Ons beskou die wêreld
“Lekkers” vir voëls
‘’n Brasiliaanse plant gebruik ’n voorheen onbekende strategie om bestuiwing te bevorder’, berig die Duitse tydskrif GEO. In plaas van ’n slukkie nektar bied Combretum lanceolatum sy besoekers eerder “lekkers” aan. Gedurende die nag vervaardig die blomme van hierdie struik soet jellie wat harde klontjies vorm van ongeveer 6 millimeter in deursnee. Glukose en fruktose maak die jellie soet, wat volgens navorsers “amper soos jelliebabas” proe. Die berig verduidelik dat “wanneer die blomme hulle blare met sonop oopvou, lê die glinsterende, deurskynende lekkers uitgesprei, soos op ’n skinkbord”. Hierdie blomlekkerny lok ten minste “28 voëlspesies uit agt families”. Terwyl die voëls van struik tot struik kos soek, word hulle vol stuifmeel, wat sodoende die plant vinniger laat versprei.
Gelukkige Italiaanse kinders
“Italianers het die gelukkigste kinders in Europa”, sê die dagblad La Repubblica van Rome in ’n berig oor ’n studie deur die Italiaanse Nasionale Sentrum vir Dokumentering en Ontleding van die Kinderjare en Adolessensie. Navorsers het gevind dat 96 persent van Italiaanse kinders in ’n huis met albei ouers grootword, wat ’n hoër persentasie is as in ander Europese lande, waar meer mense mekaar verlaat en skei. Daarbenewens het meer as die helfte ook grootouers wat in dieselfde huis of naby hulle woon. Gevolglik sien “8 uit 10” grootouers hulle kleinkinders “meer as een keer per week”. Dit, sê die verslag, dra by tot ’n kind se “gevoel dat hy iewers hoort” en verminder eensaamheid. Die sielkundige Alessandra Graziottin sê: “Die geluk van ’n kind, soos dié van ’n volwassene, spruit nie voort uit rykdom of ontwerpersklere nie, maar omdat hy voel dat hy geliefd is.”
’n Gerieflike vlug
As jy ’n aangenamer vlug wil hê, stel die koerant El Universal van Mexikostad die volgende voor: (1) Drink baie water, aangesien die lug in vliegtuie baie droog kan wees. (2) Dra ’n bril in plaas van kontaklense, aangesien die droë lug jou oë kan irriteer. (3) Doen ligte oefeninge in jou sitplek om jou spiere te ontspan en die sirkulasie in jou bene te verbeter. (4) Loop elke nou en dan in die gang af. (5) Dra skoene wat jy maklik kan uittrek, en gebruik ’n voetrus—dalk jou oornagsak. (6) Dra gemaklike, kreukeltrae klere wat van natuurlike materiaal gemaak is sodat jou vel kan asemhaal. (7) Alkohol moet matig of glad nie gedrink word nie, aangesien hoogte die uitwerking van alkohol vergroot. (8) Verstel die lugreëling sodat dit nie direk op jou nek of rug blaas nie. (9) Probeer om te slaap, en gebruik verkieslik ’n oogmasker. (10) Kou iets wanneer julle opstyg en land om die druk in die ore te verlig. Babas kan ’n fopspeen gegee word.
Bedorwe kinders in Duitsland
“’n Nuwe kultuur waarin daar [aan kinders] toegegee word”, word onder ouers waargeneem, sê Udo Beckmann, die voorsitter van ’n Duitse onderwysersunie. Volgens die koerant Südwest Presse het Beckmann gesê dat al hoe meer kinders verskriklik bederf word en gevolglik nie bereid is om hulle op skool in te span nie. “Hy het gesê dat dit ’n baie algemene gevoel onder ouers is dat huiswerk ‘te veel druk’ op hulle kinders plaas en dat dit ‘onredelik’ is om te verwag dat kinders vir klastoetse moet leer.” Wanneer ouers altyd aan hulle kinders toegee om konflik te vermy, het die berig gesê, ontneem hulle hulle kinders “die geleentheid om hulle lewe op ’n verantwoordelike manier te lei”. Bedorwe kinders, sê Beckmann, word uiteindelik “egosentriese volwassenes” wat alles wil hê, maar nie bereid is om daarvoor te werk nie.
Waarom voëls in V-formasie vlieg
Navorsers het nou empiriese bewyse dat voëls soos ganse en pelikane “in V-formasies vlieg om weerstand te verminder en energie op lang migrasies te spaar”, sê The Daily Telegraph van Londen, in ’n bespreking van ’n verslag in die tydskrif Nature. Wetenskaplikes van die Nasionale Sentrum vir Wetenskaplike Navorsing in Villiers en Bois, Frankryk, het die hartklop van agt pelikane gemeet wat in V-formasie vlieg en toe hierdie syfers met hulle “vlerkslae en vliegpatrone” vergelyk. Die navorsers het gevind dat die voëls se hartklop afgeneem het wanneer hulle in formasie vlieg en dat hulle hulle vlerke minder geklap het as wanneer hulle alleen vlieg, al was hulle spoed min of meer dieselfde. “Wanneer voëls in formasie vlieg”, sê Nature, “beweeg elke vlerk in ’n stygstroom wat deur die vlerke van die ander voëls in die formasie geskep word.” Hierdie strategie stel die witpelikane in staat om tot 20 persent meer energie te spaar as wanneer hulle alleen vlieg.
Bybellees in Frankryk
Hoewel 42 persent van die Franse met wie ’n onderhoud gevoer is, ’n Bybel het, het ’n opname wat in die Katolieke koerant La Croix gepubliseer is, getoon dat slegs ongeveer 2 persent dit byna elke dag lees. Twee-en-sewentig persent sê dat hulle “nooit die Bybel lees nie”. Van dié wat ondervra is, het 54 persent gesê dat die Bybel “’n verouderde boek” is wat “uit voeling is met die moderne wêreld”. Die berig verduidelik dat “die Franse die Bybel hoofsaaklik vanuit ’n kulturele oogpunt beskou” en dit gebruik om uit te vind “waar Judaïsme en die Christelike godsdiens hulle oorsprong het”. La Croix sê dat daar “elke jaar ongeveer 250 000 Bybels en 30 000 eksemplare van die Nuwe Testament in Frankryk verkoop word”.
’n Geakkrediteerde astrologieskool
’n Skool in die Verenigde State “waar studente leer om horoskope te skryf en raad oor die toekoms te gee . . . het akkreditasie verkry van ’n staatserkende liggaam, wat dit blykbaar die eerste astrologieskool maak om hierdie status te ontvang”, sê The New York Times. Volgens die instituut se stigter het “die stand van die sterre hulle begunstig” gedurende die maand van die akkreditasie. Die skool word die Astrologiese Instituut genoem en bied kursusse aan wat “’n meesterklas oor die asteroïedgodinne” en ’n klas oor “hoe om ’n astrologiese rubriek te skryf”, insluit. Die meeste gegradueerdes “begin hulle eie praktyke, hoewel party deur holistiese gesondheidsentrum, spa’s en plesierbote in diens geneem word”. Die Times het gesê dat “die instituut akkreditasie ontvang het . . . nadat dit bewys het dat sy onderwysers gekwalifiseerd is en dat sy gegradueerdes bevoeg is om die arbeidsmark te betree”. Maar volgens die hoof van die Akkrediteringsraad vir Hoër Onderwys het “die akkreditasie nie astrologie bevestig nie, maar slegs erken dat die skool sy beloftes aan sy studente nagekom het”.
Mount Everest word skoongemaak
Mount Everest, die aarde se hoogste berg (8 850 meter), word gewoonlik as ’n plek van ongerepte skoonheid en prag uitgebeeld. Maar volgens ’n verslag in die tydskrif Down to Earth van Nieu-Delhi het Mount Everest ’n groot vullishoop geword. Die honderde klimmers wat oor die dekades Everest se hange aangedurf het, het letterlik tonne gemors agtergelaat, insluitende “leë suurstofbottels, ou lere of pale en plastiese bergklimstokke”. Die vuilste kamp, sê die verslag, is “die South Col-kamp, van waar die meeste klimmers die laaste skof na die kruin aanpak”. Bhumi Lal Lama, ’n beampte van die Nepalese Bergklimvereniging, het gesê dat “ons dit oorweeg om [sjerpas] $13,50 (VSA) [R155] te betaal vir elke kilogram vullis wat hulle optel”. Sjerpas “dien gewoonlik as gidse en dra voorraad vir mense” wat Everest klim, sê die verslag.
“Toormiddel” boemerang
“’n Ghanese man is deur ’n mededorpsbewoner doodgeskiet toe hulle ’n toormiddel getoets het wat bedoel was om hom teen koeëls te beskerm”, berig Reuters-nuusdiens. ’n Aantal dorpenaars in die noordooste van Ghana het ’n toordokter gevra om hulle teen koeëls bestand te maak. “Nadat hy sy liggaam elke dag vir twee weke met ’n konkoksie gesmeer het”, sê die verslag, het die slagoffer “ingestem om geskiet te word om te sien of die toormiddel werk”. Die slagoffer is onmiddellik dood ná ’n enkele geweerskoot. Daarna het ontstoke dorpenaars die toordokter gegryp en erg geslaan omdat sy toormiddel nie gewerk het nie. Mense in die verre noorde van Ghana raadpleeg dikwels toordokters wanneer hulle beskerming soek teen vyandiggesinde stamlede.