Ano ro Ginaturo it Pangtubos Katon?

1. Paalin kita makabenepisyo sa pag-attend sa Memoryal ku kamatayon it Cristo kada dag-on?

SIGURADO gid nga nagapasaeamat ka kay Jehova dahil sa anang owa’t katumbas nga regalo nga pangtubos! (2 Cor. 9:15) Dahil ginsakripisyo ni Jesus ro anang kabuhi, pwede ka mangin amigo ni Jehova. May tsansa ka man nga mabuhi sa owa it katapusan. Abu gid kita nga rason para pasaeamatan si Jehova nga nagtao katon it pangtubos dahil palangga na gid kita! (Roma 5:8) Para padayon kita nga mangin mapinasaeamaton sa pangtubos ag indi ra pagbalewalaon, ginsugo kita ni Jesus nga mag-attend sa Memoryal it anang kamatayon kada dag-on.​—Luc. 22:​19, 20.

2. Ano ro pagatalakayon sa rayang artikulo?

² Sa rayang dag-on, ro Memoryal hay iselebrar sa Sabado, Abril 12, 2025. Sigurado gid nga tanan kita hay gustong mag-attend kara. Makabenepisyo kita it mayad kon taw-an naton it oras ro pagpamaeandonga sa gin-obra ni Jehova ag ku anang Unga para katon, sa panahon bago ro Memoryal ag pagkatapos kara. Sa rayang artikulo, talakayon naton kon ano ro ginaturo katon it pangtubos parti kay Jehova ag sa anang Unga. Sa masunod nga artikulo, buligan kita kara nga maintindihan kon paalin kita makabenepisyo sa pangtubos ag kon paalin naton mapakita ro pagpasaeamat kara.

RO GINATURO KATON IT PANGTUBOS PARTI KAY JEHOVA

3. Paalin ro kamatayon it sangka tawo makatubos sa minilyon nga tawo? (Tan-awa man ro piktyur.)

³ Ro pangtubos hay nagaturo katon parti sa katarungan ni Jehova. (Deut. 32:4) Paalin? Isipa ra: Dahil owa nagtuman si Adan, namana naton ro saea nga nagaresulta sa kamatayon. (Roma 5:12) Para mapalaya kita halin sa saea ag kamatayon, ginpadaea ni Jehova si Jesus para mangin pangtubos. Pero paalin ro kabuhi it sangka perpekto nga tawo makatubos sa minilyon nga tawo? Si apostol Pablo hay naghambae: “Bangud sa pag-eapas it sambatong ka tawo [nga si Adan] abu ro nangin makasasaea, sa kamana man, abu ro pakamatarungon sa atubangan it Dyos sa pagtuman it sambatong ka tawo [nga si Jesus].” (Roma 5:19; 1 Tim. 2:6) Ro buot hambaeon ni Pablo, ro tanan nga tawo hay nangin makasasaea ag nagakamatay dahil owa nagtuman ro sangka perpekto nga tawo sa Dyos. Ag paagi sa pagkamatinumanon it sangka perpekto nga tawo mapalaya kita sa saea ag kamatayon.

4. Ham-an owa lang ginpasugtan ni Jehova nga mabuhi sa owa it katapusan ro matarung nga mga inunga ni Adan?

⁴ Dapat gid baea mamatay si Jesus para euwason kita? Ham-an owa lang ginpasugtan ni Jehova nga mabuhi sa owa it katapusan ro matarung nga mga inunga ni Adan? Para sa buko’t perpekto nga mga tawo, matsa raya ro makatarungan ag tama nga obrahon. Pero bukon it makaraya ro perpekto nga hustisya ni Jehova. Dahil makatarungan si Jehova, indi na gid pagbalewalaon ro klaro ag hungod nga owa pagtuman ni Adan kana.

5. Ham-an makasigurado kita nga pirme gid obrahon ni Jehova kon ano ro tama?

⁵ Pero, paalin kon owa nagtao si Jehova it pangtubos ag balewalaon lang anay ro anang katarungan paagi sa pagpasugot nga mabuhi sa owa it katapusan ro buko’t perpekto nga mga inunga ni Adan? Kon obrahon na ron, posibleng isipon it mga tawo nga balewalaon man it Dyos ro hustisya sa iba pang bagay. Halimbawa, posibleng magduda sanda kon tumanon baea ni Jehova ro anang mga promisa. Pero indi dapat kita mabaeaka nga matabo ron. Ham-an? Dahil ginpadapat ni Jehova ro katarungan maskin pa kinahang-ean na nga isakripisyo ro anang Unga. Ngani nagapasalig katon ra nga pirme na gid obrahon kon ano ro tama.

6. Ano ro sangka paagi nga ginapakita it pangtubos nga palangga kita ni Jehova? (1 Juan 4:​9, 10)

⁶ May sambilog pa nga ugali nga nagpahueag gid kay Jehova para ipadaea na si Jesus ag mamatay para katon: Ro anang pagpalangga. (Juan 3:16; basaha ro 1 Juan 4:​9, 10.) Ginapakita it pangtubos nga bukon eang it kabuhi nga owa’t katapusan ro gusto ni Jehova para katon, kundi gusto na man nga mangin parte kita it anang pamilya. Isipa ra: Kat nagpakasaea si Adan, bukon eon imaw it parte ku pamilya ni Jehova. Bilang resulta, tanan kita hay gin-unga nga bukon man it parte ku pamilya it Dyos. Pero dahil sa pangtubos, ginapatawad ni Jehova ro atong mga saea. Ag sa ulihi, ro tanan nga tawo nga nagatuo ag nagatuman kana hay mangin parte it anang pamilya. Maskin makaron paeang, pwede eon kita mangin maeapit kay Jehova ag sa atong mga igmanghod sa kongregasyon. Matuod gid nga palangga kita ni Jehova!—Roma 5:​10, 11.

7. Paalin ro pag-antus ni Jesus makabulig katon nga maintindihan kon mauno kita kapalangga ni Jehova?

⁷ Mas maintindihan pa gid naton kon mauno kita kapalangga ni Jehova kon isipon naton ro kasakit nga anang nabatyagan kat nakita na ro pag-antus it anang Unga. Ginhambae ni Satanas nga owa it alagad it Dyos nga makapabilin Kana nga mainunongon kon makaatubang sanda it malisud nga sitwasyon. Para pamatud-an nga purilon si Satanas, ginpasugtan ni Jehova nga mag-antus si Jesus bago mamatay. (Job 2:​1-5; 1 Ped. 2:21) Nakita ni Jehova ro pag-intrimis it mga tawo kay Jesus, ro pagbunae it mga soldado kana, ag ro pag-eansang kana sa poste. Nakita rayon ni Jehova ro grabi nga pag-antus it anang pinalangga nga Unga hasta nga mamatay ra. (Mat. 27:​28-31, 39) May gahum si Jehova nga punggan ra tanan. Halimbawa, kat ginhambae it mga tawo: “Makaron tan-awon ta kon euwason imaw it Dyos,” pwede kunta ra obrahon ni Jehova. (Mat. 27:​42, 43) Pero, kon gin-obra na ra, indi mabayad ni Jesus ro anang kabuhi bilang pangtubos ag owa rayon kita it pag-eaum. Ngani ginpasugtan ni Jehova nga tiison ku anang Unga ro mga pag-antus hasta sa anang kamatayon.

8. Ham-an makasigurado kita nga nasakitan si Jehova kat nakita na nga nagaantus ro anang Unga? (Tan-awa man ro piktyur.)

⁸ Indi naton pag-isipon nga dahil eabing gamhanan ro Dyos, owa eon imaw it baeatyagon! Gintuga na kita sa anang larawan nga may abilidad nga makabatyag, ngani ginapakita kara nga may baeatyagon man si Jehova. Ginahambae it Biblia nga ‘nasakitan’ ag ‘nasubuan’ imaw. (Sal. 78:​40, 41) Tan-awa ro eksperyinsya ni Abraham ag ni Isaac. Ginsugo ni Jehova si Abraham nga ihaead ro anang bugtong nga unga bilang sakripisyo. (Gen. 22:​9-12; Heb. 11:​17-19) Maimadyin naton kon mauno kasakit ag kasubo ro nabatyagan ni Abraham habang ginahanda na nga patyon si Isaac. Mas sobra pa karon ro nabatyagan ni Jehova habang ginatan-aw na ro anang Unga nga ginasakit hasta mamatay it buko’t makadyos nga mga tawo!—Tan-awa sa jw.org/hil ro video nga Iluga ang Ila Pagtuo—Abraham, Parte 2.

9. Ano ing matun-an sa Roma 8:​32, 38, 39 parti sa pagpalangga ni Jehova?

⁹ Ginaturo katon it pangtubos nga owa eon it maskin sin-o nga makapalangga katon pareho sa pagpalangga ni Jehova—maskin pa ro atong pinakamaeapit nga pamilya o pinakamaeapit nga amigo. (Basaha ro Roma 8:​32, 38, 39.) Makasigurado kita nga mas palangga kita ni Jehova kaysa sa pagpalangga naton sa atong sarili. Gusto mo baea mabuhi sa owa’t katapusan? Eabi eon gid nga mas gusto ron ni Jehova. Gusto mo baea mapatawad ing mga saea? Eabi eon gid nga mas gusto ka patawaron ni Jehova. Ro ginapangabay eang nana hay batunon naton ro anang espesyal nga regalo nga pangtubos paagi sa pagtuo ag pagtuman kana. Ro pangtubos hay nagapakita kon mauno kita kapalangga ni Jehova. Ag sa bag-ong kalibutan, abu pa kitang matun-an parti sa pagpalangga ni Jehova.​—Man. 3:11.

RO GINATURO KATON IT PANGTUBOS PARTI KAY JESUS

10. (a) Ham-an nasubuan si Jesus sa anang kamatayon? (b) Paalin ginpamatud-an ni Jesus nga tama si Jehova? (Tan-awa man ro kahon nga “Ginpamatud-an it Integridad ni Jesus nga Tama si Jehova.”)

¹⁰ Nabaeaka gid si Jesus parti sa reputasyon it anang Ama. (Juan 14:31) Nasubuan gid si Jesus dahil gin-akusahan imaw it pagpasipaea ag pagpanamad nga posibleng makatao it kahuy-anan sa pangaean it anang Ama. Ngani nagpangamuyo imaw: “Ama ko, kon mahimo, ilikaw kakon raya nga kupa.” (Mat. 26:39) Paagi sa pagpabilin it anang integridad kay Jehova hasta sa anang kamatayon, ginpamatud-an na nga buko’t matuod ro ginhambae ni Satanas sa anang Ama.

11. Paalin ginpakita ni Jesus ro anang pagpalangga sa mga tawo? (Juan 13:1)

¹¹ Ginaturo man katon it pangtubos nga nabaeaka gid si Jesus sa mga tawo, eabi eon sa anang mga disipulo. (Hulu. 8:31; basaha ro Juan 13:1.) Halimbawa, nasayran ni Jesus nga mangin malisud ro pila nga mga parte it anang pagministeryo iya sa eugta, sambilog kara hay ro anang masakit nga kamatayon. Gintuman ni Jesus ro anang asayment iya sa eugta bukon eang it dahil ginsugo imaw ni Jehova, kundi dahil palangga na gid ro mga tawo. Ginpakita ni Jesus ro anang mabahoe nga pagpalangga sa mga tawo paagi sa pagwali, pagturo, ag pagbulig kanda. Maskin sa adlaw it anang kamatayon, ginhugasan na ro siki it anang mga apostoles para tur-an ag palig-unon sanda. (Juan 13:​12-15) Rayon habang nakaeansang si Jesus sa poste, gintaw-an na it pag-eaum ro anang kaiping nga kriminal ag ginpakita na man ro anang pagkabaeaka sa anang nanay kat ginpangabay na si Juan nga diparahon ra. (Luc. 23:​42, 43; Juan 19:​26, 27) Ngani ginpakita ni Jesus ro anang pagpalangga sa mga tawo bukon eang it paagi sa anang kamatayon, kundi paagi man sa anang bilog nga pagkabuhi iya sa eugta.

12. Ano ro padayon nga ginaobra ni Jesus para katon makaron?

¹² Matuod nga namatay si Jesus it “makaisaeang bes gid lang,” pero hasta makaron nagasakripisyo imaw para katon. (Roma 6:10) Paalin? Padayon imaw nga nagatao it oras ag kusog para makabenepisyo kita sa mayad nga mga bagay nga nangin posible dahil sa pangtubos. Isipa ro anang mga ginaobra. Nagaalagad imaw bilang atong Hari, Mataas nga Saserdote, ag ueo it kongregasyon. (1 Cor. 15:25; Efe. 5:23; Heb. 2:17) Imaw ro nagapanguna sa ueobrahon nga pagtipon it mga pinili ag it mabahoe nga grupo it mga tawo. Rayang pagtipon hay makompleto bago matapos ro mabahoe nga kasakitan.b (Mat. 25:32; Mar. 13:27) Ginasigurado na man nga ro anang matutom nga mga alagad hay mapakaon it bugana sa espiritwal sa panahon it rayang katapusan nga mga inadlaw. (Mat. 24:45) Ag sa sueod it Sanglibo nga Dag-on nga Paghari ni Jesus, padayon imaw nga magaalagad para sa atong kamaeayran. Gintao ni Jesus ro anang kabuhi para katon. Espesyal gid imaw nga regalo halin kay Jehova!

PADAYON NGA MAGTUON

13. Paalin ro pagpamaeandong makabulig kimo nga padayon nga makatuon parti sa pagpalangga it Dyos ag ni Cristo para katon?

¹³ Padayon ka nga makatuon parti sa pagpalangga ni Jehova nga Dyos ag ni Cristo Jesus kon padayon mo nga pamaeandungan ro andang mga gin-obra para katon. Mga pilang domingo bago ag pagkatapos it Memoryal, pwede mong basahon ro sambato o iba pang mga Ebanghelyo. Sa ing pagbasa, indi kinahang-ean nga abu gid ing matapos. Kundi, maghinay-hinay ag usuya ro mga rason kon ham-an dapat natong palanggaon si Jehova ag si Jesus. Ag isugid man sa iba ing mga natun-an.

14. Base sa Salmo 119:97 ag footnote, paalin ro pag-research makabulig katon nga padayon nga makatuon parti sa pangtubos ag sa iba pang mga pagturo? (Tan-awa man ro piktyur.)

¹⁴ Kon mabuhay ka eon sa kamatuoran, posible nga mag-isip ka kon may bag-o ka pa baeang matun-an parti sa katarungan it Dyos, sa anang pagpalangga, ag sa pangtubos. Ro matuod, owa’t katapusan ro pwede natong matun-an parti sa rayang mga bagay ag sa iba pang mga topiko. Ngani, ano atong obrahon? Basaha ag tun-i ro base sa Biblia nga impormasyon sa atong mga publikasyon. Kon may owa ka naintindihan sa ing nabasa, mag-research. Rayon sa bilog nga adlaw, pamaeandungi ing nabasahan ag natun-an parti kay Jehova, sa anang Unga, ag sa andang pagpalangga kimo.​—Basaha ro Salmo 119:97 ag footnote.

15. Ham-an importante nga padayon kita nga mag-usoy it mga manggad sa Biblia?

¹⁵ Indi maeuyahan it buot o madueaan it gana kon indi ka makakita it bag-ong mga bagay sa ing pagbasa sa Biblia o pag-research. Isipa nga matsa nagausoy ka it bueawan. Ro tawo nga nagausoy it bueawan hay kinahang-ean gid nga magtao it oras o panahon bago makakita it maskin pinakamaisot nga bueawan. Pero, owa sanda nagapundo ag padayon nga nagausoy it mapinasensyahon dahil ro kada maisot nga bueawan hay importante kanda. Eabi eon gid nga mas importante ro kada manggad it kamatuoran sa Biblia! (Sal. 119:127; Hulu. 8:10) Ngani mangin mapinasensyahon ag padayon nga sunda ing iskedyul sa pagbasa it Biblia.​—Sal. 1:2.

16. Paalin naton pwedeng matuead si Jehova ag si Jesus?

¹⁶ Habang nagatuon, isipa kon paalin mo maaplikar ing ginatun-an. Halimbawa, pwede mong matuead ro katarungan ni Jehova paagi sa pagtratar it patas sa iba. Pwede mo man matuead ro pagpalangga ni Jesus sa anang Ama ag sa iba paagi sa pagiging handa nga obrahon ro gusto ni Jehova, ag buligan ro iba maskin malisud ra. Kon amat, pwede mo pa gid matuead si Jesus paagi sa pagpanaksi sa iba agud may tsansa man sanda nga mabaton ro owa it katumbas nga regalo ni Jehova.

17. Ano ro pagatalakayon naton sa masunod nga artikulo?

¹⁷ Kon mas naintindihan naton ag naapresyar ro pangtubos, mas palanggaon pa gid naton si Jehova ag si Jesus. Dahil kara, mas palanggaon pa gid nanda kita. (Juan 14:21; Sant. 4:8) Ngani panginpusli ro tanan nga ginatao katon ni Jehova para padayon kitang makatuon parti sa pangtubos. Pagatalakayon sa masunod nga artikulo ro pila nga mga paagi kon paalin kita makabenepisyo sa pangtubos, ag kon paalin naton mapakita nga nagapasaeamat kita sa pagpalangga ni Jehova.