Kalate ôsu Jean a nga tili
4 A bôte ma nye’e, te mia buni bôte bese ba jô na foé* ba kate mia ja so yôp, ve yemela’ané miñye’elane* mise ba ve mia asu na, mi yeme nge mia so fo’o be Zambe amu abui bekulu mejô be ne minsos be ntoo si nyu.
2 Mia ye yeme na ñye’elan éziñe wo so be Zambe, nge ñye’elan ôte wo jô na, Yésus a nga nyoñe nyule minsôn éyoñ a nga zu si. 3 Ve ñye’elan ôse wo kañese ki Yésus ô nji so be Zambe. Nde fe, mi nga wô’ô na, bôte béziñe ba ye soo avale miñye’elan éte, bôte bete be ne besiñe be Krist; éyoñe ji, miñye’elane miap mi maneya yametane be bôte ya si.
4 A ayôme bongô, mi ne bone be Zambe, a mi sa’aleya miñye’elane mite, amu Zambe, nnye ate a ne ngame jenan a dañe Diable, nnye a ne ngam émo. 5 Be ne bone ya si nyu, jôme te nje ba kobô mame ya émo, a bôte ya si nyu ba vô’ôlô be. 6 Bi ne bone be Zambe. Môt ase a nga yeme Zambe a vô’ôlô bia; wôna môt a nji so be Zambe a ne teke vô’ôlô bia. Nsela’ane a ne zañe benya mejôô a minsos nnye ñhe le.
7 A bôte ma nye’e, nkelan ôsu a nye’esan, amu nye’ane wo so be Zambe, a môt ase a nye’e a ne mone Zambe, a yeme fe Zambe. 8 Môt ase a nji nye’e, a ngenane teke yeme Zambe amu Zambe a ne nye’an. 9 A zene nyi nje Zambe a nga liti na a nye’e bia, a nga lôm atyi’i Mone dé si nyu asu na bi bi ényiñ a zene jé. 10 Nye’an ôte ô ne na, sa ke bia bi nga nye’e Zambe, ve nnye a nga nye’e bia a lôme Mone wé ane metuna’a ya late ngbwa* amu minseme miangan.
11 A bôte ma nye’e, mbôle Zambe a nga nye’e bia abim éte, bi ne ñhe ntindane ya nye’esan, wua a nye’e nyu mbok. 12 Teke môt éziñ a yeneya Zambe. Nge bia ke ôsu a nye’esan, wua a nye’e nyu mbok, Zambe a ye kabetane bia, a nye’ane wé wo ye jaé be bia ne lut. 13 A zen éte, bia yeme na bia wulu a Zambe a na nye fe a wulu a bia amu a nga ve bia nsisime wé. 14 Nde fe, biabebiene bi nga yen a bo’olô na Ésa a nga lôme Mone na a zu nyii bôte bese. 15 Môt ase a kañese na Yésus a ne Mona Zambe, Zambe a kabetane nye, émiene fe a kabetane Zambe. 16 Éyoñe ji, bi nga yem a buni na Zambe a nye’e bia.
Zambe a ne nye’an, a môt ase a ba’ale émiene nye’an été a kabetane Zambe, Zambe fe a kabetane nye. 17 A zen éte, nye’ane wo ye jaé be bia ne lut, ndembene bia ye kobô teke ko woñe* môse ntyi’ane mejô, amu bia fe bia nyiñ a bôte ya si nyu aval ane Yésus a mbe a nyiñik a be. 18 Môt a nye’e nya nye’ane a ne teke ko woñ. Nya nye’ane a wua woñe fé, amu woñe wo bo na bi kate nye’e. Nde fe nye’ane ya môt a ne ñwôwoñ ô vo’o jaé ne lut. 19 Bia nye’e amu Zambe nnye a nga taté nye’e bia.
20 Nge môt éziñ a jô na: “Ma nye’e Zambe,” ve a vini’i monyañe wé, môt ate a ne nlaa minsos. Amu môt a nji nye’e monyañe wé a yen a mis, a vo’o nye’e Zambe a ngenane teke yen. 21 A atiñ a nga ve bia nde di, môt ase a nye’e Zambe, a yiane fe nye’e monyañe wé.