Olie—Sal dit ooit opraak?
“Sonder [energie] draai die ratte van die nywerheid nie . . . Geen motors, vragmotors, treine, skepe of vliegtuie sou gebou kon word nie . . . Sonder energie sou huise koud en onverlig bly, kos sou nie gaargemaak kon word nie. . . . Sonder energiehulpbronne sou ons letterlik weer in die Steentydperk wees.”—Van die “Amerikaanse Departement van Geologiese Opnames se Wêreldpetroleumevaluasie 2000”.
KENNERS op die gebied van energiesake meen dat die olievoorraad moontlik eendag uitgeput sal raak. Party skat dat die wêreld se oliereserwes nog 63 tot 95 jaar sal hou. Intussen word ander energiebronne benut, waarvan party al dekades lank gebruik word. Onder dié wat hernieubaar is—of vinnig aangevul kan word—is die volgende: sonenergie, windenergie, golfenergie, hidroëlektriese energie en oseaantermiese energie. Maar tans is daar nog groot probleme met die opwekking en verspreiding daarvan.
Die toekoms lyk beslis donker as die mens hom eers na hernieubare energiebronne gaan wend nadat hy niehernieubare bronne uitgeput het. Oliemaatskappye is gereed om die beperkte tyd wat daar volgens hulle berekeninge nog olie beskikbaar sal wees, ten beste te benut. Ongelukkig is daar alle rede om te verwag dat die maatskaplike en omgewingsprobleme wat met olie gepaardgaan, net so lank sal voortduur. Olie op sigself is natuurlik nie die oorsaak van hierdie probleme nie. Dit is die mens se hebsug en dors na mag wat olie sy slegte reputasie gegee het.
Gelukkig is die toekoms van olie—en trouens van alle energiebronne—nie in die hande van die nasies nie. Ja, dit is in die hande van die aarde se Skepper en Bewaarder, Jehovah God, wat belowe het dat elke omgewings- en maatskaplike probleem wat met die gebruik en misbruik van die aarde se hulpbronne verband hou, binnekort sal verdwyn (Openbaring 4:11). Soos die Bybel sê, is die tyd naby wanneer God “die verderwers van die aarde [sal] verderf”. Regverdige heerskappy deur God sal lei tot “’n nuwe hemel en ’n nuwe aarde”, ’n wêreld sonder selfsugtige uitbuiting en onregverdigheid, waar die hulpbronne van die aarde onbaatsugtig gebruik sal word tot voordeel van die ganse gehoorsame mensdom.—Openbaring 11:18; 21:1-4.
[Prente op bladsy 12]
Alternatiewe energiebronne sluit sonpanele en windturbines in