Van ons lesers

Waarom ek ’n winsgewende loopbaan prysgegee het (Junie 2010) Ek kan skaars woorde vind om julle te bedank vir hierdie artikel! Ek is 39, en ek maak drie kinders alleen groot. In die deel van Rusland waar ek woon, is dit baie moeilik om werk te vind. Maar die voorbeeld van Martha Teresa Márquez het my tot optrede aangespoor. Die artikel het gesê dat Martha tamales by die huis gemaak en dit op straat verkoop het om haar in die voltydse bediening te onderhou. Ek het besluit om haar voorbeeld te volg en om Russiese pasteitjies te maak wat pirosjki genoem word. Dit het gewerk! Nou help my hele gesin hiermee. Gevolglik leer my kinders praktiese lewensvaardighede en om verantwoordeliker te wees.

G. M., Rusland

Hakkelry—Is daar ’n oplossing? (Mei 2010) Dankie vir die akkurate inligting wat julle oor hakkelry voorsien het. Ons span ons in om diegene wat hakkel, te laat besef dat daar talle doeltreffende maniere is waarop hulle gehelp kan word.

J. F., president van die Hakkelstigting, Verenigde State

Jongmense vra . . . Hoe kan ek die Bybel se beskouing van homoseksualiteit verduidelik? (Desember 2010) Ek is al tien jaar getroud, en ek het een kind. Ek worstel daagliks met “’n doring in die vlees”. Ek het homoseksuele begeertes. Die huwelik het dit nie verander nie. Ek het al baie moedeloos gevoel omdat dit gelyk het asof ek net nie die stryd teen my begeertes kan wen nie. Maar nadat ek hierdie artikel gelees het, voel ek nie meer dat daar geen hoop is vir my nie. Ek het daarin geslaag om die realistiese doelwit te bereik om nie op hierdie begeertes te reageer nie.—2 Korintiërs 12:7.

Naam weerhou, Verenigde State

Van vyfjarige ouderdom af worstel ek al met homoseksuele begeertes. Ek is nou 61, en ek het nog steeds hierdie begeertes. Ek het veral gehou van die gedagte dat selfs diegene wat tot die teenoorgestelde geslag aangetrokke voel, vir die hoerery moet vlug en dat daar baie persone is “wat ongetroud is, maar heel moontlik nie ’n huweliksmaat sal vind nie en baie wat getroud is met iemand wat gestremd is en nie seks kan hê nie”, en tog kan hulle ’n gelukkige lewe lei sonder om hulle seksuele begeertes te bevredig. Mense met homoseksuele neigings kan dus ook ’n sedelik rein lewe lei as hulle God werklik wil behaag. Ek wil julle dus bedank vir die aanmoediging wat julle aan persone gee wat met hierdie probleem worstel.

Naam weerhou, Verenigde State