Maan e si Zezi m’ɔ ti Davidi nin Salomɔn Danfuɛ’n i ye
“Amun nian, sran kun o wa bɔ i dan tra Salomɔn.”—MATIE 12:42.
1, 2. ?Ngue ti yɛ ɔ kwla bo klɔ sran’m e nuan kɛ Davidi yɛ be seli Samiɛli kɛ ɔ guɛ i ti su ngo’n niɔn?
KƐ Ɲanmiɛn nuan ijɔfuɛ Samiɛli nian Davidi sa’n, ɔ faman famiɛn mlɔnmlɔn. Ɔ fa bua tafuɛ. Asa ekun’n, i awuliɛ klɔ Bɛtleɛmu’n timan klɔ dan. Be kan klɔ sɔ’n i ndɛ kɛ ɔ “ti Zida akpasua’n be nun kaan kpa’n.” (Mise 5:1) Sanngɛ, bakan sɔ’n m’ɔ faman sran m’ɔ le ɲrun’n, m’ɔ fin klɔ kaan kun su’n, i yɛ Ɲanmiɛn nuan ijɔfuɛ Samiɛli su wa guɛ i ti su ngo naan ɔ yo Izraɛli nvle’n i su famiɛn ɔn.
2 Samiɛli w’a bumɛn i kɛ Yese i wa Davidi yɛ Zoova waan ɔ́ fɛ́ i yó famiɛn ɔn. Yese i wa kasiɛn’n m’ɔ ti ba’m be mɔcuɛ su’n, yɛle Davidi.a I kpa bɔbɔ’n, kɛ Samiɛli bali Yese m’ɔ ti sran ndɛnmanfuɛ’n i awlo lɛ naan ɔ́ kpá sran ng’ɔ́ wá yó famiɛn’n, nn Davidi nunman lɛ. Sanngɛ Davidi yɛ Zoova fɛli i ɔ. I ng’ɔ ti cinnjin’n yɛle ngalɛ’n.—1 Samiɛl 16:1-10.
3. (a) ?Kɛ Zoova nian sran kun’n, ngue yɛ ɔ ti cinnjin i ɲrun ɔn? (b) ?Kɛ be guali Davidi i ti su ngo’n, ngue yɛ ɔ yoli i ɔ?
3 Like nga Samiɛli kwlá wunmɛn i’n, Zoova wunnin i. Ɲanmiɛn wunnin Davidi i awlɛn’n nun lɔ, yɛ ɔ kloli i. Ɲanmiɛn liɛ’n, nán like nga be ɲinma wun i’n yɛ ɔ ti i cinnjin ɔn, sanngɛ like ng’ɔ o sran kun i awlɛn’n nun’n niɔn. (An kanngan 1 Samiɛl 16:7 nun.) Ɔ maan kɛ Samiɛli wunnin kɛ Zoova w’a faman Yese i mma kpɛnngbɛn nso’m be nun wie fi’n, ɔ seli kɛ be ko fa ba kasiɛnfuɛ’n nnɛn’m be sin lɔ bla. Ɲanmiɛn ndɛ’n se kɛ: “Yɛ [Yese] maan be ko flɛli i-ɔ. Gbanflɛn sɔ’n ti kpinndin-kpinndi, i nyinma’m be ti cɛnjɛiin, i nyrun’n ti saun kpa, yɛ Anannganman seli Samiɛl kɛ: ‘Jaso guɛ i ti su ngo, i-ɔ.’ Samiɛl fɛli i nnɛn wɛ’n naan w’a guɛ i ti su ngo i niaan’m be nyrun lɛ. Kɛ ɔ fɛ i lɛ’n, Anannganman i wawɛ’n jrali David su.”—1 Samiɛl 16:12, 13.
Klist i nzɔliɛ sran yɛle Davidi
4, 5. (a) An kan ninnge nga Davidi nin Zezi be yoli mɔ be ti kun’n, be nun wie’m be ndɛ. (b) ?Ngue ti yɛ be kwla se kɛ Zezi ti Davidi Danfuɛ’n niɔn?
4 Be wuli Zezi Bɛtleɛmu lɔ kɛ Davidi sa. Kɛ be wuli Davidi’n, ɔ dili afuɛ 1.100 yɛ be wuli Zezi ɔ. Kɛ Davidi sa’n, sran kpanngban ɲrun’n, Zezi nin famiɛn dilɛ fataman. Yɛle kɛ nán famiɛn kɛ ngalɛ’n sa yɛ Izraɛlifuɛ sunman be ɲin o i sin ɔn. Sanngɛ kɛ Davidi sa’n, i yɛ Zoova fɛli i ɔ. Zoova kloli i kɛ ɔ fa kloli Davidi’n sa.b (Lik 3:22) Asa kusu’n, ‘[Zoova] i wawɛ’n jrali Zezi su’ wie.
5 Nán ninnge nga Davidi nin Zezi be yoli mɔ be ti kun’n, i ngba yɛle ngalɛ’n. I wie ekun yɛle kɛ Asitɔfɛli m’ɔ ti Davidi i afɔtuɛ manfuɛ’n, ɔ kacili i kpɔfuɛ. Zezi kusu’n, i akoto nga be flɛ i Zidas Iskariɔti’n, ɔ kacili i kpɔfuɛ wie. (Jue Mun 41:10; Zan 13:18) Davidi nin Zezi be nɲɔn’n, Zoova i sua’n i klolɛ’n kunnin be kpo. (Jue Mun 27:4; 69:10; Zan 2:17) Asa ekun’n, Davidi i aja difuɛ’n yɛle Zezi. Ka naan b’a wu Zezi’n, anzi kun seli i nin kɛ: “E Min Nyanmiɛn’n ɔ́ fɛ́ i nannan David bia’n mɛ́n i.” (Lik 1:32; Matie 1:1) Zezi m’ɔ ti Mɛsi’n m’ɔ́ wá dí famiɛn’n mɔ sran’m be minndɛli i lele’n, i dan trali Davidi. Afin Mɛsi’n i su ndɛ nga be kannin’n, i kwlaa i nuan yía Zezi su.—Zan 7:42.
Maan e su Famiɛn mɔ i kunngba’n ti bua tafuɛ’n i su
6. ?Wafa sɛ yɛ Davidi yoli bua tafuɛ kpa ɔ?
6 Zezi ti bua tafuɛ wie. ?Ngue ninnge yɛ bua tafuɛ kpa’n yo ɔ? Sran ng’ɔ si bua ta kpa’n, ɔ kpɔcimɛn i bua mun, ɔ miɛn i ɲin man be aliɛ yɛ ɔ sasa be. (Jue Mun 23:2-4) I nun mɔ Davidi te yo gbanflɛn’n, ɔ yoli bua tafuɛ, yɛ ɔ niɛnnin i si i bua’m be su kpa. Kɛ asɔmɔli nin nnɛn ngble mɔ be flɛ i ursu’n, be kunndɛli kɛ bé kún i bua mun’n, yakpa su ɔ sasali be.—1 Samiɛl 17:34, 35.
7. (a) ?Ngue yɛ ɔ ukali Davidi naan w’a kwla di famiɛn’n niɔn? (b) ?Wafa sɛ yɛ Zezi kleli kɛ ɔ ti Bua Tafuɛ kpa ɔ?
7 Afuɛ nga Davidi dili be bo nun lɔ’n, ɔ nin oka’m be su bua’m be lika nianlɛ nun’n, ɔ ukɛli i kpa junman dan ng’ɔ́ wá dí i Izraɛli nvle’n i su nianlɛ nun’n, i nun.c (Jue Mun 78:70, 71) Junman nga Zezi kusu dili nun’n, ɔ kleli kɛ ɔ ti bua tafuɛ kpa. Kɛ ɔ́ níɛn i ‘bua akpasua kaan’n,’ ɔ nin i ‘bua’m be wie’m’ be lika’n, Zoova yɛ ɔ mɛnnin i wunmiɛn yɛ ɔ kleli i atin ɔn. (Lik 12:32; Zan 10:16) Ɔ maan, Zezi yoli Bua Tafuɛ Kpa. Ɔ si i bua’m be kpa ti’n, ɔ fa be dunman’n flɛflɛ be. Be klolɛ’n ti’n, i nun m’ɔ o asiɛ’n su wa’n, ɔ fɛli i wun mannin. (Zan 10:3, 11, 14, 15) Like nga Zezi m’ɔ ti Bua Tafuɛ Kpa’n yoli’n, Davidi su kwlá yomɛn i le. E ti kpɔlɛ tɛ’n m’ɔ yili’n ti’n, sran’m be kwla ɲan be ti wie’n i sa nun. Nguan mɔ kɛ be ɲɛn i be wuman kun’n, i waan ɔ́ fá mɛ́n i ‘bua akpasua kaan’n’ ɲanmiɛn su lɔ. Asa kusu’n, i waan ɔ́ fá anannganman nguan mɛ́n i “bua’m be wie” mun, mɛn uflɛ nun. Sran nga be ti kɛ gboklo sa’n be su tranman lɔ. I sɔ ninnge’m be yolɛ’n nun’n, like fi kwlá jrɛnmɛn i.—An kanngan Zan 10:27-29 nun.
Maan e su Famiɛn m’ɔ kwla’n i su
8. ?Ngue ti yɛ e kwla se kɛ Davidi yoli famiɛn kwlafuɛ kpa ɔ?
8 Kɛ Davidi yoli famiɛn’n, ɔ tuli i klun kunnin alɛ, ɔ sasali asiɛ nga Ɲanmiɛn i nvle’n o su’n. Yɛ “kan kwlaa nga David kɔ’n, anannganman maan ɔ nyan jranwlɛ.” Davidi i famiɛn dilɛ’n i bo’n, i nvle’n fɛ i Ezipti lɔ nzue ba’n su lele fa ju Efrati nzue ba’n su. (2 Samiɛl 8:1-14) Zoova i fanngan nun maan ɔ yoli famiɛn kwlafuɛ kpa. Biblu’n waan: “Kɛ ɔ fin lɛ’n, David dunman’n fuli lele juli mɛn’m be kwlaa be nun, kpɛkuun Anannganman yoli maan mɛnmɛn’m be nunfuɛ’m be kwlaa be sroli i.”—1 Be Nyoliɛ 14:17.
9. Kɛ Ɲanmiɛn sieli Zezi kɛ ɔ́ wá yó famiɛn’n, wafa ng’ɔ kwlɛli i kpɔfuɛ mun’n, an yiyi nun.
9 Kɛ Famiɛn Davidi sa’n, i nun mɔ Zezi o asiɛ’n su wa’n, ɔ yoli yakpafuɛ. Kɛ Ɲanmiɛn sieli i kɛ i yɛ ɔ́ wá yó famiɛn’n, ɔ kwlali mmusu mun. Ɔ maan sran nga mmusu’m be sacili be’n, ɔ deli be. (Mark 5:2, 6-13; Lik 4:36) Mmusu’m be su kpɛnngbɛn bɔbɔ mɔ yɛle Satan’n, ɔ kwlá yoman Zezi i like fi mlɔnmlɔn. Zoova i fanngan nun maan Zezi kwlali mɛn mɔ Satan yɛ ɔ ti i siefuɛ’n.—Zan 14:30; 16:33; 1 Zan 5:19.
10, 11. ?Junman benin yɛ Zezi m’ɔ ti Famiɛn m’ɔ kwla’n, ɔ di i ɲanmiɛn su lɔ ɔ?
10 Kɛ Zezi wuli mɔ be cɛnnin i m’ɔ ɔli ɲanmiɛn su’n, i afuɛ 60 su’n, akoto Zan wunnin like ng’ɔ́ wá jú’n, aolia nun. Aolia nun like sɔ’n nun’n, ɔ wunnin kɛ Zezi ti Famiɛn m’ɔ kwla’n ɲanmiɛn su lɔ. Zan klɛli i kɛ: “Ń nían-an, nnɛn kpanngɔ ufue kun yɛ. Ta o sran ng’ɔ ti su’n i sa nun, be mɛnnin i like kun kɛ sika kle sa, yɛ ɔ ɔli yasua su kɛ ɔ nin i kpɔfuɛ mun bé kó kún naan ɔ́ kwlá be.” (Sa Nglo Yilɛ 6:2) Sran ng’ɔ o nnɛn kpanngɔ ufue’n su’n yɛle Zezi. Afuɛ nga be flɛ i 1914 nun’n, kɛ be sieli Zezi i famiɛn ɲanmiɛn su lɔ’n, “be mɛnnin i like kun kɛ sika kle sa.” Kɛ ɔ yoli sɔ’n, “ɔ ɔli yasua su kɛ ɔ nin i kpɔfuɛ mun bé kó kún.” Nanwlɛ, kɛ Davidi sa’n, Zezi ti famiɛn kun m’ɔ kwla ɔ. Kɛ be sieli Zezi famiɛn Ɲanmiɛn Sielɛ’n su’n, ɔ nin Satan be kunnin. Kpɛkun ɔ fuɛnnin i nin i mmusu mun ɲanmiɛn su lɔ guali be asiɛ’n su wa. (Sa Nglo Yilɛ 12:7-9) Ɔ nin be kún lele “ɔ́ kwlá be,” yɛ ɔ́ núnnún Satan i mɛn tɛ nga mlɔnmlɔn.—An kanngan Sa Nglo Yilɛ 19:11, 19-21 nun.
11 Kɛ Davidi sa kusu’n, Zezi ti famiɛn m’ɔ si aunnvuɛ ɔ. Yɛ Armagedɔn alɛ’n nun’n, ɔ́ sásá “sran kpanngban kpa” mun. (Sa Nglo Yilɛ 7:9, 14) Asa ekun’n, kɛ Zezi nin sran 144.000 mɔ be cɛnnin be’n, bé wá dí famiɛn’n, “sran kpa mun o, sran tɛ mun o, bé cɛ́n.” (Sa Nga Be Yoli’n 24:15) Be nga bé cɛ́n be asiɛ’n su wa’n, bé kwlá ɲán anannganman nguan. Nanwlɛ, be ɲrun lɔ like fɛ minndɛ be! Maan e kwlaa’n e ta nda kɛ ‘é yó sa kpa.’ I liɛ’n, kɛ sran kpa ngunmin bé wá yí asiɛ’n, mɔ bé dí aklunjuɛ Davidi Danfuɛ’n i sielɛ’n bo’n, é wún nun.—Jue Mun 37:27-29.
Ngwlɛlɛ nga Salomɔn srɛli’n, Ɲanmiɛn fa mɛnnin i
12. ?Ngue like yɛ Salomɔn srɛli ɔ?
12 Davidi i wa Salomɔn kusu yoli Zezi i nzɔliɛ sran wie.d Kɛ Salomɔn yoli famiɛn’n, Zoova fiteli i ɲrun lafilɛ nun. Ɔ seli i kɛ like kwlaa ng’ɔ srɛ i’n, ɔ́ fá mɛ́n i. Salomɔn kwla srɛ Zoova kɛ ɔ mɛn i aɲanbeun ninnge kpanngban annzɛ kwlalɛ annzɛ kusu ɔ mɛn i nguan ɲanman tɛnndɛn. Sanngɛ w’a yoman sɔ. W’a bumɛn i bɔbɔ i wun akunndan, ɔ maan ɔ srɛli Zoova kɛ: “Man min ngwlɛlɛ ɔ nin akunndan bɔ be fa wun sa’m be wlɛ’n kɛ ɔ́ yó naan m’an sie nvle sɔ’n ti. Sɛ w’a yo-man sɔ-ɔ sran kun kwlá sie-man ɔ nvle’n, afin ɔ ti dan. N waan a man min akunndan bɔ be fa wun sa’m be wlɛ’n ekun.” (2 Be Nyoliɛ 1:7-10) Zoova tɛli Salomɔn i srɛlɛ’n su.—An kanngan 2 Be Nyoliɛ 1:11, 12 nun.
13. ?Ngue ti yɛ e kwla se kɛ sran fi i ngwlɛlɛ’n toman Salomɔn liɛ’n niɔn? ?Yɛ i ngwlɛlɛ sɔ’n fin wan?
13 I nun mɔ Salomɔn nin Zoova be nanti klanman’n, i ngwlɛlɛ’n trali i wiengu’m be kwlaa. Ɔ buli “nyanndra akpi nsan.” (1 Famiɛn Mun 5:10, 12, 14) Be klɛli be nun kpanngban sieli. Yɛ andɛ nin andɛ be nga be kunndɛ ngwlɛlɛ’n be te klo be kpa. Seba famiɛn bla’n i nvle’n nin Salomɔn liɛ’n be ti nun kilo 2.400. Sanngɛ, ɔ bali lele kɛ ɔ́ wá úsa Salomɔn i “sa kekleekle mun” ɔ́ fá kpɛ́ i ngwlɛlɛ’n i bo nían. Ndɛ nga Salomɔn kannin’n, ɔ nin ninnge ng’ɔ wunnin i Salomɔn i nvle’n nun’n, be boli i nuan. (1 Famiɛn Mun 10:1-9) Kan nga Salomɔn i ngwlɛlɛ’n fin’n, Biblu’n kɛn i ndɛ se kɛ: “Sran’m be fin asiɛ’n i lika kwlaa nun be ba Salomɔn wun wunlɛ, be ba kɛ bé wá tí ndɛ ng’ɔ kan be mun, afin ngwlɛlɛ nga Nyanmiɛn fa mɛnnin i’n yɛ ɔ fa kan-an.”—1 Famiɛn Mun 10:24.
Maan e su Famiɛn ngwlɛlɛfuɛ’n su
14. ?Wafa sɛ yɛ Zezi ti ‘sran kun bɔ i dan tra Salomɔn’ ɔn?
14 Sran kunngba cɛ nga i ngwlɛlɛ’n trali Salomɔn liɛ’n yɛle Zezi Klist. I bɔbɔ kɛnnin i wun ndɛ seli kɛ: “Sran kun o wa bɔ i dan tra Salomɔn.” (Matie 12:42) Zezi i “ndɛ’n yɛ maan e nyan anannganman nguan-an.” (Zan 6:68) Ndɛ ng’ɔ kɛnnin i oka’n su lɔ’n nun’n, ɔ yiyili Salomɔn i ndɛ liɛ’n wie’m be nun, yɛ ɔ kannin wie guaguali su. Salomɔn kannin ninnge wie mɔ be man Zoova i sufuɛ’m be aklunjuɛ’n be ndɛ. (Nyanndra Mun 3:13; 8:32, 33; 14:21; 16:20) Zezi kan flannin nun kpa kɛ e Zoova sulɛ’n nun’n, ninnge nga Ɲanmiɛn waan ɔ́ yó ɔ nin nga be nin i klun sa’n be kɔ likawlɛ’n, be ngunmin yɛ be kwla man e aklunjuɛ ɔ. Ɔ seli kɛ: “Be nga be si kɛ be di Nyanmiɛn ninnge’m be yalɛ’n, be liɛ su ti ye, afin Nyanmiɛn yɛ ɔ sie be sakpa-a!” (Matie 5:3) Be nga be fa Zezi i ndɛ’n su’n, be fa be wun mantan Zoova mɔ ‘nguan’n i bo’n wo i wun lɔ’n.’ (Jue Mun 36:10; Nyanndra Mun 22:11; Matie 5:8) Klist ti ‘Nyanmiɛn m’ɔ si sa’n kwlaa’n’ i ja nunfuɛ. (1 Korɛntfuɛ Mun 1:24, 30) Kɛ mɔ Zezi Klist yɛ ɔ ti Mɛsi nga be sieli i famiɛn’n ti’n, “ngwlɛlɛ wawɛ” o i su.—Ezai 11:2.
15. ?Wafa sɛ yɛ e kwla si ngwlɛlɛ ng’ɔ fin Ɲanmiɛn’n niɔn?
15 ?Wafa sɛ yɛ e mɔ e ti Salomɔn Danfuɛ’n i sɔnnzɔnfuɛ’n, e kwla ɲan ngwlɛlɛ ng’ɔ fin Ɲanmiɛn’n wie ɔ? Biblu’n nun yɛ e wun Zoova i ngwlɛlɛ’n niɔn. Ɔ maan sɛ e waan é sí ngwlɛlɛ sɔ’n, ɔ fata kɛ e mian e ɲin e nian nun naan e bu su akunndan. Ndɛ nga Zezi kannin’n yɛ ɔ fata kɛ e bu su akunndan bɔbɔ’n niɔn. (Nyanndra Mun 2:1-5) Asa kusu’n, ɔ fata kɛ e srɛ Ɲanmiɛn naan ɔ man e ngwlɛlɛ titi. Ɲanmiɛn Ndɛ’n se e kɛ sɛ e srɛ Ɲanmiɛn kɛ ɔ uka e’n, ɔ́ tɛ́ e su. (Zak 1:5) Ɲanmiɛn i wawɛ’n dunman nun maan e kwla wun ngwlɛlɛ ng’ɔ o i Ndɛ’n nun’n. I liɛ’n kɛ ndɛ’n tɔ e su’n, ɔ kwla uka e naan y’a fa ajalɛ kpa. (Lik 11:13) Be flɛli Salomɔn ekun kɛ “akunndanfuɛ’n [annzɛ sran yiayiafuɛ’n, NW]” m’ɔ ‘kleli nvle’n nunfuɛ’m be ninnge silɛ’n.’ (Akunndanfuɛ’n 12:9, 10) Zezi kusu m’ɔ ti asɔnun’n i ti’n, ɔ ti i sran’m be yiayiafuɛ wie. (Zan 10:16; Kolɔsfuɛ Mun 1:18) I sɔ’n ti’n, ɔ fata kɛ e ɔ asɔnun aɲia’m be bo. Afin lɔ yɛ be ‘kle e ninnge silɛ’ ɔ.
16. ?Wafa sɛ yɛ Salomɔn nin Zezi be aeliɛ’n yoli kun ɔn?
16 Famiɛn Salomɔn yoli ninnge kpanngban. Ɔ siesieli be nvle wunmuan’n i kplanlɛ’n. Ɔ niannin famiɛn sua mun, nin klɔ ng’ɔ tian fie su ninnge nga be ɲan be’n be nuan be su’n, ɔ nin klɔ ng’ɔ fɛ i kakaklolo ng’ɔ fa kun alɛ’n nin i nnɛn kpanngɔ mun sie be su mun’n be kplanlɛ’n be su. Kpɛkun, ɔ niannin akpɔ be yolɛ’n, ɔ nin nzue bla dandan kpa’m be bolɛ’n su wie. (1 Famiɛn Mun 9:17-19) I junman ng’ɔ dili’n, nvlefuɛ’m be kwlaa be dili su. Zezi kusu ti like kplanfuɛ wie. Ɔ kplɛnnin i asɔnun’n “yɛbuɛ tanda’n su.” (Matie 16:18) Mɛn uflɛ’n nun’n, ɔ́ wá nían ninnge nga bé kplán be lɔ’n be su.—Ezai 65:21, 22.
Maan e su aunjuɛ Famiɛn’n su
17. (a) ?Salomɔn i sielɛ’n bo’n, ngue yɛ ɔ yoli i liɛ ngunmin ɔn? (b) ?Ngue yɛ Salomɔn w’a kwlá yoman ɔn?
17 Dunman Salomɔn’n i bo’n yɛle “aunjuɛ.” Zerizalɛmu mɔ lɔ yɛ Famiɛn Salomɔn tran dili famiɛn’n kusu’n, i bo’n yɛle kɛ “Be le aunjuɛ dilɛ’n kpɛ nɲɔn.” Afuɛ 40 ng’ɔ dili famiɛn’n, Izraɛli nvle’n i aunjuɛ ng’ɔ dili’n, awlanmannun’n be nin a dimɛn i sɔ le. Kɛ Biblu’n kán blɛ sɔ’n i ndɛ’n, ɔ se kɛ: “Salomɔn blɛ su’n kɛ ɔ fɛ i Dan b’ɔ́ fá jú Beɛr-Seba’n, Izraɛl nvle wunmuan’n nun’n, Zidafuɛ mun nin Izraɛlfuɛ’m be kwlakwla be o be vinyi fie mun, ɔ nin be figie fie’m be su sɛsɛsɛ, be klun ti-man be.” (1 Famiɛn Mun 5:5) Kannzɛ ɔ ti sɔ’n, sanngɛ ngwlɛlɛ dan nga Salomɔn sili i’n, w’a kwlá yoman naan tukpacɛ’n, ɔ nin sa tɛ’n nin wie’m b’a tu i nvlefuɛ’m be su. Sanngɛ Zezi m’ɔ ti Salomɔn Danfuɛ’n ɔ́ wá yó naan i sɔ ninnge’m be tu sran ng’ɔ sie be’n, be su.—An kanngan Rɔmfuɛ Mun 8:19-21 nun.
18. ?Like kpa benin yɛ ɔ o Klistfuɛ’m be asɔnun’n nun ɔn?
18 Kɛ é sé yɛ’n bɔbɔ’n, aunjuɛ o Klistfuɛ’m be asɔnun’n nun. E nin Ɲanmiɛn nin e niaan mun e afiɛn’n sɛ. Aunjuɛ nga e di i andɛ’n, i su ndɛ nga Ezai kannin’n yɛ: “Bé wá fá be tokofi mun bé bó tokpo, yɛ bé fá be cua mun bé yó wlɔsɔ. Nvle kun su fa-man alɛ wlɛ-mɛn i nvle uflɛ sin kun. Be su suan-man alɛ dilɛ’n kun.” (Ezai 2:3, 4) Sɛ e fa e wun man Ɲanmiɛn wawɛ’n naan ɔ sie e’n, nn e kwlakwla yɛ e yo yɛ maan aunjuɛ sɔ’n o lɛ ɔ.
19, 20. ?Ngue ti yɛ ɔ fata kɛ e di aklunjuɛ ɔ?
19 Sanngɛ e ɲrun lɔ’n yɛ ɔ́ wá yó kpa dan’n niɔn. Zezi i sielɛ’n bo’n, aɲinyiɛfuɛ’m bé dí aunjuɛ nga be nin a dimɛn i le’n. Kpɛkun blɛblɛblɛ, “bé nyán be ti, be su saci-man kun.” (Rɔmfuɛ Mun 8:21) Kɛ Klist i afuɛ akpi famiɛn dilɛ’n ko wie’n, i kasiɛn su’n bé wá sá sran mun nían. Wie’m bé fín nun fíte. Kpɛkun ‘mɛn’n ɔ́ wá yó yalɛfuɛ’m [annzɛ wun ase kanfuɛ’m] be liɛ. Be wun jɔ́ be kpa fɔuun!’ (Jue Mun 37:11; Sa Nglo Yilɛ 20:7-10) Nanwlɛ, Klist Zezi i sielɛ liɛ’n wá trá Salomɔn liɛ’n fatifati!
20 Kɛ nga Izraɛlifuɛ’m be dili aklunjuɛ Moizi nin Davidi nin Salomɔn be sielɛ blɛ’n nun sa’n, e kusu Klist i sielɛ’n bo’n, é wá dí aklunjuɛ dan trá su. (1 Famiɛn Mun 8:66) Zoova fɛli i Wa kunngba cɛ’n mɔ yɛle Moizi nin Davidi yɛ Salomɔn Danfuɛ’n fa mannin e. I ti’n, asenna’n kwlaa ti i liɛ!
[Ja ngua lɛ ndɛ mun]
a Yese i kunngba’n yɛ be flɛ i Izai ɔ.
b Atrɛkpa’n, Davidi i dunman’n i bo’n yɛle “Awlɛn su sran.” Zoova flɛli Zezi kpɛ nɲɔn kɛ ‘min anwlɛn su ba’.—Matie 3:17; 17:5.
c Kɛ ɔ́ yó sɔ kusu’n, Davidi kacili kɛ bua ba m’ɔ fɛ i wla guɛ i tafuɛ’n su’n sa. Ɔ minndɛli kɛ Zoova m’ɔ ti Bua Tafuɛ Dan’n, ɔ sɛsɛ i yɛ ɔ kle i atin. Ɔ fɛli i wla’n kwlaa guali Ɲanmiɛn su. Ɔ maan ɔ seli kɛ: “N ti kɛ bua sa, Anannganman yɛ ɔ nian min su ɔ. Like fi su mian-man min.” (Jue Mun 23:1) Zan batɛmu yofuɛ’n seli kɛ “Nyanmiɛn Bua Gbanflɛn’n” yɛle Zezi.—Zan 1:29.
d Salomɔn i dunman’n kun ekun yɛle Zɛdidza. I bo’n yɛle kɛ “Zoova i awlɛn su sran.” —2 Samiɛl 12:24, 25.
An yiyi nun
• ?Wafa sɛ yɛ Zezi ti Davidi Danfuɛ’n niɔn?
• ?Wafa sɛ yɛ Zezi ti Salomɔn Danfuɛ’n niɔn?
• ?Ngue ti yɛ amun si Davidi Danfuɛ’n mɔ i kunngba’n ti Salomɔn Danfuɛ’n i ye ɔ?
[Foto, bue 31]
Ngwlɛlɛ nga Ɲanmiɛn fa mannin Salomɔn’n, ɔ ti ngwlɛlɛ nga Salomɔn Danfuɛ’n wá ɲɛ́n i’n i nzɔliɛ.
[Foto, bue 32]
Zezi i sielɛ liɛ’n wá trá Salomɔn nin Davidi be liɛ’n fatifati!