Ol Yangfala Oli Askem . . .

?Olsem Wanem Mi Save Kam Fri Long Dabol Laef Ya?

Anna i talem se: “Mi no lesin long eni samting we papa mo mama blong mi oli talem. Mi gat fasin stronghed mo mi stat blong gyaman long tufala. Mi talem long tufala se bambae mi go pem ol samting long stoa, be rili mi wantem go luk wan boe.”

ANN i gat wan dabol laef, mo i no longtaem hem i no moa lesin, i no long papa mama blong hem nomo, be long voes blong hat mo tingting blong hem we hem i trenem blong laenap wetem Baebol. Yu save, Ann i stap mekem nogud long saed blong seks wetem boefren blong hem, long fasin haed. Hem i tingtingbak nao i talem se: “Mi traem blong fogetem Jeova olgeta.” Be, i no longtaem hem i mas fesem wan trutok stret se ‘wanem sid we ol man oli planem, bambae oli kasem frut blong hem tu.’ (Galesia 6:7) Biaen Ann i gat bel. Hem i talem se: “Mi laekem pikinini blong mi wetem olgeta hat blong mi. Be i no stret we wan man i mas gotru long wan ekspiryens olsem. Taem hem i no mared. Taem hem i stap hem wan nomo.”

?Olsem wanem, long sam rod yu tu yu stap long trap ya blong dabol laef—yu stap haedem trufala fasin blong yu long papa mama blong yu mo long ol Kristin fren blong yu? Maet yu jes stap kampani nomo wetem sam skul fren we yu save se papa mama blong yu oli no agri long olgeta. No maet yu bin foldaon long sam fasin we oli nogud moa olsem smok, dring tumas alkol, no slip olbaot bifo mared. Nating se i olsem, bambae i no longtaem ol nogud frut oli kamaot from, olsem i bin hapen long Ann.b

Be, sam yangfala oli no letem samting ya i jenisim tingting blong olgeta nating long fasin stronghed we oli gat. Oli olsem man we i luk fes blong hem long glas mo “wantaem nomo hem i no moa save tingbaot we fes blong hem i olsem wanem.” (Jemes 1:23, 24) Mifala i hop se yu yu no olsem. Maet yu stat finis blong traehad blong luklukgud long yu wan—mo yu no laekem wanem we yu luk. Yu wantem jenisim. Yu luksave se yu mas jenis. Kwestin i stap nao se, ?yu save jenis olsem wanem?

Tanem Tingting—Faswan Step

Fastaem, yu mas mekem wan disisen long tingting blong yu blong jenis. Ol Wok 3:19 i talem se: “Oraet, nao yufala i mas tanem tingting blong yufala from sin blong yufala, yufala i mas luk long God blong hem bambae i tekemaot ol sin blong yufala.” Be, fasin ya blong tanem tingting, i no long saed blong tingting nomo. Fasin blong tanem tingting i minim se wan man i “harem i sore, harem nogud, i wari, long wanem we hem i mekem.” Jemes, man ya blong raetem Baebol i givim advaes ya se: “Naoia i gud yufala i sore, yufala i krae. I gud yufala i krakrae tumas from ol sin blong yufala. I gud yufala i no moa laf, yufala i no moa haremgud, naoia yufala i harem nogud, yufala i krae. Long fes blong God yufala i mekem tingting blong yufala i stap daon.” (Jemes 4:9, 10) ?Olsem wanem yu save harem se yu sore long wan samting we bifo yu haremgud long hem? Tingbaot olsem wanem samting ya i rong. Tingbaot olsem wanem samting ya i mekem Jeova i harem nogud. Tingbaot ol problem we yu kasem from fasin blong yu we yu stap haedem, mo ol gyaman tok we yu mas talem blong haedem. !Talem bakegen long yu wan se God i no laekem nating fasin blong gyaman! (Ol Sam 5:6) Fasin blong tingting dip long ol samting ya i save givhan long yu blong sakemaot ol nogud fasin long tingting mo long filing blong yu.

Be, blong harem nogud long wanem we yu stap mekem nomo, i no naf. Wan yangfala man we nem blong hem Robert, we i joen long fasin ya blong yusum drag long fasin haed, i talem se: “Mi harem nogud bigwan. Mi save wanem i stret mo wanem i no stret. Be, mi gohed blong gat wan dabol laef.” !Taswe, i nidim strong tingting blong mekem sam samting! Long 2 Kronikel 7:14, God i talem se sipos ol man we oli stap mekem sin oli “mekem tingting blong hem i stap daon mo prea mo lukaot fes [blong hem] mo tanem baksaed blong olgeta long rabis rod blong olgeta, nao long heven [hem wan bambae] i harem olgeta mo fogivim sin blong olgeta.”

‘Lukaot fes blong God’ i minim blong kam kolosap long hem long prea, talemaot sin blong yu long hem, mo askem strong blong hem i fogivim yu. Maet samting ya i no isi blong mekem, be bambae yu haremgud sipos yu mekem olsem. Man blong raetem Ol Sam i talem se: “Taem mi no talemaot sin blong mi long yu, mi slak we mi slak, from evri dei nomo, mi stap krae kasem tudak. Long dei mo long naet yu stap panisim mi . . . Nao mi talemaot sin blong mi long yu, mi no moa haedem ol samting nogud we mi mi mekem.”—Ol Sam 32:3-5.

Talem Long Papa Mama Blong Yu

I gat wan narafala we i nidim blong save problem blong yu. ?Be hu ya? Wan yangfala we nem blong hem Brian i talem se: “Wan bigfala mastik we mi mekem i blong go talemaot problem blong mi long olgeta we mi ting se oli ol fren blong mi, bitim we mi go long Kristin mama blong mi. Be mi fraet blong toktok wetem hem from mi ting se bambae hem i kros tumas, ale mi go luk ol fren blong mi, we oli jes lidim mi i go longwe moa long trutok.” Yu no mas mekem sem mastik olsem. Talemaot evri samting we i stap long hat blong yu long papa mama blong yu we oli laekem God. (Skelem wetem Proveb 23:26.) Oli gat raet blong save wanem yu bin mekem. Japta 2 blong buk ya Questions Young People Ask—Answers That Work i givim sam rod we yu save folem blong tokbaot samting ya long papa mama blong yu.c

I tru, yu no mas ting se bambae oli glad from we yu bin gyaman long olgeta. Be oltaem ol papa mama oli laekem ol pikinini blong olgeta. Wan man blong raetem buk, Clayton Barbeau i talem se: “Bambae oli no save talem se yu no moa pikinini blong olgeta from we yu mekem wan mastik, no yu stap long wan trabol. Sam yangfala gel oli gat bel, oli kasem sik long saed blong seks, oli gat problem long saed blong alkol no drag no oli gat sam nara problem, mo oli ting se papa mama blong olgeta bambae oli mekem i nogud no agensem olgeta, spolem haos, mo ronwe long taon ya. Be taem oli talemaot long papa mama blong olgeta, oli faenem se papa mama oli putum han i goraon long olgeta, mo talem se, ‘Yes, yu stap long trabol, mo mifala i mas luk olsem wanem mifala i save givhan long yu blong yu kamaot long hem.’” Yes, taem sapraes mo kros blong olgeta oli godaon, kolosap olgeta papa mama oli traem blong givhan. !Samting ya i tru moa taem papa mama oli fraetgud long God! Stampa wari blong olgeta i no blong mekem yu yu sem no mekem yu yu harem nogud, be blong stretem problem ya. (Skelem wetem Aesea 1:18.) Long saed ya, maet oli mekem plan tu blong yu save toktok wetem ol elda long kongregesen.—Jemes 5:14, 15.

I tru, bambae yu mas gotru sam panis we papa mama blong yu bambae oli givim, we i stret blong yu kasem, mo maet oli blokem yu long sam samting. Be samting ya i save givhan long yu blong no foldaon bakegen long olfala rod blong yu. Antap moa, taem yu tokbaot ol trabol wetem papa mama blong yu mo yu luk olsem wanem oli laekem yu tumas, samting ya i save jenisim tingting we yu gat long tufala fastaem. Kam kasem naoia, maet yu no haremgud long rul no tabu we oli putum long yu. Wan gel, nem blong hem Paulette, i talem se: “I had blong akseptem ol advaes mo rul we papa mama blong yumi oli givim long yumi. Be naoia mi luksave se ol samting ya oli blong givhan long yumi mo mekem yumi glad blong olwe.”

Jenisim Ol Fren Blong Yu

I no plante taem we wan yangfala i gohed blong folem fasin blong dabol laef hem wan. !Maet ol fren blong yu oli pusum yu blong gohed long stronghed fasin blong yu! Blong no gobak long nogud fasin we yu stap haedem, yu nidim blong jenisim ol fren blong yu. Man blong raetem Ol Sam i talem se: “Mi mi no save go stap wetem ol man blong gyaman. Mi no gat bisnes nating wetem ol man we oli gat tu tingting.” (Ol Sam 26:4) I no isi blong lego ol fren we yu bin joen wetem olgeta longtaem finis. Maet yu nidim blong prea olsem man blong raetem Ol Sam se: “Plis yu blokem ol man blong gyaman mo ol man nogud, yu sevem mi.” (Ol Sam 43:1) Wok folem prea ya, mo talem long ol olfala fren blong yu se yu jenis nao, mo yu wantem blong mekem wanem i stret. I nogud blong stap olsem wan disaepol blong Jisas we i stap haed, i moa gud blong talemaot bilif blong yu long ol narafala. (Skelem wetem Jon 19:38.) Plante taem, ol rabis fren bambae oli lukaot ol narafala fren kwiktaem nomo.

Nekis samting, yu nidim blong jenisim ol rabis fren blong yu wetem ol gudfala fren. ?I no gat plante yangfala we oli fraetgud long God? Oraet, tingbaot profet Jeremaea, we i talem se: “Mi no sidaon blong fren wetem ol man we oli stap mekem plei blong trikim ol man, we mi glad tumas from. From han blong yu mi mi stap sidaon mi wan nomo.” (Jeremaea 15:17) I gud moa long yu blong stap yu wan nomo bitim we yu stap joen wetem ol yangfala we bambae oli pulum yu yu kam slak long saed blong speret. Be plante taem, yu save faenem ol trufala fren sipos yu traehad from. Eksampel, Tammy i stat blong joen wetem kasen blong hem we i stap talemaot gud nyus fultaem. Tammy i talem se: “Mitufala i kam gud fren. Long dei we mi no gat skul, mi stap goaot wetem hem long wok blong prij. Samting ya i givhan long mi blong mekem sam jenis long laef blong mi.”

Be wan yangfala blong Jemani i talem se: “Nambawan samting blong lukaot long yumi, hemia wan gud voes blong hat mo tingting, we i kamaot from fasin frengud wetem Jeova God.” Wan yangfala gel we i foldaon long fasin blong folem wan dabol laef i talem se: “Mi neva wokem wan gud fasin fren wetem Papa blong mi, Jeova.” Tru long prea mo stadi hem wan, hem i stat blong jenisim sam samting. Hem i glad blong talem se: “Naoia mi gat wan fasin fren wetem Jeova we i no gat man i save tekemaot.” Yu tu yu save haremgud long wan gudfala fasin fren olsem wetem God. Bambae Hem i lidim mo sapotem yu, long taem ya tu we yu faenem se i had blong jenisim olfala fasin blong laef blong yu. Ol Sam 37:24 i talem long saed blong wan man blong wok blong God we i holemstrong long hem se: “Sipos oli foldaon be bambae oli no save stap daon longtaem, from we Hae God bambae i holem olgeta, i leftemap olgeta.” Yes, wetem help blong Jeova, yu save kam fri long fasin blong gat dabol laef.

[Ol Futnot]

[Tok blong makem poen long pej 21]

“Mi traem blong fogetem Jeova olgeta”

[Tok blong makem poen long pej 21]

Yu mas mekem wan disisen long tingting blong yu blong jenis

[Tok pija long pej 22]

Eksplenem long ol olfala fren blong yu se yu jenis mo bambae yu no moa joenem olgeta blong mekem samting we i nogud