Nyo itie ayika pi nindo ma pire tek nisagu zoo mi oro maeni?

1. Pirang’o nindo mi Poy pi tho pa Yesu utie nindo ma pire tek nisagu zoo? (Luka 22:19, 20)

NI DHANU pa Yehova, nindo mi Poy pi tho pa Kristu utie nindo ma pire tek nisagu zoo. Etie foc acel kende ma Yesu ung’olo athothi ni julub pare nia gibed gitim. (Som Luka 22:19, 20.) Wabed wakuro nindo mi Poy pi tho pa Yesu kud ava ma lee pi thelembe dupa. Wakewec iwi moko.

2. Wabed wakuro nindo mi Poy pi tho pa Yesu kud ava ma lee pi thelembe moko ma kanigi?

² Poy pi tho pa Yesu konyowa ninyamu i lembe iwi valer mi jamgony. Epoyo wiwa i kum kite ma wacopo nyutho ko foyofoc mwa pi lam ma Yesu thiero. (2 Kor. 5:14, 15) Emiyo iwa bende kaka mi ‘tielo cwinywa i kindwa’ kud umego ku nyimego mwa. (Rum. 1:12) Kubang’ oro, umego ku nyimego mwa ma dupa ma gikwiyo i tipo de gidikiri i iye. Jol ma ku yaw yaw ma jujolo kogi cwalu jumoko m’i kindgi nidwogo i bang’ Yehova. Dhanu mange bende lembe ma gineno man giwinjo cwalugi nicaku wotho i yo mi kwo. Pieno etie lembe ma kakare nia Poy pi tho pa Yesu pire ubed tek lee i iwa!

3. Poy pi tho pa Yesu diko kind umego ku nyimego mwa m’i wang’ ng’om zoo nenedi? (Nen bende cal.)

³ Kepar bende pi kite ma Poy pi tho pa Yesu diko ko kind umego ku nyimego mwa m’i wang’ ng’om zoo. Jumulembe pa Yehova giwotho cokiri pi Poy pi tho pa Yesu kinde ma ceng’ ubemwony i kabedoman m’i wang’ ng’om. Wan ceke wawinjo korolembe ma ketho nwoc nia pi jamgony utie tek lee. Wawero wer ario mi pak, waketho mukathi ku divai kadhu i kindwa, man wayero “amen” niai kud i adundewa i ajiki mi rwo ang’wen. Pi saa ma romo 24, nwang’u dong’ cokiri ceke utimo lembe ma rom eno. Iparu nia anyong’a copo nego Yehova giku Yesu rukani kinde ma gibeneno nia wabemiyo igi yung i acel i ayi maeno?

4. Wabidwoko wang’ penji ma kanigi i thiwiwec maeni?

⁴ I thiwiwec maeni, wabidwoko wang’ penji ma e: Wacopo yiko adundewa nenedi pi Poy pi tho pa Yesu? Wacopo konyo jumange nenedi kara gin de ginwang’ bero i iye? Man wacopo konyo umego ku nyimego mwa ma gikwiyo i tipo nenedi? Dwokowang’ penji maenogi bikonyowa nibedo ayika pi nindo maeno ma pire tek lee.

WACOPO YIKO ADUNDEWA NENEDI PI POY PI THO PA YESU?

5. (a) Pirang’o ukwayu wanyam i lembe iwi valer mi jamgonyi? (Zaburi 49:7, 8) (b) Video ma thiwiye tie, ‘Pirang’o Yesu utho?’ uponji ku lembang’o?

⁵ Acel m’i kind yo ma pigi tek nisagu zoo ma wacopo yiko ko adundewa pi Poy pi tho pa Yesu utie ninyamu i lembe iwi valer mi lam mi jamgony pa Yesu Kristu. Wan wa dhanu wambe ku copo mi gonyara giwa kud i dubo man tho. (Som Zaburi 49:7, 8; nen bende video ma thiwiye tie, Pirang’o Yesu utho?)a Pieno Yehova ung’iyo nioro Wode ubin umii kwo pare pi nilaruwa. Ugam ukwayu gin ario ceke gitim kero ma lee pi nitimo lembuno. (Rum. 6:23) Ka wabemedara ninyamu i lembe iwi gin ma Yehova giku Yesu gitimo iwa, e foyofoc mwa de bimedere ameda pi jamgony. Pieno wabiweco iwi lembe moko ma tek ma Yehova giku Yesu gibino ayika nitimo pi nimiyo iwa jamgony. Re ku kwong’a zoo, ang’o m’ugam ukwayere pi niculo jamgonyi?

6. Jamgony utie ang’o, man pirang’o ugam ukwayu Yesu ucul jamgonyi?

⁶ Jamgony utie welpiny ma juculo pi nigonyo piny moko. Adamu ubino ng’atu ma pwe kinde ma jucwiye. Saa m’edubo, ebayu genogen mi kwo ma rondo ku rondo pire kende ngo, ento bende pi nyithindhe ceke. Pi nigonyo gin m’Adamu bayu, Yesu uthiero kwo pare ma pwe calu lam. I kind nindo ceke ma Yesu kwo iye iwi ng’om, “etimo ngo dubo man kadok ndra de junwang’u ngo i dhoge.” (1 Pet. 2:22) Pieno i saa m’ebetho, nwang’u kwo pare urombo tap ku m’Adamu bayu.—1 Kor. 15:45; 1 Tim. 2:6.

7. Yesu unwang’ere i wang’ amulaic moko ma kani kinde m’ebino iwi ng’omi?

⁷ Yesu uworo Won m’i polo tap tap i ayi m’ukwayere, kadok ku kind amulaic m’enwang’ere ko kinde m’ebino iwi ng’om. Saa m’ebino nyathin, ugam ukwayu ejwigere i the dito mi junyodo pare ma gibino ku dubalaga, kadok nwang’u en enyolere ni ng’atu ma pwe de. (Luka 2:51) Kinde m’edoko aradu, ugam ukwayu ecerere i wang’ mac ma jumange giromo dhuro i kume kara kud ewor junyodo pare kunoke kara etur cik pa Yehova. Man kinde m’edongo, ugam ukwayu ecerere i wang’ abidhe pa Sitani Wonabali m’umito nia ewek nitimo ni Yehova. (Mat. 4:1-11) Lembakeca pa Sitani ubino nia eketh Yesu udubi, kara kud ecopere ire niculo lam mi jamgony.

8. Yesu uciro peko mange ma kanigi?

⁸ Saa ma Yesu ubetimo tic pare iwi ng’om, enwang’ere kud amulaic mange dupa. Ku lapor, junyayu ragedo i kume, man judegi pare gisayu yore mi nege. (Luka 4:28, 29; 13:31) Ugam ukwayu ecir ng’ico mi julub pare. (Mark. 9:33, 34) Kinde ma jubeng’olo tho i wiye, jufwode man jucaye. I ng’eye junege ve jakwo, man ewinjo litho lee. (Ebr. 12:1-3) Bende, saa m’ebino iwi yen mi can, ugam ukwayu ecir peko ma lee en gire, m’umbe gwok pa Yehova.b—Mat. 27:46.

9. Lam ma Yesu thiero ubecwaluwa nitimo ang’o? (1 Pethro 1:8)

⁹ Ubenen kamaleng’ nia Yesu usendere lee akeca pi nimiyo lam mi jamgony. Ka wabeparu pi gin m’ebedo ayika nitimo pi nimiyo lam mi jamgony piwa, nyo eno cwaluwa ngo nimare lee mandha?—Som 1 Pethro 1:8.

10. Lam mi jamgony ubanju ang’o i bang’ Yehova?

¹⁰ Ka Yehova ke? En lundo ebino ayika nitimo ang’o kara Yesu ucul lam mi jamgonyi? Poy nia Yehova giku Yesu gitie ku winjiri ma ceng’ini mandha ma copo bedo i kind wego giku wode. (Rie. 8:30) Pieno kepar kite m’ewinjere ko kinde m’ebeneno Yesu ubeciro peko ma dupa iwi ng’om. M’umbe jiji, can unege lee kinde m’ebeneno jubesendo Wode, jubekwere, man jubemulo iye.

11. Kemii lapor moko m’ubenyutho kite ma Yehova romo winjere ko kinde ma jubenego Yesu.

¹¹ Wego moko ci ma tho unego nyathin pare, ung’eyo kadhiri litho ma juwinjo i saa ma kumeno. I andha, watie ku yiyoyic ma tek i cer, ento eno kabu ngo litho ma wawinjo ka ng’atu moko ma wamaru utho. Lapor maeni ubekonyowa ninyang’ i kite ma Yehova uwinjere ko kinde m’ebeneno Wode m’emaru ubesendere man ubetho i nindo 14 mi dwi mi Nisan, oro 33 N.N.Y.c—Mat. 3:17.

12. Wacopo timo ang’o i kind nindo m’ubeterowa i ceng’ mi Poy pi tho pa Yesu?

¹² Niai kawoni nitundo i nindo mi Poy pi tho pa Yesu, nyo iromo pangu ngo nitimo ponji peri ma segi iwi lam mi jamgonyi? Tii ku Buku mi timo sayusac mi Jumulembe pa Yehova kunoke ku jamtic moko ci mange mi ponjo Biblia, kara inyang’ ma thuc i thiwiwecne.d Lub bende kokoro mandha program mi som mi Biblia mi Poy pi tho pa Yesu ma juwodho i Buku mi coko mi kwo man tic mwa mi Jukristu. Man i nindone, kud iwil nineno program mi Ponji mi kugweno mi ceng’ mi Poy pi tho pa Yesu. Ka wayiko adundewa pi Poy pi tho pa Yesu, wabibedo bende ayika nikonyo jumange de ninwang’u bero i iye.—Ezr. 7:10.

KONY JUMANGE DE GINWANG’ BERO I IYE

13. Yo ma kwong’a ma waromo konyo ko dhanu mange de ginwang’ bero i Poy pi tho pa Yesu utie ma kani?

¹³ Wacopo konyo jumange nenedi kara gin de ginwang’ bero i Poy pi tho pa Yesu? Yo ma kwong’a utie nilwong’ogi i programne. M’uweko dhanu ma warombo kugi nja i tic mi lembanyong’a, wacopo kiewo bende nying’ dhanu mange ma wabilwong’o. Gicopo bedo wedi mwa, jutic wadwa, awiya kalasi wadwa, man jumange. Ka wambe ku wend karathasi mi lwong’o m’uromo, wacopo oro igi bende karathasine mir elektronik. Wang’eyo ngo ka nyo dhanu adi ma biyiyo lwong’one!—Ekl. 11:6

14. Kemii lapor moko m’unyutho nia nimiyo karathasi mi lwong’o athothi ni ng’atini romo miyo amora i kume.

¹⁴ Poy nia kan ilwong’o ng’atini athothi i Poy pi tho pa Yesu, eno romo miyo amora i kume nibino. Ceng’ acel, i nyamego moko ma won ot pare tie ngo Jamulembe pa Yehova uwang’ lii kinde ma won ot parene uyero ire nia en de ebicidho i Poy pi tho pa Yesu. Pirang’o lembuno uwang’u i nyamegone? Pilembe nwang’u dong’ elwong’e wang’ dupa i Poy pi tho pa Yesu, ento ebed ecidho ngo. Kan ang’o m’uketho eyiyo lwong’one ma wang’uni ke? Won ot parene yero nia jadit cokiri moko ma ceng’ini kugi ma ging’iyo kude re m’umiyo ire karathasi mi lwong’o. E ecidho i Poy pi tho pa Yesu mi oro maeca, man mi oro mange dupa m’i ng’eye.

15. Kinde ma wabelwong’o ng’atu moko i Poy pi tho pa Yesu, mito ngo wawil kud ang’o?

¹⁵ Mito ngo wawil nia ju ma wamiyo igi karathasi mi lwong’o gicopo bedo ku penji dupa, asagane ka fodi gidikiri ngo wang’ acel de i coko mwa. Pieno ukwayu walar wapar pi penji ma giromo penjo, man wayikara pi nidwoko wang’gi. (Kol. 4:6) Ku lapor, jumoko giromo penjo kumae: ‘Lembang’o ma bikadhu kucane?’ ‘Programne bitimo saa adi?’ ‘Ukwayu akendara nenedi?’ ‘Jubimondo ku sente adi?’ ‘Nyo ajok bibedo nuti?’ Saa ma wabelwong’o ng’atini i Poy pi tho pa Yesu, waromo kepenje kumae: “Nyo itie ku penji moko?” Man i ng’eye, wacul wang’ penji pare. Pi nikonye enyang’ i kite ma coko mwa bekadhu ko, wacopo tiyo bende ku video m’uwacu Wapoi pi tho pa Yesu man Lembang’o ma Bekadhu i Ot Ker? Ponji mi 28 mi buku Icopo kwo kud anyong’a rondo ku rondo! bende umiyo paru ma beco dupa ma wacopo weco i wigi.

16. Ju ma gidikiri i Poy pi tho pa Yesu giromo bedo ku penji mange ma kani?

¹⁶ I ng’ey program mi Poy pi tho pa Yesu, jumoko ma lembene unyang’ugi giromo bedo ku penji mange de. Giromo penjo ka nyo pirang’o ng’atu acel de mbe m’ucamu mukathi kadi m’umadhu divai, kunoke nyo pirang’o ju ma wendgi nok kendgi re ma gimulo kum piny maeno. Giromo penjo bende ka nyo wabed watimo Poy pi tho pa Yesune wang’ adi. Man giromo mito ging’ey ka nyo coko ceke mi Jumulembe pa Yehova bekadhu ve Poy pi tho pa Yesu. Kadok juweco iwi lembe maeno ma dupa i saa mi korolembe mi Poy pi tho pa Yesu de, re ju ma gibino ma nyen giromo maru jukejukor igi lembene i thucne. Thiwiwec mi jw.org m’uwacu: “Pirang’o Jumulembe pa Yehova gitimo Cemo mir uthieno pa Rwoth i ayi m’ukoc ku mi dini mange?” copo konyowa nidwoko wang’ penji migine moko. Wamito watim gin ceke ma wacopo i wang’ Poy pi tho pa Yesu, i saa m’ebekadhu man i ng’eye, pi nikonyo dhanu “m’adundegi ubedo ayika” ginwang’ bero i kum programne.—Tic. 13:48.

KONY JU MA GIKWIYO I TIPO

17. Judong cokiri gicopo konyo ju ma gikwiyo i tipo nenedi? (Ezekiel 34:12, 16)

¹⁷ Judong cokiri, wucopo konyo ju ma gikwiyo i tipo nenedi i kind nindo mi Poy pi tho pa Yesu? Wunyuth igi nia wubedieng’ kugi. (Som Ezekiel 34:12, 16.) I wang’ Poy pi tho pa Yesu, wutim tego wuwec ku ju ma dupa m’i kindgi i kadhiri ma wucopo. Wunyuth igi nia wumarugi, man nia wutie ayika nikonyogi i kadhiri ceke ma copere iwu. Wulwong’gi i Poy pi tho pa Yesu. Tek gibino, wujolgi ku yaw yaw. I ng’ey programne, wumeduru nilwong’o umego ku nyimego mwa maeno ma jumer ku telefon, niliewogi, man nimiyo igi kony mi tipo ma gitie ku yenyne kara gidwog i bang’ Yehova.—1 Pet. 2:25.

18. Ng’atuman m’i kindwa copo konyo umego ku nyimego mwa ma gikwiyo i tipo nenedi? (Jurumi 12:10)

¹⁸ Dhanu ceke mi cokiri gicopo konyo ju ma gikwiyo i tipo ma gibino i Poy pi tho pa Yesu. Nenedi? Nwang’u gibenyutho igi mer, bero man woro. (Som Jurumi 12:10.) Poy nia rombe maeno giromo bedo ku jiji mi caku bino kendo i coko. Saa moko nyo gibelworo nia jubiwok jologi ngo ma ber.e Pieno, ur nipenjogi ku penji ceke ma romo nyayu lewic i wigi kunoke niyero wec ma romo kierogi. (1 Thes. 5:11) Poy bende nia umego ku nyimego maeno gitie juyic wadwa. Watie kud anyong’a nitimo kendo ni Yehova karacelo kugi!—Zab. 119:176; Tic. 20:35.

19. Nibepoy pi tho pa Yesu miyo bero ma kani?

¹⁹ Watie ku foyofoc lee nia Yesu ukwayu wabed wapoy pi tho pare kubang’ oro, man wang’eyo nia pi lembene tie tek lee. Ka wabedikara i iye, eno miyo bero iwa man ni jumange i ayi dupa. Nenedi? (Isa. 48:17, 18) Mer ma wamaru ko Yehova giku Yesu medere ameda. Wanyutho nia watie ku foyofoc pi gin ma gitimo iwa. Kindwa doko ceng’ini lee kud umego ku nyimego mwa. Man wakonyo jumange de ging’ey ayi ma giromo nwang’u ko mugisa ma jamgony miyo. Dong’ watim ceke ma wacopo kara wabed ayika pi Poy pi tho pa Yesu m’utie nindo ma pire tek nisagu zoo!