Iseni kwi Bungano lya Citungu Ilya “Lulimi Lwine Lwine”

UKUPUSANA mu lulimi kwaliba maka ya kulekanya ayabako ukutula pa Babele. Palya Yehova afulungenye ululimi lwa mutundu wa muntu no kufuupula imifwaile ya bantu ku ‘kukuula ulupungu no kuicitila ishina [lyalumbuka, NW].’ (Ukutendeka 11:4) Fintu ubupusano bwingaba ubwa kulekanya mu lulimi kuti camonwa mu cacitike mu Belgium. Imyaka iingi iyapitapo, Universiti ya ciKatolika pa Louvain yalyakanikene pa kati ukulingana ne ndimi.

Ululimi ni lumo fye ulwa milandu ya malekano pa kati ka bantu. Imbi yaba ni buluko, umushobo, amasomo, ne cipimo ca bunonshi. Lelo Inte sha kwa Yehova balibomba ku kucimfya fyonse ifi ifya kusangwilako fya kulekanya kabili baliba abaikatana mu cine cine.

Ulusuba lwapwile lwamwene ukulangisha kwamonekesha ukwacilapo ukwa uku kwikatana mu misumba ya Chorzów (mupepi na Katowice), Poznam, na Warsaw mu Poland. Inte, shilanda mu kucefyako indimi 20 ishapusanapusana, balisangilwepo ukufuma ku fyalo fimo 37. Nalyo line, buumo bwamonekesha bwalilangishiwe na bonse. Cinshi calengele ci? Bonse balelanda “ululimi lwine lwine” ulwa cine ca mu Malembo. Ici mu kubamo ubusesemo calisobelwe pali Sefania 3:9: “Lyene [ine Yehova Lesa] nkaalulo lulimi lwa bantu na bantu ukubo lulimi lwine lwine, ukuti bonse bene balilile kwi shina lya kwa Yehova, no kumubombela no mutima umo.”

E ico, mu kuba no mulandu usuma, amabungano ya citungu aya 1990 ya kakwato umutwe wa kuti “Ululimi Lwine Lwine.” Pa mulandu wa kukanapwililika kwa buntunse, ukusonga ukufuma ku calo ca bubifi ica kwa Satana, ne ncitilo sha bucenjeshi isha kwa Ciwa ne fibanda fyakwe, ukulanda “ululimi lwine lwine” lyonse takwanguka. Lyonse tufwile ukuba abapempwila ukulwisha ukukongama kwa kaso uko ukwingatulekanya.

Mulandu nshi untu Lesa atupeelela ulu ululimi lwine lwine? Pa kuti twingabombela Yehova “no mutima umo.” Amabupilibulo yambi yalango kuti ici cipilibula ukubombela Lesa “pe samba lye koli limo line” (The Jerusalem Bible); “mu kuba no kusuminisha kumo” (Moffatt); “mu kuba na kanwa kamo” (An American Translation); kabili “ukubombela pamo mu mulimo wakwe.”—Byington.

Ukupitila mu malyashi, ifilangililo, ifyakukumanya, amalyashi ya mu kukonkana, ifilangililo fya mu Baibolo pali aya mabungano, tukakoseleshiwa no kucincimushiwa ku kulanda ululimi lwine lwine mu kucilapo ukulongoloka. Yakatusesha na kabili ku kubomba mu kuba na bamunyinefwe mu kucilapo ukufumamo cimo kabili mu kumfwana.

Aya mabungano yakatendeka pali Cine mu kwipipa fye pa numa ya 1:00—p.m. kabili yakasondwelela mupepi na 4:00—p.m. pa Mulungu. Cita amapekanyo nomba ukusangwako ku lwimbo lwa kwiswila no kusangwa kuli shonse imbali ukufikila ipepo lya kusondwelela pa Mulungu icungulo.

Mukese na maBaibolo yenu ne nyimbo, kabili beni abaipekanya ukulemba ifishinka. Mukese na kabili ne nsala ya ku mupashi iisuma, kabili mukafumapo abacilapo ukuipangasha mu kukumanina ku kulanda ululimi lwine lwine na ku kubombela Yehova.

Umutande ne Fifulo fya Mabungano ya Citungu aya “Lulimi Lwine Lwine” aya 1990 Zambia

AUGUST 16-19

Chate, Chingola, Chipata, Kafue, Kalomo, Kitwe A. (Buchi), Kitwe B. (Chamboli), Luanshya, Lundazi, Manyinga, Mufulira, Sesheke, Solwezi.

AUGUST 23-26

Kaoma, Mongu, Mumbwa, Ndola A. (Chifubu), Ndola (English), Ndola B. (Mushili), Nyanje, Nyimba.

AUGUST 30−SEPTEMBER 2

Chansa, Kabwe, Kasama, Kazembe, Lusaka A. (Matero), Lusaka B. (Woodlands), Lusaka C. (Chingwere), Lusaka D. (Chelston), Mununga, Senga Hill, Serenje, Ukwimi.

SEPTEMBER 6-9

Isoka, Kapiri Mposhi, Mansa, Mpika, Samfya.