S., Verenigde State
Terwyl my man op ’n sakereis was, is sy aktetas met al ons kredietkaarte en tjekboeke gesteel. Die artikel oor identiteitsdiefstal het vir ons presies gesê hoe om die situasie te hanteer, onder andere om in aanraking te kom met die bedrogafdelings van ons plaaslike kredietburo’s. Dit het verhoed dat die diewe verdere kredietaankope doen. Ek sou nooit self daaraan gedink het om dit te doen nie.
H. C., Verenigde State
Die son Ek dank Jehovah dikwels vir die son, die maan en ons pragtige aarde, maar ek dink nie gewoonlik baie oor hierdie dinge nie. Nadat ek die artikel “Die uitsonderlike kenmerke van ons son” (22 Maart 2001) gelees het, is ek beweeg om opreg tot God te bid en hom vir sy vrygewigheid en kosbare gawes te dank.
B. P., Verenigde State
Ek is nege jaar oud, en ek wil vir julle dankie sê dat julle sulke interessante artikels skryf—soos hierdie een oor die son. Ek leer regtig baie wanneer ek die Ontwaak! lees.
A. B., Verenigde State
Hare Ek is ’n haarkapster en het dit baie geniet om die artikel “Jou hare van naderby beskou” (8 April 2001) te lees. Ek het dit vir my werkgewer gegee. Sy was beïndruk daarmee en het dit vir die ander meisies by die werk gegee. Dankie vir daardie praktiese inligting.
D. L., Roemenië
Dankie vir die voetnoot wat na ’n vorige artikel verwys, “Alopesie—Hoe ek haarverlies stilswyend verduur” (22 April 1991). Ek verduur hierdie probleem al 17 jaar lank. In ’n wêreld waar ’n mens se voorkoms die belangrikste is en waar enigiemand wat anders is, verwerp word, is dit bemoedigend om te weet dat ek die ondersteuning van Jehovah en sy organisasie het.
M. G., Italië
Kunstenaar se verhaal Ek dien as ’n reisende opsiener van Jehovah se Getuies, en ek weet van ’n gesin waar die vader nooit werklik vordering gemaak het as ’n Christen nie. Hy is ’n goeie mens, maar sy stokperdjie is om modelle van vegvliegtuie te bou. Hy het speletjies van luggevegte op sy rekenaar en skiet ure lank vyandelike vegvliegtuie af. Ons het hom probeer help om te sien dat hy sy gesindheid teenoor oorlog moet verander. Nou het ons hierdie uitstekende verhaal van Dorothy Horle, “Ek verheerlik vrede pleks van oorlog” (8 April 2001). Ek gaan dit met hom bespreek.
P. P., Dominikaanse Republiek