Maan e lafi su kɛ Zoova fɔ́nvɔ e

1. ?Kɛ Zifu’m be ɔli Babilɔnin lɔ’n, wafa sɛ yɛ lɔ tranlɛ’n yoli-ɔ?

ZIFU’M be yoli ɲin kekle Zoova su afuɛ kpanngban. I sɔ’n ti’n, Zoova yacili Babilɔninfuɛ’m be lɛ naan be saci Zifu’m be nvle’n, naan be tra be lomuɛn wɔ Babilɔnin lɔ. ?Wafa sɛ yɛ Babilɔnin lɔ tranlɛ’n yoli-ɔ? (2 Ɲol. 36:​15, 16, 20, 21) I yo, kɛ be o Babilɔnin lɔ’n be kwla yo be bɔbɔ be klunklo ninnge wie mun. (Zer. 29:​4-7) Sanngɛ kusu’n lɔ tranlɛ’n w’a yoman pɔpɔ w’a manman be. Yɛ nán be klun klo su yɛ be ɔli lɔ-ɔ. Be nga be trali be ɔli’n be nun kun kannin wafa nga be wun yoli be’n i ndɛ. Ɔ seli kɛ: “E trannin ase Babilɔnin nzue ba’m be nuan lɛ. Kɛ e wla kpɛnnin Siɔn su’n, e sunnin.” (Jue. 137:1) Zifu sɔ mɔ be wla w’a bo be wun’n, sɛ be ɲan sran fɔnvɔ be’n ɔ́ yó be fɛ. ?Sanngɛ wan yɛ ɔ́ fɔ́nvɔ be-ɔ?

2-3. (1) ?Ngue yɛ Zoova yoli mannin Zifu nga be trali be lomuɛn ɔli Babilɔnin’n niɔn? (2) ?Ngue yɛ é wá kɛn i ndɛ like suanlɛ nga nun-ɔn?

² Zoova ti ‘Ɲanmiɛn kun m’ɔ fɔnvɔ sran sa kwlaa nun-ɔn.’ (2 Kor. 1:3) Ɔ klo i sufuɛ mun yɛ ɔ kunndɛ kɛ ɔ́ fɔ́nvɔ be. Ɔ si kɛ be nga bé wá trá be kɔ́’n be nun wie’m bé káci be ayeliɛ’n, kpɛkun bé sá be sin bé sú i kɛ laa’n sa. (Eza. 59:20) I sɔ’n ti’n, Zoova maan Ezai klɛli fluwa kun afuɛ ya kun ka naan b’a tra Zifu’m be lomuɛn b’a wɔ Babilɔnin. Fluwa sɔ’n yɛ be flɛ i Ezai fluwa’n niɔn. ?Ngue ti yɛ Zoova yoli maan be klɛli fluwa sɔ’n niɔn? Ezai seli kɛ: “Amun Ɲanmiɛn’n waan: ‘Amun fɔnvɔ min nvlefuɛ mun, amun fɔnvɔ be.’” (Eza. 40:1) Zoova yoli maan Ezai klɛli i fluwa’n naan i nun ndɛ’n cici Zifu nga bé wá trá be lomuɛn bé kɔ́’n be wla.

³ Kɛ Zifu nga be trali be ɔli’n sa’n, e kusu ɔ fata kɛ be fɔnvɔ e cɛn kunngun. Like suanlɛ nga nun’n, é wá wún like nga Zoova yoli fa fɔnvɔli be’n. I klikli nun’n, ɔ seli kɛ ɔ́ yáci be nga be kaci be sa’n be sa tɛ’n cɛ́ be. I nɲɔn su’n, ɔ kannin ndɛ kun fa cicili be wla. Yɛ i nsan su’n, ɔ yoli maan srɛ w’a kunman be kun. Kpɛkun é wá wún wafa nga e kwla ɲan ndɛ sɔ’m be su ye wie andɛ’n.

ZOOVA YACI E SA TƐ MUN CƐ E

4. ?Wafa sɛ yɛ Zoova kleli kɛ ɔ ti Ɲanmiɛn kun m’ɔ si aunnvɔɛ-ɔ? (Ezai 55:7)

⁴ Zoova ti ‘Siɛ kun m’ɔ si sran aunnvɔɛ dan-ɔn.’ (2 Kor. 1:3) I sɔ’n ti’n, ɔ seli kɛ ɔ́ yáci Zifu’m be sa tɛ’n cɛ́ be. (An kanngan Ezai 55:7 nun.) Ɔ seli kɛ: “Min sran klolɛ dan m’ɔ wieman le’n ti’n, ń má sí ɔ aunnvɔɛ.” (Eza. 54:8) ?Wafa sɛ yɛ Zoova kleli kɛ ɔ́ sí be aunnvɔɛ-ɔ? Ɔ ti su kɛ sa tɛ mɔ Zifu’m be yoli’n ti’n, bé dí afuɛ kpanngban Babilɔnin lɔ. Sanngɛ Zoova seli kɛ be su kaman lɔ. (Eza. 40:2) Nanwlɛ, e kwla se kɛ ndɛ sɔ’n guali Zifu nga be kacili be ayeliɛ mɔ be kunndɛ kɛ Zoova i klun jɔ be wun’n be awlɛn su nzue.

5. ?Ngue ti yɛ e kwla se kɛ sa nga ti yɛ e kwla lafi su kɛ Zoova yaci e sa tɛ mun cɛ e’n, ɔ tra Zifu’m be liɛ’n niɔn?

⁵ ?Ngue yɛ ndɛ sɔ’n kle e-ɔ? Zoova kunndɛ kɛ ɔ́ yáci i sufuɛ’m be sa tɛ’n cɛ́ be mlɔnmlɔn. Sa nga ti yɛ e kwla lafi su kɛ Zoova yaci e sa tɛ mun cɛ e’n, ɔ tra Zifu’m be liɛ’n bɔbɔ. Afin e si like nga Zoova yoli naan w’a kwla yaci e sa tɛ mun w’a cɛ e’n. Kɛ Ezai wieli i fluwa’n i klɛ m’ɔ dili afuɛ kpanngban kpa’n, Zoova sunmɛnnin i wa m’ɔ klo i kpa’n asiɛ’n su, naan ɔ wa kpɔ be kwlaa nga be sa tɛ’n yo be nsisɔ’n be ti. Kɛ mɔ Zezi kpɔli e ti’n ti’n, Zoova kwla yaci e sa tɛ mun cɛ e mlɔnmlɔn. (Yol. 3:19; Eza. 1:18; Efɛ. 1:7) Nanwlɛ, e Ɲanmiɛn’n si aunnvɔɛ dan.

6. ?Wafa sɛ yɛ Zoova i sran aunnvɔɛ silɛ’n ɔ cici e wla-ɔ? (An nian foto’n wie.)

⁶ Sɛ e yoli sa tɛ wie naan e akunndan te bu e fɔ’n, ndɛ nga Zoova maan be klɛli i Ezai 55:7 nun’n ɔ kwla cici e wla. I li sɛ sa nga e yoli’n ti’n, e te wun e ɲrun’n yɛ e akunndan kwla bu e fɔ dan-ɔn. Sanngɛ sɛ e dili e sa tɛ’n i nanwlɛ, naan e kacili e ayeliɛ’n e kwla lafi su kɛ Zoova yaci cɛli e. Yɛ kɛ Zoova ko yaci sran kun i sa tɛ’n ko cɛ i’n, ɔ boman su diman jɔlɛ kun. (An nian Zeremin 31:34 nun.) Kɛ mɔ Zoova fɛmɛn i ɲin siemɛn i sa tɛ nga e yoli be laa’n be su kun’n ti’n, ɔ fataman kɛ e kusu e bu be akunndan sa trilili. Ninnge nga e yo be dɔ nga su’n yɛ be ti Zoova i cinnjin-ɔn, nán sa nga e yoli be laa’n niɔn. (Eze. 33:​14-16) Mɛn uflɛ’n nun lɔ’n, e Si Ɲanmiɛn m’ɔ si aunnvɔɛ’n ɔ́ yó maan e su wunman sa tɛ nga e yoli be laa’n be su afɛ kun.

7. ?Sɛ e yoli sa tɛ dan wie’n, ngue yɛ ɔ́ úka e naan y’a bo su y’a kle asɔnun kpɛnngbɛn mun-ɔn?

⁷ ?Yɛ sɛ e yoli sa tɛ dan wie naan e fiali su naan i sɔ’n ti’n e akunndan te bu e fɔ’n nin? ?Ngue yɛ ɔ fata kɛ e yo-ɔ? Biblu’n wla e fanngan kɛ e bo su kle asɔnun kpɛnngbɛn mun naan be uka e. (Zak. 5:​14, 15) Ɔ ju wie’n i sɔ yolɛ’n timan pɔpɔ. Sanngɛ sɛ sa nga e yoli’n ɔ yo e nsisɔ sakpa, naan e wla kpɛn su kɛ Zoova ɔ nin be ng’ɔ sieli be kɛ be uka e’n be klo sran, yɛ be si aunnvɔɛ’n, e su sisiman e bo naan y’a bo su y’a kle be. I wie yɛle aniaan kun mɔ be flɛ i Aatiia i liɛ’n. Sa tɛ wie m’ɔ yoli’n ti’n, i akunndan buli i fɔ dan. Ɔ seli kɛ: “N niannin bian nin bla nna nga be fa fite nzra nun’n. N yoli sɔ afuɛ kun. Sanngɛ kɛ cɛn kun’n n tieli nzra nun ijɔlɛ kun m’ɔ kan be akunndan m’ɔ bu be fɔ’n i ndɛ’n, n boli sa sɔ’n su n kleli min yi ɔ nin asɔnun kpɛnngbɛn mun. Kɛ n boli su n kleli be’n min akunndan w’a buman min fɔ kun. Sanngɛ sa tɛ sɔ mɔ n yoli’n ti’n, min sa sin bubuli min. Asɔnun kpɛnngbɛn’m be kpɛnnin min wla kɛ Zoova w’a yiman min blo, naan klolɛ mɔ Zoova klo min’n i ti yɛ ɔ tuli min fɔ-ɔ. Ndɛ mɔ be kannin’n ɔ guali min awlɛn su nzue, yɛ ɔ ukali min naan m’an wun i wlɛ kɛ Zoova yacili min sa tɛ’n cɛli min sakpa.” Andɛ’n Aatii ti titi atin bofuɛ, nin asɔnunfuɛ’m be ukafuɛ. Nanwlɛ, kɛ e si kɛ, sɛ sa tɛ nga e yoli’n ɔ yo e nsisɔ sakpa’n Zoova yáci cɛ́ e’n, i sɔ’n fɔnvɔ e.

ZOOVA CICI E WLA

8. (1) ?Ndɛ benin yɛ Zoova kannin m’ɔ́ cící Zifu nga bé wá trá be lomuɛn’n bé kɔ́ Babilɔnin’n be wla-ɔ? (2) ?Kɛ nga Ezai 40:​29-31 fa kan’n sa’n, wafa sɛ yɛ i sɔ’n yó be-ɔ?

⁸ Zifu’m be kwla bu i kɛ be su saman be sin be nvle’n nun lɔ kun. Afin titi’n Babilɔninfuɛ’m be yaciman be nga be trali be lomuɛn’n be nun. (Eza. 14:17) Sanngɛ Zoova kannin ndɛ kun m’ɔ cicili i sufuɛ’m be wla-ɔ. Ɔ tɛli i sufuɛ’m be nda kɛ ɔ́ yó maan bé sá be sin be nvle’n nun. Yɛ like fi su kwlá yoman naan i ndɛ sɔ’n w’a kpɛnman su. (Eza. 44:26; 55:12) Zoova ɲrun’n, Babilɔninfuɛ’m be ti kɛ ndutre sa. (Eza. 40:15) Ndutre’n i nunnunlɛ’n ɔ ti pɔpɔ. Ɔ maan Zifu’m be delɛ Babilɔninfuɛ’m be sa nun’n ɔ su yoman kekle kaan sa manman Zoova. Ndɛ sɔ’n fɔ́nvɔ Zifu nga bé wá trá be lomuɛn kɔ́ Babilɔnin’n. Sanngɛ nɛ́n i ngba-ɔ. Ezai seli kɛ: “Be nga be fa be wla gua Zoova su’n bé ɲán wunmiɛn ekun.” (An kanngan Ezai 40:​29-31 nun.) Nanwlɛ, ndɛ sɔ’n wlá Zifu’m be fanngan. “Kɛ anunman ɲin sa’n, bé tú kɔ́ nglo kɛ be le ndɛwa sa.”

9. ?Ngue ti yɛ Zifu’m be kwla lafi su kɛ Zoova dé be Babilɔninfuɛ’m be sa nun sakpasakpa-ɔ?

⁹ Ndɛ uflɛ wie mun ekun mɔ Zoova kannin’n ti’n, Zifu’m be kwla lafi su kɛ nda ng’ɔ tali be’n ɔ́ yíɛ i nuan sakpa. I wie yɛle kɛ, kɛ nga Zoova fa kannin’n sa’n, be wunnin kɛ Asirifuɛ’m be fali alɛ wlali Izraɛli akpasua blu’n i nunfuɛ’m be sin. Be kwlali be kpɛkun be trali lɔfuɛ’m be lomuɛn ɔli. (Eza. 8:4) Asa’n be wunnin kɛ Babilɔninfuɛ’m be sacili be klɔ’n kpɛkun be trali lɔfuɛ’m be lomuɛn be ɔli. (Eza. 39:​5-7) Be si kɛ be boboli famiɛn Sedesiasi i ɲinma mun, yɛ be trɛli i ɔli Babilɔnin sakpa. (Zer. 39:7; Eze. 12:​12, 13) Ɔ maan ndɛ kwlaa nga Zoova kannin’n ɔ kpɛnnin su. (Eza. 42:9; 46:10) I kwlaa sɔ’n wlá be fanngan naan b’a lafi su kɛ bé ɲán be ti sakpasakpa kɛ nga Zoova fa kannin’n sa.

10. ?Mɛn i awieliɛ blɛ nga nun’n, é yó sɛ naan e ɲin w’a tran like nga e wla o su kɛ é ɲɛ́n i’n i su titi?

¹⁰ ?Ngue yɛ ndɛ sɔ’n kle e-ɔ? Kɛ e wla bo e wun’n, like nga e lafi su kɛ Ɲanmiɛn wá yó mán e cɛn wie lele’n ɔ wla e fanngan. Blɛ nga e o nun yɛ’n, ɔ ti kekle. Asa’n e kpɔfuɛ’m be le kwlalɛ. Sanngɛ ɔ fataman kɛ e sa sin bubu e. Zoova tali e nda kɛ é trán mɛn klanman’n nun tititi. Blɛ sɔ’n nun’n, sa fi su ɲanman e, yɛ é dí fɔundi. Ɔ fata kɛ e ɲin tran like sɔ mɔ e wla o su kɛ é ɲɛ́n i’n i su titi. Sɛ y’a yoman sɔ’n, é yó kɛ sran kun m’ɔ jin vitri kun sin, ɔ su nian lika klanman kpa kun’n sa. Sanngɛ vitri’n ti fiɛn. I sɔ’n ti’n ɔ kwlá wunman lika’n i klanman m’ɔ ti’n i kpa. Ɔ maan ɔ fata kɛ ɔ nunnun vitri’n su naan w’a wun i wlɛ kɛ lika’n ti klanman sakpa. E kusu kɛ ɔ ko yo naan y’a wun kɛ mɛn klanman’n i nun lɔ tranlɛ’n yó ɲɛnmɛn dan’n, ɔ fata kɛ e fa blɛ e bu ninnge kpakpa nga Zoova wá yó be lɔ’n be akunndan. I lɛ nun’n, like nga e wla o su kɛ é ɲɛ́n i’n, i su ndɛ ng’ɔ o e fluwa’m be nun’n, maan e kanngan nun. I su video nga anuannzɛ’n yili be’n maan e nian be. Yɛ i su jue nga anuannzɛ’n maan be toli’n, maan e bo e tie. Asa’n like nga e ɲin o i sin kpa mɛn uflɛ’n nun lɔ’n, kɛ é srɛ́ Zoova’n maan e kan kle i.

11. ?Ngue yɛ ɔ ukali aniaan bla kun naan w’a kwla jran kekle-ɔ?

¹¹ Maan e nian wafa nga like nga e wla o su kɛ é ɲɛ́n i’n ɔ ukali aniaan bla kun mɔ be flɛ i Jɔi mɔ tukpacɛ kekle kpa kun kle i yalɛ’n. Ɔ seli kɛ: “Kɛ min wla bo min wun dan’n, n kan min klun ndɛ kwlaa n kle Zoova. Yɛ n si kɛ ɔ wun min su sa’n i wlɛ. Kɛ ɔ yo sɔ’n, Zoova man min ‘wunmiɛn ng’ɔ tra klɔ sran liɛ’n.’” (2 Kor. 4:7) Asa’n, aniaan bla’n fa blɛ bu mɛn uflɛ’n nun lɔ tranlɛ’n i akunndan. Afin lɔ’n, “sran fi su seman kɛ: ‘N kpinndinman.’” (Eza. 33:24) Sɛ e kusu e kan e klun ndɛ kwlaa e kle Zoova, yɛ e bu like nga e wla o su kɛ é ɲɛ́n i’n i akunndan’n, é ɲán wunmiɛn naan y’a kwla jran kekle.

12. ?Ngue ti yɛ e kwla lafi su kɛ ninnge nga Zoova seli kɛ ɔ́ yó be e ɲrun lɔ’n, ɔ́ yó be sakpa-ɔ? (An nian foto’n wie.)

¹² Kɛ nga Zoova fa yoli i Zifu’m be blɛ su’n sa’n, andɛ kusu’n, ndɛ wie m’ɔ kannin be’n ti’n, e kusu e kwla lafi su kɛ ɔ́ yía nda ng’ɔ tali be’n be nuan sakpa. Sa ng’ɔ seli kɛ bé jú e blɛ su’n, e wun kɛ be kpɛn su sakpasakpa. I wie yɛle kɛ, e wun kɛ Angle nin Amlɛnkɛn mɔ be sie mɛn’n, sɛ é kwlá sé’n, be kwlalɛ’n ‘i bue kun le wunmiɛn yɛ i bue kun ti fakafaka.’ (Dan. 2:​42, 43) Asa’n, e wun kɛ asiɛ’n keje lika fanunfanun nun. Yɛ e bo jasin fɛ’n nvlenvle’m be kwlaa be nun. (Mat. 24:​7, 14) Kɛ e wun kɛ sa kwlaa sɔ mun, ɔ nin sa uflɛ wie mun ekun mɔ Biblu’n seli kɛ bé wá jú’n, be ju sakpasakpa’n, i sɔ’n yo maan e lafi su kɛ ninnge kpakpa nga Zoova seli kɛ ɔ́ yó be e ɲrun lɔ’n, ɔ́ yó be sakpa.

ZOOVA YO MAAN E WLA GUA ASE

13. (1) ?Kɛ ɔ cɛ kan Zifu’m bé ɲán be ti’n, sa benin yɛ ɔ juli-ɔ? (2) ?Kɛ nga Ezai 41:​10-13 fa kan’n sa’n, wafa sɛ yɛ Zoova cicili Zifu’m be wla-ɔ?

¹³ Zoova seli Zifu nga be trali be lomuɛn ɔli Babilɔnin lɔ’n kɛ bé ɲán be ti. Sanngɛ kusu ɔ si kɛ, kɛ blɛ sɔ’n mántan koko’n, ɔ su yoman pɔpɔ manman be. Zoova seli kɛ famiɛn kun m’ɔ le kwlalɛ kpa’n, ɔ́ wá fá alɛ wlá nvle nga be mantan Babilɔnin’n be sin yɛ ɔ́ kwlá be. Kpɛkun i sin’n, ɔ́ fá alɛ wlá Babilɔnin klɔ’n nunfuɛ’m be sin wie. (Eza. 41:​2-5) Sanngɛ ɔ fataman kɛ srɛ kun Zifu mun. Afin ka naan sa sɔ’n w’a ju bɔbɔ’n, Zoova cicili be wla. Ɔ seli kɛ: “Nán srɛ kun wɔ, afin e nin wɔ e o nun, nán koko, afin n ti ɔ Ɲanmiɛn.” (An kanngan Ezai 41:​10-13 nun.) ?Kɛ Zoova se kɛ “n ti ɔ Ɲanmiɛn’n,” i ndɛ sɔ’n i bo’n yɛle benin? Nán kɛ ɔ su se be ngbɛn kɛ ɔ fata kɛ be su i-ɔ. Afin be bɔbɔ be si kɛ i sɔ yɛ ɔ fata kɛ be yo-ɔ. Sanngɛ ɔ su kpɛn be wla kɛ ɔ nin be o nun naan ɔ́ úka be.—Jue. 118:6.

14. ?Ngue ekun yɛ Zoova yoli naan Zifu nga be trali be lomuɛn ɔli’n, be wla w’a gua ase-ɔ?

¹⁴ Zoova yoli maan Zifu nga be trali be lomuɛn ɔli’n be wla guali ase. Ɔ yoli maan be wla kpɛnnin su kɛ i tinmin’n nin i ngwlɛlɛ’n be leman wunsu. Ɔ seli be kɛ be man be ɲin su naan be nian nzraama mun. Ɔ seli ekun kɛ i yɛ ɔ yili nzraama mun-ɔn naan ɔ si nzraama’m be tinuntinun be dunman wie. (Eza. 40:​25-28) Sɛ Zoova si nzraama’m be tinuntinun be dunman’n, nɛ́n i sufuɛ mun yɛ ɔ su siman be dunman-ɔn. Asa’n i sɔ’n kle kɛ, sɛ Zoova le tinmin yi nzraama mun’n, nɛ́n i sufuɛ mun yɛ ɔ su kwlá ukaman be-ɔ. I kwlaa sɔ’n ti’n, ɔ nunman nun kɛ srɛ kun Zifu nga be trali be lomuɛn ɔli Babilɔnin’n.

15. ?Ngue yɛ Zoova seli Zifu’m be kɛ be yo naan b’a ɲan be ti-ɔ?

¹⁵ Asa ekun’n, kɛ Zifu’m be ti ɲanlɛ blɛ’n wá jú’n, like ng’ɔ fata kɛ be yo’n, Zoova kleli be. Ezai fluwa’n nun’n, Zoova seli i nvle’n nunfuɛ’m be kɛ: “Amun wlu amun sua ba’m be nun, yɛ amun to amun sin anuan. Amun fia lɔ kan lele maan ya dan’n sin.” (Eza. 26:20) Atrɛkpa’n, kɛ famiɛn Sirisi fali alɛ wlali Babilɔninfuɛ’m be sin’n, ndɛ sɔ’n ukali Zifu mun naan b’a si like ng’ɔ fata kɛ be yo’n. Glɛki bian kun m’ɔ suan laa sa’m be su like’n ɔ seli kɛ, kɛ famiɛn Sirisi ɔ nin i sonja’m be wluli Babilɔnin klɔ’n nun’n, ɔ seli kɛ be kun be kwlaa nga bé wún be gua su’n. Nanwlɛ, e kwla se kɛ blɛ sɔ’n nun’n, srɛ kunnin be kwlaa nga be trannin Babilɔnin lɔ’n be dan. Sanngɛ Zifu’m be liɛ’n, kɛ mɔ atrɛkpa’n be nantili ndɛ nga Zoova kan kleli be’n su’n ti’n, be ɲannin be ti.

16. ?Ngue ti yɛ ɔ fataman kɛ sa nga bé wá jú ɲrɛnnɛn dan’n nun’n ti’n, srɛ kun e dan-ɔn? (An nian foto’n wie.)

¹⁶ ?Ngue yɛ ndɛ sɔ’n kle e-ɔ? Ɔ cɛ kan’n, ɲrɛnnɛn dan ng’ɔ́ wá jú’n, be nin-a wunmɛn i wunsu le. Kɛ ɔ́ wá bó i bo’n, sran’m be su siman like ng’ɔ fata kɛ be yo’n, yɛ srɛ kún be dan kpa. E mɔ e ti Zoova i sufuɛ’n, e liɛ’n su yoman sɔ. E si kɛ Zoova ti e Ɲanmiɛn. É jrán kekle, afin e si kɛ e ti ɲanlɛ’n w’a mantan koko. (Lik. 21:28) Kɛ nvlenvle’m be bo wá yó kun bé fá alɛ wlá e sin bɔbɔ’n, é jrán kekle. Zoova wá sín anzi’m be lika sásá e. Yɛ ɔ́ klé e like ng’ɔ fata kɛ e yo naan y’a ɲan e ti’n. ?Wafa sɛ yɛ Zoova wá klé like ng’ɔ fata kɛ e yo’n niɔn? Dɔ nga su’n e siman wafa nga Zoova wá yó’n. Sanngɛ atrɛkpa’n, Zoova wá sín asɔnun’m be lika naan w’a yo sɔ. Atrɛkpa’n e ‘sua ba’ liɛ nga é wá fía be nun’n, yɛ be o lɛ-ɔ. ?Wafa sɛ yɛ dɔ nga su’n e kwla buabua e wun e sie-ɔ? Ɔ fata kɛ e fa e wun e mantan e niaan mun. E nanti ajalɛ kwlaa nga Zoova i anuannzɛ’n ɔ kle e’n su. Yɛ e lafi su kpa kɛ Zoova yɛ ɔ kle e anuannzɛ’n i atin-ɔn.—Ebr. 10:​24, 25; 13:17.

17. ?Ngue yɛ é yó naan Zoova w’a fɔnvɔ e-ɔ?

¹⁷ Kannzɛ bɔbɔ Babilɔnin lɔ tranlɛ’n su yoman pɔpɔ manman Zifu nga bé wá trá be lomuɛn bé kɔ́’n, sanngɛ Zoova w’a yaciman be lɛ sa ngbɛn. Ɔ fɔnvɔli be. I kunngba’n yɛ Zoova yo man e andɛ-ɔ. Ɔ maan kannzɛ sa nga bé tɔ́ e su ainman’n bé yó sɛ yó sɛ’n, sanngɛ maan e kpɛ e ɲin Zoova wun lɔ titi. Maan e lafi su kɛ Zoova yaci e sa tɛ mun cɛ e, yɛ ɔ nian e lika. Maan e fa e wla e gua Zoova su titi. Maan e ɲin tran like nga e wla o su kɛ é ɲɛ́n i’n su titi. Nán e wla fi su kɛ sɛ Zoova o e sin’n, ɔ fataman kɛ srɛ kun e.