Daniele
7 Mu mwaka wa ntanshi uwa kuteka kwa kwa Belshasari+ imfumu ya Babiloni, Daniele amwene iciloto ne fimonwa fya mu mutwe wakwe pa busanshi bwakwe.+ E lyo alembele ici ciloto.+ Ashimike ne lyashi lyonse. 2 Daniele atile:
“Namwene mu fimonwa fyandi ubushiku, kabili, moneni! imyela+ ine (4) iya mu myulu yalelulunkanya bemba mukalamba.+ 3 Kabili ifinama+ fine (4) ifyakulisha fyalefuma muli bemba,+ fyonse ifyapusana.+
4 “Ica ntanshi cali nge nkalamo,+ kabili cali na mapindo ya kwa kapumpe.+ Nakonkenyepo ukulolesha yasuka yanukulwa amapindo ya ciko, kabili bacimishe ukufuma pa nshi+ no kucilenga ukwiminina ku makasa yabili ngo muntu, kabili bacipeele umutima wa muntu.+
5 “Kabili, moneni! icinama cimbi, ica cibili, icapala bere.+ Kabili lubali lumo cali icatundama,+ kabili caikete ne mbafu shitatu mu kanwa ka ciko pa kati ka meno ya ciko; kabili caebelwe ukuti, ‘Ima, kalye iminofu iingi.’+
6 “Pa numa ya ici, nakonkenyepo ukulolesha, kabili, moneni! icinama cimbi, icaba nge mbwili,+ lelo cali na mapindo yane mu numa ya ciko nga aya cuni. Ne cinama ici cali ne mitwe ine,+ kabili ukuteka kwapeelwe kuli cena.
7 “Pa numa ya ici namwene mu fimonwa fya bushiku, kabili, moneni! icinama icalenga bune, ica kutiinya kabili ica kusakamika kabili ica maka ayakalamba.+ Kabili cali na meno ya cela, ayakulisha. Calelya no kukokotaula, kabili calenyantaula ne fyashalapo ku makasa ya ciko. Kabili calipuseneko ku finama fyonse fimbi ifyabalilepo, kabili cali ne nsengo ikumi (10).+ 8 Nalolekeshe insengo, e lyo, moneni! akalusengo kambi, akanono,+ kamenene mu kati ka shiko, na shitatu pa nsengo sha ntanshi shalinukwike ilyo akalusengo kanono kamenene. Kabili, moneni! mu kalusengo aka mwali amenso nga menso ya muntu, kabili mwali na kanwa akalelanda ifya mataki.+
9 “Nakonkenyepo ukulolesha fyasuka fyatekwa+ ifipuna fya bufumu, e lyo Uwa Nshiku ne Nshiku+ aikala. Ica kufwala cakwe cali icabuuta tutu,+ no mushishi wa ku mutwe wakwe nga masako ya mpaanga ayabuuta tuutu.+ Icipuna cakwe ica bufumu ni mingu sha mulilo;+ ne mipeto ya ciko mulilo uuleaka.+ 10 Kwali no mulonga wa mulilo uwalekonkoloka ukufuma pa ntanshi yakwe.+ Kwali na makana ikana (1,000,000) abalemubombela,+ na makana ikumi ukufushiwa ku makana ikumi (100,000,000) nabeminina pa ntanshi yakwe.+ Balitekele Icilye,+ na mabuuku yalikupukwilwe.
11 “E lyo nakonkenyepo fye ukulolesha pa mulandu wa ciunda ca mashiwi ya mataki ayalelanda akalusengo;+ nakonkenyepo ukulolesha casuka icinama ico caipaiwa no mubili wa ciko waonaulwa no kupooswa mu mulilo uuleaka.+ 12 Lelo ifinama+ ifyashelepo, ukuteka kwa fiko kwalifumishiwepo, kabili balifitantalisheko ubumi ukufika pa nshita imo.+
13 “Nakonkenyepo ukulolesha mu fimonwa fya bushiku, kabili, moneni! umo uwaba ngo mwana wa muntu+ aleisa na makumbi+ ya mu muulu; awe aisa afika na ku Wa Nshiku ne Nshiku,+ e lyo bamupalamika kuli ena.+ 14 Kabili bamupeele ukuteka+ no bukata+ no bufumu,+ pa kuti abantu na bantu bonse, aba nko ne ndimi bamubombele.+ Ukuteka kwakwe kuteka kwa muyayaya ukushakapite, no bufumu bwakwe tabwakonaulwe.+
15 “Awe ine, ne Daniele, umutima wandi walisakamene pa mulandu wa ici, ne fimonwa fya mu mutwe wandi fyalintiinishe.+ 16 Nasukile napalama kuli umo uwa mu baimininepo, pa kuti imwipushe umwalolele ifi fyonse.+ Na o alinjebele, no kunondolwela umwalolele ifi fintu fyonse ati,
17 “‘Apo ifinama ifi ifyakulisha fili fine,+ ishamfumu shine shikema ukufuma pano isonde.+ 18 Lelo aba mushilo+ aba Wapulamo+ bakapokelela ubufumu,+ kabili bakakwata ubufumu umuyayaya, kabili ukufuma umuyayaya ukufika umuyayaya.’
19 “E lyo nafwaile ukwishiba bwino bwino pa cinama icalenga fine, icapuseneko ku finankwe fyonse, ica kutiinya apakalamba nga nshi, ica meno ya cela ne ngala sha mukuba, icalelya no kukokotaula, kabili icalenyantaula ifyashelepo ku makasa ya ciko;+ 20 kabili nafwaile ukwishiba na pa nsengo ikumi (10) ishali ku mutwe+ wa ciko, na pa kalusengo+ kambi akamenene, kalya ako shitatu shanukwike+ ilyo kamenene, akalusengo ako kali na menso na kanwa akalelanda ifya mataki+ kabili akalemoneka akakulu ukucila ishinankwe.
21 “Nakonkenyepo ukulolesha ilyo akalusengo ako namwene kalwile na ba mushilo, kabili kalebanasha,+ 22 asuka aisa Uwa Nshiku ne Nshiku+ na ba mushilo aba Wapulamo+ balibapingwile bwino, ne nshita yalifikile na ba mushilo bapeelwe ubufumu.+
23 “Ne fi e fyo atile, ‘Icinama icalenga fine, cikaba bufumu ubwalenga bune pano isonde, ubukapusanako ku mabufumu yonse yambi; kabili bukapoka pano isonde ponse no kupanyantaula no kupatobaula.+ 24 E lyo isho insengo ikumi (10), ni mfumu ikumi ishikema+ mu bufumu ubu; na imbi ikema no kukonkapo, kabili yena ikapusanako ne shabalilepo,+ kabili ikawisha ne mfumu shitatu.+ 25 Kabili ikalanda amashiwi ya misuula pa Wapulamo,+ kabili ikalacululusha aba mushilo aba Wapulamo.+ Kabili ikapanga ukwalula inshita+ na mafunde,+ kabili bakapeelwa mu kuboko kwa iko ukufika ku nshita imo, ne nshita shibili na hafu wa nshita.+ 26 E lyo Icilye caikele,+ no kuteka kwa iko basukile bakufumyapo, pa kuti bayonaule no kuilofya umupwilapo.+
27 “‘Kabili ubufumu no kuteka no bukata bwa mabufumu mwi samba lya muulu onse fyapeelwe ku bantu ba mushilo aba Wapulamo.+ Ubufumu bwabo bufumu bwa muyayaya,+ kabili amabuteko yonse yakababombela no kubanakila.’+
28 “Pano e pa mpela ya mulandu. Na ine, ne Daniele, amatontonkanyo yandi yalintiinishe nga nshi, ica kuti imimonekele yandi yalyalwike; lelo nasungile uyu mulandu onse mu mutima wandi.”+