Ҝәнҹләр, Аллаһы иззәтләндирән мәгсәдләрә ҹан атын
«Аллаһ јолунда мәшг ет» (1 ТИМОТЕЈӘ 4:7).
1, 2. а) Павел Тимотеји нәјә ҝөрә тә’рифләјирди? б) Бу ҝүн ҝәнҹләр Аллаһ јолунда неҹә мәшг едирләр?
«БАРӘНИЗДӘ... һәгигәтән гајғы чәкән һәмфикир башга адамым јохдур... О, ушаг атасына хидмәт етдији кими, Мүждәни јајмаг ишиндә мәнә хидмәт етди» (Филипилиләрә 2:20, 22). Гәлби исиндирән бу тә’риф сөзләри һәвари Павелин Филипидә јашајан мәсиһчиләрә јаздығы мәктубундандыр. Павел бу сөзләри кимин һаггында дејирди? Сәјаһәтләри заманы ону мүшајиәт едән ҹаван Тимотеј һаггында. Бир тәсәввүр ет, Павелин өз мәһәббәтини вә е’тибарыны белә ифадә етмәси Тимотеји неҹә дә руһландырмышды!
2 Тимотеј кими руһани бахышлы ҝәнҹләр Јеһованын халгы ичиндә һәмишә гијмәтли хәзинә һесаб олунуб (Мәзмур 110:3). Бу ҝүн Аллаһын тәшкилатында пионер, миссионер, тикинтидә вә филиалларда көнүллү хидмәт едән ҝәнҹләр вар. Башга мәс’улијјәтләри дашымагла јанашы, јығынҹағын ишләриндә сә’јлә иштирак едәнләр дә тә’рифә лајигдирләр. Бу ҝәнҹләр сәмави Атамыз Јеһованы иззәтләндирән мәгсәдләрә ҹан атараг һәгиги мәмнунлуг әлдә едирләр. Онлар һәгигәтән дә ‘Аллаһ јолунда мәшг едирләр’ (1 Тимотејә 4:7, 8).
3. Бу мәгаләдә һансы суаллар мүзакирә олунаҹаг?
3 Бәс сән бир ҝәнҹ кими, конкрет руһани мәгсәдләрә чатмаг үчүн сә’ј ҝөстәрирсәнми? Бу ишдә сәнә ким көмәк едәр вә руһландыра биләр? Вар-дөвләтә һәрис дүнјанын тә’сиринә неҹә мүгавимәт ҝөстәрә биләрсән? Аллаһы иззәтләндирән мәгсәдләрә ҹан атмагла һансы хејир-дуалары бичәҹәксән? Ҝәлин Тимотејин һәјатыны вә хидмәтини нәзәрдән кечирәрәк бу суаллара ҹаваб тапаг.
Тимотејин әсли
4. Тимотејин һәјатыны гысаҹа данышын.
4 Тимотеј Романын Галатија әјаләтинин Листра адлы кичик шәһәриндә бөјүмүшдү. Ҝөрүнүр, о, мәсиһчилик һаггында илк дәфә јенијетмә оланда, ерамызын тәхминән 47-ҹи илиндә Павел Листрада тәблиғ едәндә ешитмишди. Тимотеј чох тезликлә јерли иман гардашлары арасында јахшы ад газанды. Ики илдән сонра Листраја гајыдан Павел Тимотејин руһани инкишафы барәдә ешидәндә, ону өзү илә миссионер сәјаһәтләринә апарды (Һәвариләрин ишләри 14:5-20; 16:1-3). Тимотеј јеткинләшдикҹә, она даһа мәс’улијјәтли ишләр, о ҹүмләдән, гардашлары мөһкәмләндирмәк кими ваҹиб тапшырыглар һәвалә олунурду. Павел тәхминән 65-ҹи илдә Ромадакы һәбсханадан Тимотејә мәктуб јазанда о, Ефесдә ағсаггал кими хидмәт едирди.
5. 2 Тимотејә 3:14, 15 ајәләринә әсасән, Тимотејин руһани мәгсәдләрә ҹан атмасына һансы ики амил тә’сир етмишдир?
5 Ајдындыр ки, Тимотеј һәјатда руһани мәгсәдләрә үстүнлүк верирди. Бәс ону буна нә тәшвиг етмишди? Тимотејә јаздығы икинҹи мәктубунда Павел ики һәлледиҹи мәгама тохунду: «Өјрәндијин вә әмин олдуғун шејләрә әмәл етмәкдә давам ет, чүнки бунлары кимдән өјрәндијини билирсән. Мүгәддәс Јазылары да ушаглыгдан е’тибарән билирсән» (2 Тимотејә 3:14, 15). Ҝәлин әввәлҹә Тимотејин сечим етмәсиндә диҝәр мәсиһчиләрин ојнадығы ролу арашдыраг.
Јахшы әһатәнин фајдасы
6. Тимотеј һансы тәрбијәни алмышды вә бу она неҹә тә’сир етмишди?
6 Тимотејин тәрбијә алдығы аиләдә һамы ејни динә гуллуг етмирди. Онун атасы јунан, анасы Евники вә нәнәси Лоида исә јәһуди иди (Һәвариләрин ишләри 16:1). Евники вә Лоида Тимотејә көрпәлијиндән Ибрани Јазыларыны өјрәдирдиләр. Өзләри мәсиһчилији гәбул етдикдән сонра онлар, шүбһәсиз, бу тә’лимләрин доғрулуғуна Тимотеји дә әмин етмишдиләр. Бу ҝөзәл тәрбијәнин Тимотејә бөјүк фајдасы дәјди. Павел гејд етди: «Сәндә олан ријасыз иманы јада салырам. Бу иман, габагҹа сәнин нәнән Лоидада вә анан Евникидә јашајырды вә мән әминәм ки, о сәндә дә јашајыр» (2 Тимотејә 1:5).
7. Бир чох ҝәнҹләрә кимләр көмәк едир вә бунун онлара һансы фајдасы дәјә биләр?
7 Бу ҝүн бир чох ҝәнҹләрин Лоида вә Евники кими руһани мәгсәдләрин ваҹиблијини дәрк едән Аллаһдан горхан валидејнләри вә нәнә-бабалары вар. Мәсәлән, јенијетмә оланда валидејнләринин онунла етдији узун сөһбәтләр индијәдәк Самирәнин јадындадыр. О дејир: «Ата-анам мәнә Јеһованын нөгтеји-нәзәрини ашылајыр, тәблиғи биринҹи јерә гојмағы өјрәдирдиләр. Онлар һәмишә мәни таммүддәтли хидмәтә тәшвиг едирдиләр». Самирә валидејнләринин сөзләринә гулаг асды вә инди о, хүсуси хидмәт нөвүндә иштирак едир: өз өлкәсиндә Бет-Ел аиләсинин үзвүдүр. Әҝәр валидејнләрин фикрини руһани мәгсәдләрә јөнәлтмәјә сәни тәшвиг едирләрсә, онларын мәсләһәтини гулагардына вурма. Онлар сәнин јахшылығыны истәјирләр (Сүлејманын мәсәлләри 1:5).
8. Руһән мөһкәм мәсиһчиләрлә достлуғун Тимотејә һансы фајдасы дәјди?
8 Руһән јеткин мәсиһчиләрлә достлуг етмәк дә чох ваҹибдир. Тимотеји һәм өз јығынҹағынын, һәм дә тәхминән 30 км аралыда јерләшән Конјадакы јығынҹағын ағсаггаллары јахшы таныјырдылар (Һәвариләрин ишләри 16:1, 2). О, фәал инсан олан Павеллә јахын дост олмушду (Филипилиләрә 3:14). Павелин мәктубларындан ҝөрүнүр ки, Тимотеј мәсләһәтләри гәбул едир вә иман нүмунәләрини јериндәҹә тәглид едирди (1 Коринфлиләрә 4:17; 1 Тимотејә 4:6, 12-16). Павел јазырды ки, Тимотеј онун ‘тә’лим, давраныш, мәгсәд, иман, сәбир, мәһәббәт, тәһәммүлүнүн изи илә ҝетмишди’ (2 Тимотејә 3:10, 11). Бәли, Тимотеј Павелин нүмунәсини чох јахшы изләјирди. Руһән мөһкәм мәсиһчиләрлә јахынлыг етсән, сағлам руһани мәгсәдләрә ҹан атмаг сәнин үчүн дә асан олаҹаг (2 Тимотејә 2:20-22).
«Мүгәддәс Јазылары» өјрәнмәк
9. Аллаһ јолунда мәшг етмәк үчүн дүзҝүн достлар сечмәкдән савајы, даһа нә етмәлисән?
9 Руһани мәгсәдләрә һәвәс тәкҹә јахшы достлар сечмәкләми јараныр? Хејр. Сән Тимотеј кими «Мүгәддәс Јазылары» диггәтлә арашдырмалысан. Бәлкә дә јазыб-охумаг сәнин чох да хошуна ҝәлмир, анҹаг јадына сал ки, Тимотеј ‘Аллаһ јолунда мәшг етмәли’ иди. Идманчылар мәгсәдләринә чатмаг үчүн ајларла усанмадан мәшг едирләр. Руһани мәгсәдләрә наил олмаг үчүн дә нәјисә гурбан вермәк вә сә’ј ҝөстәрмәк лазымдыр (1 Тимотејә 4:7, 8, 10). Анҹаг сәндә суал јарана биләр: «Мүгәддәс Китабы өјрәнмәјин мәгсәдләримә чатмаға нә аидијјәти вар?» Ҝәлин онларын арасындакы үч әлагәни нәзәрдән кечирәк.
10, 11. Мүгәддәс Јазылар руһани мәгсәдләрә чатмаға сәни неҹә тәшвиг едәҹәк? Нүмунә чәк.
10 Биринҹиси, Мүгәддәс Јазылар сәндә тәмиз нијјәт јарадаҹаг. Орада сәмави Атамызын ҝөзәл шәхсијјәти, мәһәббәтдән ирәли ҝәләрәк бизим үчүн нә етдији вә садиг хидмәтчиләри үчүн һансы әбәди мүкафатлары һазырладығы ачыгланыр (Амос 3:7; Јәһја 3:16; Ромалылара 15:4). Јеһованы нә гәдәр јахшы таныјаҹагсанса, Она гаршы мәһәббәтин вә һәјатыны Она һәср етмәк арзун бир о гәдәр артаҹаг.
11 Бир чох ҝәнҹ мәсиһчиләр дејирләр ки, онларын һәгигәти мәнимсәмәсиндә әсас ролу Мүгәддәс Китабы мүнтәзәм өјрәнмәк ојнамышды. Мәсәлән, Адел мәсиһчи аиләсиндә бөјүсә дә, һеч вахт гаршысына руһани мәгсәдләр гојмурду. О дејир: «Валидејнләрим мәни өзләри илә Падшаһлыг Залына апарырдылар, анҹаг мән нә шәхси өјрәнмә кечирирдим, нә дә ҝөрүшләрдә програма гулаг асырдым». Баҹысы вәфтиз оландан сонра Аделин һәгигәтә мүнасибәти дәјишди. «Мән Мүгәддәс Китабы башдан ајаға кими охумағы гәрара алдым. Бир парча охујур, сонра охудугларым һаггында дәфтәрдә гејдләр едирдим. Һәминки гејдләри индијәдәк сахламышам. Бир илә Мүгәддәс Китабы охујуб гуртардым». Нәтиҹәдә Адел һәјатыны Јеһоваја һәср етди. Ҹидди хәстәлијинә бахмајараг, о, инди пионер, јә’ни таммүддәтли хидмәтчидир.
12, 13. а) Мүгәддәс Китабы өјрәнмәк ҝәнҹләрә һансы дәјишикликләри етмәјә көмәк едәҹәк вә неҹә? б) Мүгәддәс Китабын мүдрик мәсләһәтләриндән нүмунә чәк.
12 Икинҹиси, Мүгәддәс Китабын сајәсиндә шәхсијјәтиндә лазыми дәјишикликләр едәҹәксән. Павел Тимотејә демишди ки, ‘Мүгәддәс Јазылар’ «тә’лим, тәкзиб, ислаһ, салеһлик тәрбијәси үчүн фајдалыдыр ки, Аллаһ бәндәси камил олуб, һәр ҹүр хејирли иш үчүн тәҹһиз едилсин» (2 Тимотејә 3:16, 17). Мүнтәзәм олараг Аллаһын Кәламындан охудугларынын үзәриндә дүшүнмәк вә онун принсипләрини һәјата кечирмәклә јол верәҹәксән ки, Аллаһын мүгәддәс руһу шәхсијјәтини јахшылыға доғру дәјишсин. Бунун сајәсиндә сәндә һәлимлик, мәтанәт, чалышганлыг вә һәмиманлыларына гаршы тәмиз мәһәббәт јаранаҹаг (1 Тимотејә 4:15). Тимотејдә бу хүсусијјәтләр вар иди, буна ҝөрә дә һәм Павел, һәм дә хидмәт етдији јығынҹаг ону чох гијмәтләндирирди (Филипилиләрә 2:20-22).
13 Үчүнҹүсү, Аллаһын Кәламы мүдриклик хәзинәсидир (Мәзмур 1:1-3; 19:7; 2 Тимотејә 2:7; 3:15). О сәнә мүдрикликлә достлар, фајдалы әјләнҹә сечмәјә вә сајсыз-һесабсыз башга чәтин мәсәләләрдә гәрар вермәјә көмәк едәҹәк (Јарадылыш 34:1, 2; Мәзмур 119:37; 1 Коринфлиләрә 7:36). Руһани мәгсәдләрә чатмағын үчүн инди мүдрик гәрарлар гәбул етмәјин ваҹибдир.
«Мүбаризәдә јахшы чарпыш»
14. Руһани мәгсәдләрә ҹан атмаг нә үчүн асан дејил?
14 Јеһоваја иззәт ҝәтирән мәгсәдләрә үстүнлүк вермәк ән мүдрик һәрәкәт олса да, бу һеч дә асан дејил. Мәсәлән, иш сечиминә ҝәлдикдә, гоһумларын, һәмјашыдларын, һәмчинин али тәһсил вә ҝәлирли ишин һәгиги уғур вә хошбәхтлијин ачары олдуғуну дүшүнән мүәллимләрин јахшылығыны истәјәрәк сәнә ҝүҹлү тәзјиг ҝөстәрә биләрләр (Ромалылара 12:2). Јеһованын сәнә һазырладығы ‘әбәди һәјаты бәрк тутмаг’ үчүн Тимотеј кими, сәнә дә ‘иман уғрунда ҝедән мүбаризәдә јахшы чарпышмаг’ лазым ҝәләҹәк (1 Тимотејә 6:12; 2 Тимотејә 3:12).
15. Чох еһтимал ки, Тимотеј һансы чәтинликләрлә гаршылашмышды?
15 Иманына шәрик олмајан аилә үзвләрин сәнин сечиминлә разылашмајанда сынағын даһа да чәтинләшә биләр. Јәгин, Тимотеј дә белә мүгавимәтлә мүбаризә апармалы олмушду. Бир китабда дејилир ки, Тимотејин аиләси чох ҝүман «тәһсилли вә варлы синфә» мәнсуб иди. Атасы, еһтимал ки, онун али тәһсил алаҹағыны вә аиләнин ишини давам етдирәҹәјини ҝөзләјирдиa. Тимотеј исә Павеллә бирҝә тәһлүкәләрлә долу вә мадди ҹәһәтдән чәтинлик чәкәҹәји миссионер сәјаһәтини сечди. Тәсәввүрүнә ҝәтирирсән атасы буна неҹә мүнасибәт ҝөстәрди?!
16. Бир ҝәнҹ атасынын мүгавимәтинә неҹә таб ҝәтирди?
16 Ҝәнҹ мәсиһчиләр дә бу ҝүн ејни чәтинликләрлә үзләширләр. Јеһованын Шаһидләринин филиалларынын бириндә хидмәт едән Метју хатырлајыр: «Мән пионер хидмәтинә башлајанда, атам сон дәрәҹә мә’јус олмушду. О дүшүнүрдү ки, мән өз тәһсилими һеч-пуч етдим, чүнки өзүмү тә’мин етмәк үчүн сүпүрҝәчи ишинә дүзәлмишдим. О, һәр дәфә мәнә там иш ҝүнү ишләсәјдим, нә гәдәр пул газанаҹағымы хатырладараг истеһза едирди». Бәс Метју бу сынаға неҹә таб ҝәтирди? «Мән һәр ҝүн Мүгәддәс Китабы охујурдум, даима, хүсусилә өзүмдән чыхаҹағымы һисс едәндә, дуа едирдим». Метјунун гәтијјәти мүкафатсыз галмады. Вахт кечдикҹә онун атасы илә мүнасибәти јахшылашды. Метју һәм дә Јеһоваја даһа јахын олду. О дејир: «Мән ҝөрдүм ки, Јеһова гајғыма галыр, руһландырыр вә сәһв гәрарлардан мәни горујур. Әҝәр руһани мәгсәдләрә ҹан атмасајдым, бу хејир-дуаларын һеч бирини алмаздым».
Диггәтини руһани мәгсәдләрә јөнәлт
17. Бә’зиләри таммүддәтли хидмәтә ҹан атанлары неҹә руһдан салырлар? (Матта 16:22).
17 Һәмиманлыларын өзүн дә һисс етмәдән гаршына руһани мәгсәдләр гојмағына мане ола биләрләр. Ола билсин, бә’зиләри дејир: «Пионер олмаг нәјә лазымдыр? Сән нормал һәјат сүрә-сүрә дә тәблиғ едә биләрсән. Өзүнә јахшы иш тап ки, пул сарыдан чәтинлик чәкмәјәсән». Бу јахшы мәсләһәт кими ҝөрүнә биләр, анҹаг она гулаг ассан, Аллаһ јолунда мәшг етмиш олаҹагсанмы?
18, 19. а) Диггәтини руһани мәгсәдләрә неҹә јөнәлдә биләрсән? б) Сән бир ҝәнҹ кими Падшаһлыг наминә нәләрдән имтина етмисән?
18 Тимотејин ҝүнләриндә дә бә’зи мәсиһчиләр белә фикирләширдиләр (1 Тимотејә 6:17). Диггәтини руһани мәгсәдләрә ҹәмләмәјә көмәк етмәк үчүн Павел Тимотејә деди: «Әсҝәрлик едән һеч кәс өзүнү ҝүндәлик һәјатын ишләри илә бағламыр; ону ордуја чағыран адамы разы салмаг истәјир» (2 Тимотејә 2:4). Һәрби хидмәтдә олан әсҝәр фикрини кәнар мәгсәдләрә јајындырмајаҹаг. Онун вә башгаларынын һәјаты командирин әмрләрини иҹра етмәк һазырлығындан асылыдыр. Мәсиһин әсҝәри олдуғун үчүн сәнин фикрин бир шејә јөнәлмәлидир. Лазымсыз мадди мәгсәдләрә бағланма ки, хиласедиҹи хидмәтдә там сурәтдә иштирак етмәкдән јајынмајасан (Матта 6:24; 1 Тимотејә 4:16; 2 Тимотејә 4:2, 5).
19 Раһат һәјата ҹан атмагданса, фәдакар олмаға чалыш. «Мәсиһ Исанын әсҝәри кими, раһат һәјатдан әл чәкмәјә һазыр ол» (2 Тимотејә 2:3, «The English Bible in Basic English»). Миссионер сәјаһәтиндә Павели мүшајиәт едәндә Тимотеј һәтта ән чәтин шәраитләрдә белә мәмнун галмағын сиррини өјрәнмишди (Филипилиләрә 4:11, 12; 1 Тимотејә 6:6-8). Сән дә белә едә биләрсән. Падшаһлыг наминә нәдәнсә кечмәјә һазырсанмы?
Индики вә ҝәләҹәк хејир-дуалар
20, 21. а) Руһани мәгсәдләрә ҹан атмаг һансы хејир-дуалары ҝәтирир? б) Сән нә етмәјә гәти гәрарлысан?
20 Тимотеј тәхминән 15 ил әрзиндә Павел илә чијин-чијинә хидмәт етмишди. Хош хәбәр Аралыг дәнизинин демәк олар ки, бүтүн шимал бөлҝәсинә јајылдыгҹа, Тимотеј јени јығынҹагларын јаранмасынын ҹанлы шаһиди олурду. О, рәнҝарәнҝ вә мәмнунедиҹи һәјат сүрмүшдү, анҹаг «нормал» јашамағы сечсәјди, һәјаты белә кечмәзди. Руһани мәгсәдләрә ҹан атсан, сән дә мисилсиз руһани хејир-дуалар бичәҹәксән. Сән Јеһоваја јахынлашаҹаг, һәмиманлыларынын мәһәббәтини вә һөрмәтини газанаҹагсан. Вар-дөвләт далынҹа гачмағын ҝәтирдији ағры вә мә’јуслуғу јох, башгаларына тәмәннасыз хидмәт етмәјин ҝәтирдији әсл хошбәхтлији дадаҹагсан. Ән дәјәрлиси исә одур ки, сән ‘һәгиги һәјата’ — јер үзүндә әбәди һәјата наил олаҹагсан (1 Тимотејә 6:9, 10, 17-19, И–93; Һәвариләрин ишләри 20:35).
21 Әҝәр сән һәлә буну етмәмисәнсә, биз сәни дәрһал Аллаһ јолунда мәшг етмәјә башламаға тәшвиг едирик. Руһани мәгсәдләрә чатмаға сәнә көмәк едә биләҹәк баҹы-гардашларла сых үнсијјәт ет вә онлардан мәсләһәт истә. Аллаһын Кәламыны мүнтәзәм өјрән. Дүнјадакы пулпәрәстлик руһуна алудә олма. «Зөвг алмамыз үчүн бизә һәр шеји боллугла верән» Аллаһ вә’д едир ки, Она иззәт ҝәтирән мәгсәдләри сечсән, инди вә ҝәләҹәкдә сәнә бол-бол хејир-дуа верәҹәк. Буну јадында мөһкәм сахла! (1 Тимотејә 6:17).
[Һашијә]
a Јунан ҹәмијјәтиндә тәһсил чох јүксәк гијмәтләндирилирди. Тимотејин мүасири олан Плутарх јазмышдыр: «Јахшы тәһсил бүтүн јахшылығын мәнбәји вә көкүдүр... Мән дејәрдим ки, мәһз онун сајәсиндә мә’нәви камиллијә вә хошбәхтлијә наил олмаг олар... Бүтүн башга јахшы шејләр бәшәри, фани вә әһәмијјәтсиздир» (Моралиа, I, «The Education of Children»).
Хатырлајырсынызмы?
• Ҝәнҹләр руһани мәгсәдләрә ҹан атмагда һарадан көмәк әлдә едә биләрләр?
• Мүгәддәс Китабы диггәтлә өјрәнмәк нә үчүн ваҹибдир?
• Ҝәнҹләр дүнјадакы пулпәрәстлик руһундан өзләрини неҹә горуја биләрләр?
• Руһани мәгсәдләр һансы хејир-дуалары ҝәтирир?
[28-ҹи сәһифәдәки шәкил]
Тимотеј јахшы мәгсәдләрә ҹан атырды.
[31-ҹи сәһифәдәки шәкилләр]
Руһани мәгсәдләрә ҹан атырсанмы?
[32-ҹи сәһифәдәки шәкилләр]
Јахшы әһатә Тимотејә неҹә көмәк етди?