Fintu Caba ica Kunonsha Ukulondolola Cintu Yehova Acita!

¹ Kalemba wapuutwamo uwa Ilumbo 48 acincishe abo baali mu Israele ‘ukushinguluka Sione, ukupende impungu sha uko, ukulolesha amakuule yakankaala ya uko, ku kuleka bakalondolole ku nkulo iikakonkapo.’ Ukuseshiwa ku kutemwa kwa kuli Yehova, baali no kuba abasekelela nga nshi mu fintu fyonse ifya cilya cifulo ca pa kati ica pe sonde ica mitekele ya teokratiki. Fintu ifi fyali no kuba ifyaumo mutengo pantu uyu wali musumba uo Yehova abikilepo ishina lyakwe line! Baali no kulanda pa lwa wene, kabili ukucilisha baali no kushininkisha ukuti ubufyashi bwabo bwalyumfwile pa lwa fyonse fintu basungile mu mitima yabo iine.—Amalu. 48:12, 13.

² Nomba twikala mu nshita lintu ukuteka kwa teokratiki ukwa kwa Mesia wa kwa Yehova kwabikwa te mu Sione wa pe sonde na kabili lelo muli Yerusalemu wa mu muulu. (Heb. 12:22) Ubufumu bwa kwa Yehova mu maboko ya kwa Yesu Kristu bulateka ukutula 1914. (Ukus. 12:10) Imibombele ya buko yaba ya buseko bwacilishapo bukulu kuli ifwe. Na kabili twaliba abasekelela nga nshi mu nshila intu Yehova atungulwilamo ababomfi bakwe pe sonde pa kuti bengapwilikisha ukufwaya kwakwe pamo nga beminishi bamoneka aba bulya Bufumu. Ifyebo fya kucincimusha ukukuma kuli ici fyalilondololwa mu citabo cesu icipya Jehovah’s Witnesses—Proclaimers of God’s Kingdom. Fintu twali abacankwa ukupokelela cene pe Bungano lyesu ilya Citungu ilya nomba line ilya “Ukusambilisha kwa Bulesa!”

³ Ukufika pa September 1, icitabo cali nacikakulwa kale kale mu ndimi 20, kabili ukupilibula no kusabankanya fyalecitwa ku kwisusha ukukabila kwa abo balanda indimi shimbi 13. Bushe icinshingwa-ŋanda cobe calishitako kope? Bushe mulecibelenga? Bushe mulelanda pa fintu mulesambilila ukufuma muli cene?

⁴ Pa numa ya kulolesha pa fikope no kubelenga amashiwi yalondolole fikope, nga fintu catubulwilwe pe bungano, bamunyina na bankashi abengi mu kwangufyanya bawilile mu kubelenge fyebo. Cinshi caba e kulandapo kwabo? Pano pali fye ukunono.

⁵ Nkashi umo alembele ati: “E citabo fye ceka ico nabala mpokelelapo ico ndi uwabilima nga nshi ukupwisha pa kuti ningacibelenga na kabili. Ndi pa cipandwa 25 nomba. Ilyo nacililako kucibelenga, e lintu ncililako kutibinte filamba kabili umutima wandi wisulamo ukutemwa kwa kuli Yehova. Icitabo ca kukoselesha nga nshi kabili ca kukosha icitetekelo.”

⁶ Munyina umo uwabombela Yehova pa myaka ukucila pali 40 atile: “Nshailwike fintu ici citabo cali no kuba ica kulenga ukushikamamo. Nasendeme mu kucelwa kabili naimine mu kubangilila no kupwishishisha ukubelenga mu milungu ibili. Mu cine cine cili ni cimo ica fitabo fyacilishapo kusesha nabala mbelengapo. Mulimo walamuka uwa kusapika lelo na kabili caba mulimo walamuka uwa kukoselesha.”

⁷ Programu wa Lyonse uwa Kubelenga: Bamo abo mu kwangufyanya babelengele icitabo conse balipampamina pa kubelenga cene na kabili lelo iyi nshita panono panono.

⁸ Nga ca kuti mu cinshingwa-ŋanda cenu ababa mu cine balicila pali umo, kuti pambi mwafwaya ukubomfya ifiputulwa fya citabo mwi sambililo lyenu ilya lupwa. Indupwa shimo shatendeke ukucite co mu nshiku fye shinono pa numa bapokelele kope pe bungano. Ici tacilepilibula ukuti ifintu fimbi, pamo nga ukupekanishisha Isambililo lya Ulupungu lwa kwa Kalinda, filingile ukubikwa pa mbali. Lelo kuti pambi mwacisanga ukuba ica kunonsha nga nshi ukubomfya amaminiti na yambi 15 nelyo 20 ku kubelenga no kulanshanya ifyebo ukufuma mu citabo ca Proclaimers.

⁹ Indupwa shimbi shilebelenga amabula yabili nelyo yatatu—nakalimo akamutwe kanono kamo nelyo tubili—cila cungulo bushiku pa numa ya mulalilo. Ngo muntu umo umo pambi bafwile balibelenga iciputulwa cikalamba ica citabo, lelo balenonkelamo kufuma mu kufimba kwa panono panono capamo ne shuko lya mu nshita ilya kulanshanya ifyebo. Bamo abalecite ci balibombela Yehova pa myaka iingi. Ilyo balebelenga, ukufuluka ukwingi kulabalamunwa. Cilakafya imitima yabo ilyo balelanshanya capamo ukwakanamo kwabo mu fya kucitika ifyo babelengelepo.

¹⁰ Pa mulandu wa mibele mu ŋanda mu mwenu, kuti pambi wasango kuti ulebelenga fye weka. Nkashi umo uwalembele ku Sosaite atile: “Ndabelenga ici citabo panono pa nshita imo cila bushiku pa ntanshi ya kusendama. Ici citabo cilekuulila muli ine ukutesekesha kwashika no kutemwa kwa cine, kabili ndeyumfwa uwapalamisha kuli Yehova kabili uwa kutasha nga nshi ukuti naba ulubali lwa kuteyanya kwakwe. Mu cine cine ndeipakisha ibula limo na limo nabelenga.”

¹¹ Nangu ca kuti icitabo cikalamba, ifiputulwa ifiine te fikalamba. Iciputulwa ca kwiswila caba kufimba ukwipi lelo ukwa kucincimusha ukwa fya kucitika ukufuma mu nshiku sha kwa Abele ukutentemuka ukufika mu mwaka wa 1992—mu mabula fye 108. Ifiputulwa fimbi fyakula ukufuma pa mabula 13 ukufika kuli 150. Cimo na cimo ica ifi fiputulwa cayakanishiwa mu mpendwa ya fipandwa. Mu cifulo ca kupitamo fye ulubilo, buula iciputulwa cimo, icipandwa cimo, nelyo akamutwe kanono kamo pa kashita kamo; ipakishe cene; kabili nonkelamo ukufuma muli cene.

¹² Sendako Inshita ya Kutontonkanya pa co Ulebelenga: Cinshi cili no kuba ubuyo bobe ubukalamba ilyo ulebelenga? Ukufimba fye amabula—ukupwisha icitabo—tabulingile ukuba e buyo bobe. Icitabo ca Proclaimers cakwatamo icalembwa ca bupyani bobe ubwa ku mupashi. Ufwile ukubwishiba bwino. Sendako inshita ku kutontonkanya pa lwa bupilibulo bwa co ulebelenga. Ilyo ulepituluka mu mibombele ya nte sha kwa Yehova isha ku kale, languluka fintu wingapashanya icitetekelo cabo. (Heb. 12:1, 2) Lintu wabelenga pa lwa kulunduluka kwa busangu bukalamba, mwensekesha ifimfokonshi ifyo fyabikile mu citeyo abo abapumbwike, mu kuba ne cilolwa ca kubakilila bumupashi bobe bwine. Kabili ilyo ulepituluka mu lyashi lyesu ilya muno nshiku, lolekesha imibele ya ku mupashi iya abo ababomfiwe kuli Lesa, fintu balangishe ukuti ukucita ukufwaya kwa kwa Lesa kwali e cintu cacindamisha mu bumi bwabo, na fintu bayankwile ku mibele—imo iya yene iyaafya nga nshi—iyo Lesa asuminishe.—Heb. 13:7.

¹³ Ukacisanga ukuba ica kukosha icitetekelo ukupansa ifyebo fyalonshiwa ifilelangilila fintu Yehova atungulula abantu bakwe ku kumfwikisha kwalengama ukwa cine ca Baibolo ico tuipakisha nomba. Ukutesekesha kobe ukwa mitantikile imoneka iyo Yehova alebomfya kukakula ilyo wabeleshanya mu kuwaminako no kulunduluka kwa kuteyanya. Mu kushininkisha ukayumfwa uwacincimuka ilyo ulebelenga fintu, mu kufikilishiwa kwa masesemo, imbila nsuma yafika ku mpela sha pano isonde. Umutima obe ukakafiwa ku fya kukumanya ifya ba busumino mu mbali shonse isha calo ababomba mu kupimpa ukubilisha Ubufumu. Ukakoshiwa ukubomba ne fya kwesha fya pa lobe ilyo ulebelenga cintu bamunyina ne nkashi aba busumino kale kale bashipikishako pa mulandu wa kutemwa kwabo ukwa kuli Yehova.

¹⁴ Pa numa nubelenga iciputulwa cimo ica fyebo, sendako inshita ku kulanshanya capamo ubucindami bwa ciko no kupituluka mu fyebo. Nga ca kuti walikwata abana banono, basanshemo pa kubaleka ukulondolola ifikope no kukweba cintu baishiba pa lwa bantu balangilwe. Nelyo fye nga ca kuti ulebelenga fye weka, tukuta ukwakana na bambi ico ulesambilila. Nga fintu cili icalinga, bomfya ifyebo pa fipempu fya kubwelelamo na lintu uletungulula amasambililo ya Baibolo aya mu ŋanda. Ukufibwekeshabwekeshapo kobe kukafifwatika pa muntontonkanya obe wine no mutima, kabili fikanonsha bambi na bo bene.

¹⁵ Kwata Ubuseko mu Fyebo fya Kulonsha: Ifiputulwa fya nshita ifyo upeelesha ku kubelenga icitabo ca Proclaimers filingile ukuba ponse pabili ifya kuipakisha kabili ifya kunonsha.

¹⁶ Bushe kuti watemwa ulupwa lobe ukutandalila icishinte cikalamba ica calo conse ica Nte sha kwa Yehova? Amabula 208-9 yalanga ifikuulwa fyabomfiwe na Sosaite umwanda wa myaka umo uwapitapo mu ncende ya Pittsburgh. Amabula 216-17 yalekulenga ukubeleshanya ne fikuulwa fyabomfiwe pa numa mu Brooklyn. Ifikope pa mabula 352-6 kuti fyakwaafwa ukubika mu cikope icishinte cikalamba ica calo conse ilelo. Ifipandwa 26 na 27 fyakwatamo ukulonsha pa lwa mulimo ucitwa pa Bethel, kabili amabula 295-8 yapeela ifyebo fyalundwako pa lwa bumi bwa pa Bethel.

¹⁷ Ubwingi bwesu tatwaba na maka ya kutandalila imisambo ya Sosaite iyafulisha. Amabula 357-401 aya citabo ca Proclaimers yakusenda ku kutandalila icalo conse. Takuliko ukukabila kwa kupitamo fye ulubilo. Poosako inshita inono mu calo cimo na cimo kabili ipakishe cene. Bomfya mapu wa calo conse pa mabula 415-17 ku kusanga icifulo cimo na cimo. Belenga ukulandapo uko kuleendela pamo ne cikope cimo na cimo ica musambo. Ukupitila mu cisontelelo kuti na kabili wasanga ifyebo na fimbi ifya kucincimusha pa lwa calo cimo na cimo. Bomfya ili shuko lya mu nshita ku kwishiba ifilundwa fya lupwa lobe ulwa ku mupashi mu fyalo fimbi.

¹⁸ Lintu abantu balongana ku kwangalila capamo, inshita shimo shimo balangala amangalo ayo yabimbamo ukwishiba kwa fishinka fya ku calo. Bushe te kuti cicilepo kuba ica kunonsha ukwishiba imyaka yacindamisha ne fya kucitika fya mu lyashi lya muno nshiku ilya bantu ba kwa Yehova? Kuti wasanga ubwingi bwa fishinka fya musango yo ukutantikwa pa mabula 718-23 mu citabo ca Proclaimers. Uyo mutande upayanya icimpangilile ca kutendekelako; kuti walunda kuli wene ukufuma ku fyebo fisangwa mu mbali shimbi isha citabo. Bomfya fyene nge citendekelo ca kupitulukamo. Abacaice mu lupwa nakalimo bakasungila fyene ku mutwe mu kwangufyanya. Bamo aba ifwe fwe bacikalamba kuti pambi twakokomoka. Lelo ifi fili fyebo fya kulonsha ifya lyashi lya kale ilya teokratiki ifyo bonse twinganonkelamo lintu twafishiba. Pa numa waishiba inshiku ne fishinka fya kutendekelako, kuula pali uyo mufula. Mona nga fyebo finga wingebukisha ukukuma ku ca kucitika cimo na cimo. Lyene landa pa lwa lubali ulo ica kucitika cimo na cimo cakwete mu kupwishishiwa kwa kufwaya kwa kwa Lesa. Mu kukonkapo, landa pa fintu cayambukila ubumi bobe bwine na fintu ulingamo mu co Yehova alecita.

¹⁹ Mona Amashuko ya mu Nshita Ayaisuka Kuli Iwe: Ilyo ulebelenga no kulanshanya Jehovah’s Witnesses—Proclaimers of God’s Kingdom, ukasanga ukuti cilefungulula pa ntanshi yobe ukufikilishiwa kwakulisha ukwa kwa Esaya 60:22. Icitabo cilondolola pe bula 519 ukuti: “Ukufikilishiwa kwa bulayo bwa kuti ‘umunono akabe kana limo’ mu kushininkisha kwalicitika, kabili apakalamba nga nshi! Muli cimo na cimo ica fyalo fyacila 50 umo mushali ‘umunono’ nelyo fye umo—uko kushali Inte sha kwa Yehova nangu bamo ku numa mu 1919, uko kushali ukushimikila nakalya—ilelo kwalibako bakalumba ba kwa Yehova abacila pe kana limo. Muli fimo ifya ifi fyalo, nomba mwalibamo amakumi ya makana, ee, nelyo fye ukucila na pa makana umwanda, aba Nte sha kwa Yehova abali ni bakabilisha ba Bufumu bwa kwa Lesa abapimpa! Mu kusaalala kwa calo, Inte sha kwa Yehova balisanguko ‘luko lwakosa’—abafulilako mu mpendwa pamo nge cilonganino caikatana ica mu cibulungwa conse ukucila ubwingi bwa bantu ubwa luli lonse ulwa nko shiiteka mupepi na 80 isha mu calo.”

²⁰ Uyo mulimo wa kusanduluka kwa Bufumu mu kushininkisha taulati upwe. Mu kupusanako, Yehova aliukalakasha ku cipimo cishingalinganishiwako. Kufika ku cipimo nshi ukakana muli wene? Bushe mu cituntulu uli uwaibukila ulwa mashuko ya mu nshita yonse ayali ayaisuka kuli iwe? Ilyo ulesambilila ico bambi balecita, shi umutima obe wine wingaseshiwa ku kuilenga we mwine ukubako ku kwakanamo mu kukumanina mu mulimo wakulisha uyo Lesa wesu uwa kutemwa aletungulula ukupitila muli Yesu Kristu mu kasuba kesu.