?Zoova tɛ e srɛlɛ’m be su?

1-2. ?Ngue ti yɛ ɔ ju wie’n ɔ yo e kɛ Zoova tɛman e srɛlɛ’m be su-ɔ?

BIBLU’N se kɛ: “Maan aklunjɔɛ’n i dan kpafuɛ nga á dí’n, ɔ yo Zoova dunman nun, yɛ ɔ́ fá ɔ awlɛn su ninnge mun mán wɔ.” (Jue. 37:4) Nda sɔ mɔ Zoova tali e’n, ɔ yo ɲɛnmɛn dan. ?Sanngɛ i sɔ’n kle kɛ Zoova ká lɛ fá ninnge kwlaa nga e srɛ i’n mán e? ?Ngue ti yɛ kosan sɔ’n ti cinnjin-ɔn? Maan e fa e ɲin e sie i sa nga’m be su. Wienun-ɔn, aniaan bla kun m’ɔ nin-a jaman bian’n, ɔ srɛ Zoova kɛ ɔ yo naan ɔ di Ɲanmiɛn Sielɛ’n i Jasin Bofuɛ’m be Suklu’n wie. Sanngɛ lele nin i kɛ afuɛ kpanngban sín’n, nn be nin-a yiɛmɛn i suklu sɔ’n i bo. Annzɛ aniaan bian kun mɔ tukpacɛ kekle kpa kun o i wun’n, ɔ srɛ Zoova kɛ ɔ yo i juejue naan w’a kwla di junman kpa asɔnun’n nun. Sanngɛ ɔ yoman juejue. Annzɛ kusu siɛ nin niɛn kun be srɛ Zoova kɛ ɔ uka be wa’n naan ɔ su i titi. Sanngɛ ɔ nin i sɔ’n ngba’n be wa’n yacili Zoova i sulɛ.

² Atrɛkpa’n, ɔ kusu a srɛli Zoova i like kun, sanngɛ w’a ɲanman like sɔ’n. Ɔ maan a kwla bu i kɛ Zoova tɛ ɔ wiengu’m be srɛlɛ’n su sanngɛ ɔ liɛ’n yɛ ɔ tɛman su-ɔ. Annzɛ a kwla bu i kɛ a yoli like tɛ wie ti-ɔ. Aniaan bla kun mɔ be flɛ i kɛ Zanisi’nb i wun yoli i sɔ wie. Ɔ nin i wun be srɛli Zoova kɛ ɔ yo naan be ko di junman Betɛli lɔ. Aniaan bla’n seli kɛ: “N seli min wun kɛ ɔ su cɛman naan b’a se e kɛ e ko di junman Betɛli lɔ.” Sanngɛ lele nin i kɛ afuɛ kpanngban sín’n, nn ɔ nin i wun’n be te o lɛ, be nin-a flɛman be. Zanisi seli kɛ: “Min sa sin bubuli min yɛ min akunndan’n sanngannin. Ɔ maan n usali min wun sɛ n yoli like wie mɔ w’a yoman Zoova i fɛ-o. N srɛli kpɛ sunman kɛ ɔ yo naan e ko di junman Betɛli. ?Yɛ nn ngue ti yɛ Zoova w’a tɛman min srɛlɛ’n su-ɔ?”

3. ?Kosan benin mun yɛ é wá tɛ́ be su like suanlɛ nga nun-ɔn?

³ Ɔ ju wie’n, e kwla usa e wun sɛ Zoova tie e srɛlɛ mun-o. Be nga laa’n be suli Zoova kpa bɔbɔ’n, be nun wie’m be usali be wun sɔ wie. (Zɔb. 30:20; Jue. 22:2; Aba. 1:2) ?Ngue yɛ ɔ kwla uka e naan y’a wun i wlɛ kpa kɛ Zoova tie e srɛlɛ mun-ɔn? (Jue. 65:2) Kɛ ɔ ko yo naan y’a wun i su tɛlɛ’n maan e dun mmua e tɛ kosan nga’m be su: (1) ?Kɛ e srɛ Zoova’n, ngue yɛ ɔ yo-ɔ? (2) ?Ngue yɛ Zoova kunndɛ kɛ e yo-ɔ? (3) ?Ngue ti yɛ ɔ ju wie’n, ɔ fata kɛ e kaci ninnge nga e srɛ Zoova’n niɔn?

?KƐ E SRƐ ZOOVA’N NGUE YƐ Ɔ YO-Ɔ?

4. ?Kɛ nga Zeremin 29:12 fa kan’n sa’n, ngue yɛ Zoova ta e nda kɛ ɔ́ yó-ɔ?

⁴ Zoova ta nda e kɛ ɔ́ tíe e srɛlɛ’n. (An kanngan Zeremin 29:12 nun.) Zoova klo i sufuɛ kpa mun, ɔ maan i ɲin kpaman srɛlɛ mɔ be srɛ i’n su. (Jue. 10:17; 37:28) Sanngɛ i sɔ’n kleman kɛ ɔ́ yó like kwlaa nga e se i kɛ ɔ yo man e’n. E srɛlɛ wie’m be o lɛ’n, saan mɛn klanman nun lɔ yɛ ɔ́ tɛ́ be su-ɔ.

5. ?Ka naan Zoova w’a tɛ e srɛlɛ’m be su’n, ngue yɛ ɔ yo-ɔ? An yiyi nun.

⁵ Zoova nian sɛ like nga e srɛ i’n ɔ nin i klun sa’n be kɔ likawlɛ-o. (Eza. 55:​8, 9) Like nga Zoova waan ɔ́ yó’n, i kun yɛle kɛ maan sran’m be tran asiɛ’n su, yɛ maan be bo yo kun be lo be wun be mɛn i kɛ ɔ sie be. Sanngɛ Satan waan sɛ klɔ sran’m be sie be wiengu’n yɛ be liɛ yó ye-ɔ. (Bob. 3:​1-5) Kɛ ɔ ko yo naan e kwlaa y’a wun i wlɛ kɛ Satan ti ato buafuɛ’n, Zoova kplinnin su kɛ klɔ sran’m be sie be wiengu. Klɔ sran’m be wiengu sielɛ’n kusu kpɛli ɲrɛnnɛn sunman ba. (Aku. 8:9) Sanngɛ sɛ Zoova siesie sa kwlaa nga be tɔ e su’n, sran’m bé bú i kɛ kɛ klɔ sran’m be sie be wiengu’n i bo’n gua klanman.

6. ?Ngue ti yɛ ɔ fata kɛ e lafi su kɛ Zoova tɛ́ e srɛlɛ’m be su kɛ ng’ɔ nin i fata’n sa-ɔ?

⁶ Kɛ e srɛ Zoova’n, wafa ng’ɔ tɛ e su’n ɔ ti fanunfanun. I wie yɛle kɛ kɛ Famiɛn Ezekiasi tɔli tukpacɛ kekle kpa’n ɔ srɛli Zoova tankaan kpa kɛ ɔ yo i juejue. Zoova kusu yoli i juejue. (2 Fam. 20:​1-6) Sanngɛ kɛ akoto Pɔlu srɛli Zoova kɛ ɔ yi ‘owie kun m’ɔ o i kplo’n nun’n,’ w’a yoman sɔ. Atrɛkpa’n owie sɔ’n ti tukpacɛ wie m’ɔ kleli i yalɛ-ɔ. (2 Kor. 12:​7-9) I wie kusu yɛle akoto Zaki nin Piɛli be liɛ’n. Famiɛn Erɔdu kunndɛli kɛ ɔ́ kún be nɲɔn’n. Aniaan’m be srɛli Ɲanmiɛn be mannin Piɛli. Atrɛkpa’n be srɛli Ɲanmiɛn be mannin Zaki wie. Kɛ ɔ yoli sɔ’n anzi kun wa deli Piɛli, sanngɛ Zaki liɛ’n be kunnin i. (Yol. 12:​1-11) Ɔ maan e kwla usa e wun kɛ: ‘?Ngue ti yɛ Zoova deli Piɛli mɔ w’a deman Zaki-ɔ?’ Biblu’n tɛman kosan sɔ’n su.c Sanngɛ e kwla lafi su kɛ Zoova “yoman sa nga be timan su’n le.” (Mml. 32:4) Asa’n, e Si Zoova klo Piɛli nin Zaki. (Ngl. 21:14) Ɔ ju wie’n, Zoova tɛman e srɛlɛ’m be su kɛ nga e fa sunnzunnin’n sa. Sanngɛ kɛ mɔ e lafi su kɛ Zoova klo sran yɛ ɔ yo sa’n i nuan su’n ti’n, sɛ w’a tɛman e su kɛ nga e fa sunnzunnin sa’n, e planman.—Zɔb. 33:13.

7. (1) ?Ngue yɛ ɔ fataman kɛ e yo-ɔ? (2) ?Yɛ ngue ti-ɔ?

⁷ Ɔ fata kɛ e mian e ɲin naan y’a faman e wun y’a sunnzunman e wiengu. I wie yɛle kɛ e kwla srɛ Zoova kɛ ɔ yo like kun man e, sanngɛ ɔ yoman. I sin’n, e ti i kɛ aniaan uflɛ srɛli like kunngba’n Zoova sa nun, kpɛkun ɔ yo e kɛ Zoova w’a yo w’a mɛn i sa. I sɔ sa’n juli aniaan bla kun mɔ be flɛ i kɛ Ana’n i su. Kansɛli yoli i wun mɔ be flɛ i kɛ Matie’n yɛ ɔ srɛli Zoova kɛ ɔ yo i juejue. Blɛ kunngba sɔ’n nun’n, kansɛli yoli aniaan bla kpɛnngbɛn nɲɔn wie. Ana srɛli Zoova tankaan kpa mɛnnin i wun’n ɔ nin aniaan bla sɔ mun. Aniaan bla’m be yoli juejue sanngɛ i wun liɛ’n ɔ wuli. I klikli nun’n, Ana usɛli i wun sɛ Zoova yɛ ɔ yoli maan be yoli juejue-o. Ɔ seli i wun kɛ sɛ ɔ ti sɔ’n, nn ngue ti yɛ i wun liɛ’n w’a yoman juejue wie-ɔ. E siman like nga ti yɛ aniaan bla nɲɔn sɔ’m be yoli juejue’n. Sanngɛ e si kɛ Zoova wá yí e su afɛ’n kwlakwla yɛ ɔ kunndɛ kpa ɔ́ cɛ́n e sran nga be wuli’n.—Zɔb. 14:15.

8. (1) ?Kɛ nga Ezai 43:2 fa kan’n sa’n, wafa sɛ yɛ Zoova suan e bo-ɔ? (2) ?Kɛ sa’m be o e su’n, wafa sɛ yɛ Ɲanmiɛn srɛlɛ’n uka e-ɔ? (An nian video nga be flɛ i kɛ Ɲanmiɛn srɛlɛ’n uka e naan y’a jran kekle.)

⁸ Zoova súan e bo titi. Zoova ti e Si yɛ ɔ klo e kpa. Ɔ maan ɔ kunndɛman kɛ e wun e ɲrun. (Eza. 63:9) Sanngɛ ɔ seman kɛ ɔ́ yó naan sa’m be kwlaa be to fuan e. E kwla fa sa nga be tɔ e su’n e sunnzun nzue ba annzɛ sin. (An kanngan Ezai 43:2 nun.) Sanngɛ ɔ ta e nda kɛ ɔ́ úka e naan e fin sa sɔ’m be nun e fite. Kannzɛ sa nga be tɔ e su’n be ti sɛ ti sɛ’n ɔ kplinman su kɛ sa sɔ’m be yo naan e nin i e afiɛn saci. Asa ekun’n, Zoova fɛ́ i wawɛ’n úka e naan y’a kwla jran kekle. (Lik. 11:13; Fip. 4:13) I sɔ’n ti’n, e kwla lafi su kɛ Zoova mán e ninnge nga e miɛn i wun naan y’a kwla jran kekle naan y’a su i kpa titi’n.d

?NGUE YƐ ZOOVA KUNNDƐ KƐ E YO-Ɔ?

9. ?Ngue yɛ ndɛ ng’ɔ o Zaki 1:​6, 7 nun’n kle e-ɔ?

⁹ Zoova kunndɛ kɛ e lafi i su. (Ebr. 11:6) Ɔ ju wie’n ɔ yo e kɛ e su kwlá jranman sa nga be to e su’n be ɲrun kekle sa. Wie liɛ bɔbɔ’n, e kwla bu i kɛ Zoova ukaman e. Biblu’n se e kɛ Ɲanmiɛn fanngan nun’n, ‘e kwla fu klɔ’n i wun talɛ’n su e jra lɔ.’ (Jue. 18:29) I sɔ’n ti’n, nán maan e akunndan’n yo nɲɔnnɲɔn, maan e srɛ Zoova yɛ e lafi su kpa kɛ ɔ́ tɛ́ e su.—An kanngan Zaki 1:​6, 7 nun.

10. An kan wafa nga e kwla yo srɛlɛ nga e srɛ Ɲanmiɛn’n i nuan su sa’n i ndɛ.

¹⁰ Zoova kunndɛ kɛ e yo srɛlɛ nga e srɛ i’n i nuan su sa. Maan e se kɛ aniaan bian kun srɛ Zoova kɛ ɔ yo naan i junman su kpɛn’n mɛn i atin naan ɔ tran nvle kun aɲia kun bo. ?Wafa sɛ yɛ Zoova kwla tɛ aniaan’n i srɛlɛ’n su-ɔ? Ɔ kwla mɛn i fanngan naan ɔ ko wun i junman su kpɛn’n i wun. Sanngɛ ɔ fata kɛ i bɔbɔ tu i ja ko wun i junman su kpɛn’n i wun. I kpa bɔbɔ’n atrɛkpa’n ɔ fata kɛ ɔ ko wun i wun kpɛ sunman ka naan w’a kplin su. Wie liɛ’n ɔ nin i wiengu junman difuɛ kun be nuan kwla sɛ su kɛ ɔ kaci i. Annzɛ kusu ɔ kwla se kɛ cɛn ng’ɔ su diman junman’n, maan be kpɛ i sika’n nun.

11. ?Ngue ti yɛ kɛ e srɛ Zoova i like kun’n, ɔ fata kɛ e jran su kpa-ɔ?

¹¹ Kɛ e srɛ Zoova i like kun’n, ɔ kunndɛ kɛ e jran su kpa. (1 Tes. 5:17) Ndɛ nga Zezi kannin’n kle kɛ nán blɛ kwlaa nun yɛ Zoova ka lɛ fá like nga e srɛli i’n mán e-ɔ. (Lik. 11:9) I sɔ’n ti’n, nán e sa sin bubu e. Maan e srɛ Zoova tankaan kpa titi. (Lik. 18:​1-7) Kɛ e srɛ Zoova i like kun mɔ e jran su kpa’n, i sɔ’n kle i kɛ like sɔ’n ti e cinnjin. Asa’n, i sɔ’n kle ekun kɛ e lafi su kɛ Zoova kwla uka e.

?NGUE TI YƐ Ɔ JU WIE’N Ɔ FATA KƐ E KACI NINNGE NGA E SRƐ ZOOVA’N NIƆN?

12. (1) ?Kɛ e srɛ Ɲanmiɛn’n, kosan klikli ng’ɔ fata kɛ e fa usa e wun’n yɛle benin? (2) ?Kɛ é srɛ́ Zoova’n, wafa sɛ yɛ e kwla kle kɛ e ɲin yi i-ɔ? (An nian kuku nga be flɛ i kɛ “?Wafa nga n srɛ Zoova’n, ɔ kle kɛ min ɲin yi i?” nun.)

¹² Sɛ e srɛ Zoova i like kun naan e ɲanman like sɔ’n, maan e fa kosan nsan e fa usa e wun. I klikli’n yɛ: ‘?Like nga n srɛ Zoova lɛ’n n miɛn i wun sakpa?’ Wie liɛ’n e bu i kɛ e si like ng’ɔ ti kpa man e’n. Sanngɛ atrɛkpa’n like nga e srɛ Zoova lɛ’n ɔ su yoman e wun sa ye. E kwla se Zoova kɛ ɔ yo like wie fa ti e wun ɲanman nun. Sanngɛ Zoova si kɛ nán like sɔ’n i yolɛ’n yɛ ɔ́ tí e wun ɲanman nun sakpa-ɔ. Annzɛ kusu’n like nga e srɛ Zoova’n ɔ nin i klun sa’n be kɔman likawlɛ. (1 Zan 5:14) I wie yɛle siɛ nin niɛn nga e dun mmua e kannin be ndɛ’n. Be srɛli Zoova kɛ ɔ uka be wa’n naan ɔ su i titi. Sɛ be srɛ sɔ kusu-ɔ, ɔ timan tɛ sɔ liɛ. Sanngɛ Zoova su mianman sran kun kɛ ɔ su i. Ɔ kunndɛ kɛ e bɔbɔ nin e mma mun e su i e klun klo su. (Mml. 10:​12, 13; 30:​19, 20) Ɔ maan like nga siɛ nin niɛn sɔ’m be kwla yo’n yɛle kɛ be kwla srɛ Zoova kɛ ɔ uka be naan be kwla uka be wa’n naan ɔ klo i kpa naan ɔ su i titi.—Ɲan. 22:6; Efɛ. 6:4.

13. ?Kɛ nga Ebre Mun 4:16 fa kan’n sa’n, blɛ benin nun yɛ Zoova úka e-ɔ? An yiyi nun.

¹³ Kosan i nɲɔn su nga e kwla fa usa e wun’n yɛ: ‘?Dɔ nga su yɛ ɔ fata kɛ Zoova tɛ min su-ɔ?’ Ɔ ju wie’n, e kwla bu i kɛ ɔ fata kɛ Zoova ka lɛ tɛ e su. Sanngɛ Zoova liɛ’n ɔ si blɛ nga i nun yɛ ɔ fata kɛ ɔ uka e’n i kpa. (An kanngan Ebre Mun 4:16 nun.) Sɛ Zoova w’a kaman lɛ w’a yoman like nga e srɛli i’n, e kwla bu i kɛ ɔ su faman like sɔ’n manman e. Sanngɛ atrɛkpa’n blɛ ng’ɔ fata kɛ ɔ fa like sɔ’n man e’n nin-a juman. I wie yɛle gbanflɛn ng’ɔ srɛli Zoova kɛ ɔ yo i juejue’n i liɛ’n. Sɛ Zoova yo abonuan sa yo i juejue’n, Satan kwla se kɛ kɛ mɔ Zoova yoli i juejue i ti yɛ ɔ te su i-ɔ. (Zɔb. 1:​9-11; 2:4) Asa’n, Zoova sieli blɛ kun mɔ i nun yɛ ɔ́ yó tukpacifuɛ’m be juejue-ɔ. (Eza. 33:24; Ngl. 21:​3, 4) Ka naan blɛ sɔ’n w’a ju’n, Zoova su yoman abonuan sa yoman e juejue. Ɔ maan like nga aniaan bian’n kwla srɛ Zoova kɛ ɔ yo mɛn i’n yɛle kɛ ɔ mɛn i wunmiɛn naan ɔ jrɛn i tukpacɛ’n i ɲrun kekle naan ɔ kwla su i titi.—Jue. 29:11.

14. ?Ngue yɛ Zanisi i su ndɛ’n kle e-ɔ?

¹⁴ ?Amun wla kpɛn aniaan bla Zanisi m’ɔ srɛli Zoova kɛ ɔ yo naan ɔ nin i wun be ko di junman Betɛli lɔ’n i su? Afuɛ nnun sinnin ka naan w’a wun i wlɛ kɛ Zoova tɛli i su. Aniaan bla’n seli kɛ: “Blɛ kwlaa sɔ’n nun’n, Zoova kleli min like yɛ ɔ ukali min naan m’an wɔ min ɲrun i sulɛ’n nun. N ma wunnin i wlɛ kɛ ɔ fata kɛ n lafi i su kpa n tra laa’n. Asa’n, n sieli i nzɔliɛ kɛ ɔ fata kɛ n bo min ɲin ase n suan Biblu’n nun like kpa n tra laa’n. N wunnin i kɛ kannzɛ min su sa’n ti sɛ ti sɛ’n, ɔ fata kɛ n su Zoova aklunjɔɛ su.” Kɛ ɔ́ kɔ́ i ɲrun’n, be seli Zanisi nin i wun kɛ be ko di akpasua su nianlɛ junman’n. Kɛ Zanisi buli sa sɔ’n i akunndan’n, ɔ seli kɛ: “Zoova tɛli min srɛlɛ’m be su, sanngɛ w’a tɛman be su kɛ nga n fa sunnzunnin’n sa. Wafa nga Zoova tɛli min su’n m’an kaman lɛ m’an wunmɛn i wlɛ. Sanngɛ kɛ Zoova kleli kɛ min ndɛ lo i naan ɔ klo min’n, i sɔ’n yo min fɛ dan.”

15. ?Ngue ti yɛ ɔ ju wie’n ɔ timan cinnjin kɛ e se Zoova kɛ ɔ yo like trele kun man e-ɔ? (An nian foto mun wie.)

¹⁵ Kosan i nsan su nga e kwla fa usa e wun’n yɛ: ‘?Yɛ sɛ n srɛ Zoova kɛ ɔ yo like uflɛ man min’n nin?’ Kɛ e srɛ Zoova mɔ e se i kɛ ɔ yo like trele kun man e’n i sɔ’n ti su. Sanngɛ ɔ ju wie’n, ɔ timan cinnjin kɛ e yo sɔ. I liɛ’n é wún like nga Zoova bɔbɔ kunndɛ kɛ ɔ́ fá mán e’n i wlɛ. Maan e kan aniaan bla ng’ɔ nin-a jaman bian m’ɔ srɛli Zoova kɛ ɔ yo naan ɔ tran Ɲanmiɛn Sielɛ’n i Jasin Bofuɛ’m be Suklu’n i bo’n i ndɛ kan. Ɔ kunndɛli kɛ ɔ́ dí suklu sɔ’n wie naan ɔ́ kɔ́ kan be mian jasin bofuɛ’m be wun lɔ kpa’n. Sɛ ɔ srɛ Zoova kɛ ɔ yo naan w’a kwla di suklu sɔ’n wie’n ɔ timan tɛ. Sanngɛ ɔ kwla kan gua su kɛ maan ɔ ukɛ i naan ɔ wun like uflɛ ekun mɔ a kwla yo naan w’a kwla su i kpa w’a traa laa’n i wlɛ. (Yol. 16:​9, 10) Asa’n, ɔ kwla yo i srɛlɛ’n i su sa. Yɛle kɛ ɔ kwla se akpasua sunianfuɛ’n kɛ ɔ kle i be asa liɛ’n su lɔ asɔnun bo nga be mian atin bofuɛ’m be wun kpa’n. Annzɛ kusu ɔ kwla klɛ Betɛli’n i fluwa usa lika be mian be mian jasin bofuɛ’m be wun lɔ kpa’n.e

16. ?Ngue yɛ e kwla fa e wla e gua su-ɔ?

¹⁶ Kɛ nga e fa wunnin i sa’n e kwla lafi su kɛ sɛ e srɛ Zoova’n, ɔ́ tɛ́ e su kɛ ng’ɔ nin i fata’n sa. (Jue. 4:3; Eza. 30:18) Ɔ ju wie’n, ɔ su tɛman e su kɛ nga e fa sunnzunnin’n sa. Sanngɛ Zoova i ɲin su kpaman srɛlɛ nga e srɛ i’n i su le. Zoova klo e tankaan kpa yɛ ɔ su yiman e ase le. (Jue. 9:10) I sɔ’n ti’n, maan ‘e fa e wla guɛ i su blɛ kwlaa nun,’ yɛ e kan ndɛ ng’ɔ o e awlɛn’n nun’n i kwlaa e kle i.—Jue. 62:8.