Mbamba foé Luc a nga tili
9 Mvuse ya valé, Yésus a nga tôkane minlôman Awôm a mibaé, a ve mie ngule ya titane mbia minsisime mise a ngule ya saé akon. 2 Ane a nga lôme be, be ke kañete foé ya Éjôé Zambe a saé minkôkon, 3 a nga jô fe be na: “Te mia nyoñe jôm éziñ asu dulu, te mia nyoñe ntum, nge ékpwaé bidi, nge belet, nge moné,* te mia nyoñe ja’a biyé bibaé.* 4 Ve vôm ase ba ye kañese na mi nyiine nda éziñ, taba’ané vôm ate akekui mia ye kôlô valé. 5 A vôm ase bôte ba bene nyoñe mia, éyoñe mia ye kôlô tison éte, sasa’ané mbuluk ô ne mia mebo mfa’a ya liti* na be wô’ôya foé.” 6 Nde be nga téé a ke ba kañete bôte mbamba foé minlame minlam a saé bôte vôm ase.
7 Hérode* njôô ya ngoto* a nga wô’ô foé ya mame mese me mbe me boba’an, ane nlem ô nga tyebe nye yôbe nya abuii, amu bôte béziñe be mbe be jô’ô na Jean a wômôya miñwuan, 8 ve bôte bevo’o be mbe be jô’ô na Élie a betaya so, bevo’o ke be jô’ô na, wua ya bekulu mejô ya melu mvus a wômôya miñwuan. 9 Nde Hérode a nga jô na: “Nga me nga tyi’i Jean nlô, môte mbé a bo beta be mame ma wô’ô ba?” Ane a nga jeñe zene ya yene nye.
10 Éyoñe minlômane mi nga bulan, nde mi nga kañete Yésus mame mese mi nga bo. Ane a nga nyoñe be a kee be tisone ba loone na Bethsaïda, vôme be ne tabe étam. 11 Ve éyoñe minsamba mi bôte mi nga yeme de, mi nga tôñe nye. Ane Yésus a nga nyoñe mie a mbamba nlem, a taté na a kate mie foé ya Éjôé Zambe, a saé minkôkon. 12 Ve éyoñe môs ô nga ke memane, minlôman Awôm a mibaé mi nga zu koone nye a jô nye na: “Jô’ô nsamba bôte na ô ke minlame minlam a vôm ô ne koone bidi a ne bebé a valé, ô ke jeñe vôme ya bômbô si a jôme ya di, amu teke nlam éziñ ô ne bebé a vôme bi ne nyi.” 13 Ve Yésus a nga jô be na: “Miabebiene va’ané be jôme ya di.” Nde be nga jô nye na: “Susu’a bidi bi bili va é ne fo’o ve belet étan a kos ébaé, nga ve biabebiene bia ke kuse jôme ya di asu bôte ba bese.” 14 Bôte be mbe valé be mbe fame bebé 5 000. Ve Yésus a nga jô beyé’é bé na: “Bo’ané na be tabe si minsamba minsamba, nsamba ôse bôte 50.” 15 Ane be nga bo nalé a toé bôte bese si. 16 Ane a nga nyoñe belet étan a kos ébaé, a bete mise yôp, a ye’elane Zambe. Mvuse ya valé, a nga be’e belet a taté na a ve beyé’é belet a kos; beyé’é ki, be nga kabe bie nsamba bôt. 17 Nde bese be nga di a jaé, a bifuse bi nga bu’u, be nga kôane bie a jalé bikat 12.
18 Mvuse ya valé, éyoñe Yésus a mbe a ye’elan étam, beyé’é bé be nga zu koone nye, nde a nga sili be na: “Minsamba mi bôte mia jô na me ne za?” 19 Ane be nga yalane nye na: “Jean Baptiste, ve bôte béziñe ba jô na ô ne Élie, bevo’o ke na ô ne nkulu mejô mfe ya melu mvus a nga wômô miñwuan.” 20 Nde a nga sili be na: “Mia ki mia jô na me ne za?” Pierre a nga yalane na: “Ô ne Krist Zambe.” 21 Nde a nga telé be étyi na, be bo teke kate môt éziñ ajô éte, 22 ve a nga kate be na: “Mona môt a yiane tôban abui minjuk a na bemvendé, bejôô beprêtre a bescribe ba ye bene nye a wôé nye, a mvuse melu melal a ye wômô.”
23 Ane a nga jô bese na: “Nge môt a kômbô tôñe ma, a nyumu’u émiene mam a be’e élé mintaé* jé môs ane môs, a ke ôsu a tôñe ma. 24 Amu nyu a kômbô kaman ényiñe* jé a ye sube je, ve nyu a sup ényiñe jé amu ma, nnye a ye beta bi je. 25 Nya ajôô a ne na, mfi ôvé môt a ne bi nge a mane bi si ése, ve a sube nge ndaman ényiñe jé? 26 Amu môt ase a ye wô’ô ma ôson a mejô mam, Mona môte fe a ye wô’ô môt ate ôson éyoñ a ye so étôto’o jé, a ji Ésa a beéngele be ne mimfufup. 27 Ve ma kate fo’o mia na, bôte béziñe be ne va, ba ye ke wu ôsusua na ba yen Éjôé Zambe.”
28 A nga bo na, bebé melu muam, éyoñ a maneya jô mejô mete, a nga nyoñe Pierre, Jean a Jacques a kee be nkôle na a ke ye’elan. 29 Nté a mbe a ye’elan, asu dé é nga tyendé a biyé bié bi nga faé a bo éfumulu ne fuum. 30 E teme na, bôte bebaé be mbe be tele valé be laan a nye; a mbe Moïse a Élie. 31 Bôte bete be mbe be faé, ane be nga taté na ba kobô ajô ya nkeane wé, ñwô ôte ô mbe na wo tôéban e Jérusalem. 32 Ôyo ô mbe ô bili Pierre a bôte be mbe a nye, ve éyoñe be nga kôme vee, be nga yene duma dé a bôte bebaé be mbe be tele a nye. 33 A éyoñe bôte bete be nga li’i Yésus, Pierre a nga jô nye na: “A Ñye’ele, a ne mvo’é amu bi ne va, nlôñané bibeme bilal, jia asu dôé, ji vok asu Moïse, ji vok asu Élie.” A nji be a yeme’e jôm ébien a mbe a jô’ô. 34 Ve nté a mbe a kobô’ô mejô mete, ane nkut ô nga sis, a ô nga taté na wo buti be. Éyoñe nkut ô maneya buti be, be nga ko woñ. 35 Ane tyiñ é nga so nkut été é jô’ô na: “Mone wome nyu, nyu me nga top. Vô’ôlané nye.” 36 Nté tyiñ é mbe é kobô’ô, Yésus a nga li’i étam. Beyé’é bé be nga tabe bivôl, be nga lôte tañe melu éziñe teke kañete môte mame be nga yen.
37 Tyé kpwaa, éyoñe be nga siliki be so’o nkôle yôp, ane beta nsamba bôt a nga zu tôbane Yésus. 38 E teme na, môt a nga bete tyiñe nsamba bôt été a jô’ô na: “A Ñye’ele, ma ye’elane wo, za’a fombô mona fame wom, amu susu’a mone me bili le. 39 Mbia nsisim a wô’ô bi nye, a été été mona fam a nga yôn, mbia nsisim a wô’ô su’u nye ngul abui a bo na avul é kui nye anyu; é wô’ô bo nya ayaé na a kôlô be nye, ve a su’ulane kôlô éyoñ a maneya balé nye meveñ. 40 Ma te ye’elane beyé’é bôé na be vaa nye, ve be nji kui na be bo de.” 41 Yésus a nga jô na: “A mvoñe bôt é ne teke mbunan, akekui éyoñ évé ma ye ke ôsu a nyiñ a mia a jibi mia? Za’a nyo mone va.” 42 Ve nté a mbe a subu’u nye bebé, mbia nsisim a nga wua nye tyia a su’usu nye ngul abui, ve Yésus a nga komekane mbia nsisim a saé mona fam, a kee nye ésa. 43 Bese be nga kame beta ngule Zambe.
Nté be mbe be kame’e mame mese a nga bo, a nga jô beyé’é bé na: 44 “Kôme’e vô’ôlané, a ba’ale jame di: ba zu kuane Mona môte mo me bôt.” 45 Ve be nji kôme wô’ô jam a mbe a jô’ô, amu jam éte é mbe be nsolane na be bo teke de wôk, be nga ko woñe ya sili nye jam éte.
46 Nde be nga sañetane be be na, be yeme za ya be be a dañe ba bevok. 47 Mbôle Yésus a mbe a yeme’e jame be mbe be simesa’an, a nga nyoñe mone mongô a telé nye fefele jé, 48 a nga jô be na: “Nyu ase a yeme nyoñe mone mongô nyu, amu jôé dam a nyoñe fe ma, a nyu ase a nyoñe ma a nji nyoñe fo’o ve ma étam, a nyoñe fe Nyu a nga lôme ma. Amu môt ase a sili émiene si e zañe jenan, nnye a dañe ba bevok.”
49 Jean a nga jô nye na: “A Ñye’ele, bi nga yene môt éziñ a vaa mbia minsisim a bela’ane jôé dôé. Amu a nji bo nsamba wua a bia, bi nga jeñe na bia dibe nye zene na a bo teke de beta bo.” 50 Ve Yésus a nga jô nye na: “Te mia jeñe na, mi dibe nye zen, amu nyu ase a nji wosane mia a ne ngame jenan.”
51 A nga bo na, éyoñe melu a mbe na a ke yôbe me nga bo bebé,* a mbe a nyoñeya ntyi’ane* na, a ke ve Jérusalem. 52 A nga lôme bôt ôsu wé, a be nga ke nyiine nlame bôte ya Samarie na be bo ngômesan asu dé. 53 Ve be nji nyoñe nye mvo’é amu nleme wé ôse ô be ve na a ke* Jérusalem. 54 Éyoñe beyé’é bé, Jacques a Jean be nga yene jam éte, be nga jô na: “A Ñye’ele ye wo yi na bi loone nduan é so yôp, a mane zu jiane be si?” 55 Ve a nga kôñelane mfa’a be mbe a komekane be. 56 Ane be nga ke nlam ôfe.
57 Nté be mbe be kele’e zen, môt éziñ a nga jô nye na: “Ma ye tôñe wo vôm ase wo ye ke.” 58 Ve Yésus a nga jô nye na: “Bemvak ba nyiñe mimbase mekok été, anone ya yôbe ki da nyiñe mumba’a été, ve Mona môt a nji bi vôme ya beté nlô wé.” 59 Nde a nga jô môte mfe na: “Za’a bo ñyé’é wom.” Môt a nga yalane na: “A Tate, kañese’e na me taté ke jam ésa wom.” 60 Ve a nga jô nye na: “Jôké’é mimbime mi jame mimbime miap, ve wo, kele’e kañete foé ya Éjôé Zambe.” 61 A môte mfe a nga jô na: “A Tate, ma ye tôñe wo, ve taté’é kañese na me ke ya’ane nda bôte jam.” 62 Yésus a nga jô nye na: “Môt a futi wo minsini ba fa’a nye si* a beta fombô biôme bi ne nye mvus, a se ke môt a yiane nyoñe ngap Éjôé Zambe.”