Ajalɛ nga e kwla fa’n

E bo Biblu’n nun like klelɛ bo Ɔktɔblu i Fue cɛn klikli’n nun

“E bali amun wun wulɛ naan é kán awa kpa kun i ndɛ klé amun. ?Amun bu i kɛ awa wie fi kwlá yoman naan nzaje sa mun ɔ nin sran lufle bulɛ’n ɔ nin sa tɛtɛ nga be o e su’n b’a wie mlɔnmlɔn?” Maan sran’n tɛ su. Maan amun kpɛn sran’n i wla kɛ, kɛ Zezi klé i sɔnnzɔnfuɛ’m be srɛlɛ’n, ɔ seli be kɛ be srɛ naan i sɔ awa liɛ’n bla. Awa sɔ’n yɛle Ɲanmiɛn Sielɛ’n. Kpɛkun fa ndɛ ng’ɔ o Ɔktɔblu 1 Sasafuɛ Tranwlɛ’n i sin bui’n su’n kle sran’n naan ndɛ ng’ɔ o kosan klikli’n i bo lɛ’n, an koko su yalɛ. Biblu’n nun ndɛ mma nga be klɛ lɛ’n, an kanngan kun annzɛ wie’m be nun. I sin’n, fa fluwa’n man sran’n, kpɛkun cɛn nga amún kókó kosan uflɛ su yalɛ’n, maan amun nuan sɛ su.

Sasafuɛ Tranwlɛ’n Ɔktɔblu 1

“Sran kpanngban be si srɛlɛ nga Zezi kleli i sɔnnzɔnfuɛ mun’n. E bali amun wun wunlɛ naan é kókó srɛlɛ sɔ’n i nun ndɛ kun su yalɛ. [Kanngan Matie 6:9, 10 nun.] ?B’a yiyi like nga be flɛ i Ɲanmiɛn Sielɛ’n i nun weiwein b’a kle amun le? ?Yɛ amun si sa nga ti yɛ, kɛ Zezi klé sran’m be like’n, ɔ kannin Ɲanmiɛn Sielɛ’n i ndɛ kpɛ sunman’n? [Maan sran’n tɛ su.] Like nga be flɛ i Ɲanmiɛn Sielɛ’n, ɔ nin ninnge ɲɛnmɛnɲɛnmɛn nga Sielɛ’n sɔ’n maan asiɛ su wafuɛ’m bé ɲɛ́n i’n, fluwa nga yiyi nun.”

Réveillez-vous ! Octobre

“E bali amun like yolɛ naan é úsa amun ngwlɛlɛ afɛ. [Fa periodiki’n i bui’n kle i.] ?Amun bu i kɛ ɔ fata kɛ sran kun yo aɲanbeunfuɛ ka naan b’a se kɛ i liɛ’n w’a yo ye? [Maan sran’n tɛ su.] Amun nian ndɛ nga Biblu’n kan’n. [Kanngan Lik 12:15 nun.] Biblu’n kle kɛ sran kwlaa ng’ɔ kunndɛ kɛ i liɛ’n yo ye’n, i liɛ’n kwla yo ye sakpa. Ndɛ sɔ’n yɛ fluwa nga yiyi nun ɔn.”