በጽሑፍ መደርደሪያዎች ተጠቅሞ መመሥከር የሚቻለው እንዴት ነው?

ጋሪ ወይም ጠረጴዛ በመጠቀም የሚሰጠው ምሥክርነት ቅን ልብ ያላቸው ሰዎች ወደ እውነት እንዲሳቡ በመርዳት ረገድ በጣም ውጤታማ መሆኑ እየታየ ነው። (ዮሐ. 6:44) በመሆኑም ሽማግሌዎች ከፍተኛ የእግረኛ ፍሰት ባለባቸው የጉባኤያቸው ክልሎች ውስጥ የአደባባይ ምሥክርነት ለመስጠት ዝግጅት እንዲያደርጉ ተበረታትተዋል። ተንቀሳቃሽ የጽሑፍ መደርደሪያዎች በአንድ ቦታ ስለማይቀመጡ በአጠቃላይ ሲታይ የባለሥልጣናትን ፈቃድ መጠየቅ አያስፈልግም። በዚህ ሥራ ለመካፈል ብቃት ያላቸው እነማን ናቸው? ጥሩ የማመዛዘን ችሎታ፣ የሚያስከብር አቋምና ከሰዎች ጋር ውይይት የማድረግ ችሎታ ያላቸው አስፋፊዎች በዚህ ሥራ ሊካፈሉ ይችላሉ። አስፋፊዎች በሥራው ይበልጥ ውጤታማ መሆን ከፈለጉ ሊያደርጓቸው የሚገቡና ሊያደርጓቸው የማይገቡ ነገሮች ከዚህ በታች ቀርበዋል።

መደረግ ያለበት፦

በአጠገባችሁ ለሚያልፉ ሰዎች ወዳጃዊ ስሜት አሳዩ፤ እንዲሁም ተቀራቢና እነሱን ለመርዳት ዝግጁ ሁኑ። አንዳንድ አስፋፊዎች ሞቅ ያለ ፈገግታ ያሳያሉ እንዲሁም ወዳጃዊ በሆነ ስሜት ሰላምታ ይሰጣሉ። በዚያ የሚያልፍ አንድ ሰው ወደ ጽሑፎቹ ሲመለከት ካያችሁ “የምትፈልገውን መውሰድ ትችላለህ” የሚል ግብዣ ማቅረብ ትችላላችሁ።
ከጠረጴዛው በተገቢው ርቀት ላይ ቁሙ። በአንዳንድ አካባቢ አስፋፊዎች ከጽሑፍ መደርደሪያው ብዙም ሳይርቁ መቆማቸው ጥሩ ውጤት አስገኝቶላቸዋል። በሌሎች አካባቢዎች የሚኖሩ አስፋፊዎች ደግሞ እንዲህ ማድረግ በዚያ የሚያልፉ ሰዎች ቆም ብለው ጽሑፎችን እንዳይመለከቱ ነፃነት እንዳሳጣቸው ስለተገነዘቡ ይበልጥ ራቅ ብለው በመቆም ሰዎች ወደ መደርደሪያው እስኪመጡ ድረስ ይጠብቃሉ። ያም ሆነ ይህ አንድ ሰው ወደ ጽሑፍ መደርደሪያው ከመጣ ውይይት ለመጀመር ጥረት አድርጉ፤ ለምሳሌ “ስለዚህ ጥያቄ አስበህ ታውቃለህ?” በማለት መጠየቅ ትችላላችሁ።
በተቻለ መጠን መጽሐፍ ቅዱስን ተጠቀሙ።
እንደ የመጽሐፍ ቅዱስ ትምህርት ያሉ የማስጠኛ ጽሑፎችን ለሚወስድ ማንኛውም ሰው መጽሐፍ ቅዱስን ለማጥናት የሚያስችል ዝግጅት እንዳለ ተናገሩ። መጽሐፍ ቅዱስን መማር የሚኖርብን ለምንድን ነው? የተባለውን ቪዲዮ ከኤሌክትሮኒክ መሣሪያችሁ ላይ እንዲመለከት ጋብዙት።
የሚቻል ከሆነ ፍላጎት ያሳዩ ሰዎችን ስታገኙ አድራሻቸውን ተቀበሉ። ግለሰቡ የሚኖረው ከእናንተ ክልል ውጭ ከሆነ እባካችሁ ተከታትላችሁ እርዱት (S-43) የተባለውን ቅጽ በመሙላት በተቻለ ፍጥነት ለጸሐፊው ስጡት።

መደረግ የሌለበት፦

መቆጣት፣ መጎትጎት፣ መጫን ወይም ከጠረጴዛው አጠገብ ዘብ ጠባቂ መስሎ መቆም።
ይህንን የምሥክርነት ዘርፍ ጽሑፎችን ለማደል ብቻ እንደሚያገለግል ዘዴ አድርጎ መመልከት። በአገልግሎት ላይ ስንሆን ዋነኛው ግባችን የመጽሐፍ ቅዱስ ጥናት ማስጀመር ነው፤ ስለዚህ ከሰዎች ጋር ውይይት ለመጀመር ጥረት ማድረግ ይኖርብናል።
ፊት ለፊት በመቆም ጽሑፍ መደርደሪያውን መከለል ወይም ከአገልግሎት ጓደኛችን ጋር የጦፈ ወሬ መያዝ። ስለ ግል ጉዳይ በሞባይል ስልካችን ማውራት የሚያስገድደን ሁኔታ ካጋጠመን ከጽሑፍ መደርደሪያው ራቅ ብለን ማናገር የተሻለ ነው።
ከተቃዋሚዎች ጋር ክርክር መግጠም። ተቃዋሚው ረብሻ የሚፈጥር ዓይነት ከሆነ አካባቢውን ለቀን ወደ ሌላ ቦታ መሄድ ሊያስፈልገን ይችላል።