Hémle​—Lem i i nlédhana

HÉMLE i gwé ngui ngandak. Kiki hihéga, to hala kiki Satan a nsômbôl nol bés i pes mbuu, hémle i nhôla bés i “lém makoñ ma hié ma mut mbe momasôna.” (Éfésô 6:16, MN.) Ni hémle, di nla hônba mandutu ma ma yé kiki dikôa. Yésu a kal banigil bé le: “Ibale ni gwé hémle kiki jis li pôôga, ki n’a kal hikôa hini le, ‘habi hana, ke nyoo,’ hi’a habi.” (Matéô 17:20) Kiki hémle i nla lédés bés i pes mbuu, di nla badba le: Kii i yé hémle? Mambe maada ma yé ipôla ñem wés ni hémle yés? Lelaa di nla lédés yo? Njee di nlama hémle?​—Rôma 4:3.

KII I YÉ HÉMLE?

Hémle i ta ndigi bé i yi le i yom Bibel i nkal i yé maliga, inyule yak “mimbuu mimbe mi nhémle hala, mi sehlaga ki.” (Yakôbô 2:19) Kii i yé ni hémle?

Bibel i ñunda le hémle i gwé mintjep ima. U bisu u yé le, hémle ‘i yé botñem i ngui mut a gwé le i jam a mbem li ga yon ibabé set.’ (Lôk Héber 11:1a) Ibale u gwé hémle, u nyi ntiik le i mam momasôna Yéhôva a nkal ma yé maliga, ma ga yon ki. Kiki hihéga Yéhôva a kal Lôk Israel le: “Ibale ni nla sagal malômbla mem ni njamuha ni malômbla mem ni juu, le njamuha ni juu ba ba bañ ngéda yap, wee yak malômbla mem lôñni David, nkol wem, ma nla sagla.” (Yérémia 33:20, 21) Baa u ma kon woñi le hiañgaa hi ga pam bé, kayéle juu ni njamuha bi ba ha bé? Ibale u nkon bé woñi le hisi hi ga waa kiiña hiomede, to kiiña hiañgaa, baa u nlama kon woñi le i Nwet a boñ le hisi hi kiiña hala a ga yônôs bé bañga yé? To jam!​—Yésaya 55:10, 11; Matéô 5:18.

U nyônôs ima u yé le, hémle i yé ‘i bana bikwo bi nkaa le ngim mam i yé toi [hala wee i yé ntiik] to ibale i nene bé i mis.’ (Lôk Héber 11:1b) Hala wee kii? Hégda le hisii mañge hi mbat we le, ‘baa mbebi i yé toi?’ To hala kiki u mah tehe bé mbebi, u ga yoñ dihéga inyu hôla nye i nok le mbebi i yé toi, kiki bo nhébék, minyiñgha mi tjai di bie, ni mam mape ki. Ibale mañge a nok i yom u nsômbôl kal nye, a nyik neebe le mbebi i yé tolakii a ntehe bé yo. Hala a ñunda le hémle i umne i ngii mam ma yé ntiik, to hala kiki ma nene bé.​—Rôma 1:20.

DI DIIHE MALIGA

Kiki hémle i yé i ba nkwoog nkaa le ngim mam i yé toi, i mbéda le mut a bana “bañga yi i maliga” inyu pam i hémle. (1 Timôtéô 2:4) Ndi hala a kôli bé. Ñôma Paul a tila le: “Ni ñem nyen mut a nhémlene.” (Rôma 10:10) Mut a nlama ndigi bé neebe maliga, ndi a nlama ki diihe mo. Ha ngéda i nyen a ga nôgda ngôñ i hémle i jam li, hala wee i niñ inoñnaga ni maliga. (Yakôbô 2:20) Ibale mut a ndiihe bé maliga, a nla tjél neebe mo to ibale ba ñunda nye mam ma nkwés nye nkaa, inyule a nyéñ ndigi manjel i yônôs ngôñ yé minsôn, tole a gwé bé ngôñ i héñha mahoñol. (2 Pétrô 3:3, 4; Yuda 18) Inyu hala nyen ngéda kôba, i bôt bobasôna ba bi tehe manyaga bé bon ba bi hémle. (Ñanga bôt 14:11; Yôhanes 12:37) Ndik i bet ba ngwés maliga bon mbuu mpubi u nhôla i bana hémle.​—Galatia 5:22; 2 Tésalônika 2:10, 11.

LELAA DAVID A BI BANA HÉMLE I NGUI

I nsoñgi bôt ba bééna hémle ikeñi, di nla sima Kiñe David. (Lôk Héber 11:32, 33) Ndi bôt bé ba lihaa bobasôna bé bon ba bééna nya hémle i. Kiki hihéga lisañ jada, Éliab, manyañ David nu mañ, a bi unda le a bééna bé hémle ngéda a bi nyéyéi David ngeñ a kolba Gôliat nu a bé yahal litén li Djob. (1 Samuel 17:26-28) Mut to wada a ngwééna bé hémle; to bagwal bés ba ta bé le ba lôôs bés hémle, jon David a bééna i nya hémle i inyule a bééna maada malam ni Nyambe.

I kaat Tjémbi 27, David a nyelel i jam li bi hôla nye i bana hémle i ngui. (Nlôñ 1) David a bé soñda mu mam ma bi pémél nye, ni lelaa Yéhôva a bi timbhe baoo bé. (Minlôñ 2, 3) A bé lôôha diihe bitelbene bi Yéhôva inyu bibégés. (Nlôñ 4) David a bé bégés Nyambe ni bôt bape i témpel yé. (Nlôñ 6) A bé lôndôl Yéhôva ibabé waa ikété masoohe. (Minlôñ 7, 8) David a bé gwés ki le Djob a niiga nye njel yé. (Nlôñ 11) Hémle i bé lôôha ba nseñ inyu David kayéle a bat le: “Éé, ibale bo ndi me hémle bé, [ki me tééne hee len?]”​—Nlôñ 13.

LELAA U NLA LÉDÉS HÉMLE YOÑ?

U nla bana hémle kiki David ibale u gwé mahoñol ni bilem gwé di nléba i kaat Tjémbi 27. Kiki hémle i umne i bañga yi, hala a’ ba we jam li ntomb i hôlôs i lem i, ibale u nke ni bisu i nigil Bibel ni bikaat bi ntôñ. (Tjémbi 1:2, 3) Yoñ ngéda i soñda i mam u nigil. Ibale u nsoñda, u ga bana ngandak manjom i ti Yéhôva mayéga. Kiki u mba u nkon maséé inyu mam Yéhôva a mbôñôl we, hala nyen ngôñ i pahal hémle yoñ i makoda y’a keñep, w’a bana ki makénd i añal ñañ nlam. (Lôk Héber 10:23-25) Ni ki le, di ñunda hémle yés, ngéda di nke ni bisu i “soohe ngéda yosôna, ibabé waa.” (Lukas 18:1-8) Jon, di ‘waa bañ soohe’ Yéhôva, di yik ntiik le ‘a ntôñ ni bés.’ (1 Tésalônika 5:17; 1 Pétrô 5:7) Hémle i ntinde bés i bana bihiumul bilam. Mbus, bihiumul bilam bi bi nlédés hémle yés.​—Yakôbô 2:22.

HÉMLE YÉSU

Yésu a kal banigil bé kôkôa i nsôk ilole a nwo le: “Hémlana Nyambe, hémlana ki me.” (Yôhanes 14:1) Jon di nlama ndik bé hémle Yéhôva, di nlama hémle yak Yésu. Lelaa u nla hémle Yésu? Di wan manjel maa.

Njel i bisu, tehe binoñ kiki likébla Yéhôva a nti we. Ñôma Paul a kal le: “Me niñil . . . inyu hémle me nhémle Man Nyambe, nu a gwés me, a sem ki nyemede inyu yem.” (Galatia 2:20) Ngéda u nhémle Yésu, u yé nkwoog nkaa le binoñ bi bi tina inyu yoñ, bi nla boñ le bibéba gwoñ bi nwéhlana, bi nti ki we botñem i niñ boga, iloo mam momasôna bi ñunda le Djob a ngwés we. (Rôma 8:32, 38, 39; Éfésô 1:7) Ibale u nhémle toi le binoñ bi nla hôla we, kiññem i ga lôôha bé tééñga we, u ga lehel bé to ñem.​—2 Tésalônika 2:16, 17.

Njel i yônôs iba, ni njel sesema i Yésu, kôôge Yéhôva bebee ikété masoohe. Binoñ bi mboñ le di lah soohe Yéhôva ‘ni makénd, di kôs konangoo, di léba ki karis i nhôla bés i loñge ngéda.’ (Lôk Héber 4:15, 16; 10:19-22) Masoohe ma nhôla bés i kolba manoodana.​—Lukas 22:40.

Njel i yônôs aa, di nôgôl Yésu. Ñôma Yôhanes a tila: “Nu a nhémle Man a gwé niñ boga; ndi nu a nôgôl bé Man a’ tehe bé niñ, ndi hiun hi Nyambe hi tiñi ni nye.” (Yôhanes 3:36) Baa u nyimbe jam Yôhanes a nkal? Nye, ibale mut a gwé bé hémle wee a yé ndok. Jon, u ñunda le u nhémle Yésu ngéda u nôgôl nye. U nôgôl Yésu ngéda u noñ “mbén Kristô,” hala wee mam momasôna a bi niiga, a kal ki le di boñ. (Galatia 6:2) U nôgôl ki Yésu ngéda u ñemble “nkol u maliga ni u pék.” (Matéô 24:45) Ngéda u nôgôl Yésu, u ga pam i hônba mandutu, to ma yé kiki mbuk mbebi.​—Lukas 6:47, 48.

‘LÉDHANA IKÉTÉ HÉMLE NAN I I NLÔÔHA PUBHAGA’

Lisañ jada, mut wada a kal Yésu ni kiñ ikeñi le: “Me nhémle! Hôla ngitophémle wem!” (Markô 9:24) Tolakii i mut nu a bééna hémle, nyemede a bi neebe le a bééna ngôñ ni mahôla inyu kéñbaha yo. Kiki i mut nu, bés bobasôna di mboma mam i niñ yés ma ma mbat le di kéñbaha hémle yés. Ni ki le, bés bobasôna di nla lédés hémle yés ibôdôl nano. Kiki di ntehe, di nlédés hémle yés ngéda di nigil Bañga i Djob di soñdaga ki yo, hala a ga tinde ki bés i ti Yéhôva mayéga. Hémle yés i ga keñep, keñep ni keñep, ngéda di mbégés Yéhôva ni lôk kéé, di añlege bôt bape ñañ nlam, ni i ngéda di ntéñbe ni masoohe. U héya hala, ngéda di nkéñbaha hémle yés, di nkôs bisai bikeñi. Bañga i Djob i nkal bés le: “A bagwéha, [lédhana] bébomede ikété hémle nan i i nlôôha pubhaga . . . ni téédaga bébomede ikété gwéha Nyambe.”​—Yuda 20, 21.