MWBR21 01 Laif ahn Minischri Meetin Werkbuk Risaach Infamayshan
JANIWERI 4-10
CHREZHAZ FAHN DI WERD A GAAD | LEVITICUS 18-19
“Stay Moarali Kleen”
How fi Protek Wiself Fahn Wan a Saytan Chrap
Jehoava mi menshan di imoaral tingz weh di nayshanz rong Izrel mi-di du, den ih tel dehn: “Yu noh fi du weh dehn du eena di lan a Kaynan, wehpaat Ai di bring yoo. . . . Di lan doti, an Ai wahn ponish evribadi deh fi weh dehn du.” Tu di hoali Gaad a Izrel, di Kaynanait dehn way a laif mi soh disgostin an imoaral dat hihn mi vyoo di lan wehpaat dehn mi-di liv az doti ahn korop.—Lev. 18:3, 25.
w17.02 20 ¶13
Jehoava Leed Ih Peepl
13 Di faytful king dehn mi difrent fahn di leedaz a di ada nayshan dehn. Dehndeh leedaz neva plan heda taim fi di fyoocha, ahn dehn mi mek hyooman wizdom gaid dehn. Anda di roolaship a di Kaynanait dehn, peepl mi praktis tingz weh Jehoava hayt. Dehn mi ga sekshwal rilayshanz wid wahn kloas famili memba, wid wahn persn a di saym seks, ahn wid wahn animal. Dehn mi sakrifais dehn chiljren ahn dehn mi aalso praktis disgostin aidol wership. (Lev. 18:6, 21-25) Pahn tap a dat, di Babiloanyan ahn di Eejipshan leeda dehn neva fala di laa a kleenis weh Jehoava mi gi tu di Izrelait dehn. (Num. 19:13) Bot Gaad peepl mi difrent. Dehn mi si how fi dehn faytful leedaz mi set di egzampl pahn how fi bee spirichwali, moarali, ahn fizikali kleen. Ih klyaa fi si dat Jehoava mi-di leed ih peepl.
w14 7/1 7 ¶2
Weh Gaad Wahn Du Bowt Badnis
Weh wahn hapm tu peepl weh noh waahn stap praktis bad tingz ahn chaynj dehn wayz? Tink bowt dis pramis weh Jehoava gi wi: “Onli di wan dehn weh raichos wahn liv pahn di ert, ahn di wan dehn weh aalwayz faytful wahn stay pahn di ert. Bot az fi di wikid wan dehn, dehn wahn geh dischrai, ahn di chrayta dehn wahn geh dischrai tu.” (Proverbs 2:21, 22) Peepl weh praktis wikidnis ahn weh chrai mek adaz du bad tingz noh wahn egzis nohmoh. Joorin da peesful taim, hyoomanz weh obay Jehoava wahn get fi bee perfek lee bit bai lee bit.—Roamanz 6:17, 18; 8:21.
Spirichwal Chrezhaz
w06 6/15 22 ¶11
“Ai Reeli Lov Yu Laa!”
11 Wahn nada paat a di Laa weh Gaad mi gi Moaziz mi shoa dat Gaad kay bowt ih peepl. Dis da di paat weh seh dat di Izrelait dehn kuda mi kalek op eni grayn weh mi lef oava. Jehoava mi seh dat afta di Izrelait dehn mi reep di froot fahn dehn feel, dehn mi fi alow peepl weh mi poa fi kalek op eniting weh mi lef oava. Di Izrelait dehn neva fi reep evriting fahn aafa di ej a dehn feel, ahn dehn neva fi kalek op eni grayp er aliv weh mi lef oava. If wahn Izrelait mi ferget wahn bondl a grayn eena di feel, ih neva fi goh bak ahn kalek it op. Dis da-mi wahn lovin araynjment weh Jehoava mi mek fi di poa peepl dehn, di farina dehn, di pikni dehn weh neva ga no ma ahn pa, ahn di uman dehn weh neva ga wahn hozban. If eni a di Izrelait dehn mi waahn kalek op weh mi lef oava, dehn mi haftu werk haad. Bot if dehn mi du dat, dehn noh mi wahn haftu bayg enibadi fi food.—Leviticus 19:9, 10; Deuteronomy 24:19-22; Psalm 37:25.
JANIWERI 11-17
CHREZHAZ FAHN DI WERD A GAAD | LEVITICUS 20-21
“Jehoava Mek Ih Peepl Dehn Bee Difrent Fahn Ada Peepl”
w04 10/15 11 ¶12
Weh Paradais Meen fi Yoo?
12 Bot dehn ga sohnting weh wi need fi pay atenshan tu. Gaad mi tel di Izrelait dehn: “Unu fi kip aala di komanment weh Ai di koman unu tudeh, soh dat unu ku geh powaful an enta di lan ahn kanka it.” (Deuteronomy 11:8) Leviticus 20:22, 24 menshan da sayhn lan. Ih seh: “Unu fi kip mi komanment dehn ahn mi laa dehn ahn du weh Ah seh, soh dat di peepl fahn di lan wehpaat Ah di bring unu fi liv noh chroa unu owt. Dat da wai Ah mi tel unu: ‘Unu wahn kanka dis lan, an Ai wahn giv it tu unu az sohnting weh bilangz tu unu. Da wahn lan weh di floa wid milk ahn honi.ʼ” Di Izrelait dehn onli kuda mi kanka di lan if dehn mi ga wahn gud rilayshanship wid Jehoava Gaad. Bot bikaaz di Izrelait dehn neva obay Jehoava, hihn mi alow di Babiloanyan dehn fi kanchroal di Izrelait dehn ahn chroa dehn owta di lan wehpaat dehn mi liv.
it-1 1199
Inheritans
Dis di rifaa tu sohnting weh sombadi oan weh ih famili fi get afta ih ded. Di mayn Heebroo verb weh dehn yooz da na·chalʹ (noun, na·chalahʹ). Dis da wen dehn paas dong wahn inheritans tu sombadi er wen dehn paas dong wahn pozishan tu sombadi weh wahn tek dehn plays. (Nu 26:55; Eze 46:18) Dehn yooz di verb ya·rashʹ fi eksplayn wen wahn persn tek oava wahn nada persn pozishan, eeda bikaaz da pozishan geh paas dong tu ahn, er di persn mi tek it oava bikaaz di oana bifoa hihn ded. (Ge 15:3; Le 20:24) Dis Heebroo werd ku aalso meen dat wahn groop a peepl weh aaganaiz laik wahn aami “jraiv owt” er “kanka” sohnting. (De 2:12; 31:3) Di Greek werd weh dehn yooz fi di werd inheritans simila tu di werd kleʹros. Dis werd mi fers meen “lat” den afta dat ih mi meen “shayr” ahn den fainali ih meen “inheritans.”—Ma 27:35; Ak 1:17; 26:18.
it-1 317 ¶2
Di Berd Dehn
Afta di Flod, Noawa mi aafa op sohn kleen berd lang wid sohn ada animal az wahn sakrifais. (Ge 8:18-20) Afta dat, Jehoava mi alow hyoomanz fi eet difrent kaina berd, az lang az dehn neva eet di blod. (Ge 9:1-4; kompyaa Le 7:26; 17:13.) Joorin da taim, if wahn berd mi ‘kleen,ʼ dehn neva mi wahn noa anles Jehoava mi mek dehn noa eena som way dat Hihn mi wahn aksep it az wahn sakrifais. Ahn da neva til di Izrelait dehn mi get di Laa weh Gaad mi gi Moaziz dat dehn mi noa wich berd dehn kuda mi eet ahn wich berd dehn kudn eet bikaaz ih “neva kleen.” (Le 11:13-19, 46, 47; 20:25; De 14:11-20) Di Baibl noh menshan notn weh shoa wai wahn berd neva kleen. Moas a di berd dehn weh neva kleen da-mi berd weh hont an eet ada animalz, bot noh aala dehn mi du dat. (Si HOOPOA.) Wen Jehoava mi set op di nyoo kovenant, peepl neva deh anda di Laa weh Gaad mi gi Moaziz nohmoh, an afta dat aal animalz mi kleen. Wi ku si proof a dis fahn di vizhan weh Jehoava mi gi Peeta.—Ak 10:9-15.
Spirichwal Chrezhaz
it-1 563
Kot
Gaad Laa neva alow di Izrelait dehn fi kot dehn badi fi pleez ded peepl. (Le 19:28; 21:5; De 14:1) Di reezn wai dehn neva fi du dis da bikaaz dehn da-mi wahn hoali peepl tu Jehoava, wahn speshal prapati. (De 14:2) Soh di Izrelait dehn mi fi stay weh fahn eni kaina praktis weh ga fi du wid aidol wership. Soh wen wahn persn fahn di nayshan a Izrel mi ded, di Izrelait dehn neva fi bee soh sad dat dehn en op di kot dehnself, bikaaz dehn mi noa weh hapm tu sombadi weh mi ded, ahn dehn mi noa bowt di rezorekshan hoap. (Da 12:13; Hee 11:19) Wen di Izrelait dehn mi fala di Laa weh seh dat dehn neva fi kot dehnself, dehn mi shoa dat dehn mi ga rispek fi di hyooman badi weh Jehoava kriyayt.
JANIWERI 18-24
CHREZHAZ FAHN DI WERD A GAAD | LEVITICUS 22-23
“Weh di Festival Dehn Weh di Izrelait Dehn Yoostu Ga Meen fi Wee?”
it-1 826-827
Di Festival a di Bred Widowt Ees
Di fers day a di Festival a di Bred Widowt Ees da-mi wahn hoali asembli ahn wahn sabat. Pahn di sekant day, Nisan 16, dehn mi kehr wahn bondl a di fersfroot a di baali haavis tu di prees. Baali da-mi di fers krap fi geh raip da Palistain. Bifoa dis festival, di Izrelait dehn kudn eet no nyoo grayn, bred, er grayn weh roas fahn di nyoo haavis. Eena wahn simbolik way, di prees mi aafa op di fersfroot tu Jehoava wen ih mi wayv di wayv aafrin bak ahn foat. Di prees mi aalso aafa op wahn helti wan yaa oal ram az wahn aafrin weh geh bon wid faiya lang wid wahn grayn aafrin wid ail ahn wahn jrink aafrin. (Le 23:6-14) Jehoava neva gi no koman fi bon di grayn er di flowa pahn di alta, laik weh di prees dehn mi du laytaraan. Di peepl neva onli kuda mi aafa op dehnya fersfroot, bot joorin dehnya okayzhan dehn mi ga wahn araynjment fi mek eech famili an eech persn weh mi ga mateeryal tingz aafa wahn sakrifais fi shoa dat dehn mi tankful.—Ex 23:19; De 26:1, 2; si FERSFROOT.
Wai di Bred Widowt Ees Mi Impoatant. Wen di Izrelait dehn mi eet bred widowt ees, dehn mi-di fala di inschrokshanz weh Jehoava mi gi Moaziz. Wi ku fain dehnya inschrokshan da Exodus 12:14-20, ahn vers 19 gat een wahn schrik inschrokshan weh seh: “Fi sevn dayz unu noh fi ga no doa weh mi lef fi ferment eena unu hows.” Da Deuteronomy 16:3 wahn nada naym fi di bred widowt ees da ‘di bred weh rimain dehn a dehn sofarin.ʼ Evri yaa dis mi rimain di Jooz dat dehn mi lef Eejip eena wahn hori (wen dehn neva ga taim fi put ees eena dehn doa [Ex 12:34]). Dehn mi rimemba di taim wen dehn mi-di sofa eena di lan a Eejip bifoa Jehoava mi sayv dehn. Jehoava ihself mi seh, “Unu fi du dis fi az lang az unu liv, fi memba di day wen unu mi kom owta di lan a Eejip.” Di fers festival weh di Izrelait dehn mi gat mi reeli amayzin bikaaz dehn mi riyalaiz dat dehn mi-di injai freedom fahn slayvri. Dehn mi aalso riyalaiz dat aala dat da-mi tanks tu Jehoava.—De 16:16.
it-2 598 ¶2
Pentikaas
Di Izrelait dehn mi fi chreet di fersfroot fahn di weet haavis difrent fahn di fersfroot fahn di baali. Dehn mi fi yooz too tent a wahn eefa a fain weet flowa (4.4 L; 4 jrai kwaat) lang wid sohn ees fi bayk too loaf a bred. Dehnya bred mi fi bee fahn “owta di Izrelait dehn hows;” bred weh dehn mi bayk fi dehnself evriday ahn weh dehn neva yooz fi wahn hoali okayzhan. (Le 23:17) Dehn mi aalso aafa op wahn aafrin weh bon wid faiya ahn wahn sin aafrin lang wid too mayl lam fi wahn kamyoonyan sakrifais. Di prees mi put ih han andaneet di loaf a bred ahn di pees a di lam, an ih mi wayv di wayv aafrin bak ahn foat fronta Jehoava. Dis mi shoa dat di prees mi-di aafa op di aafrin fronta Jehoava. Afta di prees mi aafa op di loaf dehn ahn di lam dehn, hihn kuda mi eet dehn az wahn kamyoonyan sakrifais.—Le 23:18-20.
w14 5/15 29 ¶11
Yoo di Moov Faawod Wid Jehoava Aaganaizayshan?
11 Di apasl Paal mi inkorij wi fi fala dis kongsl: “Ahn mek wi tink bowt wan anada soh dat wi ku inkorij wan anada fi shoa lov ahn du gud werk. Bradaz, som a wi ga di kostom fi niglek wi meetin dehn, bot noh mek wi du dat. Insteda dat, mek wi gi moa inkorijment tu wan anada, ahn du aala dehnya tingz moa ahn moa sins wi noa dat di day di jraa kloasa.” (Hee. 10:24, 25) Dis shoa dat Jehoava aaganaizayshan noa weh bes fi wi. Di festival dehn weh di Izrelait dehn mi ga evri yaa fi wership Jehoava mi help dehn jraa kloasa tu ahn. Pahn tap a dat, di festival dehn laik di speshal Festival a Tents eena Nehimaiya day da-mi wahn taim wen evribadi mi hapi. (Ex. 23:15, 16; Neh. 8:9-18) Wee benifit eena wahn simila way fahn wi meetin dehn, wi asembli dehn, ahn wi kanvenshan dehn. Fi mek wi bee hapi mek wi yooz evri apachooniti weh Jehoava provaid fi wi fi bil op wi spirichwal helt.—Taitos 2:2.
Spirichwal Chrezhaz
Stay Laayal!
3 Fi wee az Gaad servants, laayalti meenz dat wi lov Jehoava wid aala wi haat ahn notn kyaahn kohn bitween wee ahn hihn, ahn bikaaz a dat, wi aalwayz du weh pleez hihn. Kansida how di Baibl yooz di werd laayalti. Di werd weh wi wuda chranslayt az “faytful” er “laayal” ku aalso meen kompleet, er helti. Fi egzampl, wen di Izrelait dehn mi aafa op wahn animal az wahn sakrifais tu Jehoava, di Laa mi seh dat di animal haftu bee helti. (Lev. 22:21, 22) Gaad peepl dehn neva sopoas tu aafa op wahn animal weh mi misn wahn fut, wahn ayz, er wahn aiy, ner dehn neva fi aafa op wan weh mi sik. Tu Jehoava, ih mi veri impoatant dat dehn onli aafa op wahn animal weh mi kompleet, er helti. (Mal. 1:6-9) Ahn wee ku andastan wai Jehoava kay soh moch bowt dat. Wen wee bai sohnting, noh mata da wat, wi noh waahn notn weh noh di werk er weh ga pees misn. Wi waahn sohnting weh kompleet an eena gud kandishan. Jehoava feel di sayhn way bowt fi wee lov ahn laayalti. Ih haftu bee kompleet.
JANIWERI 25-31
CHREZHAZ FAHN DI WERD A GAAD | LEVITICUS 24-25
“Di Joobilee Yaa ahn di Freedom Weh Ih Wahn Bring Eena di Fyoocha”
it-1 871
Freedom
Di Gaad a Freedom. Jehoava da di Gaad a freedom. Hihn mi free di nayshan a Izrel fahn slayvri da Eejip. Hihn mi tel dehn dat az lang az dehn mi obay fi hihn komanment dehn, dehn mi wahn ga evriting weh dehn need. (De 15:4, 5) Bot di Laa mi seh dat if wahn man mi poa, hihn kuda mi sel ihself intu slayvri soh dat hihn kuda mi provaid weh hihn an ih famili need. Di Laa mi aalso seh dat if wahn Izrelait mi bai wahn Heebroo slayv, hihn onli mi wahn bee wahn slayv fi siks yaaz, den eena di sevent yaa hihn mi wahn bee free widowt haftu pay eniting. (Ex 21:2) Joorin di Joobilee yaa (weh mi hapm evri 50 yaaz), evribadi eena di lan mi ga freedom. Soh aala di Heebroo slayv mi free fi goh bak da dehn oan lan.—Le 25:10-19.
it-1 1200 ¶2
Inheritans
Sins di saym famili mi oan whan pees a lan fahn jenarayshan tu jenarayshan, di Izrelait dehn kudn sel dehn lan fi moni. Soh if wahn persn mi wahn bai wahn pees a lan, di oana kudn sel di lan tu ahn; ih wuda onli rent it owt ahn chaaj ahn bays pahn di valyu a di froots ahn vejitablz weh di lan projoos. Oava di yaaz di prais wuda eeda goh op er dong, bot wen da mi di Joobilee yaa eni lan weh di oana mi rent owt wuda mi goh bak tu ahn sins hihn da-mi di orijinal oana. (Le 25:13, 15, 23, 24) Dis laa mi aalso aplai tu di hows dehn weh mi deh eena wahn siti weh neva ga wahn waal di sorong it, bikaaz di Izrelait dehn mi kansida dehndeh hows fi bee paat a di oapm feel. Bot if wahn persn mi bai wahn hows weh deh eena wahn siti wid wahn waal di sorong it, ahn wahn yaa neva paas yet, di oana kuda mi bai bak di hows. Bot if wahn yaa mi paas, den di hows mi wahn bilangz tu di nyoo oana. Wen ih kohn tu di hows dehn eena di Leevait siti dehn, wahn persn kuda mi bai bak wahn hows enitaim bikaaz di Leevait dehn neva inherit no lan.—Le 25:29-34.
it-2 122-123
Joobilee
Nowadayz dehn ga too groop a peepl: peepl weh rich ahn peepl weh poa. Wen di Izrelait dehn mi obay di Joobilee laa, dat mi help dehn fi noh bee reeli rich er reeli poa. Sins evribadi mi wahn benifit fahn di Joobilee yaa, dis mi wahn schrentn di nayshan. Nobadi mi wahn bee rich er poa. Dehn mi wahn injai di saym tingz ahn dehn mi wahn ku yooz dehn talent an abiliti fi help wan anada. Di onli way di nayshan a Izrel kuda mi injai aala dis da-mi if dehn mi obay Jehoava, bikaaz hihn da di wan weh mi teech dehn ahn gi dehn weh dehn need. Dehn mi wahn praspa an injai wahn perfek govament weh onli di chroo Gaad ku provaid.—Isa 33:22.
Spirichwal Chrezhaz
w09 9/1 22 ¶4
Wen Sombadi Ofen Yu
If wahn Izrelait mi atak wahn nada Izrelait an ih mi hert di persn aiy, di Laa mi seh dat di wan weh mi atak ahn fi geh ponish. Bot ih neva op tu di persn weh mi geh hert fi ponish di neks wan er ih famili membaz. Di Laa mi seh dat dehn mi haftu tek di mata tu di joj dehn weh Jehoava mi apoint fi mek dehn disiplin di persn eena di prapa way. If sombadi mi waahn hert wahn nada persn, hihn mi noa dat hihn kuda mi geh ponish fi dat, ahn dat wuda mi stap ahn fahn du sohnting bad tu di persn weh ih waahn hert. Bot dat da noh aal.
FEBIWERI 1-7
CHREZHAZ FAHN DI WERD A GAAD | LEVITICUS 26-27
“How fi Geh Blesinz Fahn Jehoava”
w08 4/15 4 ¶8
Stay Weh Fahn “Tingz Weh Noh Ga Valyu”
8 How “Mateeryal tingz” ku bee laik wahn Gaad tu peepl? Wel, az wahn egzampl, tink bowt wahn stoan weh deh pahn di grong eena wahn feel joorin di taim a di Izrelait dehn. Wahn persn kuda mi yooz da stoan fi bil wahn hows er wahn waal. Bot if ih mi set it op az wahn “hoali pila” er az “sohnting weh adaz mi vyoo az wahn gaad,” dat mi wahn stombl Jehoava peepl. (Lev. 26:1) Eena wahn simila way, moni ga ih prapa plays. Wi need it fi servaiv, ahn wi ku yooz it fi help wi eena Jehoava servis. (Eccl. 7:12; Look 16:9) Bot if wi put moni fers eena wi laif, ahn wi noh foakos pahn Jehoava servis, moni ku bee laik wahn gaad tu wee. (Reed 1 Timoti 6:9, 10.) Eena dis werl, lata peepl foakos pahn how fi bee rich, soh wi need fi ga wahn balans vyoo wen ih kohn tu moni.—1 Tim. 6:17-19.
it-1 223 ¶3
Deep Rispek
Bikaaz a di way how Jehoava mi yooz Moaziz ahn deel wid ahn, Moaziz mi du sohn amayzin tingz fronta Gaad peepl. (Hee., moh·raʼʹ). (De 34:10, 12; Ex 19:9) Di Izrelait dehn weh mi ga fayt mi ga deep rispek fi di atariti weh Moaziz mi ga. Dehn mi riyalaiz dat Gaad mi taak tu dehn chroo Moaziz. Wen ih kohn tu Jehoava tabernakl, di Izrelait dehn mi haftu ga deep rispek far it tu. (Le 19:30; 26:2) Soh wen dehn mi wership Jehoava, dehn mi wahn du it eena di way weh hihn tel dehn fi wership ahn, an dehn mi wahn fala aala fi hihn komanment dehn.
w91 3/1 17 ¶10
Mek di Pees Fahn Gaad Protek Yu Haat
10 Jehoava mi tel di nayshan a Izrel: “If unu kantinyu fala mi inschrokshan dehn ahn kip mi komanment dehn ahn du evriting weh Ah seh, Ah wahn giv unu rayn da di prapa taim, ahn di lan wahn projoos food fi unu, ahn di chree a di feel wahn byaa froot fi unu. An unu wahn ga pees eena di lan an unu noh wahn wori bowt enibadi di atak unu; an Ai wahn deh monks unu, an Ah wahn proov dat Ai da unu Gaad an unu wahn proov dat unu da mai peepl.” (Leviticus 26:3, 4, 6, 12) Izrel kuda mi injai pees bikaaz dehn enimi noh mi wahn atak dehn. Dehn mi wahn ga evriting weh dehn need, ahn dehn mi wahn ga wahn kloas rilayshanship wid Jehoava. Bot dat wuda onli bee pasabl if dehn mi obay Jehoava Laa.—Psalm 119:165.
Spirichwal Chrezhaz
it-2 617
Siknis ahn Dizeez
Wen Gaad Peepl Neva Obay Ih Laa. Jehoava mi waan di nayshan a Izrel dat if dehn neva obay fi hihn laa, hihn mi wahn ponish dehn wid dizeez ahn siknis. (Le 26:14-16, 23-25; De 28:15, 21, 22) Eena di Skripchaz, sombadi helt, eeda spirichwal helt er fizikal helt, mi dipen pahn di blesinz weh dehn mi geh fahn Jehoava. (De 7:12, 15; Ps 103:1-3; Pr 3:1, 2, 7, 8; 4:21, 22; Re 21:1-4) Bot if sombadi mi kech wahn dizeez da mi sayka sin an imperfekshan. (Ex 15:26; De 28:58-61; Isa 53:4, 5; Mach 9:2-6, 12; Jan 5:14) Bot eena sertn sichuwayshan, Jehoava ihself mi ponish sohn peepl wid dizeez, fi egzampl, hihn mi ponish Miriyam, Yuzaiya, ahn Gehayzai wid leprosi. (Nu 12:10; 2Ch 26:16-21; 2Ki 5:25-27) Moas a di taim, di reezn wai siknis ahn dizeez mi deh da-mi bikaaz wahn persn er wahn nayshan sin. Dehn mi reep weh dehn soa; dehn mi sofa sayka dehn mi sin. (Ga 6:7, 8) Wen ih kohn tu peepl weh praktis sekshwal imoraliti, di apasl Paal seh dat “Gaad lef dehn loan mek dehn du aal kaina doti tingz weh bring shaym pahn dehn oan badi. . . . Sayka dat, dehn geh di ponishment weh dehn dizerv eena dehn oan badi.”—Ro 1:24-27.
FEBIWERI 8-14
CHREZHAZ FAHN DI WERD A GAAD | NUMBERS 1-2
“How Jehoava Aaganaiz Ih Peepl”
w94 12/1 9 ¶4
How Impoatant Jehoava Wership Haftu Bee Eena Wi Laif
4 If yoo mi deh pahn tap a wahn hai mongtin di luk dong pahn how di Izrelait kyamp mi set op eena di wildanes, weh yu mi wahn si? Yu mi wahn si bowt chree milyan er moa peepl ahn wahn lata tent weh mi set op eena wahn aaganaiz way. Yu mi wahn si wahn groop a peepl weh divaid op intu chree chraib. Som mi liv da di naat, som mi liv da di sowt, som mi liv da di ees, ahn som mi liv da di wes. Wen yu luk kloasa, yu wuda si wahn nada groop a peepl weh deh kloas tu di midl a di kyamp. Dehndeh foa smaal groop a tent weh yu wuda si da weh di famili fahn di chraib a Leevai mi liv. Ahn da di midl a di kyamp wahn big klaat mi separayt sohnting speshal. Dat da-mi di “tent a meetin,” er tabernakl, weh som a di Izrelait man dehn mi bil akaadn tu Jehoava inschrokshan.—Numbers 1:52, 53; 2:3, 10, 17, 18, 25; Exodus 35:10.
it-1 397 ¶4
Kyamp
Izrel kyamp mi veri big. Di toatal amonk a peepl eena di kyamp da-mi bowt 603,550 soalja, lang wid sohn uman ahn chiljren, oal peepl ahn sohn ada peepl weh mi kripl er kyaahn moov how dehn waahn. Sohn farina mi aalso liv eena di kyamp ahn 22,000 Leevait mi liv eena di kyamp tu. Aal tugeda, bowt 3,000,000 er moa peepl mi liv eena di kyamp. (Ex 12:38, 44; Nu 3:21-34, 39) Lata peepl ga difrent aidyaaz bowt humoch lan dis kyamp wuda tek op, bot wi noh noa fi shoar. Wen di kyamp mi deh pahn di ada said a Jeriko da Moab, di Skripcha seh dat dehn mi kova “fahn Beth-jeshimoth to Abel-shittim.”—Nu 33:49.
Spirichwal Chrezhaz
it-2 764
Rejischrayshan
Dis di rifaa tu wahn lis a naym akaadn tu di chraib a di peepl weh liv eena wahn hows. Dehn mi fi du moa dan jos konk di amonk a peepl weh mi liv deh. Di rejischrayshan weh mi tek plays eena Baibl taimz mi serv fi difrent perpos, laik fi pay taks, fi asain di soalja dehn, er (eena di kays a di Leevait dehn) fi apoint dehn fi tek op sertn rispansabiliti eena di tabernakl.
FEBIWERI 15-21
CHREZHAZ FAHN DI WERD A GAAD | NUMBERS 3-4
“Di Werk Weh di Leevait Dehn Mi Du”
it-2 683 ¶3
Prees
Anda di Laa Kovenant. Wen di Izrelait dehn da-mi slayv da Eejip, Jehoava mi set wan said di fersbaan son dehn a Izrel fi ihself rong di taim wen hihn mi dischrai di fersbaan son dehn a Eejip wid di tent playg. (Ex 12:29; Nu 3:13) Dehnya fersbaan son mi bilang tu Jehoava, bikaaz hihn mi gi dehn wahn speshal asainment fi du. Gaad kuda mi asain dehnya fersbaan son a Izrel fi bee prees ahn fi tek kayr a di tabernakl. Insteda dat, hihn mi yooz di mayl son dehn a di chraib a Leevai fi du dis speshal asainment. Bikaaz a dis, Jehoava mi alow di mayl Leevait dehn fi tek di plays a di fersbaan mayl dehn a di ada 12 chraib (dehn mi konk Joazef too son, Ifrayim ahn Manaaseh, az too chraib). Wen dehn mi rejista evribadi eena di nayshan a Izrel, dehn mi konk di mayl dehn weh da neva Leevait weh mi bowt wan mont oal an oalda, ahn dehn mi konk di mayl dehn weh da Leevait. Dehn mi fain owt dat dehn mi ga 273 moa fersbaan mayl weh da neva Leevait. Soh Gaad mi seh dat di peepl dehn mi haftu pay faiv shekl ($11) az wahn ransom prais fi eech a di 273 mayl dehn weh da neva Leevait. Dehn mi fi gi di moni tu Ayron an ih son dehn. (Nu 3:11-16, 40-51) Bifoa dehn mi du aala dis, Jehoava mi don set apaat di mayl membaz a Ayron famili fahn di chraib a Leevai fi mek dehn bee di prees dehn a Izrel.—Nu 1:1; 3:6-10.
it-2 241
Di Leevait Dehn
Rispansabiliti Dehn. Di Leevait dehn mi mek op owta chree famili fahn Leevai son dehn Gershon (Gershom), Koahat, ahn Merayrai. (Ge 46:11; 1Ch 6:1, 16) Eena di wildanes, Jehoava mi asain eech wan a di famili dehn wahn plays kloas tu di tabernakl. Di Koahatait dehn fahn Ayron famili mi kyamp fronta di tabernakl tuwaadz di ees. Di ada Koahatait dehn mi kyamp tuwaadz di sowt. Di Gershonait dehn mi kyamp tuwaadz di wes, ahn di Merayrait dehn mi kyamp tuwaadz di naat. (Nu 3:23, 29, 35, 38) Di Leevait dehn mi ga di rispansabiliti fi kehr di tabernakl, tek it dong, ahn set it op bak. Wen da mi taim fi moov di tabernakl, Ayron an ih son dehn mi tek dong di kertn weh mi separayt di Hoali fahn di Moas Hoali ahn dehn mi kova di aak a di testimoni, di alta dehn, ahn di ada hoali ting dehn. Di Kohatait dehn mi kehr aala dehnya ting. Di Gershonait dehn yoostu moov di klaat ahn kovarin fi di tabernakl, di skreen dehn, di klaat dehn fahn di koatyaad, ahn di roap dehn weh dehn mi yooz fi put op di tabernakl. Di Merayrait dehn yoostu tek kayr a di panel dehn fi di tabernakl, di poas dehn, di fut dehn fi di panel, ahn di roap ahn pin dehn weh dehn mi yooz fi put op di fens rong di tabernakl.—Nu 1:50, 51; 3:25, 26, 30, 31, 36, 37; 4:4-33; 7:5-9.
it-2 241
Di Leevait Dehn
Eena Moaziz taim da neva til wahn Leevait mi tern 30 yaaz oal dat hihn kuda mi tek op ih ful asainment ahn hoal di tabernakl ahn di tingz weh eena di tabernakl wen dehn mi-di moov it. (Nu 4:46-49) Wen wahn Leevait mi 25 yaaz oal hihn kuda mi tek op sertn rispansabiliti, bot hihn kudn du haad werk, laik kehr di tabernakl. (Nu 8:24) Eena King Dayvid taim di Leevait dehn kuda mi help owt fahn dehn mi 20 yaaz oal. Dayvid mi eksplayn dat di Leevait dehn noh mi wahn haftu moov di tabernakl agen (bikaaz dis mi wahn bee di templ). Wen wahn Leevait mi tern 50 yaaz oal, ih asainment mi finish. (Nu 8:25, 26; 1Ch 23:24-26; si AYJ.) Di Leevait dehn mi haftu noa di Laa gud. Lata taimz dehn mi haftu reed it owt load ahn teech it tu di ada peepl.—1Ch 15:27; 2Ch 5:12; 17:7-9; Ne 8:7-9.
Spirichwal Chrezhaz
w06 8/1 23 ¶13
Bee Waiz—Ga Deep Rispek Fi Gaad!
13 Wen Dayvid mi-di goh chroo wahn haad taim eena ih laif, hihn mi pen pahn Jehoava ahn hihn mi si how Jehoava tek kayr a ahn. Dat mi mek Dayvid ga deep rispek fi Gaad an ih mi chros ahn moa. (Psalm 31:22-24) Eena chree sichuwayshan, Dayvid neva tek Jehoava araynjment seeryos ahn hihn mi sofa bikaaz a dat. Di fers taim Dayvid neva tek Jehoava araynjment seeryos da wen hihn mi gi di koman fi mek dehn kehr di Aak a Jehoava kovenant pahn wahn wagan. Bot Gaad Laa mi seh dat di Leevait dehn mi fi kehr it pahn dehn shoalda. Bot Dayvid neva fala weh di Laa seh, soh wen di Aak a di kovenant mi-di luk fi jrap, Oza, di wan weh mi di leed di wagan, mi reech owt fi chrai hoal it op. Hihn mi ded pahn di spat bikaaz hihn mi “disrispek” Jehoava. Yes, Oza mi komit wahn seeryos sin, bot di hoal ting da-mi Dayvid faalt bikaaz hihn neva ga rispek fi Gaad Laa ahn dat da wai da sad sichuwayshan mi hapm. Fi ga deep rispek fi Gaad meenz dat wi wahn du tingz di way how hihn tel wi fi du it.—2 Samuel 6:2-9; Numbers 4:15; 7:9.
FEBIWERI 22-28
CHREZHAZ FAHN DI WERD A GAAD | NUMBERS 5-6
“Weh Wi Ku Laan Fahn di Nazarait Dehn Egzampl?”
it-2 477
Nazarait
Di man dehn weh mi mek wahn vow fi bee wahn Nazarait neva fi du chree tingz: (1) Dehn neva fi jrink eni kaina lika weh mi wahn mek dehn geh jronk, ahn dehn neva fi eet eniting aafa di grayp vain, weda ih mi green, raip er jrai, ahn dehn neva fi jrink di grayp joos weda ih mi ferment, ih mi fresh, er if ih mi luk laik vineega. (2) Dehn neva fi kot dehn hyaa. (3) Dehn neva fi toch wahn ded badi eevn if da mi wan a dehn kloas famili memba, laik dehn pa, dehn ma, dehn breda, er dehn sista.—Nu 6:1-7.
Speshal Vow. Di persn weh mi mek dis speshal vow mi fi “liv dehn laif az wahn Nazarait [weh meen dehn onli mi wahn werk] fi Jehoava.” Dehn noh mi wahn du dis werk fi geh prayz fahn ada man ahn dehn noh mi wahn du tingz fi pleez dehnself. Insted, “joorin di yaaz wen hihn serv az wahn Nazarait, hihn hoali tu Jehoava.”—Nu 6:2, 8; kompyaa Ge 49:26, ftn.
Di tingz weh wahn Nazarait mi fi du mi ga speshal meenin wen ih kohn tu wership Jehoava. Jos laik wahn hai prees, wahn Nazarait mi ga wahn hoali asainment. Soh dehn neva fi toch wahn ded badi eevn if da mi fahn wan a dehn kloas famili memba. Bikaaz di hai prees ahn di ada prees dehn mi ga wahn seeryos rispansabiliti, dehn neva fi jrink eni kaina wain er lika weh wuda mek dehn geh jronk weneva dehn mi di du dehn hoali asainment tu Jehoava.—Le 10:8-11; 21:10, 11.
Pahn tap a dat, wahn Nazarait, (Hee., na·zirʹ) mi fi “proov dat ih hoali wen ih lef ih hyaa fi groa.” Dis mi aalso mek it eeziya fi mek adaz rekonaiz ih hoali pozishan. (Nu 6:5) Dehn mi yooz di saym Heebroo werd na·zirʹ fi rifaa tu di “vain weh dehn mi lef fi groa” pahn di hoali Sabat joorin di Joobilee yaa dehn. (Le 25:5, 11) Wahn nada inchrestin fak da dat di goal playt fi di hed-rap weh mi deh pahn di front a di hai prees hed mi gat aan di werdz “Hoalinis bilangz tu Jehoava,” ahn dehn mi kaal dis di “hoali sain a dedikayshan [Hee., neʹzer, kohn fahn di saym mayn werd az na·zirʹ].” (Ex 39:30, 31) Dehn mi aalso kaal di krong weh di king dehn yoostu wayr wahn neʹzer. (2Sa 1:10; 2Ki 11:12; si KRONG; DEDIKAYSHAN.) Di apasl seh dat eena di Kristyan kangrigayshan, Gaad mi alow wahn uman fi ga lang hyaa insteda mek ih wayr wahn hed kovarin. Dis mi rimain shee dat ih ga wahn difrent pozishan fahn wahn man, an ih haftu memba dat shee haftu bee wilin fi deh anda dehn atariti sayka Gaad Laa. Soh di Nazarait dehn neva fi kot dehn hyaa (dis neva nachral fi wahn man), ahn dehn mi fi stay weh fahn eni kaina wain er lika bikaaz dehn mi need fi bee kleen ahn hoali. Dis mi shoa dat dehn mi dedikayt dehn laif tu Jehoava, dat dehn neva wahn du tingz fi pleez dehnself ahn dat dehn mi wahn serv Jehoava wid dehn hoal haat.—1Ko 11:2-16; si HYAA; HED KOVARIN; NAYCHA.
Spirichwal Chrezhaz
w05 1/15 30 ¶2
Kweschanz Weh Peepl Aks
Samson da-mi wahn difrent kaina Nazarait. Bifoa Samson mi baan, Jehoava aynjel mi tel ih ma: “Luk! yu wahn geh pregnant ahn fi shoar yu wahn ga wahn son. Yu noh fi kot ih hyaa, bikaaz az ih baan hihn wahn bee wahn Nazarait a Gaad; ahn hihn wahn bee di wan fi tek di leed ahn sayv Izrel fahn owta di han a di Filisteen dehn.” (Judges 13:5) Samson neva mek wahn vow fi bee wahn Nazarait. Jehoava mi apoint ahn az wahn Nazarait ahn hihn mi wahn bee wahn Nazarait fi ih hoal laif. Di laa weh mi seh dat wahn Nazarait neva fi toch wahn ded badi neva aplai tu Samson. If hihn mi toch wahn ded badi bai aksident, hihn mi wahn kyaahn staat ih laif oava az wahn Nazarait, bikaaz hihn da-mi wahn Nazarait fan ih baan. Soh ih klyaa fi si dat wahn persn weh mi valantyaa fi bee wahn Nazarait difrent fahn wahn persn weh Jehoava mi apoint fi bee wahn Nazarait.